Genesis 32
32
Si Jacob Namparaan a Mangabet ed kinen Esau
1Intuloy nen Jacob so pankukurang to. Inabet na pigaran anghil. 2Nen anengneng to ra, inkuanto, “Kampo ya na Dios”; kanyan inngaran to man a pasen na Mahanaim.#32:2 MAHANAIM: “Duaran kampo” so kabaliksan to yan ngaran diad salitay Hebreo.
3Angibakiy Jacob na totoo to ed kinen agi ton Esau diad dalin na Edom. 4Imbilin tod sikaran onyay ibaga ra: “Siak a si Jacob, say mapaabeban aripen mo, ipapakabat kod sika Esau, ya abayag ak a nanayam ed kindi pangamaen tan Laban tan natan ak labat ompawil. 5Wala ray bakak, asno, kanding, karniro, tan aripen ko. Imbakik ed sika ra yan totoo, ta labay koy mipulangan ed sika.”
6Nen pinmawil ed kinen Jacob ira may imbaki to, inkuanda, “Linma kamid kinen agim ya Esau, tan wala lad dalan a mangabet ed sika. Kaiba toy apat a lasus a lalaki.” 7Ataktakot tan agunigon si Jacob. Impankadwa to ray totoon kaiba to, saray karniro, kanding, baka, tan saray kamilyo. 8Inkuantod sikaton dili, “No dogpaan toy onaan ya olup, nayarin makabatik so walad onur ya olup.”
9Insan nampikasiy Jacob, “Dios nen lakik ya Abraham tan Dios nen amak ya Isaac, dengel mo ak pa! Imbagam ed siak, Katawan, ya ompawil ak ed dalin ko tan saray kakanayon ko, tan ag mo ak paolyan pian maung so pansumpalan ko. 10O matoor a Katawan, ag ak manepeg a mangawat na panangarom tan panangasim ya impatnag mod siak a mapaabeban aripen mo. Binaliw koy Jordan ya anggapoy awit ko no ag say baston labat, balet natan pinmawil ak a kaibak ira yan duaran olup. 11Kerewen kod sika ya iyagel mo ak ed kinen Esau. Antakot ak ta ompan onla dian ondogpad sikami et pateyen to kamin amin, pati saray bibii tan saray ogogaw. 12Ag mo pa lilingwanan ya insipan mon ag mo ak paolyan pian maung so pansumpalan ko; insipan mo met ya itdan mo ak na saray kabyangay boleg ko a diad kinarakel da et ag ira nabilang, ta singa kinarakel na buer ed gilig na dayat so bilang da.”
13-15Kasumpal na impamalabas day labid man, nampiliy Jacob ed saray ayayep to na irigalo tod kinen Esau: duan lasus a kabatyan a kanding tan duamplon kanding a kalakyan, duan lasus a kabatyan a karniro tan duamplon karniron kalakyan, talomplon kamilyon mampapasuso tan saray kilaw da, apataplon kabatyan a baka tan samploran bakan kalakyan, duamplon kabatyan ya asno tan samploran asno a kalakyan. 16Impansisian to rad pigaran grupo tan impaasikaso tod sakey ya aripen to so balang grupo. Inkuantod sikara, “Onona kayo, balet panaarawian yoy balang sakey a grupo.” 17Imbilin tod walad onaan ya aripen, “No naabet moy Esau a kuyak tan tepeten to, ‘Siopay amom? Iner so laen mo? Siopay akankien ed saray ayayep a walad onaan mo?’ 18onyay iyebat mo, ‘Kien ira nen aripen mon Jacob. Ipapayakar to ran rigalo ed kuya ton Esau.’” 19Onya met so imbilin tod kumadwan aripen, say kumatlo, tan amin da ni ray arum a managasikasoy ayayep: “Onyay ibaga yod kinen Esau no naabet yo: 20‘On, say aripen yon Jacob et wadtad bandad onur.’” Inisip nen Jacob a diad pangiter to na rigalo napakepa toy pasnuk nen Esau, tan no naabet to, pirdonaen da. 21Impaiyona to la ra may rigalo to, tan naogip nid kampo to diad saman a labi.
Akibalsakan si Jacob
22Diad saman lamlamang a labi, binmangon si Jacob, intagar to ra may duaran asawa to, saramay duaran inamung ton aripen a bibii, tan saramay labinsakey ya anak to, insan da binaliw so Ilog na Jabok. 23Kasumpal to ran pinabaliw, impaibaliw to met iray amin a kayaryan to, 24balet tinmilak a bukbukor to.
Insan sinmabiy sakey a too tan akibalsakan ed kinen Jacob ya anggad palbangon. 25Nen alikas na samay too ya ag manalo, pinoniti tod tapi si Jacob, et apiley. 26Inkuanto may too, “Paonlam ak la, ta asingger lay kabwasan.”
“Andi, no ag mo ak ni bindisionan,” ebat nen Jacob.
27“Antoy ngaran mo?” tepet na samay too.
“Jacob,” ebat to.
28Inkuanto may too, “Aliwa lan Jacob so ngaran mo. Akibalsakan kad Dios tan saray totoo, et analo ka; kanyan Israel#32:28 ISRAEL: Say tanul na sayan ngaran kapara toy Hebreon salita a kabaliksan toy “mibabalsakan ed Dios” odino “mibabalsakan so Dios.” la so ngaran mo.”
29Inkuanen Jacob, “Ibagam met sirin so ngaran mo.”
Balet inmebat, “Akin et labay mo nin naamtaan so ngaran ko?” Binindisionan tod satan si Jacob.
30Inkuanen Jacob, “Anengneng koy Dios ed lupa-lupaan, et mabilay ak ni”; kanyan inngaran toy Peniel#32:30 PENIEL: Say tanul na sayan ngaran kapara toy Hebreon salita a kabaliksan toy “say lupa na Dios.” iman a pasen. 31Pinmaway lay agew nen ontataynan lay Jacob manlapud Peniel; mankitley lapud samay tapi to. 32Anggad natan, ag mangakan iray kabyangay boleg nen Israel na laman na tapi, ta diad sayan laman so aponiti ed kinen Jacob.
Currently Selected:
Genesis 32: MBBPAN83
Highlight
Share
Copy
Want to have your highlights saved across all your devices? Sign up or sign in
Maung a Balita Biblia © Philippine Bible Society, 1983
