Крар 19
19
Павел Эфесда
1АпӀалас Каринфда авай чӀавуз, Павел вини дагъларин уьлкве тирвал сиягьатдиз акъатнай. Ам Эфесдиз атана. Ана адал са шумуд тилмиз гьалтна.
2– Куьн Исадихъ ийизвай имандал атайла, квек Пак Руьгь акатнайни? – абурувай хабар кьуна ада.
– Чаз Пак Руьгь вуч затӀ ятӀа гьич ванни хьайиди туш, – лагьана жаваб гана абуру.
3Инал Павела хабар кьуна:
– Цик акахьун къачудайла бес куьне квехъ иман ийизвай?
– Чна Ягьяди лагьай гафарин чӀалахъ яз цик акахьун къачунай, – лагьана жаваб гана абуру.
4– Ягьяди инсанриз Аллагьдин рекьел атунин лишан яз цик акахьун къачу ва гьакӀ вичелай гуьгъуьниз къведай Исадихъни иман ая лугьузвай, – лагьана Павела.
5И гафар ван хьайи абуру Ребби Исадихъ иман авунин лишан яз цик акахьун къачуна. 6Павела абурал гъилер эцигна, абурукни Пак Руьгь акатна. Гьа инал абур жуьреба-жуьре чӀаларал рахаз ва пайгъамбарвал ийиз хьана. 7Абур цӀикьвед кас кьван авай.
8Павела пуд вацра синагугра викӀегьдаказ вязер авуна. Ада чувудрихъ галаз авур веревирдера Аллагьдин пачагьвал вуч затӀ ятӀа вири чӀалахъ жедайвал ачухарзавай. 9Адаз яб гузвайбурукай са бязибур терс тир. Адан гафарин чӀалахъ тежез, абуру халкьдин вилик Аллагьдин рекьиз себ гузвай. Павел абурун патавай хъфена ва вичихъ галаз тилмизарни хутахна. Ада гьар юкъуз Туьренан мектебда вязер ийизвай. 10Гьа икӀ давам хьайи кьве йисан къене Асия вилаятда авай вири чувудризни муькуьбуруз Реббидин Гафуникай хабар хьана.
11Аллагьди тежер хьтин аламатар Павелан гъилералди кьилиз акъудзавай. 12Азарри кьунвайбурун патав Павела алукӀай ягълухарни хуруганарни гъидай, азарри кьунвайбурал эцигдай, абурукай себеб жез азарри кьунвайбур дири хъжедай, чӀуру жинерар хкатдай. 13А чкайра инсанрикай суьгьуьрдин гафаривди жинерар хкудзавай са бязи чувудар мадни авай, абуруни, жинерар хкудиз алахъдайла, Иса Месигьдин ТӀвар кьун кьетӀна. Абуру жинерриз лугьуз хьана:
– Вичикай Павела ихтилатай Исадин ТӀварцӀелай за ваз и касдикай хкечӀ лагьана эмирзава.
14Чувудрин чӀехи хахам Скеван ирид хцини гьа икӀ авуна. 15Амма чӀуру жинжи абуруз жаваб гана:
– Иса заз чида, Павелакайни заз хабар ава, бес куьн вужар я?
16ЧӀуру жин квай инсан абурал гадар хьана, ада абур вири кӀаник кутуна. Ада абуруз ахьтин гатунар кьуна хьи, иви кӀвахьна физ, жинерар хкудзавайбур пекерни алачиз а кӀваляй катна хъфенай. 17Эфесда уьмуьр тухузвай вири чувудризни муькуьбуруз и кардикай хабар хьайила, абурук кичӀ акатна. Гьанлай Ребби Исадин ТӀвар абуру зурба гьуьрметдалди кьаз хьана.
18Имандал атай гзафбуру, къвез, чпи авур чӀуру крар вирибурун вилик хиве кьаз хьана. 19Виликдай суьгьуьрчивилер авур гзафбуруни чпин суьгьуьрдин ктабар гваз къвез, абур виридан вилик цӀуз гадарнай. ЦӀуз вегьей кьван ктабрин къимет гьисабайла, ам яхцӀурни цӀуд агъзур драхмадив кьван агакьнай. 20Гьа икӀ гегьеншдиз чкӀиз, Аллагьдин Гафуни къуват къачузвай.
Эфесда къал
21Хьайи вири крарилай кьулухъ Павела МакӀедандайни Ахайдай яна Ярусалимдиз фидай меслятна.
