Genesis 26
26
Si Isaac Nag-estar sa Gerar
1Karon may gutom naman sa duta, wala labot sang gutom sadtong panahon ni Abraham. Si Isaac nagkadto kay Abimelec, ang hari sang mga Filistinhon, sa Gerar. 2Ang Ginoo nagpakita kay Isaac kag nagsiling, “Indi ka magkadto sa Ehipto. Magpabilin ka sa duta nga ginasiling ko sa imo nga imo pagaestaran. 3Diri#Gen. 22:16-18. ka lang anay estar, kag pagaupdan ko ikaw kag pagahatagan sing mga kaayuhan. Ihatag ko sa imo kag sa imo mga kaliwat ini tanan nga mga kadutaan. Tumanon ko ang ginsaad ko sa imo amay nga si Abraham. 4Hatagan ko ikaw sing mga kaliwat nga pareho kadamo sang mga bituon sa langit, kag ihatag ko sa ila ini tanan nga mga kadutaan. Ang tanan nga mga pungsod magapangayo sa akon nga pakamaayuhon ko man sila subong sang akon pagpakamaayo sa imo mga kaliwat. 5Hatagan ko ikaw sing mga kaayuhan tungod kay si Abraham nagtuman sa akon kag naghimo sang tanan ko nga mga sugo kag kasugoan.”
6Gani si Isaac nag-estar sa Gerar. 7Kon#Gen. 12:13; 20:2. pamangkuton sia sang mga tawo sa sina nga lugar nahanungod sang iya asawa, nagasiling sia, “Utod ko sia,” tungod kay nahadlok sia magsiling nga asawa niya sia. Nahadlok sia sa mga tawo didto kay basi patyon nila sia, agod makuha nila si Rebeca nga tama gid katahom. 8Sang nagdugaydugay na si Isaac didto, natabuan nga si Haring Abimelec nakatamwa sa iya bintana kag nakita niya nga nagadaluay si Isaac kag si Rebeca. 9Ginpatawag ni Abimelec si Isaac kag ginsingganan, “Asawa mo gali sia! Ngaa nagsiling ka nga utod mo sia?”
Nagsabat sia, “Naghunahuna ako nga basi patyon ako kon magsiling ako nga asawa ko sia.”
10Si Abimelec nagsiling, “Ano ang ginhimo mo sa amon? Kon abi natabo nga ang isa sang akon mga tinawo nagpakighilawas sa imo asawa, kuntani ikaw ang kabangdanan sang amon pagpakasala.” 11Si Abimelec nagpaandam sa tanan nga mga tawo: “Ang bisan sin-o nga maghimo sing malain sa sini nga tawo ukon sa iya asawa pagapatyon.”
12Si Isaac nagsab-og sa sadto nga duta, kag sadto nga tuig nagpatubas sia sing 100 ka pilo sang sa iya ginsab-og, tungod kay ang Ginoo nagpakamaayo sa iya. 13Nagpadayon sia sa pag-uswag, kag nagmanggaranon gid sia. 14Ang mga Filistinhon nahisa sa iya, tungod kay madamo ang iya mga karnero, mga baka, kag mga ulipon. 15Gani, gintampukan sang mga Filistinhon ang mga bubon nga ginkutkot sang mga ulipon sang iya amay nga si Abraham sang buhi pa sia.
16Dayon si Abimelec nagsiling kay Isaac, “Palayo ka sa amon kay naggamhanan ka pa sang sa amon.” 17Gani si Isaac naghalin kag nagpatindog sang iya mga tolda sa kapatagan sang Gerar, diin sia nag-estar sing madugay. 18Ginpakutkotan naman niya ang mga bubon nga ginkutkot sadto anay sang iya amay nga si Abraham kag gintampukan sang mga Filistinhon sang mapatay na si Abraham. Ginhingalanan ini ni Isaac sang mga ngalan nga ginhingalan sang iya amay.
