Genesis 31
31
Tinaynan nen Jacob si Laban
1Nadngelan nen Jacob a kuan na saray lalakin anak nen Laban, “Inala nen Jacob so amin a kayaryan nen ama tayo. Nanlapud ama tayo so amin a kayamanan to.” 2Alikas to met a nanaoman lay panangaro nen Laban ed sikato. 3Insan inkuan na Katawan ed sikato, “Pawil ka lad dalin na saray atateng mo tan saray kakanayon mo. Olupen ta ka.”
4Kanyan nampabakian nen Jacob ira di Raquel tan Lea ya abeten dad alog a kawalaan da ray ayayep to. 5Inkuantod sikara, “Nalilikas kon mangooman lay panangarod siak di ama tayo; balet aasikasoen ak lawas na Dios nen amak. 6Kabat yon dua ya inyoput koy biskeg ko ed impanlingkur kod ama yo. 7Anggaman ontan, sinaol da ak tan amimpulon inooman day upak. Balet ag inyabuloy na Dios a napasakitan da ak. 8Nen inkuandi ama tayon Laban, ‘Saray baklayan a kanding so upam,’ nananak na baklayan iray kabatyan. Nen inkuanda, ‘Saray gulisan a kanding so upam,’ nananak na gulisan iray kabatyan. 9Inala na Dios iray ayayep nen ama yo tan inter to rad siak.
10“Nen panaon na panagkasta, walay kogip ko. Anengneng kon saray kalakyan a kanding a mankakasta et gulisan, batekan, tan baklayan so kolor da. 11Inkuan ed siak na anghil na Dios diad kogip, ‘Jacob!’ ‘On, wadya ak,’ ebat ko. 12Intuloy ton inkuan, ‘Nengneng mo, amin a kanding a kalakyan a mankakasta et gulisan, batekan, tan baklayan ira. Gagawaen ko ya, ta nanenengneng koy gagawaen nen Laban ed sika. 13Siak imay Dios a pinmayawar ed sika diad Betel, a dimay angipaalageyan moy bato a pakanudnunotan tan insaklang mon masanto ed siak—tan diman met so nanggawaan moy sakey a sinambaan a sipan ed siak. Natan mamparaan ka, taynan kad sayan dalin tan pawil kad dalin a nianakan mo.’”
14Inmebat ira di Raquel tan Lea, “Anggapo lay nakdaan a tawiren mid ama mi. 15Singa kami la sangkailid sikato. Inlako to kami, tan inggastos to lan amin so kuartan nanlakoan tod sikami. 16Amin iray kayamanan ya inalay Dios ed kinen ama mi et kayaryan mi tan kayaryan na saray anak mi. Sumpal moy imbaga na Dios ed sika.”
17-18Namparaan sirin si Jacob ya ompawil ed kinen ama to diad dalin na Canaan. Impakabayo tod saray kamilyo iray anak to tan saray asawa to, tan pinaona to ray amin ya ayayep to tan antokaman a kayaryan a nalmoan tod Mesopotamia. 19Linmay Laban a mangatlid saray karniro to; et nen andid man ed abung, tinakew nen Raquel iray talintaoy diriyos na pamilya tan kayaryan nen ama to. 20Pinalikdo nen Jacob si Laban diad ag to impangibagay itaynan to. 21Inawit ton amin iray kayaryan to tan ginanatan toy tinmaynan. Binaliw toy Ilog na Eufrates tan amaarap ed Palandey na Galaad.
Inosilan nen Laban si Jacob
22Kalabas na taloy agew nibagad kinen Laban a tinmaynan si Jacob. 23Intagar to ray totoo to tan inosilan ton pitoy agew si Jacob, et nabot to ed palandey na Galaad. 24Diad kogip nen Laban ed saman a labi, linmay Dios ed sikato tan inkuanto, “Manalwar ka! Ag mo didiwiten a balut si Jacob.” 25Nanayam si Jacob ed kapokdulan, balet si Laban tan saray kakanayon to et nankampo rad kapokdulan na Galaad.
26Inkuanen Laban ed kinen Jacob, “Akin et pinalikdo mo ak diad impangawit mod saray bibiin anak ko a singa ra asamsam ed bakal? 27Akin et pinalikdo mo ak diad inyalis mon ag ko amta? No imbagam labat komun ed siak, pinasiput ta kan walay liket, kansion, tan togtog na saray arpa tan pandirita. 28Ag mo anggan impaanguban iray apok tan saray anak ko kasakbay dan inmalis. Makapoy man a ginawam! 29Walay pakayarik a mamasakit ed sika, balet pinasakbayan ak na Dios nen amam ya ag ta kan balut diwiten. 30Kabat kon tinmaynan ka, lapud labay mo lay makasempet ed abung mo, balet akin et tinakew mo ray diriyos ko?”
31Inmebat si Jacob, “Antakot ak, ta inisip kon alaen yod siak iray anak yon bibii. 32Balet no narumog yo dia iray diriyos yo, nakaukolan a pateyen so siopaman a pakarumogan. Nia ray lalakin mantasi. Mananap kayoy antokaman a kayaryan yo tan ala yoy gawa yo.” Ag amta nen Jacob a tinakew nen Raquel iray diriyos nen Laban.
