Genesis 41
41
Si Jose Nagsaysay sang Kahulogan sang mga Damgo sang Hari
1Sang makaligad ang duha ka tuig, nagdamgo ang hari sang Ehipto. Sa iya damgo, nagatindog sia sa pangpang sang Suba sang Nilo, 2sang magtakas halin sa suba ang pito ka matahom kag matambok nga mga baka kag naghalab sang hilamon. 3Dayon may pito na naman ka mga baka nga nagtakas halin sa suba. Maniwang sila kag daw pulos lang tul-an. Nagpalapit sila kag nagtindog sa tupad sang nauna nga mga baka sa pangpang sang suba. 4Dayon ang maniwang nga mga baka nagkaon sang matambok nga mga baka. Kag nagmata ang hari. 5Sang matulogan naman sia, nagdamgo sia liwat. May pito ka mga uhay nga matinggas kag alanyon na nga nag-ulhot sa isa lang ka puno. 6Dayon may pito man ka mga uhay nga huyos nga nag-ulhot nga ginpakigas sang hangin sa desierto. 7Ang huyos nga mga uhay naghalunhon sang pito ka matinggas nga mga uhay. Ang hari nagmata kag natalupangdan niya nga nagdamgo sia. 8Sang#Dan. 2:2. pagkaaga natublag sia, gani, ginpatawag niya ang tanan nga mga madyikero kag mangin-alamon sang Ehipto. Ginsugiran niya sila sang iya mga damgo, pero wala sing isa sa ila nga makasaysay sa iya sang kahulogan sini.
9Dayon ang manugtagay sang bino nagsiling sa hari, “Nadumdoman ko karon nga nakasala ako. 10Naakig ka anay sa akon kag sa pangulo sang manugluto sang tinapay kag ginpabilanggo mo kami sa balay sang kapitan sang gwardya. 11Isa ka gab-i nagdamgo ang kada-isa sa amon kag ang amon mga damgo may nanuhaytuhay nga mga kahulogan. 12May isa didto ka pamatan-on nga Hebreo upod sa amon, isa sia ka alagad sang kapitan sang gwardya. Ginsugiran namon sia sang amon mga damgo kag ginsaysay niya sa amon ang kahulogan sini. 13Kag ang amon mga damgo nahanabo suno sa iya ginsaysay. Ginpabalik mo ako sa akon palangakuan, kag ang manugluto sang tinapay ginpapugotan mo kag ginpabitay.”
14Ginpatawag sang hari si Jose, kag sa gilayon ginpagwa nila sia sa bilangguan. Sa tapos sia magpakalbo, makapamarbas kag makailis sang iya bayu, nagkadto sia sa hari. 15Ang hari nagsiling kay Jose, “Nagdamgo ako, kag wala sing bisan sin-o nga makasaysay sini sa akon. Ginsugiran ako nga sarang ikaw makasaysay sang kahulogan sang mga damgo.”
16Si Jose nagsabat, “Indi ako makasarang, kon sa akon lang Mahal nga Hari, kundi ang Dios amo ang magahatag sing panaysayon para sa kaayuhan sang hari.”
17Ang hari nagsiling, “Nagdamgo ako nga nagatindog ako sa pangpang sang Nilo 18sang magtakas ang pito ka matahom kag matambok nga mga baka halin sa suba kag naghalab sila sang hilamon. 19Dayon may pito naman ka mga baka nga nagtakas nga maniwang kag daw pulos lang tul-an. Sila ang pinakamalaw-ay nga mga baka nga akon nakita sa bug-os nga duta sang Ehipto. 20Ang maniwang nga mga baka nagkaon sang matambok nga mga baka. 21Pero sang nakaon na nila sila, daw indi man lang mahibal-an tungod kay kon tan-awon sila, daw amo man lang sila gihapon. Dayon nagmata ako. 22Nagdamgo man ako nga nakakita ako sing pito ka mga uhay nga matinggas kag alanyon na nga nag-ulhot sa isa ka puno. 23Dayon may pito naman ka mga uhay nga huyos nga nag-ulhot kag ginpakigas sang hangin sa desierto. 24Ang huyos nga mga uhay naghalunhon sang pito ka matinggas nga mga uhay. Ginsugid ko ini nga mga damgo sa mga madyikero, pero wala sing isa sa ila nga makasaysay sini sa akon.”
25Si Jose nagsiling sa hari, “Isa lang ang kahulogan sang duha ka mga damgo. Ang Dios nagsugid sa imo sang iya pagahimuon. 26Ang pito ka mga baka nga matambok nagakahulogan sing pito ka tuig, kag ang pito ka matinggas nga mga uhay nagakahulogan man sing pito ka tuig. Ang ila kahulogan isa lang. 27Ang pito ka mga baka nga maniwang nga nagtakas sang ulihi, kag ang pito ka huyos nga mga uhay nga ginpakigas sang hangin sa desierto nagakahulogan sang pito ka tuig nga gutom. 28Subong sang ginsiling ko sa imo, ang Dios nagpahayag sa imo sang iya pagahimuon. 29Magaabot ang pito ka tuig sang daku nga kabuganaan sa bug-os nga duta sang Ehipto. 30Sa tapos sina, magasunod ang pito ka tuig nga tiggulotom, kag ang tanan nga maayo nga mga tinuig malipatan sa duta sang Ehipto tungod kay ang gutom magahalit sang duta. 31Ang tion sang kabuganaan malipatan sing bug-os tungod kay tama gid ang gutom nga magasunod. 32Tungod nga ginsulit ang imo damgo, nagakahulogan nga natalana na ini sang Dios, kag himuon niya ini sa indi madugay.
