Genesis 17
17
Ang Pagtuli, Tanda sang Kasugtanan
1Sang si Abram nagaedad na sing nobentay nwebe ka tuig, ang Ginoo nagpakita sa iya kag nagsiling, “Ako ang Dios nga Makagagahom. Magtuman ka sa akon kag himua sa gihapon ang matarong. 2Magahimo ako sing kasugtanan sa imo kag hatagan ko ikaw sing madamo nga mga kaliwat.” 3Dayon si Abram naghapa sa duta kag ang Dios nagsiling sa iya, 4“Amo ini ang aton kasugtanan nga akon ginahimo sa imo: Nagasaad ako nga mangin-amay ka sang madamo nga mga pungsod. 5Ang#Rom. 4:17. imo ngalan indi na Abram, kundi Abraham#17:5 ABRAHAM: Ini nga ngalan pareho sang Hebreo nga pulong nga kon sayuron “amay sang madamo nga mga pungsod.” tungod kay ginahimo ko ikaw nga amay sang madamo nga mga pungsod. 6Hatagan ko ikaw sing madamo nga mga kaliwat kag ang iban sa ila manginhari. Magadamo gid ang imo nga mga kaliwat kag mahimo sila nga mga pungsod.
7“Pagatumanon#Luc. 1:55. ko ang akon saad sa imo kag sa imo nga mga kaliwat sa palaabuton nga mga kaliwatan subong isa ka walay katapusan nga kasugtanan. Ako mangin-imo Dios kag Dios sang imo mga kaliwat. 8Ihatag#Bin. 7:5. ko sa imo kag sa imo mga kaliwat ini nga duta sa diin isa ikaw subong ka dumoluong. Ang bug-os nga duta sang Canaan mangin-ila sang imo mga kaliwatan sa walay katubtoban, kag ako mangin-ila Dios.”
9Ang Dios nagsiling kay Abraham, “Ikaw dapat man magsugot sa pagtuman sang aton kasugtanan, ikaw kag ang imo mga kaliwat sa palaabuton nga mga kaliwatan. 10Ikaw#Bin. 7:8; Rom. 4:11. kag ang imo mga kaliwat dapat magsugot sini: ang tagsa ka lalaki sa inyo dapat magpatuli. 11-12Sugod karon dapat ninyo tulion ang tagsa ninyo ka bata nga lalaki sa ikawalo nga adlaw halin sa iya pagkatawo, lakip ang mga ulipon nga natawo sa inyo balay kag ang ginpamakal ninyo nga mga ulipon sa mga dumoluong. Ini magapakita nga may kasugtanan kita. 13Ang tagsa sa inyo dapat tulion, kag ini mangintanda sa inyo mga lawas sa pagpakita nga ang akon kasugtanan sa inyo wala sing katapusan. 14Ang lalaki nga wala matuli indi na manginbahin sang akon mga tawo, tungod kay wala niya matuman ang kasugtanan niya sa akon.”
15Ang Dios nagsiling kay Abraham, “Indi mo na pagtawgon ang imo asawa kay Sarai, kundi sugod subong si Sara#17:15 SARA: Ini nga ngalan sa Hebreo nagakahulogan “prinsesa.” na ang iya ngalan. 16Bendisyunan ko sia kag hatagan ko ikaw sing anak nga lalaki paagi sa iya. Bendisyunan ko sia kag mangin-iloy sia sang madamo nga mga pungsod, kag ang iban niya nga mga kaliwat manginhari.”
17Si Abraham naghapa sa duta pero nagkadlaw sia sang nagpanghunahuna sia sini, “Makapabata pa bala ang lalaki nga nagaedad sing 100 ka tuig? Makabata pa bala si Sara nga nagaedad na sing nobenta ka tuig?” 18Nagpamangkot sia sa Dios, “Ngaa indi mo na lang himuon si Ismael nga akon manunubli?”
19Pero ang Dios nagsiling, “Indi mahimo! Ang imo asawa nga si Sara magaanak sing isa ka bata nga lalaki kag pagahingalanan mo sia kay Isaac.#17:19 ISAAC: Ini nga ngalan sa Hebreo nagakahulogan “nagakadlaw sia.” Pagatumanon ko ang akon kasugtanan sa iya kag sa iya mga kaliwat, kag ini nga kasugtanan wala sing katapusan. 20Nabatian ko ang imo pangabay nahanungod kay Ismael, gani bendisyunan ko sia kag hatagan sing madamo nga mga kaanakan kag madamo nga mga kaliwat. Mangin-amay sia sang dose ka mga prinsipe kag himuon ko nga daku nga pungsod ang iya mga kaliwat. 21Pero tumanon ko ang akon kasugtanan sa imo anak nga si Isaac, nga ibun-ag ni Sara sa mga amo man sini nga tion sa madason nga tuig.” 22Sa tapos makahambal ang Dios kay Abraham, ginbayaan niya sia.
23Sa sadto gid nga adlaw, gintuli ni Abraham ang iya anak nga si Ismael kag ang tanan niya nga mga ulipon, ang mga natawo sa iya balay kag ang mga ginpamakal niya, ang tanan nga mga lalaki sa iya balay, suno sa ginsugo sa iya sang Dios. 24Si Abraham nagaedad sing nobentay nwebe ka tuig sang pagtuli sa iya, 25kag ang iya anak nga si Ismael nagaedad sing trese ka tuig. 26Sila nga duha gintuli sa amo man nga adlaw, 27upod sa tanan nga mga ulipon ni Abraham.
Currently Selected:
Genesis 17: MBBHIL12
Highlight
Share
Copy
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
