Genesis 26
26
Si Isaac ed Gerar
1Wala lamet so sinmabin eras ed Canaan, likud ed samay sinmabi la nen panaon nen Abraham. Linmay Isaac ed kinen Abimelec ya ari na Palestina, diad Gerar. 2Pinmayawar so Katawan ed kinen Isaac tan inkuanto, “Ag ka oonlad Egipto; manayam kad pasen ya ibagak ed sika. 3Dia ka la manayam; ibaan ta ka tan bindisionan ta ka. Iter ko yan amin a pasen ed sika tan saray kabyangay boleg mo. Tooren koy insipan kod kinen Abraham ya amam. 4Singa karakel na bitewen ed tawen iray iter kod sikan kabyangay boleg mo, tan iter ko yan amin a pasen ed sikara. Amin a bansa kerewen dad siak a bindisionan ko ra a singa pamindision kod saray kabyangay boleg mo. 5Bindisionan ta ka, ta inonur ak nen Abraham tan sinumpal ton amin iray ganggan tan saray bilin ko.”
6Kanyan nanayam ed Gerar si Isaac. 7Nen tinepet na saray lalakid man so nipaakar ed asawa to, imbaga ton agi to, lapud antakot a mangipatuan asawa to. Antakot ta ompan pateyen da, et naala ray Rebeca a maganggana. 8Abayag lan manaayam diman si Isaac. Aminsan ya agew, tinmandag ed bintana si Abimelec tan anengneng ton mankakarinyowan si Isaac tan si Rebeca. 9Impatawag nen Abimelec si Isaac tan inkuanto, “Asawam manaya! Akin et imbagam ya agim?”
Inmebat si Isaac, “Abaloan kon napatey ak no ibagak ya asawak.”
10“Agaylay ginawam ed sikami!” inkuanen Abimelec, “Maininomay komun na sakey ed saray totook so akiakdul ed sikato; et sikay natetel ed impakasalanan mi komun.” 11Pinasakbayan nen Abimelec iray amin a totoo, “Pateyen so siopaman a mandiwit ed sayan too o say asawa to.”
12Tinaneman nen Isaac iman a dalin, tan diad saman a taon akaani na maminlasus a kinarakel ed samay intanem to, lapud binindisionan na Katawan. 13Anggapoy tonda na inaligwas to tan nagmaliw a mayamyaman. 14Mangimon ed sikato ray Filisteo, ta amayamay so karniro, baka, tan aripen to. 15Kanyan tinabunan da ray amin a bobun a ginawa na saray aripen nen Abraham nen mabilay ni.
16Insan inkuanen Abimelec ed kinen Isaac, “Taynan kad bansa mi, ta nagmaliw kan makapanyari nen say sikami.” 17Tinmaynan sirin si Isaac, tinmondad patar na Gerar, tan diman nanayam. 18Kinotkotan to lamet ira may bobun ya agawa nen panaon nen Abraham, tan tinabunan na saray Filisteo nen andi lad bilay si Abraham. Say impangingaran nen Isaac ed sarayan bobun et kapara na saramay impangingaran nen ama to.
19Nankotkot na bobun diad patar iray aripen nen Isaac, et akalmo ray danum. 20Saray pastol na Gerar akikolkol irad saray pastol nen Isaac, tan inkuanda, “Kayaryan mi yan danum.” Kanyan inngaran nen Isaac na “Kolkol” imay bobun.
21Nankotkot na sananey a bobun iray aripen nen Isaac, tan walay kolkolan lamet. Kanyan inngaran toy “Bosulan” iman a bobun. 22Tinmaynan diman tan nankotkot lamet na sananey a bobun. Anggapoy kolkolan ed saya, kanyan inngaran toy “Kawayangan.” Inkuanto, “Natan onaligwas itayo dia, ta dia so angiteray Katawan ed sikatayo na kawayangan.”
23Tinmaynan si Isaac tan linmad Beer-seba. 24Diad saman a labi na intaynan to pinmayawar ed sikato so Katawan tan inkuanto, “Siak so Dios nen amam ya Abraham. Ag ka natatakot; kaiba ta ka. Bindisionan ta ka tan itdan ta kay amayamay a kabyangay boleg, lapud samay sipan kod kinen Abraham ya aripen ko.” 25Nanggaway altar diman si Isaac tan inggalang toy Katawan. Nankampod man, insan nankotkot lamet na bobun iray aripen to.
Say Paknaan nen Isaac tan si Abimelec
26Manlapud Gerar, linmay Abimelec ed kinen Isaac; kaiba toy Ahuzat a sumisimbawa to tan si Ficol a pangulo na saray sondalo to. 27Tinepet nen Isaac, “Akin et linma kad siak, anta kinabosul mo ak tan pinataynan mo ak ed bansam?”
28Inmebat ira, “Amta mi la natan a walad sikay Katawan, tan isipen min nakaukolan a mampapaknaan tayoy malet. Labay min isipan mo 29ya ag mo kami papasakitan, a singa ag mi impamasakit ed sika. Maung so impanengneng mid sika tan mareen so impamataynan mid sika. Natan, malinew a binindisionan kay Katawan.” 30Imparaanan ira nen Isaac na ponsia; angan tan inminom ira. 31Kabkabwasan ed ontombuk ya agew, nansipan so balang sakey ed sikara tan pinaletan da na samba. Maliket so impamasiput nen Isaac ed sikara, ta sankaaro la ra.
32Diad saman ya agew, pinmawil iray aripen nen Isaac tan imbalita rad sikato may bobun a kinotkot da. Inkuanda, “Akalmo kamiy danum.” 33Inngaran toy “Samba” man a bobun. Onyay impakalay ngaran na siudad na Beer-seba.#26:33 BEER-SEBA: “Bobun na Samba” odino “Bobun na Pitora” so kabaliksan to yan ngaran diad salitay Hebreo (nengneng yoy 21:31).
Saray Arum ya Asawa nen Esau
34Nen mantaoy apataplo si Esau, inasawa to ray duaran marikit a Heteo, si Judit ya anak nen Beeri tan si Basemat ya anak nen Elon. 35Lapud sikara, nagmaliw a magunigon so bilay di Isaac tan Rebeca.
Currently Selected:
Genesis 26: MBBPAN83
Highlight
Share
Copy
Want to have your highlights saved across all your devices? Sign up or sign in
Maung a Balita Biblia © Philippine Bible Society, 1983
