Genesis 27
27
Binindisionan nen Isaac si Jacob
1Masiken lay Isaac tan bulag la. Impatawag toy Esau ya anak ton pangulowan tan inkuanto, “Anak ko!”
“Wadya ak, ama,” ebat to.
2Inkuanen Isaac, “Sankanengneng mon masiken ak la tan asingger lay ipatey ko. 3Alam so panam, lakad takel, ta iyanupan mo ak na sakey ya ayep. 4Ilutoan mo ak na samay labalabay kon potahi, insan iyakar mo dia. Kasumpal kon mangan, iter kod sikay samput a bindision, kasakbayay ipatey ko.”
5Nen mitotongtong si Isaac ed kinen Esau, onderengel si Rebeca. Kanyan kasiput nen Esau 6inkuanen Rebeca ed kinen Jacob, “Arengel koy amam ya inkuantod kinen Esau, 7‘Iyalaan mo ak na sakey ya ayep tan ilutom a para siak. Kasumpal kon mangan, iter kod sikay bindision ko diad arap na Katawan, kasakbayay ipatey ko.’ 8Natan, anak ko, dengel mo ak tan gawam so ibagak. 9Lakan mangala na duaran mataban kilaw na kanding, ta ilutoan koy amam na samay labalabay ton potahi. 10Sikay onlan mangiter ed sikato, pian sikay pangiteran toy bindision to, kasakbayay ipatey to.”
11Balet inkuanen Jacob ed kinen ina to, “Panon to ya, et mabagoy Esau tan pino so baog ko? 12Nayarin aplusen ak nen amak tan naalmoan ton titilaan ko, et say samba so naalak la laingen, aliwan say bindision.”
13Inmebat si ina to, “Siak so pelagan na satan a samba, anak ko; basta gawam so ibabagak, tan alam ira may kanding a papaalak.” 14Linma sirin ya angalad saray kanding tan inyakar tod kinen ina to; insan nanlutoy ina to na potahin labalabay a siraen nen ama to. 15Inala nen Rebeca so walad abung a sankaabigan a kawes nen Esau, insan to insolung ed kinen Jacob. 16Imbalkut to met ira may katat na kanding ed saray taklay to tan diad tenger ton anggapoy bago. 17Inter tod sikato met imay inluto to, pati say tinapay a ginawa to.
18Insan linmay Jacob ed kinen ama to tan inkuanto, “Ama!”
“On,” ebat to. “Siopa kan anak ko?”
19Inkuanen Jacob, “Siak si Esau ya anak yon pangulowan; sinumpal koy imbaga yod siak. Yorung kayo pa, ta mangan kayod sayan potahin awit ko, pian niiter yod siak so bindision yo.”
20Inkuanen Isaac, “Panoy impakalam a tampol, anak ko?”
Inmebat si Jacob, “Tinulongan ak na Dios a Katawan yo.”
21Inkuanen Isaac ed kinen Jacob, “Singger ka pad siak, pian naaplus ta ka. Sikan talaga si Esau?” 22Sinmingger si Jacob, inaplus nen ama to. Inkuanto, “Singa bosis nen Jacob so bosis mo, balet singa taklay nen Esau iray taklay mo.” 23Ag to abirbir si Jacob, ta mabago ray taklay to a singa saray taklay nen Esau. Iter to la lawari so bindision to, 24balet tinepet to lamet, “Sikan talagay Esau?”
“On, siak,” ebat to.
25Inkuanen Isaac, “Itdan mo ak imay nilutom. Kasumpal kon mangan, iter ko lad sikay bindision ko.” Initdan nen Jacob, tan initdan to met na alak. 26Insan inkuanen ama to, “Asingger ka, ta anguban mo ak, anak ko.” 27Nen anguban to, naangub nen Isaac so angub na kawes nen Esau, kanyan inter toy bindision to ed kinen Jacob. Inkuanto, “Say balingit na anak ko singa balingit na alog a binindisionay Katawan. 28Itdan ka komuy Dios na linaew na tawen, tan gawaen ton mataba ray alog mo! Itdan to ka komuy dakel a naani tan daakan ya alak! 29Magmaliw komun ya aripen mo ray bansa, tan ontuek komun ed sika ray totoo. Oleyan mo komun ya amin iray kakanayon mo tan ontuek ed sika komun iray kabyangay boleg nen inam. Nisamba komun iray mangisambad sika, tan nabindisionan komun iray mamindision ed sika.”