– Ярусалимда хьайидалай кьулухъ зун Римдизни акъатун лазим я, – лагьана ада.
22МакӀедандиз ада вичиз куьмекарзавай кьве кас, ТӀиматӀейни ЭрастӀ, ракъурна, вични са кьадар вахтунда Асия вилаятда амукьна.
23И чӀавуз Аллагьдин рекьин паталай лап чӀехи къалар акъатна. 24Заргар ДимитӀриди гимишдикай Артемидатан#19:24 Артемидат – къадим Юнанда (Грецияда) няметрин булвилин гъуц тир. ибадатханадин гъвечӀи кӀалубар гьазуриз маса гузвай. И кӀвалахди адазни чкадин устӀарриз чӀехи хийирар гъизвай. 25Садра ада маса устӀарар ва шакӀуртар кӀватӀна абуруз лагьана:
– Я стхаяр, и карди чаз хъсан хийир гузвайди квез чизва. 26Амма квез аквазва ва ван къвезва хьи, и Павел лугьудай касди тек са Эфесда ваъ, гьакӀ вири Асия вилаятдани инсандин гъилери туькӀуьрнавай аллагьар – аллагьар туш лугьуз, гзаф инсанар чӀалал гъана вичин патаз акъудна. 27Исятда тек са чи пеше къиметдай аватунин ваъ, гьакӀни чӀехи аллагь Артемидатан ибадатхана квазни такьунин хата арадал атанва. ГьакӀ хьайила, вичиз вири Асия вилаятди ва вири дуьньяди ибадат ийизвай вилик-кьилик квай паб-аллагь Артемидат кӀвачерик аватун мумкин я.
28И гафарин ван хьайила, устӀаррик хъел акатна, абуру гьарайиз хьана:
– Сагъ хьурай Эфесдин Артемидат!
29Са герендилай вири шегьердик юзун акатна. Инсанри Павелан юлдашар тир макӀеданви Гайни АристӀарх кьуна. Вирида шегьердин мярекатар кьиле физвай чкадиз гьерекатна. 30Павелаз халкьдин вилик экъечӀна рахаз кӀан хьана, амма тилмизри ам ахъайнач. 31Асиядин вилик-кьилик квай са бязи ксари, чеб Павелан дустар хьуниз килигна, аниз фимир лагьана адан патав инсанар ракъурна.
32КӀватӀ хьанвайбур вири какахьнавай. Садбуру са гафар гьарайзавай, муькуьбуру маса. ЧӀехи паюниз чеб аниз вучиз атанвайбур ятӀа чизвачир. 33Чувудри Искендер вилик акъудна ва инсанрин кӀеретӀди адаз вуч лугьудатӀа чирна. Искендера вич хуьн патал гаф къачудайла, гъилелди ишара авуна. 34Амма ам чувуд тирди чир хьайила, вирибуру сад хьиз гьарайиз хьана:
– Сагъ хьурай Эфесдин Артемидат!
Абуру кьве сятда кьван гьараяр авуна. 35Ахпа халкьдин вилик шегьердин чӀехибурукай сад экъечӀна. Ада абур секинарна, лагьана:
– Эфесвияр! Вилик-кьилик квай паб-аллагь Артемидатан ибадатхана Эфес шегьерда авайдакай вири дуьньядиз хабар авачни? Цавай аватай адан къамат алай къван Эфесда авайди тийижирди авани? 36И кар инкариз жедай кас авачтӀа, куьн секин хьун лазим я, фагьум тавуна са карни авуна кӀандач. 37Куьне иниз кьуна гъайи инсанрикай садани ибадатхана атӀанач ва чи паб-аллагьдиз экъуьгънач. 38ДимитӀридини адан юлдашри са нелай ятӀани шикаят ийизватӀа, чахъ дуван ва гьакимар ава. Къуй абуру чпи чпелай арзаяр авурай. 39Квехъ мад са гьихьтин ятӀани суалар аматӀа, къанун тирвал кӀватӀнавай межлисдал эцигиз жеда. 40Къал къарагъарна лагьана къе хьайи крарай чак тахсирар кутаз хьайитӀа, чаз чун гьахъар хъийидай делилар жагъидач, вучиз лагьайтӀа вири къал-къул бине авачирди я.
Гьа и гафар лагьана, ада халкь ахъайна.
Currently Selected:
Крар 19: ЛезПК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010-2024
