Genesis 42
42
Ang mga Utod nga Lalaki ni Jose Nagkadto sa Ehipto sa Pagdalawat sing Trigo
1Sang pagkahibalo ni Jacob nga may trigo sa Ehipto, nagsiling sia sa iya mga anak, “Ngaa bala nga wala kamo nagagiho? 2Nakabati#Bin. 7:12. ako nga may trigo sa Ehipto. Kadto kamo didto kag magdalawat agod indi kita mapatay sa gutom.” 3Gani ang napulo sang mga utod ni Jose sa amay naglakat sa pagdalawat sing trigo sa Ehipto, 4pero wala ni Jacob pagpaupda si Benjamin, ang utod ni Jose sa amay kag iloy, tungod kay nahadlok sia basi may malain nga matabo sa iya.
5Upod sa iban nga mga tawo, ang mga anak nga lalaki ni Jacob nag-abot sa Ehipto sa pagdalawat sing trigo, tungod kay may gutom man sa duta sang Canaan. 6Si Jose, subong nga gobernador sang Ehipto, nagpadalawat sing trigo sa tanan nga mga tawo sang kalibutan. Gani, ang mga utod ni Jose nag-abot kag nagsaludo sa iya nga ang ila mga guya nagaduot sa duta. 7Sang pagkakita ni Jose sa iya mga utod, nakilala niya sila, pero wala sia magpakita nga kilala niya sila. Ginpamangkot niya sila sing matigdas, “Diin kamo maghalin?”
Nagsabat sila, “Sa Canaan. Nag-abot kami sa pagbakal sing kalan-on.”
8Bisan nakilala ni Jose ang iya mga utod, pero sila wala makakilala sa iya. 9Nadumdoman#Gen. 37:5-10. niya ang iya mga damgo nahanungod sa ila, kag nagsiling sia sa ila, “Mga espiya kamo! Nag-abot kamo sa pagtan-aw kon diin ang maluya nga pamakod sang amon duta.”
10Nagsabat sila, “Indi, sir, nag-abot kami subong mga alagad mo sa pagbakal sing kalan-on. 11Mag-ulotod kami tanan. Indi kami mga espiya, kundi mga tawo nga nagasugid sing matuod.”
12Si Jose nagsiling sa ila, “Indi ako magpati! Nag-abot gid kamo sa pagtan-aw kon diin ang maluya nga pamakod sang amon duta.”
13Nagsiling sila, “Sir, dose kami tanan nga mag-ulotod nga mga anak sang isa lang ka tawo sa duta sang Canaan. Ang kamanghuran yadto didto upod sa amon amay, kag ang isa namon ka utod patay na.”
14Si Jose nagsabat, “Subong sang ginsiling ko na sa inyo, mga espiya gid kamo. 15Sa sini nga paagi matilawan kamo: nagasumpa ako sa ngalan sang hari nga indi kamo makahalin, kon indi magkadto diri ang inyo kamanghuran nga utod nga lalaki. 16Palakta ang isa sa inyo sa pagkuha sa iya. Ang mabilin pagabantayan tubtob mapamatud-an ang inyo ginsiling. Kon indi, subong nga nagakabuhi ang hari, mga espiya gid kamo.” 17Sa sina nga mga pulong, ginbilanggo niya sila sing tatlo ka adlaw.
18Sa ikatlo nga adlaw si Jose nagsiling sa ila, “Mahinadlukon ako sa Dios, gani luwason ko ang inyo mga kabuhi kon himuon ninyo ini. 19Kon wala kamo nagabutig nga mga tawo, ang isa sa inyo magapabilin sa bilangguan sa diin kamo ginbilanggo, kag ang iban sa inyo sarang makalakat sa pagdala sang inyo gindalawat nga trigo didto sa inyo ginagutom nga mga panimalay. 20Dayon dapat ninyo dalhon sa akon ang inyo kamanghuran nga utod, sa pagpamatuod nga wala kamo nagabutig, kag indi ko kamo pagpatyon.”
