Genesis 19
19
Ang Pagkamakasasala sang Sodoma
1Sang mag-abot ang duha ka mga anghel sa Sodoma sadto nga kasisidmon, si Lot nagapungko sa pwerta sang siudad. Sang pagkakita ni Lot sa ila, nagtindog sia sa pagsugata sa ila. Nagluhod sia sa atubang nila nga nagaduko sang iya ulo, 2kag magsiling, “Mga Sir, ano ang maalagad ko sa inyo? Kon mahimo sulod kamo anay sa akon balay. Pwede kamo makapanghinaw sang inyo mga tiil kag makatulog diri karon nga gab-i. Buas, aga pa kamo magbugtaw kag magpadayon sang inyo pagpanglakaton.”
Pero nagsabat sila, “Indi na lang, kay diri na lang kami matulog sa plasa karon nga gab-i.”
3Ginpilit gid niya sila, kag sang ulihi nag-upod sila sa iya balay. Si Lot nagsugo sa iya mga suloguon nga magluto sing tinapay nga wala sing lebadora kag mag-aman sing manamit nga mga pagkaon. Sang handa na ini nagpanihapon sila.
4Sang wala pa magtulog ang mga bisita, ginlibutan sang mga lalaki nga taga-Sodoma ang balay. Ang tanan nga mga lalaki sang siudad, mga tigulang kag mga pamatan-on, yadto didto. 5Gintawag#Huk. 19:22-24. nila si Lot kag ginpamangkot, “Diin na ang mga lalaki nga nag-abot sa pagdayon sa imo karon nga gab-i? Pagwaa sila diri sa amon kay luyag kami magpakighilawas sa ila.”
6Si Lot naggwa kag ginsirhan niya ang pwertahan. 7Ginsingganan niya sila, “Mga abyan, nagapakitluoy ako sa inyo nga indi ninyo paghimuon ining malaut nga butang! 8Yari, may duha ako ka mga anak nga babayi nga birhen pa. Ihatag ko sila sa inyo kag himua ninyo ang luyag ninyo sa ila. Pero indi ninyo pag-anha ining mga tawo, kay mga bisita ko sila, kag dapat ko sila apinan.”
9Pero nagsiling sila, “Indi kami pagbalabagi, ikaw nga dumoluong! Sin-o ka nga magtudlo sa amon? Halin dira, karon patilawon ka namon sing mas sobra pa sang sa ila.” Gintikwang nila si Lot, kag nagsaka sila sa pagbungkal sang pwertahan. 10Pero gindawhat sang duha ka tawo si Lot kag ginbutong pasulod sa balay kag ginsirahan nila ang pwertahan. 11Dayon#2 Hari 6:18. ginbulag nila ang tanan nga mga tawo sa gwa, gani indi na sila makatultol kon diin ang pwertahan.
Si Lot Nagbiya sang Sodoma
12Ang duha ka mga tawo nagsiling kay Lot, “Kon may iban ka pa diri nga mga anak nga lalaki, mga anak nga babayi, mga umagad nga lalaki ukon iban pa nga mga pariente sa sini nga siudad, pahalina sila diri, 13tungod kay pagalaglagon namon ini nga lugar. Ginpamatian sang Ginoo ang tama nga mga panumbongon batok sa sining mga tawo, kag ginpadala niya kami sa paglaglag sang Sodoma.”
14Dayon ginkadtuan ni Lot ang mga lalaki nga mangin-umagad niya kag ginsingganan, “Magdalidali kamo kag maghalin diri, kay pagalaglagon sang Ginoo ini nga lugar.” Pero ang hunahuna nila nga nagalahog lang sia.
15Sang kaagahon, ang mga anghel nagtinguha sa pagpadali kay Lot sa paggwa. Nagsiling sila, “Dalidali ka! Dalha ang imo asawa kag ang imo duha ka mga bata nga babayi kag maghalin diri, agod nga indi kamo mapatay kon laglagon ang siudad.” 16Daw#2 Ped. 2:7. indi pa kuntani maglakat si Lot, pero ang Ginoo naluoy sa iya. Gani, sia, ang iya asawa kag ang iya duha ka mga anak nga babayi halos guyoron sang duha ka mga lalaki kag ginpagwa nila sila sa siudad. 17Sang napagwa na nila sila sa siudad, ang isa sang mga anghel nagsiling, “Dalagan kamo! Indi kamo magbulobalikid kag indi magdulog sa patag. Magdalagan kamo didto sa mga bakulod, agod indi kamo mapatay.”
