Genesis 25
25
Ang Iban nga mga Kaliwat ni Abraham
(1 Cron. 1:32-33)
1Si Abraham nagpangasawa liwat kag ang ngalan sang iya asawa amo si Ketura. 2Ang iya mga anak kay Abraham amo sanday Zimram, Jocsan, Medan, Midian, Isbac, kag Sua. 3Si Jocsan amo ang amay ni Seba kag ni Dedan, kag ang mga kaliwat ni Dedan amo ang mga Asurim, Letusim kag Leumim. 4Ang mga anak ni Midian amo sanday Efa, Efer, Hanoc, Abida, kag Eldaa. Ini sila tanan mga kaliwat ni Ketura.
5Ginbilin ni Abraham ang tanan niya nga pagkabutang kay Isaac. 6Pero sang wala pa sia mapatay ginhatagan niya sing mga regalo ang iban niya nga mga anak nga lalaki sa iban niya nga mga asawa, kag ginpalakat sila sa duta sa Sidlangan, palayo sa iya anak nga si Isaac.
Ang Pagkapatay kag ang Paglubong kay Abraham
7-8Si Abraham nagkabuhi sing 175 ka tuig kag napatay sia nga tigulang na kaayo. 9Ginlubong sia sang iya mga anak nga lalaki nga si Isaac kag si Ismael sa kweba sang Macpela, sa duta nga iya anay ni Efron, ang anak ni Zohar nga Hethanon, sa sidlangan sang Mamre. 10Amo#Gen. 23:3-16. ini ang duta nga ginbakal ni Abraham sa mga Hethanon. Si Abraham kag si Sara nga iya asawa ginlubong didto. 11Sang patay na si Abraham, ginbendisyunan sang Dios si Isaac nga iya anak nga nag-estar sa tupad sang “Bubon sang Nagakabuhi nga Nagatan-aw sa Akon.”
Ang mga Kaliwat ni Ismael
(1 Cron. 1:28-31)
12Amo ini ang mga kaliwat ni Ismael nga anak ni Abraham sa kay Hagar, ang ulipon nga Ehiptohanon ni Sara. 13Amo ini ang mga ngalan sang mga anak nga lalaki ni Ismael halin sa magulang pakadto sa manghod. Ang kamagulangan nga anak ni Ismael amo si Nebayot. Ang madason amo sanday Kedar, Adbeel, Mibsam, 14Misma, Duma, Masa, 15Hadad, Tema, Jetur, Nafis, kag Kedema. 16Amo ini ang mga kaliwat nga lalaki ni Ismael, dose ka mga katigulangan sang mga tribo, kag ang mga barangay kag mga kampo nga ila gin-estaran ginhingalanan sa ila mga ngalan. 17Si Ismael nagaedad sing 137 ka tuig sang pagkapatay niya kag ginlubong sia sa lulobngan sang iya mga pariente. 18Ang mga kaliwat ni Ismael nag-estar sa duta sa gintung-an sang Havila kag Sur, sa sidlangan sang Ehipto, sa alagyan pakadto sa Asiria. Nagpain sila sa iban nga mga kaliwat ni Abraham.
Ang Pagkatawo ni Esau kag ni Jacob
19Amo ini ang maragtas ni Isaac nga anak nga lalaki ni Abraham. 20Si Isaac nagaedad sing kwarenta ka tuig sang pagpangasawa niya kay Rebeca nga bata ni Betuel nga Aramnon sang Mesopotamia, kag utod ni Laban. 21Tungod kay si Rebeca wala sing kabataan, nagpangamuyo si Isaac sa Ginoo para sa iya. Ang Ginoo nagsabat sang iya pangamuyo, kag si Rebeca nagbusong. 22Kapid ang iya ginabusong kag nagadis-uganay sila sa iya tiyan. Nagsiling sia, “Ngaa matabo sa akon ang kaangay sini?” Gani nagpangamuyo sia sa Ginoo sa pagpangayo sang sabat.
23Ang#Rom. 9:12.Ginoo nagsiling sa iya:
“Duha ka mga pungsod ang yara sa imo tiyan.
Magabata ka sang kapid nga magatubo kag mangin-amay sang duha ka mga pungsod nga wala nagaayuhay;
ang isa mas makusog sang sa isa,
kag ang magulang mangin-ulipon sang manghod.”
24Ang tion sang iya inugbata nag-abot kag nagbata sia sing kapid. 25Ang nahauna nga bata nga lalaki nga natawo mapulapula, kag ang iya panit pareho sang panapton nga bulbolon, gani ginhingalanan nila sia kay Esau.#25:25 ESAU: Ini nga ngalan napatuhoy sa Seir, ang lugar nga gin-estaran sang mga kaliwat ni Esau; ang Seir pareho sang Hebreo nga pulong nga kon sayuron bulbolon. 26Sang matawo ang iya utod nga lalaki, ang iya sini kamot nagauyat sing hugot sa tikod ni Esau, gani ginhingalanan sia kay Jacob.#25:26 JACOB: Ini nga ngalan pareho sang Hebreo nga pulong nga kon sayuron tikod ukon pagdaya. Sang pagkatawo nila si Isaac nagaedad sing sesenta ka tuig.
Ginbaligya ni Esau ang Iya Kinamatarong subong nga Panganay
27Ang duha ka mga bata nagdaku, kag si Esau nanginsampaton nga mangangayam, kag pirme lang sa latagon, pero si Jacob mahipos kag pirme lang sa balay. 28Si Isaac nagpasulabi kay Esau tungod kay naluyag sia magkaon sang iya sini pinangayaman, pero si Rebeca iya nagpasulabi kay Jacob.
29Isa ka adlaw sang si Jacob nagalaga sing balatong, si Esau nag-abot halin sa iya pagpangayam. Nagutom gid sia, 30gani nagsiling sia kay Jacob, “Daw mapatay na ako sa kagutom. Pakauna ako sinang mapula nga linaga.” Amo ina ang kabangdanan nga ginhingalanan sia kay Edom.#25:30 EDOM: Ini nga ngalan pareho sang Hebreo nga pulong nga kon sayuron mapula.
31Pero si Jacob nagsabat, “Hatagan ko ikaw sini, kon ihatag mo sa akon ang imo mga kinamatarong subong nga panganay.”
32Si Esau nagsiling, “Sigi, total daw mapatay na ako. Ano ang pulos sining mga kinamatarong ko sa akon?”
33Si#Heb. 12:16. Jacob nagsabat, “Magsumpa ka anay nga ihatag mo ang imo mga kinamatarong sa akon.”
Si Esau nagsumpa, kag ginhatag niya kay Jacob ang iya mga kinamatarong subong panganay. 34Dayon ginhatagan ni Jacob si Esau sing tinapay kag linaga nga balatong. Nagkaon sia, nag-inom, nagtindog kag naglakat. Amo lang yadto ang pagkabig niya sang iya mga kinamatarong subong panganay.
Currently Selected:
Genesis 25: MBBHIL12
Highlight
Share
Copy
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