19Ang mga ulipon ni Isaac nagkutkot sing bubon sa kapatagan kag nakasapo sila sing tuboran. 20Ang mga manugbantay sang mga hayop sa Gerar nagpakigsuay sa mga manugbantay sang mga hayop ni Isaac kag nagsiling sila, “Amon ini tubig.” Gani ginhingalanan ni Isaac ang bubon “Kasuayon.”
21Ang mga ulipon ni Isaac nagkutkot naman sing isa ka bubon, kag nag-inaway naman sila nahanungod sadto nga bubon, gani ginhingalanan niya yadto nga “Kaawayon.” 22Naghalin naman sia gikan didto kag nagpakutkot sing isa naman ka bubon. Wala na sing sinuay nahanungod sadto nga bubon, gani, ginhingalanan niya yadto nga “Kahilwayan.” Nagsiling sia, “Karon ang Ginoo naghatag sa aton sing kahilwayan sa pag-estar sa duta, kag magauswag kita diri.”
23Si Isaac naglakat kag nagkadto sa Beerseba. 24Sadto nga gab-i ang Ginoo nagpakita sa iya kag nagsiling, “Ako ang Dios sang imo amay nga si Abraham. Indi ka magkahadlok kay kaupod nimo ako. Pagapakamaayuhon ko ikaw kag hatagan sing madamo nga mga kaliwat, tungod sang akon saad sa akon alagad nga si Abraham.” 25Si Isaac naghimo sing altar didto kag nagsimba sa Ginoo. Dayon nagpatindog sia sang iya tolda didto, kag ang iya mga ulipon nagkutkot sing isa naman ka bubon.
Ang Kasugtanan ni Isaac kag ni Abimelec
26Si#Gen. 21:22. Abimelec nag-abot halin sa Gerar sa pagpakigkita kay Isaac, upod kay Ahuzat nga iya palamangkutan kag kay Picol nga pangulo sang iya mga soldado. 27Si Isaac nagpamangkot, “Ngaa bala nag-abot ka sa pagpakigkita sa akon nga sang una ginkontra mo ako kag ginpahalin mo gani ako sa imo duta?”
28Nagsabat sila, “Karon nahibaluan namon nga ang Ginoo kaupod nimo, kag naghunahuna kami nga dapat kita maghimo sing kasugtanan nga may panumpa. Luyag namon nga magsaad ka 29nga indi mo kami pag-anhon, subong nga wala kami mag-ano sa imo. Nagmaluloy-on kami sa imo kag ginpalakat namon ikaw nga wala pag-anha. Karon maathag nga ang Ginoo naghatag sa imo sing mga kaayuhan.” 30Si Isaac naghiwat sing sinalosalo para sa ila, kag nagkaon kag nag-inom sila. 31Aga pa gid sang madason nga adlaw ang tagsatagsa sa ila nagsaad nga nagapanumpa. Si Isaac nagpaalam sa ila kag nagbulagay sila subong nga mga abyan.
32Sa sadto nga adlaw ang mga ulipon ni Isaac nag-abot kag nagsugid sa iya nahanungod sang bubon nga ila ginkutkot. Nagsiling sila, “Nakakita kami sing tubig.” 33Ginhingalanan niya ang bubon “Panumpa”. Amo ini ang kabangdanan nga ang siudad ginhingalanan Beerseba.#26:33 BEERSEBA: Tan-awa ang 21:31.
Ang Dumoluong nga mga Asawa ni Esau
34Si Esau nagaedad sing kwarenta ka tuig sang pagpangasawa niya sang duha ka mga babayi nga Hethanon; si Judit nga anak ni Beeri kag si Basemat nga anak ni Elon. 35Ini sila nagtublag sang pangabuhi ni Isaac kag ni Rebeca.
Currently Selected:
Genesis 26: MBBHIL12
Highlight
Share
Copy
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
