Genesis 31
31
Si Jacob Nagpalagyo kay Laban
1Si Jacob nakabati nga ang mga anak nga lalaki ni Laban nagasiling, “Ginkuha ni Jacob ang tanan nga mga pagkabutang sang aton amay. Ang iya tanan nga manggad naghalin sa pagkabutang sang aton amay.” 2Nakita man ni Jacob nga ang pagkabig sa iya ni Laban karon lain na gid sang sa una. 3Dayon ang GINOO nagsiling sa iya, “Magbalik ka sa duta sang imo mga ginikanan kag sa imo mga pariente kag ako manginkaupod mo.”
4Gani ginpatawag ni Jacob si Raquel kag si Lea nga magkadto sila sa latagon sa diin yara ang iya mga panong. 5Nagsiling sia sa ila, “Natalupangdan ko nga ang pagkabig sang inyo amay sa akon lain na gid sang sa una. Pero ang Dios sang akon amay nagaupod sa akon gihapon. 6Kamo nga duha nakahibalo gid nga nagpangabudlay ako para sa inyo amay sa bug-os ko nga kusog. 7Pero gindayaan niya ako, kag kanapulo gid niya gin-ilis-ilisan ang akon suhol. Pero ang Dios wala magtugot nga mahalitan niya ako. 8Kon magsiling gani sia, ‘Ang mga may pintukpintok manginsuhol mo,’ ang tanan nga mga hayop nagbata sing may pintukpintok. Kon magsiling sia, ‘Ang may mga gurayguray manginsuhol mo,’ ang tanan nga mga hayop nagbata sing may mga gurayguray. 9Ang Dios nagkuha sang mga kahayupan sang inyo amay kag ginhatag sila sa akon.
10“Sa tion sang pagpahigal sang mga hayop, nagdamgo ako, kag nakita ko nga ang lalaki nga mga kanding nga nagapangasta may gurayguray, may pintukpintok kag kambang. 11Ang anghel sang Dios nagtawag sa akon paagi sa damgo kag nagsiling, ‘Jacob!’ Nagsabat ako, ‘Yari ako.’ 12Nagsiling sia, ‘Tan-awa, ang tanan nga mga kanding nga lalaki nga nagapangasta may gurayguray, may pintukpintok kag kambang. Ginahimo ko ini tungod kay nakita ko ang tanan nga ginahimo sa imo ni Laban. 13Ako#Gen. 28:18-22. ang Dios nga nagpakita sa imo sa Betel, sa diin ginhibuan mo sing lana sang olivo kag ginhalad ang handumanan nga bato, kag sa diin nagsumpa ka. Karon maghimos ka kag maghalin sa sini nga duta kag magbalik sa imo duta nga natawhan.’”
14Si Raquel kag si Lea nagsabat kay Jacob, “Wala na kami sing may nabilin nga panublion sa amon amay. 15Ginakabig niya kami kasubong sang mga dumoluong. Ginbaligya niya kami, kag karon naubos na niya gasto ang bili namon. 16Ini tanan nga mga manggad nga ginkuha sang Dios sa amon amay amon ina kag ila sang amon mga anak. Karon, himua ang tanan nga ginsiling sa imo sang Dios.”
17-18Gani si Jacob naghimos agod magbalik sa iya amay sa duta sang Canaan. Ginpasakay niya ang iya mga kabataan kag mga asawa sa mga kamelyo, kag ginpauna niya ang iya tanan nga mga hayop sa iya, upod ang tanan nga pagkabutang nga iya natipon sa Mesopotamia. 19Si Laban naglakat sa paggunting sang iya mga karnero, kag sang wala sia, ginkawat ni Raquel ang mga diosdios sa ila balay nga iya ni tatay niya. 20Si Jacob nagdaya kay Laban nga Aramnon paagi sa iya paglakat nga wala magpahibalo kay Laban. 21Gindala ni Jacob ang iya tanan nga mga pagkabutang kag dalidali nga naglakat. Nagtabok sia sa Suba sang Eufrates kag nagpadulong sa kabakuloran sang Galaad.
