Хьунухь 43
43
Юсуфан стхаяр кьвед лагьай гъилера Мисридиз атун
1Амма каш къвердавай къати жезвай. 2Мисридай хкай техил куьтягь хьайила бубади абуруз лагьана: «Алад, фена чаз мад са тӀимил ризкьи маса къачу!» 3Амма Ягьуда жаваб гана: «А касди гъвечӀи стха галачиз мад чун вичин вилик гьич пайдани тахъхьуникай хабардар авунай. 4Вуна адаз чахъ галаз фидай ихтияр гайитӀа, чун ваз ризкьи гъун патал рекье гьатда. 5Амма ихтияр тагайтӀа, а касди стха галачиз вичин вилик пайда хьун къадагъа авунваз хьайила, чун фин герекни жедач». 6«Лагь кван, вучиз куьне зи кьилел ихьтин бедбахтвилер гъанватӀа, – лагьана Исраила, – вучиз куьне мад са стха авайди адан вилик хатадай лагьанай?» 7Абуру жаваб гана: «А касди чавай вири хабар кьазвай: чакай, чи мукьвабурукай, чи бубадал чан аламатӀа, чахъ стхаяр мад аватӀа. Ада хабар кьазвай, чнани жаваб гузвай. Низ чидай кьван, ада чаз вичин патав гъвечӀи стха гъваш лагьана эмир гудайди?»
8Ягьуда вичин буба Исраилаз лагьана: «Ам захъ галаз ахъая, ва чун фида. И чӀавуз вири сагъ-саламат яз амукьда, вири гишин кьиникай хилас жеда – гьам чун, гьам вун, гьамни чи аялар. 9Ам элкъвена хтунин замин зи кьил хьурай. Завай кӀанни хьухь: ам элкъвена ви патав хкун тавуртӀа, жуван уьмуьрдин эхирдалди зун ви вилик батӀул жеда. 10Килиг, чна кьулухъ ягъуниз рехъ ганачиртӀа, чавай гьеле кьве гъилера аниз фена хквез жедай!»
11«Мад вучин, – лагьана бубади, – акӀ ятӀа ихьтин са кӀвалах ая: куь шешелар чи чилин вири няметралди ацӀура: ладандалди, виртӀедалди, хуш ни галай шкьакьралди, мелгьамдалди, къацувал алай шуьмягъралди, бадамралди ва а касдиз савкьват яз твах. 12Гимиш квехъ галаз кьве гъилера гзаф къачу – куь шешелра эхцигайди эвезна вахкудайвал; абур ана, аквадай гьаларай, гъалатӀ хьана. 13Квехъ галаз Бунъяминни къачу ва мад гьа касдин кьилив алад. 14Вири алакьдай Аллагьди ам квехъ галаз мергьемет авайди жедайвал, ада муькуь стхани Бунъяминни ахъайдайвал авурай! Закай лагьайтӀа – заз аялар къакъатун кхьенватӀа, гьа им зи кьисмет я».
Юсуфа вичин стхаяр ханар хьиз кьабулзава
15Стхайри савкьватар гьазурна, алатай сефердив гекъигайла, кьве гъилер гзаф гимишни къачуна ва, Мисридив агакьайла, Юсуфан вилик атана акъвазна – и гъилера Бунъяминни галаз.
16Юсуфа, абурухъ Бунъямин галаз акурла, вичин кӀвал идара ийизвайдаз лагьана: «И ксар зи кӀвализ хутах. Гьайванар тукӀуна, тӀуьн-хъун гьазура – къе нисинин фу абуру захъ галаз санал неда». 17Юсуфан эмир кьилиз акъудуналди, кӀвал идара ийизвайда стхаяр адан кӀвализ хутахна. 18Амма рекье кичӀ акатна, стхайри сада садаз лугьуз хьана:
– Чун аниз а гъилера чи шешелра аваз жагъай гимишдин патахъай тухузвайди я! Абуру чи винел вегьена чун атӀумарда, чакай лукӀар ийида ва чавай ламар къакъудда!
19КӀвалин гуьрцелдални абуру кӀвал идара ийизвай касдивай хабар кьуна: 20«Са гаф лугьудай ихтияр це, чи агъа! Чун иниз гьеле са гъилера техил маса къачуз атайди тир. 21Амма йифиз, элкъвена хъфидай рекье ял ядай чкадал чна чи шешелар ахъайнай, ва гьар садан шешелдин винелай адан гимиш аваз жагъанай – дуьм-дуьз гьар сада гайи къиметдин кьадар. Чна а гимиш элкъвена хканва. 22Техил маса къачун патал мадни гимиш гъанва. А гъилера чи шешелра чи гимиш ни эхцигнайтӀа, чаз чидач». 23«Секин хьухь, – лагьана абуруз а касди, – кичӀе жемир. Белки куь Аллагьди – куь бубадин Аллагьди ам чинеба куь шешелра эхцигнай. Куь гимиш а гъилера зав тамамвилелди агакьнай!»
Ада абурун кьилив Шимунни гъана, 24абуруз виридаз Юсуфан кӀвализ теклифна, абуруз кӀвачер чуьхуьдай яд гъана ва ламариз ем гана. 25Нисинихъ Юсуф кьабулун патал стхайри чпин савкьватарни акъудна эцигна: абуруз чпи ана нисинин фу недайди виликамаз хабар ганвай. 26Юсуф кӀвализ хтайла, абуру, чпин савкьватар адан вилик гъана, метӀерал аватна икрам авуна, 27адани абуруз салам гана ва жузуна: «Куьне заз суьгьбет авур куь кьуьзуь бубадин гьал-агьвал гьикӀ я? Адал чан аламани?» 28«Чи буба, ви лукӀ, сагъ-саламат я», – жаваб гана стхайри ва метӀерал аватна адаз икрам авуна.
29Юсуф Бунъяминаз, вичин хайи стхадиз, килигна. «ИкӀ хьайила, – лагьана ада, – куьне заз ихтилат авур куь гъвечӀи стха гьа им я ман?»
Ва стхадихъ элкъвена лагьана: «Аллагьдин патай ваз регьим хьуй, бала!»
30Стхадиз талукь яз Юсуфан рикӀе пайда хьайи кӀанивилин гьиссерин кьадар акьванди тир хьи, ам кӀевиз шехьиз са тӀимил амай. Ам тадиз маса кӀвализ экъечӀна ва ана шехьна. 31Ахпа чин-гъил чуьхвена, вичи-вич гъиле кьуна, мад мугьманрин патав хтана, вилик тӀуьн-хъун гъун эмир авуна. 32ТӀуьнар Юсуфан вилик кьилди, мугьманриз кьилди ва чпихъ галаз санал незвай мисривийрин вилик кьилди гъизвай. Мисривийри чеб мурдар тахьун патал иврийрихъ галаз санал недач. 33Стхаяр Юсуфан вилик галай-галайвал, чӀехидалай гъвечӀидалди, ацукьна, вилера тажубвал аваз сад садаз килигзавай. 34Юсуфа вичин суфрадал алай тӀуьнрикай абуруз ракъурзавай – иллаки Бунъяминаз амайбурулай вад гъилера гзаф. Абуру Юсуфахъ галаз тӀуьнар-хъунар авунай, кефер чӀугунай.
Currently Selected:
Хьунухь 43: ЛезПК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010-2024