Binindisionan nen Isaac si Esau
30Asumpal lay impangiter nen Isaac na bindision to, tan kasiput nen Jacob sinmabiy agi ton Esau a nanlapud anupan. 31Nanluto met na mananam a potahi, insan iter tod kinen ama to. Inkuanto, “Ama, yorung kayo pa, ta mangan kayod sayan potahin awit ko, pian niiter yod siak so bindision yo.”
32“Siopa ka?” tepet nen Isaac.
Inmebat, “Siak si Esau, say pangulowan ya anak yo.”
33Ginmiwgiw so intiron laman nen Isaac, tan tinepet to, “Siopa sirin imay amatey na ayep, insan to imparongod siak? Kinan ko, kasakbayan ya onsabi ka. Inter kod sikatoy samput a bindision ko, tan kien to la ya anggad angga.”
34Kadngel nen Esau ed saya, inmakis na makmaksil tan ampaipait tan inkuanto, “Itdan yo ak pa met na bindision yo, ama!”
35Inmebat si Isaac, “Linma diay agim tan tinilaan to ak. Inala to lay bindision mo.”
36Inkuanen Esau, “Sikato yay kumadwan impansaol tod siak. Ag la pankelawan a Jacob#27:36 JACOB: Say tanul na sayan ngaran kapara toy Hebreon salita a kabaliksan toy “saol.” so ngaran to. Inala to la ray kanepegan kod inkapangulowan ya anak, tan natan inala to ni so bindision a para siak. Anggapo ta lay inkera yon bindision a para siak?”
37Inmebat si Isaac, “Ginawak lan manoley ed sika, tan ginawak ya aripen ton amin iray kakanayon to. Initdan koy dakel a naani tan daakan ya alak. Natan, anggapo lay nagawaan kon para sika, anak!”
38Intuloy nen Esau so mikasid kinen ama to, “Akin, saksakey so bindision yo, ama? Bindisionan yo ak pa met, ama!” Insan manakis.
39Inkuanen Isaac ed sikato,
“Anggapoy linaew na tawen a para sika,
Anggapoy mataban dalin a para sika.
40Mambilay ka diad panamegley na ispadam,
Balet manlingkur kad agim.
Anggaman ontan, no onlaban kad sikato,#27:40 onlaban kad sikato; odino ag ka makareen.
Makaekal ka ed silong na pakayari to.”
41Binosul nen Esau si Jacob lapud sikatoy angiteran na ama ra na samay bindision. Inkuanen Esau ed sikaton dili, “Asingger lay ipatey nen amak tan say panermen ed sikato; kasumpal to ya, pateyen koy Jacob.”
42Balet arengelan nen Rebeca so getma nen Esau, kanyan impatawag toy Jacob tan inkuanto, “Dengel ka, getma nen Esau ya agim so ombawi diad pamatey tod sika. 43Natan, anak ko, gawam so ibagak ed sika. Mamparaan ka tan lakan tampol ed kinen Laban ya agik, diad Haran. 44Miayam kad sikato, anggad kinmepa lay pasnuk nen agim, 45tan alingwanan to lay ginawam ed sikato. Mangibaki ak ed satan na mangawit ed sika. Ag ko labay a nabalang ta kayon dua ed saksakey ya agew.”
Si Isaac Imbaki tod kinen Laban si Jacob
46Inkuanen Rebeca ed kinen Isaac, “Agaylay irap ko tan onsasawa ak lad saray taga arum a bansa ya asawa nen Esau. No mangasawa met si Jacob na sakey ed saray Hetea a singa sikara, maung ni laingey inatey ak.”
Currently Selected:
Genesis 27: MBBPAN83
Highlight
Share
Copy
Want to have your highlights saved across all your devices? Sign up or sign in
Maung a Balita Biblia © Philippine Bible Society, 1983