Ginlagas ni Laban si Jacob
22Sang makaligad ang tatlo ka adlaw ginsugiran si Laban nga si Jacob nagpalagyo. 23Gindala niya ang iya mga tinawo kag ginlagas niya si Jacob sa sulod sang pito ka adlaw tubtob nalambot niya sia sa kabakuloran sang Galaad. 24Sa isa ka damgo sina nga gab-i, ang Dios nagpakita kay Laban nga Aramnon kag nagpaandam sa iya, “Indi mo pagpahugon si Jacob sa bisan ano nga paagi.” 25Nalambot ni Laban si Jacob nga nagdulog kag nagpatindog sang iya tolda sa kabakuloran. Si Laban nagpatindog man sang iya tolda sa kabakuloran sang Galaad upod sang iya mga pariente.
26Si Laban nagsiling kay Jacob, “Ngaa gindayaan mo ako kag gindala mo ang akon mga bata nga babayi pareho sang mga babayi nga nabihag sa inaway? 27Ngaa nga gindayaan mo ako kag naglakat ka nga wala gid magsiling sa akon? Kon ginpahibalo mo ako, kuntani ginpalakat ko ikaw nga may kinasadya kag pagkinanta sa musika sang mga tambor kag mga arpa. 28Wala mo gid ako pagpahaluka sa akon mga apo kag sa akon mga bata nga babayi sang paglakat nila. Daw ano nga binuang ang ginhimo mo! 29Makasarang ako sa paghalit sa imo, pero kagab-i ang Dios sang imo amay nagpaandam sa akon nga nagasiling, ‘Indi mo pagpahugon si Jacob sa bisan ano nga paagi.’ 30Nakahibalo ako nga nahidlaw ka na gid sa panimalay sang imo amay, amo ina nga naglakat ka, pero ngaa ginkawat mo ang akon mga diosdios?”
31Si Jacob nagsabat, “Nahadlok ako, tungod kay naghunahuna ako nga bawion mo sa akon ang imo mga anak. 32Pero kon makita mo sa bisan kay sin-o diri ang imo mga diosdios, pagapatyon sia. Sa atubang sang aton mga tinawo subong mga saksi, pangitaa ang mga butang nga imo kag kuhaa ini.” Si Jacob wala makahibalo nga ginkawat ni Raquel ang mga diosdios ni Laban.
33Si Laban nagkadto sa tolda ni Jacob, sa tolda ni Lea, kag sa tolda sang duha ka suloguon nga babayi, pero wala niya makita ang iya mga diosdios. Dayon nagkadto sia sa tolda ni Raquel. 34Si Raquel nagkuha sang mga diosdios kag ginbutang niya sa siyasiya sang kamelyo kag ginpungkoan ini. Si Laban nag-usisa sang bug-os nga tolda, pero wala gid niya ini makita. 35Si Raquel nagsiling sa iya amay, “Tatay, indi ka lang magkaakig kon indi ako makatindog sa imo atubang, kay yari ang pamulanon ko.” Si Laban nagpangita sang iya mga diosdios, pero wala niya makita ini.
36Dayon si Jacob nanginit kag naghambal nga may kaakig kay Laban, “Ano bala ang akon sala? Ano nga kasugoan ang akon ginlapas nga ginlagas mo ako nga may kaakig? 37Karon nga nausisa mo ang tanan ko nga mga pagkabutang, ano bala nga pagkabutang ang nakita mo nga imo? Ibutang diri sa atubang sang imo kag sang akon mga tinawo kag sila ang pahukma kon sin-o sa aton ang matarong. 38Sa sulod sang baynte ka tuig nga nag-estar ako sa imo, ang imo mga karnero kag mga kanding wala gid mahar-asi kag wala gid ako makaihaw sang imo karnero nga lalaki halin sa imo panong. 39Kon ang isa ka karnero mapatay sang talunon nga mga sapat wala ko ina ginaisip sa imo parti, kundi ginaisip ko ina nga akon parti. Ang ginakawat sa adlaw ukon sa gab-i man ginapabayran mo sa akon. 40Sa madamo nga tion nag-antos ako sang tagiti sang init kon adlaw kag sang katugnaw kon gab-i kag wala ako matulogi. 41Amo ini ang inagihan ko sa sulod sang baynte ka tuig sang akon pag-estar sa imo. Nagpangalagad ako sa imo sa sulod sang katorse ka tuig para sa duha mo ka mga anak nga babayi kag nag-alagad ako sing anom pa ka tuig para sa imo mga panong kag kapulo mo liwatliwaton ang akon suhol. 42Kon ang Dios sang akon mga ginikanan, ang Dios ni Abraham, ang Dios nga ginsimba ni Isaac wala mag-upod sa akon, kuntani ginpalakat mo na ako nga wala gid sing dala. Pero ang Dios nakakita sang akon pagpangabudlay kag pag-antos, kag kagab-i ginsaway niya ikaw.”
