Genesis 18
18
Ang Isa ka Anak nga Lalaki Ginsaad kay Abraham
1Ang Ginoo nagpakita kay Abraham sa balaan nga mga kahoy ni Mamre. Si Abraham nagapungko sa pwertahan sang iya tolda sang udtong adlaw kag 2sang#Heb. 13:2. magtungkaaw sia, nakita niya ang tatlo ka mga tawo nga nagatindog didto. Sang pagkakita niya sa ila, nagdalagan sia sa pagsugata sa ila. Naghapa sia sa duta 3kag nagsiling, “Mga Sir, kon mahimo indi pagligari ang akon balay kundi maghapit gid kamo. 4Makuha anay ako sing tubig agod makapanghinaw kamo sang inyo mga tiil. Pahuway kamo anay diri sa idalom sining kahoy. 5Makuha man ako sing sarang ninyo makaon. Makahatag ini sa inyo sing kusog sa pagpadayon sang inyo pagpanglakaton. Ginapasidunggan ninyo ako paagi sa pagkadto sa akon balay, gani yari ako sa pag-alagad sa inyo.”
Nagsabat sila, “Sigi, salamat gid.”
6Si Abraham nagdalidali sa pagsulod sa tolda kag nagsiling kay Sara, “Dalidali ka kag magkuha sing isa ka sako sang imo labing maayo nga harina, kag magluto sing tinapay.” 7Dayon nagdalagan sia pakadto sa iya mga baka kag nagpili sia sing isa ka tinday nga matambok kag ginhatag ini sa ulipon nga nagdalidali sa pag-aman sini. 8Nagkuha sia sing keso, gatas, karne, kag ginbutang ini sa atubang sang mga tawo. Didto sa idalom sang kahoy ginserbihan niya sila kag nagkaon sila.
9Dayon nagpamangkot sila sa iya, “Diin ang imo asawa nga si Sara?”
Nagsabat sia, “Yara sia sa sulod sang tolda.”
10Ang#Rom. 9:9. isa sa ila nagsiling, “Sa tapos sang siyam ka bulan#18:10 Sa tapos sang siyam ka bulan: ukonSa amo man nga tion sa masunod nga tuig. magabalik ako kag ang imo asawa nga si Sara magaanak sing lalaki.”
Si Sara nagapamati didto sa pwertahan sang tolda sa likod nayon ni Abraham. 11Si Abraham kag si Sara tigulang na gid kaayo, kag nag-untat na ang iya pamulanon. 12Gani#1 Ped. 3:6. si Sara nagkadlaw sa iya kaugalingon kag nagsiling, “Karon nga tama na ako ka tigulang, magakalipay pa bala ako sa pagpakighirop sa akon bana? Wala labot sini, ang akon bana tigulang naman.”
13Dayon ang Ginoo nagpamangkot kay Abraham, “Ngaa nagkadlaw si Sara kag nagsiling, ‘Makabata pa bala ako nga tigulang na ako?’ 14May#Luc. 1:37. butang bala nga tama kabudlay para sa Ginoo? Suno sa ginsiling ko, sa tapos sang siyam ka bulan sugod karon magabalik ako sa imo kag si Sara magaanak sing lalaki.”
15Tungod kay nahadlok si Sara, ginpanghiwala niya ini nga nagasiling, “Wala ako magkadlaw.”
Ang Ginoo nagsabat, “Nagkadlaw ka gid!”
Si Abraham Nagpakitluoy para sa Sodoma
16Dayon ang mga tawo naglakat kag nagkadto sa isa ka lugar sa diin makita nila ang Sodoma, kag si Abraham nagdul-ong sa ila. 17Ang Ginoo nagsiling sa iya kaugalingon, “Indi ko pagtaguon kay Abraham ang akon pagahimuon. 18Ang iya mga kaliwat mangindaku kag gamhanan nga pungsod, kag ang tanan nga mga pungsod sa duta magapangayo nga bendisyunan ko sila subong sang akon pagbendisyon sa iya.#18:18 ang tanan nga…sa iya: ukonpaagi sa iya pagabendisyunan ko ang tanan nga mga pungsod. 19Ginpili ko sia agod iya sugoon ang iya mga anak kag mga kaliwat sa pagtuman sa akon kag sa paghimo sang husto kag matarong. Kon ila ini himuon, dayon pagatumanon ko ang tanan nga akon ginsaad sa iya.”
20Dayon ang Ginoo nagsiling kay Abraham, “Tama gid ang mga panumbongon batok sa Sodoma kag sa Gomorra, kag ang ila sala sobra na gid. 21Kinahanglan kadtuan ko kag tan-awon kon ang mga panumbongon batok sa ila matuod ukon indi.”
22Dayon ang duha ka mga tawo naglakat pakadto sa Sodoma, pero ang Ginoo nagpabilin upod kay Abraham. 23Si Abraham nagpalapit sa Ginoo kag nagpamangkot, “Pagalaglagon mo gid bala ang mga matarong upod sa mga malaut? 24Kon may yara nga singkwenta ka matarong nga mga tawo sa siudad, pagalaglagon mo bala ang bilog nga siudad? Indi mo bala pag-ipaiway ang kalaglagan agod maluwas ang singkwenta? 25Pat-ud gid nga indi mo pagpatyon ang mga matarong upod sa mga malaut. Indi ina mahimo! Indi mo ina paghimuon. Kay kon himuon mo ina, ang matarong pagasilutan upod sa mga malaut. Indi ina mahimo. Ang Hukom sang bug-os nga kalibutan dapat maghukom sing matarong.”
26Ang Ginoo nagsabat, “Kon makakita ako sing singkwenta ka matarong nga mga tawo sa Sodoma, indi ko paglaglagon ang bug-os nga siudad tungod sa ila.”
27Si Abraham naghambal liwat: “Kon mahimo, O Ginoo, patawara ako sang akon kaisog sa pagpadayon sa pagpakighambal sa imo. Tawo lamang ako, kag wala ako sang kinamatarong sa paghambal sang bisan ano. 28Pero abi may kwarentay singko lamang ka matarong nga mga tawo. Laglagon mo bala ang bug-os nga siudad tungod kay kulang sing lima?”
Ang Ginoo nagsabat, “Indi ko paglaglagon ang siudad kon may makita ako nga kwarentay singko ka matarong nga mga tawo.”
29Si Abraham naghambal liwat: “Abi may kwarenta lang.”
Nagsabat sia, “Indi ko paglaglagon ang siudad kon may yara nga kwarenta.”
30Si Abraham nagsiling, “Kon mahimo, indi ka lang magkaakig sa akon, O Ginoo, kay indi ko mapunggan ang paghambal liwat. Ti, abi kon may traynta lang?”
Nagsabat sia, “Indi ko paglaglagon ini kon may makita ako nga traynta.”
31Si Abraham nagsiling, “Ginoo, kon mahimo, patawara ako sa akon kaisog sa pagpadayon sa pagpakighambal sa imo. Abi kon may baynte lang?”
Nagsabat sia, “Indi ko paglaglagon ang siudad kon may makita ako nga baynte.”
32Si Abraham nagsiling, “Abaw, Ginoo, indi ka magkaakig, kag magahambal ako sing kaisa na lang. Abi kon may napulo lang?”
Nagsiling sia, “Indi ko paglaglagon ini kon may yara nga napulo.” 33Sa tapos ang Ginoo makapakighambal kay Abraham naglakat sia, kag si Abraham nagpauli.
Currently Selected:
Genesis 18: MBBHIL12
Highlight
Share
Copy
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