18Pero si Lot nagsabat, “Sir, indi mahimo ina. 19Daku gid ang imo nahimo sa akon kag ginluwas mo ang akon kabuhi. Pero ang mga bakulod tama kalayo kag malambot pa ako sang kalaglagan kag mapatay ako sa wala pa ako makaabot didto. 20Nakita mo bala inang diutay nga banwa? Malapit ina nga lambuton ko. Papalagyuha ako didto. Makita mo nga diutay ina nga lugar, kag indi ako maano didto.”
21Nagsabat sia, “Sigi, indi ko paglaglagon ina nga banwa. 22Hala, dalagan na! Wala ako sing may mahimo tubtob makalambot ikaw didto.”
Tungod kay gintawag ni Lot ang banwa nga diutay, ginhingalanan ini nga Zoar.#19:22 ZOAR: Ini nga ngalan pareho sang Hebreo nga pulong nga kon sayuron “diutay.”
Ang Paglaglag sang Sodoma kag Gomorra
23Nagabutlak gid ang adlaw sang pag-abot ni Lot sa Zoar. 24Sa#Mat. 10:15; 11:23-24; Luc. 10:12; 17:29; 2 Ped. 2:6; Jud. 7. hinali ginpaulan sang Ginoo ang nagadabdab nga asupre sa Sodoma kag Gomorra, 25kag ginlaglag sang Ginoo ini nga mga siudad kag ang bug-os nga patag, upod ang mga tawo didto, kag ang tanan nga nagatubo sa sadto nga duta. 26Pero#Klm. Sol. 10:7; Luc. 17:32. ang asawa ni Lot nagbalikid, kag nahimo sia nga haligi nga asin.
27Aga pa gid sang madason nga adlaw si Abraham nagdalidali sa pagkadto sa lugar diin sia nagtindog sa atubang sang Ginoo. 28Ginlantaw niya ang Sodoma kag Gomorra, kag ang bug-os nga kapatagan, kag nakita niya ang aso nga nagatub-ok halin sa duta, subong sang aso nga nagahalin sa isa ka daku nga hornohan. 29Pero sang paglaglag sang Dios sang mga siudad sang kapatagan sa diin si Lot nag-estar, gindumdom niya si Abraham kag ginpapalagyo niya si Lot agod indi sia maano.
Ang Ginhalinan sang Moabnon kag Amonhon
30Tungod kay si Lot nahadlok magtener sa Zoar, nagsaylo sia sa mga bakulod upod ang duha niya ka mga anak nga babayi. Didto sila nag-estar sa isa ka kweba. 31Ang magulang nagsiling sa manghod, “Si tatay nagatigulang na, kag wala na sing lalaki nga nabilin sa bug-os nga kalibutan#19:31 bug-os nga kalibutan: ukonsini nga duta. nga aton mapamana agod makapamata kita. 32Dali, hugbon ta sia kag magpakighilawas sa iya agod nga makapamata kita paagi sa iya.” 33Sadto nga gab-i ginpainom nila sia sing bino. Ang magulang nagpakighilawas sa iya amay, pero ang amay tama kahubog kag wala sia makahibalo sini.
34Sang madason nga adlaw nagsiling ang magulang sa manghod, “Nagpakighilawas ako kay tatay kagab-i, karon sa gab-i hugbon ta naman sia liwat kag ikaw naman ang magpakighilawas sa iya. Dayon makapamata kita paagi sa aton amay.” 35Gani ginhubog nila sia sadto nga gab-i, kag ang manghod nagpakighilawas sa iya. Tama naman sia kahubog kag wala sia makahibalo sini. 36Sa sini nga paagi ang duha ka bata nga babayi ni Lot nagbusong paagi sa ila amay. 37Ang magulang nagbata sing lalaki kag ginhingalanan niya ini kay Moab.#19:37 MOAB: Ini nga ngalan pareho sang Hebreo nga pulong nga kon sayuron “halin sa akon amay.” Sia ang ginhalinan sang mga Moabnon karon. 38Ang manghod nagbata man sing lalaki kag ginhingalanan niya ini kay Benami.#19:38 BENAMI: Ini nga ngalan sa Hebreo nagakahulogananak nga lalaki sang akon pariente kag pareho sang Hebreo nga pulong para sa Amonhon. Sia ang ginhalinan sang mga Amonhon tubtob sa sini nga adlaw.
Currently Selected:
Genesis 19: MBBHIL12
Highlight
Share
Copy
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