Ang Kasugtanan ni Jacob kag ni Laban
43Si Laban nagsabat kay Jacob, “Ini nga mga babayi anak ko, ang ila mga kabataan akon, kag ini nga mga panong akon. Kon sa bagay, ang tanan nga ginatan-aw mo akon. Pero karon, ano ang mahimo ko sa akon mga anak kag sa ila mga kabataan? 44Dali, mahimo kita sing kasugtanan, kag magtumpok kita sang mga bato sa pagpahanumdom sa aton sang aton kasugtanan.”
45Gani si Jacob nagpatindog sang isa ka daku nga bato nga handumanan. 46Ginsugo niya ang iya mga tinawo sa pagtipon sang mga bato kag sa pagtumpok sini. Dayon nagkaon sila sa tupad sang tinumpok nga bato. 47Si Laban naghingalan sini Jegar-sahaduta,#31:47 JEGAR SAHADUTA: Ini nga ngalan sa Aramico nagakahulogan tinumpok nga magapahanumdom sa aton. pero ginhingalanan ini ni Jacob Galeed.#31:47 GALEED: Ini nga ngalan sa Hebreo nagakahulogan tinumpok nga magapahanumdom sa aton. 48Si Laban nagsiling kay Jacob, “Ining tinumpok nga bato magapahanumdom sa aton nga duha.” Amo ini ang kabangdanan kon ngaa ang lugar ginhingalanan Galeed. 49Si Laban nagsiling man, “Kabay nga ang Ginoo magbantay sa aton samtang nagahilayuay kita.” Gani ang lugar ginhingalanan man Mispa.#31:49 MISPA: Ini nga ngalan pareho sang Hebreo nga pulong nga kon sayuron balantayan nga tore. 50Si Laban nagsiling pa gid, “Kon pintasan mo ang akon mga anak nga babayi, ukon magpangasawa ka sang iban nga mga babayi, bisan nga indi ako makahibalo sini, dumdoma nga ang Dios nagatan-aw sa aton. 51Yari ang mga bato nga gintumpok ko sa tunga naton, kag yari ang bato nga handumanan. 52Ining tinumpok nga mga bato kag ining bato nga handumanan amo ang magapahanumdom sa aton. Indi ako maglabang sa sining tinumpok nga mga bato sa paggubat sa imo, kag indi ka maglabang sa sining bato nga handumanan sa paggubat sa akon. 53Ang Dios ni Abraham kag ang Dios ni Nahor#31:53 ABRAHAM…NAHOR: Si Abraham lolo ni Jacob kag si Nahor lolo ni Laban. magahukom sa tunga naton.” Dayon si Jacob naghimo sang panaad sa ngalan sang Dios nga ginsimba sang iya amay nga si Isaac. 54Nag-ihaw sia sing isa ka sapat kag ginhalad niya ini sa bukid, kag gin-agda niya ang iya mga tinawo sa pagkaon. Sa tapos sila makakaon, nagtulog sila didto sa bukid. 55Aga pa gid sang madason nga adlaw, ginhalukan ni Laban ang iya mga apo kag mga anak nga babayi sa pagpaalam sa ila, kag naglakat sia pauli.
Currently Selected:
Genesis 31: MBBHIL12
Highlight
Share
Copy
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
