Genesis 16
16
Si Hagar kag si Ismael
1Karon si Sarai nga asawa ni Abram wala makapamata sa kay Abram. Pero si Sarai may ulipon nga babayi nga Ehiptohanon nga ginhingalanan kay Hagar. 2Gani si Sarai nagsiling kay Abram, “Tan-awa bala, ang Ginoo wala maghatag sa akon sing mga kabataan. Ngaa indi ka na lang maghulid sa akon ulipon? Ayhan makabata sia para sa akon.” Si Abram nagpasugot sa ginsiling ni Sarai. 3Gani ginhatag ni Sarai si Hagar kay Abram subong nga asawa. Natabo ini sa tapos nakaestar si Abram sa Canaan sing napulo ka tuig. 4Sang nakahulid si Abram kay Hagar, nagbusong sia. Sang mahibaluan ni Hagar nga nagabusong na sia, nanginbugalon sia kag gintamay niya si Sarai.
5Dayon si Sarai nagsiling kay Abram, “Imo gid ini sala nga ginatamay ako ni Hagar.#16:5 Imo gid ini sala…Hagar: ukonKabay nga mag-antos ka tungod sining malain nga ginhimo batok sa akon. Ako pa gani ang naghatag sa iya sa imo, pero halin sang pagkahibalo niya nga nagabusong na sia ginatamay na niya ako. Kabay nga hukman kita sang Ginoo kon sin-o ang husto sa aton!”
6Si Abram nagsabat, “Ti, ulipon mo man sia gihapon kag sa idalom sia sang imo gahom. Himua ang luyag mo sa iya.” Dayon ginpintasan ni Sarai si Hagar, kag naglayas sia.
7Ang anghel sang Ginoo nagsugata kay Hagar sang didto sia sa tuboran sa desierto, sa dalanon pa Sur, 8kag nagsiling sa iya, “Hagar, ulipon ni Sarai, diin ka maghalin kag diin ka makadto?”
Nagsabat sia, “Nagapalagyo ako sa akon ama.”
9Nagsiling ang anghel, “Magbalik ka sa iya kag magpadayon nga ulipon niya.” 10Kag nagsiling pa gid sia, “Hatagan ko ikaw sing madamo nga mga kaliwat nga indi sarang maisip. 11Magaanak ka sing isa ka lalaki, kag pagahingalanan mo sia kay Ismael,#16:11 ISMAEL: Ini nga ngalan sa Hebreo nagakahulogan “ang Dios nagapamati.” tungod kay ginpamatian sang Ginoo ang imo pagpanawag sa imo pag-antos. 12Pero ang imo anak magakabuhi kasubong sang isa ka talunon nga asno. Manginbatok sia sa tanan, kag ang tanan manginbatok sa iya. Magapalayo sia sa iya mga kaparientehan.”
13Si Hagar nagpamangkot sa iya kaugalingon, “Nakita ko gid bala ang Dios kag wala man ako mapatay?” Gani gintawag niya ang Ginoo nga nagpakighambal sa iya, “Ang Dios nga Nagatan-aw.” 14Amo ina nga ang mga tawo nagtawag sang bubon sa tunga sang Kades kag Bered nga “Bubon sang Isa nga Nagakabuhi nga Nagatan-aw sa Akon.”
15Si#Gal. 4:22. Hagar nagbata sing lalaki kay Abram kag ginhingalanan ni Abram ang bata kay Ismael. 16Sa sadto nga tion si Abram otsentay sais na ka tuig.
Currently Selected:
Genesis 16: MBBHIL12
Highlight
Share
Copy
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
