Exodo 2
2
Say Inkianak nen Moises
1Diad saman a panaon walay sakey a lakin kabyangay boleg nen Levi ya angasaway biin kabolegan to. 2Nanlokun yan bii tan nananak na laki. Nen anengneng to a balibalin ogaw so anak to, inyamut ton taloy bulan. 3Balet nen ag to la nayarian ya iyamut so anak to, angala na sakey a baskit a papiro; kinapolan to na beket, pian ag naloobay danum. Insan to inlogan ed baskit imay ogaw tan inggaton to ed gilig na ilog a kawalaay atatagey a dika. 4Say atsi to may ogaw nambantay ed bandad arawi, pian naamtaan to no antoy nagawad samay agi to.
5Et nibana a say prinsisa ya anak na ari et linmasur ed ilog a manames; balet saray mamarikit a katulong to nanakarakar irad gilig na ilog. Kabebekta anengneng to may baskit ed kawalaay atatagey a dika; ingganggan toy sakey a katulong to a mangalad samay baskit. 6Nilokasan nen prinsisa imay baskit tan anengneng toy sakey ya ogaw a manakakis. Naabagey to tan inkuanto, “Sayan ogaw et anak na sakey ed saray bibiin Hebrea.”
7Insan samay atsi na ogaw inkuanto, “Itawagan ta kayo na biin Hebrea, ta komisan to yan ogaw para sikayo?”
8“Laka sirin,” inkuanen prinsisa. Kanyan nila ton tinawag imay ina na ogaw. 9Inkuan na prinsisa ed samay ina, “Alam yan ogaw tan ikomisan mo ak; upaan ta ka.” Inala to sirin imay ogaw tan kinomponi to. 10Nen baleg la may ogaw inyakar tod samay prinsisa ya anak na ari. Samay prinsisa inala to may ogaw tan impasen ton anak ton dili. Inkuanto, “Diad danum so angaonan ko, kanyan ingaran ko na Moises.”#2:10 MOISES: Diad salitay Hebreo say tanul na sayan ngaran singa “inaon.”
Tinaynan nen Moises so Egipto
11Nen baleg lay Moises dinalaw to ray agagi ton Hebreo, et naimatunan toy kakairapan da. Anengneng nen Moises so sakey ya Egipsio a mamapatey ed sakey a Hebreo a kadalaan to. 12Nanlingaw-lingaw si Moises; nen anggapoy toon nanengneng to, pinatey to may Egipsio tan intabun tod kabueran. 13Diad ontombuk ya agew pinmaway si Moises tan anengneng to ray duaran Hebreo a manlalaban. Inkuantod samay nankasalanan, “Akin et kakabilen moy kaparam a Hebreo?”
14Inmebat imay too, “Siopa so anorod sika a manoley tan manintinsia ed sikami? Labay mo ak a pateyen a singa impamatey mod samay Egipsio?” Tinmakot ed satan si Moises tan inkuantod sikaton dili, “Akabatan la na totoo imay ginawak.” 15Nen akabatan na ari so agawa, ingganggan ton pateyen si Moises. Balet batik si Moises ed dalin na Madian tan diman nanayam.
Aminsan ya agew a manyodyorung si Moises ed abay na bobun, 16nitan la ray pitoran bibii ya anak nen Jetro a pari na Madian, ta onasul iray danum ya iyan dad saray atotung ya inoman na saray karniro tan saray kanding na ama ra. 17Balet sinmabi ray pumapastol tan pinapaarawi da ra may bibii. Inmalagey ed satan si Moises, tan inyagel to ra. Pinainom to ni ray ayep da. 18Nen sinmempet ira may bibii, si Jetro ya ama ra tinepet tod sikara, “Akin et asaksakbay kayon sinmempet natan?”
19Inmebat ira, “Walay sakey a lakin Egipsio ya inyagel to kamid saray pumapastol; inyasulan to kami tan pinainom to ni ray ayep tayo.”
20Tinepet nen ama ra, “Iner so kawalaan to tan a too? Akin et tinaynan yo? Tawag yo tan bagaan yon mangan dia.”
21Si Moises inmabubon ed panayam tod saman a pamilya, tan impiasawa nen Jetro ed sikato si anak ton Zipora. 22Nananak si Zipora na ogaw a laki. Nipaakar ed sayan ogaw si Moises inkuanto, “Sangkaili ak ed sayan dalin, kanyan Gersom#2:22 GERSOM: Diad salitay Hebreo say tanul na sayan ngaran singa “sangkaili.” so ngaran na sayan anak ko.”
23Kalabas na abayag a panaon inatey so ari ed Egipto, balet manngesnges ni ray Israelita ed kairapan na pakakaaripen da, kanyan kinmerew iray tulong ed Dios. 24Dinengel toy ngesnges da, ta anunotan toy impisipanan tod kindi Abraham, Isaac, tan Jacob. 25Say Dios anengneng toy pakakaaripen da ray Israelita tan inabagey to ra.
Currently Selected:
Exodo 2: MBBPAN83
Highlight
Share
Copy
Want to have your highlights saved across all your devices? Sign up or sign in
Maung a Balita Biblia © Philippine Bible Society, 1983
