Exodo 1

Say Kairapan ya Inako na saray Israelita ed Egipto

1Saray anak nen Jacob tan saray pamilya ra a kaiba to ran linmad Egipto et saraya: 2Ruben, Simeon, Levi, Juda, 3Isacar, Zabulon, Benjamin, 4Dan, Neftali, Gad, tan Aser. 5Pitomplo ya amin iray anak tan apo nen Jacob, a pati si Jose a wadman la ed Egipto. 6Diad impankurang na panaon si Jose, saramay agagi to, tan amin a totoo ed saman a kailalakan et inaatey ira. 7Balet amayamay iray anak tan apo na saman a kailalakan, a salanti saray Israelita; dinmakerakel ira tan nagmaliw iran makapanyarin tuloy, kanyan kinmayat iran nanayam ed intiron bansa na Egipto.

8Sinmabiy panaon a walay balon ari na Egipto ya ag to kabat si Jose. 9Sayan ari inkuantod saray totoo to, “Makapataktakot la ra yan Israelita, ta dakerakel tan makapanyari la ra nen say sikatayo. 10Gawaen tayoy kasiliban a pamatonda na idadakel da, ta no walay onsabi-sabin bakal, ag la pigan migampi rad saray kalaban tayo. Onlaban irad satan ed sikatayo, insan da taynan so bansa tayo.” 11Kanyan angipasen iray Egipsio na saray opisyal a mamairap ed saray Israelita. Impankikimey da ra na ambelat diad impamaalagey dad saray siudad na Pitom tan Rameses a panangisempenay abasto na ari. 12Balet no panoy impanpapairap na saray Egipsio ed saray Israelita, lalon ondarakel ira tan onaawang so pasen a panaayaman da. Apagaan ed satan iray Egipsio ed saray Israelita, 13-14kanyan impagmaliw dan masegsegang so bilay da. Pinapasoot da ran inaripen. Impankikimey da rad panagmasa na dalin tan diad panaggawa na laryo; impankikimey da met ni rad kaalogan da. Ag da ran balut kinasian.

15Insan say ari na Egipto akisalitad kindi Sifra tan Pua, saray duaran manamianak a Hebrea. 16Inkuantod sikara, “No mamaanak kayod saray bibiin Hebrea, patey yo so ogaw no laki, balet ag yo papateyen no bii.” 17Balet sarayan manamianak, lapud walay takot dad Dios, ag da inonur imay ingganggan na ari ed sikara; ag da pinatey iray ogogaw a lalaki. 18Impatawag to sirin ira yan manamianak tan tinepet tod sikara, “Akin et onyay gagawaen yo? Akin et ag yo papateyen iray ogogaw a lalaki?”

19Inmebat ira may manamianak, “Aliwan singa saray bibiin Egipsia iray bibiin Hebrea, ta mainomay iran mananak; ag ni sinmabiy manamianak et akapananak la ra.” 20-21Lapud sarayan manamianak et walay takot dad Dios, tinumangan ira na Dios tan initdan to ray anak da. Ag tinmonda so indakel na saray Israelita tan nagmaliw iran makapanyarin tuloy. 22Diad satan, say ari angipaakseb na sakey a ganggan ed saray amin a totoo to: “Ipaanur yod Ilog na Nilo so balang Hebreon laki a kapangyanak, balet ag yo papateyen iray kapangyanak a bibii.”

Currently Selected:

Exodo 1: MBBPAN83

Highlight

Copy