33“Gani magpili ka sing isa ka tawo nga maalam kag may paghangop, kag sia ang padumalaha sang pungsod. 34Kinahanglan nga magpili ka man sing mga opisyales nga magdumala sa pagkuha sang ikalima nga bahin sang patubas sang duta sang Ehipto sa sulod sang pito ka tuig nga bugana. 35Ipatipon sa ila ang tanan nga kalan-on sa sining maayo nga mga tinuig nga magaabot. Hatagi sila sing awtoridad sa pagtipon sing patubas sa mga siudad, kag sa pagbantay sini. 36Ini nga kalan-on manginpangaman sang pungsod para sa palaabuton nga pito ka tuig nga gutom sa Ehipto, agod nga ang mga pumoluyo sa Ehipto indi magkalamatay sa tion sang tiggulotom.”
Si Jose Ginhimo nga Gobernador sang Ehipto
37Ang hari kag ang iya mga opisyales nagpakamaayo sini nga plano, 38kag nagsiling sia sa ila, “Wala na kita sing may makita nga tawo nga maglabaw pa kay Jose nga may Espiritu sang Dios.” 39Gani ang hari nagsiling kay Jose, “Tungod nga ang Dios nagpahayag sa imo sini tanan, maathag nga wala na sing isa nga mas maalam kag may paghangop nga labaw pa sang sa imo. 40Himuon#Bin. 7:10. ko ikaw nga manugdumala sang akon pungsod, kag ang tanan ko nga mga tinawo magatuman sang imo mga sugo. Mangin-ikaduha lamang ikaw sa gahom tungod sang akon pagkahari.” 41Dayon ang hari nagsiling kay Jose, “Ginahimo ko ikaw karon nga gobernador sa bug-os nga Ehipto.” 42Ginkuha#Dan. 5:29. sang hari sa iya tudlo ang iya singsing nga may selyo sang hari kag ginsuksok ini sa tudlo ni Jose. Ginpabayuan niya sia sing malahalon nga bayu nga lino, kag ginpakulintasan sing bulawan nga kulintas. 43Ginpasakay niya si Jose sa ikaduha nga harianon nga karwahi, kag ang iya gwardya nag-una sa iya nga nagasinggit, “Hawa kamo!” Gani si Jose nahimo nga gobernador sang bug-os nga Ehipto. 44Ang hari nagsiling sa iya, “Ako ang hari. Kon indi mo pagpahanugotan, wala sing bisan sin-o nga makahimo sang bisan ano sa bug-os nga Ehipto.” 45-46Ginhingalanan sia sang hari kay Zafenat-panea. Ginpaasaw-an niya sia kay Asenat, ang anak nga babayi ni Potifera, nga pari sa siudad sang On.
Si Jose nagaedad sing traynta ka tuig sang pagsugod niya alagad sa hari sang Ehipto. Naghalin sia sa korte sang hari kag ginlibot ang bug-os nga duta sang Ehipto. 47Sa pito ka tuig sang kabuganaan, ang duta nagpatubas sing bugana. 48Si Jose nagtipon sing kalan-on sa sulod sadtong pito ka tuig, kag ginbutang niya ini sa mga bodega sa mga siudad. Sa tagsa ka siudad gintipon niya sa mga bodega ang patubas sang mga uma sa palibot nga mga lugar. 49Madamo gid ang natipon niya nga uyas nga daw subong ini kadamo sang balas sa baybay. Gani gin-untatan niya ang pagsukob, kay indi na ini masukob.
50Sang wala pa mag-abot ang mga tinuig sang tiggulotom, si Jose may duha ka mga anak nga lalaki sa kay Asenat. 51Si Jose nagsiling, “Ginbuot sang Dios nga kalimtan ko ang tanan ko nga mga pag-antos kag ang bug-os nga panimalay sang akon amay.” Gani ginhingalanan niya ang panganay niya nga anak kay Manases.#41:51 MANASES: Ini nga ngalan pareho sa Hebreo nga pulong nga kon sayuron “ginkalimtan”. 52Nagsiling man sia, “Ang Dios naghatag sa akon sing mga anak sa duta sa diin nakaagi ako sing mga kabudlayan.” Gani ginhingalanan niya ang iya ikaduha nga anak kay Efraim.#41:52 EFRAIM: Ini nga ngalan pareho sang Hebreo nga pulong nga kon sayuron “hatag sing mga anak”.
53Ang pito ka tuig sang kabuganaan sa duta sang Ehipto natapos, 54kag#Bin. 7:11. ang pito ka tuig sang tiggulotom nagsugod, suno gid sa ginsiling ni Jose. May tiggulotom sa iban nga mga pungsod, pero may kalan-on sa bug-os nga Ehipto. 55Sang#Juan 2:5. magbatyag sang gutom ang bug-os nga pungsod sang Ehipto, ang mga tawo nagpangayo sing kalan-on sa hari. Gani ang hari nagmando sa tanan nga mga Ehiptohanon, “Magkadto kamo kay Jose kag himua ninyo ang ginasiling niya.” 56Sang naglapnag na gid ang gutom sa bug-os nga duta, si Jose nagbukas sang tanan nga mga bodega kag nagpadalawat sia sing trigo sa mga Ehiptohanon, kay ang tiggulotom tama na gid sa bug-os nga duta sang Ehipto. 57Ang mga tawo sa bug-os nga kalibutan nagkadto sa Ehipto sa pagdalawat sing trigo kay Jose, tungod kay ang tiggulotom tama gid sa bug-os nga kalibutan.
Currently Selected:
Genesis 41: MBBHIL12
Highlight
Share
Copy
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