33Sinukisok nen Laban so tulda nen Jacob; insan linmoob ed tulda nen Lea tan diad tulda na saramay duaran aripen a bibii, balet ag to arumog iray diriyos to. Linmoob ed satan diad tulda nen Raquel. 34Balet inala la nen Raquel ira may diriyos, inkarga to rad supot ya apis na beneg na kamilyo, insan to inirungan. Inanap ira nen Laban diad intiron tulda, balet ag to ra narumog. 35Inkuanen Raquel ed kinen ama to, “Ag yo ak pamapasnukan; ta ag ak makaalagey ed arap yo, ta sinmabid siak so binulan a sakit min bibii.” Inanap nen Laban iray diriyos to, balet ag to ra nalmo.
36Naingungotan si Jacob. Inkuanto, “Antoy kasalanan a ginawak? Antoy ganggan a sinumlang ko, et naitdan kayoy kanepegan a mangosil ed siak? 37Natan ta inonaan yo lan amin iray kayaryan ko, antoy nalmo yon kagawaay abung a kayaryan yo? Ipaway yo diad arap na totook tan totoo yo, pian nanengneng da tan nasintinsiaan da no siopay nalilingod sikatayo. 38Duamploy taon ko lad sikayo; ag tinmondan nananak iray karniro tan saray kanding yo, tan ag ak angan na anggan sakey a kordiro. 39No walay karniron pinatey na ayep ed takel, inakok so inkaandi to; ag ko la inyakar ed sikayo, pian ag yo la naamtaan a siak so akankasalanan. Pinasoot yo ak a mambayar ed amin ya atakew ed agew man o labi. 40Naynay ak a nanirap, lapud petang na agew tan betel na labi. Ag ak makaogip. 41Onyay agawgawa diad loob na duamploy taon kod sikayo. Labinapat a taon so impankimey ko pian naalak iray bibiin anak yo, tan anem taon pian naalak iray ayayep yo. Anggaman ontan, amimpulon inooman yoy upak. 42No ag ak labat tutulongan na Dios da ray atateng ko, say Dios ya inggalang di Abraham tan Isaac, pinataynan yo ak la komun a kalima-lima. Balet anengneng na Dios so gunigon ko tan say kimey ko; kalabyan inter to lay sintinsia to.”
Say Paknaan di Jacob tan Laban
43Inmebat si Laban ed kinen Jacob, “Anak ko ra yan bibii, kayaryan ko ray anak da, tan kayaryan ko met ira yan ayayep. Kayaryan koy amin a nanenengneng mo dia. Balet anggapoy nagawaan kon mamokpok ed saray anak ko tan saray anak da. 44Kanyan sipaparaan aka mipaknaan ed sika. Mangibunton tay bato a pakanudnunotan ed sayan paknaan ta.”
45Angala sirin na bato si Jacob tan impaalagey tod man a sakey a pakanudnunotan. 46Ingganggan to ray totoo to a mantipon iray bato tan ibunton da. Insan angan ira diad abay to may bunton. 47Inngaran nen Laban iman a pasen na Jegar-sahaduta;#31:47 JEGAR-SAHADUTA: “Say bunton a mangipanunot ed sikatayo” so kabaliksan na sayan ngaran diad salitay Aramaico. si Jacob balet inggaran to na Galeed.#31:47 GALEED: “Say bunton a mangipanunot ed sikatayo” so kabaliksan na sayan ngaran diad salitay Hebreo. 48Inkuanen Laban ed kinen Jacob, “Sayan bunton na bato so mangipanunot ed sikatan dua.” Sikato yay makasengeg ya atawag na Galeed iman a pasen. 49Inkuan met ni nen Laban, “Bantayan ita komun na Katawan legan a nanarawiyan ita.” Kanyan atawag met iman a pasen na Mispa.#31:49 MIZPA: Say tanul na sayan ngaran kapara toy Hebreon salita a kabaliksan toy “say pasen a pambantayan.” 50Intuloy nen Laban ya inkuan, “No makapoy so ipatnag mod saray anak ko, o mangasawa ka na arum a bibii, anggaman ya ag ko amta, ag mo lilingwanan a bambantayan ita na Dios. 51Nia ray baton imbunton ko ed nanleetan ta, tan niay baton pakanudnunotan. 52Sayan bunton na bato tan sayan baton pakanudnunotan et sikaray manangipanunot. Ag kon balut onlad labas to yan bunton a dogpaan ta ka, tan ag kan balut oonlad labas to yan bunton o labas to yan baton pakanudnunotan a dogpaan mo ak. 53Say Dios nen Abraham tan say Dios nen Nacor#31:53 ABRAHAM…NACOR: Si Abraham et laki nen Jacob tan si Nacor et ama nen Laban. so manintinsiad sikatan dua.” Insan diad ngaran na Dios ya inggalang nen ama ton Isaac, sinambaan nen Jacob a tooren to yan sipan. 54Amatey na sakey ya ayep tan imbagat tod man ed palandey, insan to inimbitaan a mangan iray totoo to. Kasumpal dan angan, pinalabas day labi diad saman a palandey. 55Kabkabwasan, inaanguban nen Laban iray apo to tan saray anak ton bibii a pamasiput tod sikara, insan la sinmempet.
Currently Selected:
Genesis 31: MBBPAN83
Highlight
Share
Copy
Want to have your highlights saved across all your devices? Sign up or sign in
Maung a Balita Biblia © Philippine Bible Society, 1983
