Genesis 40
40
Impatalus nen Jose iray Kogip na Duaran Priso
1Ag abayag, nankasalanan ed ari so inkargadoy alak tan say pangulon panadiro ed palasio. 2Diad pasnuk na arid sikara, 3impaipriso to rad abung na kapitan da ray guardia, a diman met so akaiprisoan nen Jose. 4Abayag irad prisowan, tan samay kapitan impasen toy Jose a mangasikasod sikara.
5Aminsan a labi, diman ed prisowan, nankogip imay inkargadoy alak tan samay pangulon panadiro; nandomaan iray kogip. 6Nen linmad sikara si Jose diad kabwasan, anengneng ton nagugunigon ira. 7Tinepet to, “Akin et nengneng yoy nagugunigon ed sayan agew?”
8Inmebat ira, “Walay kogip na balang sakey ed sikami, et anggapo diay makapangipatalus.”
“Say Dios so manangipatalus,” inkuanen Jose. “Ibaga yod siak ira tay kogip yo.”
9Kanyan inkuanto may inkargadoy alak ed palasio, “Diad kogip ko, walay tanaman ya ubas ed arap ko 10a taloray sanga to. Kapaway na saray bolung, nanrosas, tan aluto ray bunga. 11Sankabembenan koy kupa na ari, kanyan inalak ira may bungay ubas tan pinespes ko rad kupa, insan ko inter ed ari.”
12Inkuanen Jose, “Niay talus to: saramay taloran sanga kabaliksan day taloran agew. 13Kalabas na taloy agew, ibolus kay ari, pirdonaen to ka, tan ipawil to kad gendat a kimey mo. Iderew mod sikatoy kupa, a singa gagawaen mo nen sikay inkargado na alak to. 14Balet kerewen ko pad sika a no maung lay kipapasen mo et salita mo ak met ed kinen ari, pian natulongan mo ak ya ompaway ed sayan prisowan. 15Diad tuay tua, inala ak labat ed dalin da ray Hebreo, tan anggan diad Egipto anggapoy ginawak a makasengeg na kaprisoan ko.”
16Nen naamtaan na samay pangulon panadiro a maung so impangipatalus nen Jose ed kogip na samay inkargadoy alak ed palasio, inkuanto, “Wala met so kogip ko; sankaagtok so taloran pananginay tinapay. 17Diad samay pananginan a walad tapew, wadman ya amin so klasiy kakanen a para ari, balet totoktoken na saray manok.”
18Inmebat si Jose, “Niay talus to: saramay taloran pananginay tinapay kabaliksan day taloran agew. 19Kalabas na taloy agew, ibolus kay ari—balet papotul toy olom! Insan paibitin tod tiken so kabalgan mo, et kanen na saray manok so bangkay mo.”
20Kalabas na taloy agew, nen agew na inkianak na ari, angiparaan na ponsia a para amin ya opisyal to; impaipaway to may inkargadoy alak ed palasio tan samay pangulon panadiro to tan inyarap to rad saray opisyal to. 21Pinapawil to may inkargadoy alak ed gendat a kimey to, 22balet impapatey to may pangulon panadiro. Agawan amin ira may imbaga nen Jose, 23balet ag lan balut anunotan na samay inkargadoy alak si Jose—alingwanan to lan amimpinsan.
Currently Selected:
Genesis 40: MBBPAN83
Highlight
Share
Copy
Want to have your highlights saved across all your devices? Sign up or sign in
Maung a Balita Biblia © Philippine Bible Society, 1983
