Genesis 33
33
Inabet nen Esau si Jacob
1Anengneng nen Jacob si Esau a nitan lan kaiba to ray apat a lasus a totoo to, kanyan inapag to ray ogogaw ed kindi Lea, Raquel, tan saramay duaran bibiin aripen to. 2Walad onaan ira may aripen tan saray anak da, insan mantombuk si Lea tan saray anak to, tan diad onur si Raquel tan si Jose. 3Inmonay Jacob ed sikaran amin tan nandakmomon amimpito legan ya onaasingger ed kinen agi to. 4Balet binatik nen Esau ya inabet, nilakap to, insan to inanguban. Manakis iran dua. 5Nen anengneng nen Esau ira may bibii tan saramay ogogaw, tinepet to, “Siopa ra yay kaibam?”
Inmebat si Jacob, “Sikara yay ogogaw ya inter na Dios ed siak lapud panangaro to.” 6Inmasingger ira may aripen tan saramay anak da tan dinmakmomo ran angigalang; 7sinmoblay si Lea tan saramay anak to, tan say kaonuran si Jose tan si Raquel.
8Tinepet nen Esau, “Antoy kabaliksan da ra may onaan a nabet ko?”
Inmebat si Jacob, “Rigalok ira man ed sika, ta labay koy mipulangan ed sika.”
9Balet inkuanen Esau, “Malaem la ray kayaryan ko, agi; kien mo la ray kayaryan mo.”
10Inkuanen Jacob, “Andi komun. No talagan pirdonaen mo ak, awat moy panangarok. Say pakanengneng kod lupam et singa pakanengneng kod lupa na Dios, natan ta maung so impatnag mod siak. 11Awat mo kariy panangarok ya awit kon para sika, kinasian ak na Dios, ta inter ton amin iray nakaukolan ko.” Ag to tinondaan ya anggad inawat nen Esau ira may rigalo.
12Inkuanen Esau, “Onla itayo la. Siak so onona.”
13Inmebat si Jacob, “Naksawan tan makapoy la ra yay ogogaw, insan sakey ni, nakaukolan ya asikasoen ko ra yay karniro tan baka tan saray kilaw da. No dagdagen iran manakar a masiglat ed sanagew labat, ompatey iran amin. 14Onona ka la, ta ontombuk ak lan mantantan. Manakar kami, onung na anggaay nayarian na saray ayayep tan saray ogogaw, anggad naabot ta kad Edom.”
15Inkuanen Esau, “No ontan sirin, mangitilak ak ed sika na pigaran totook.”
Balet inkuanen Jacob, “Andi-bali la tan; masarag lay impamirdonam ed siak.” 16Kanyan diad saman ya agew, amaarap lad Edom si Esau. 17Si Jacob balet linmad Sukot tan diman angipaalagey na dilin abung to tan saray salimbengan na ayayep to. Kanyan atawag na Sukot#33:17 SUKOT: “Saray salimbengan” so kabaliksan to yan ngaran diad salitay Hebreo. iman a pasen.
18Nen ompawil si Jacob a manlapud Mesopotamia, maliket ya akasabid Sikem diad sakop na Canaan, tan nankampod sakey ya alog ya asingger ed siudad. 19Sinaliw to man a parti na alog ed saray kabyangay boleg nen Hamor ya ama nen Sikem; sanlasus a kuartan pilak so imbayar to. 20Nanggawad may sakey ya altar tan nginaranan to para El, say Dios na Israel.
Currently Selected:
Genesis 33: MBBPAN83
Highlight
Share
Copy
Want to have your highlights saved across all your devices? Sign up or sign in
Maung a Balita Biblia © Philippine Bible Society, 1983