Nagsugot sila sa paghimo sini. 21Nagsiling sila sa isa kag isa, “Sa pagkamatuod, nakasala kita sa ginhimo naton sa aton utod. Nakita naton ang iya daku nga kalisdanan sang nagpakitluoy sia sa aton, pero wala kita magpamati. Amo ina nga kita naman karon ang ginalisdan.”
22Si#Gen. 37:21-22. Ruben nagsiling, “Ginsingganan ko kamo nga indi ninyo pag-anhon ang bata, pero indi kamo magpamati. Kag karon nagabayad kita sang iya kamatayon.” 23Si Jose nakahangop sang ila ginpanghambal, pero wala sila makahibalo sini, tungod kay ang ila pagpakighambal sa iya paagi sa manugbadbad. 24Si Jose naghalin sa ila kag naghibi. Sang sarang naman sia makahambal sa ila, nagbalik sia, kag ginpili si Simeon kag ginpagapos sia sa atubang nila.
Ang mga Utod ni Jose Nagbalik sa Canaan
25Nagsugo si Jose nga pun-on ang ila mga sulodlan sing trigo, kag ibalik ang kwarta sang tagsa ka tawo sa iya sako kag pabalunan sila sing pagkaon para sa ila dalanon. Gintuman ini. 26Dayon ginkarga sang mag-ulotod sa ila mga asno ang trigo nga ila gindalawat, kag naglakat sila. 27Sa ila ginpahuwayan sang gab-i, ang isa sa ila nagbukad sang iya sako sa pagpakaon sang iya asno, kag nakita ang iya kwarta sa naibabaw sang sako. 28Nagsinggit sia sa iya mga utod, “Gin-uli sa akon ang akon kwarta kag yari diri sa akon sako.” Kinulbaan gid sila, kag nagtulokay sila nga nagakurog sa daku nga kahadlok, kag nagpamangkutanay, “Ano bala ining ginhimo sang Dios sa aton?”
29Sang pag-abot nila sa ila amay nga si Jacob didto sa Canaan, ginsugiran nila sia sang tanan nga natabo sa ila: 30“Ang gobernador sang Ehipto naghambal sing matigdas sa amon, kag nagsumbong sa amon nga nagapang-espiya kuno kami batok sa ila pungsod. 31Nagsabat kami sa iya, ‘Maminatud-on kami nga mga tawo. Indi kami mga espiya. 32Dose kami ka mag-ulotod nga lalaki, sa isa lang ka amay. Ang isa namon ka utod patay na, kag ang kamanghuran yadto didto upod sa amon amay sa Canaan.’ 33Ang tawo nagsabat, ‘Sa sini nga paagi mahibal-an ko kon maayo kamo nga mga tawo: ang isa sa inyo magapabilin diri sa akon, kag ang iban magakuha sing trigo para sa inyo ginagutoman nga mga panimalay, kag maglakat. 34Dalha ninyo diri sa akon ang inyo kamanghuran nga utod. Dayon mahibaluan ko nga indi kamo mga espiya, kundi maayo nga mga tawo. Iuli ko sa inyo ang inyo utod, kag sarang kamo makaestar diri kag makanegosyo.’”
35Sang ibubo nila ang sulod sang ila mga sako, ang puyo nga may kwarta sang tagsa sa ila yara sa sako. Sang makita nila ini, hinadlukan gid sila pati ang ila amay. 36Ang ila amay nga si Jacob nagsiling sa ila, “Gusto gid bala ninyo nga maubos kaladula ang tanan ko nga mga kabataan? Si Jose wala na; si Simeon wala na; kag karon kuhaon naman ninyo si Benjamin. Ako ang nagaantos!”
37Si Ruben nagsiling sa iya amay, “Patya ang duha ko ka mga bata, kon indi ko mabalik si Benjamin sa imo. Itugyan sia sa akon, kag ibalik ko sia sa imo.”
38Pero si Jacob nagsiling, “Ang akon anak indi makaupod sa inyo. Ang iya utod patay na, kag sia na lang ang nabilin. Basi ano ang matabo sa iya sa dalanon. Tigulang na ako kag indi na ako makaantos sang kasubo nga inyo pagadalhon sa akon. Magapatay ini sa akon.”
Currently Selected:
Genesis 42: MBBHIL12
Highlight
Share
Copy
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
