Genesis 41
41
Impatalus nen Jose iray Kogip na Ari
1Kalabas na duay taon, kinogip na arid Egipto a sikatoy manalalagey ed pandel na Ilog na Nilo. 2Kabebekta pinmaway ed ilog so pitoran baka a mararakep tan matataba, tan nankakabkab ira na dika. 3Insan pinmaway met so pitoran baka a mapmabeng tan kapokepokel. Inmasingger ira ed saramay onaan a pitoran baka ed pandel na ilog. 4Insan saramay mapmabeng a baka kinan da ra may matataban baka. Abangon ed satan so ari. 5Akaogip ni tan nankogip lamet. Pinmaway ed sakey a sengeg so pitoran dawa a maiiyan tan mataktakken. 6Insan pinmaway met so pitoran dawa ya apa tan amaga ra, lapud adalan ira na dagem a nanlapud kalawakan. 7Saramay pitoran dawa ya apa inakmun da ra may pitoran maiiyan. Aliing so ari, tan naamtaan ton nankogip. 8Kaimbuas agunigon, kanyan impaawit to ray amin a salamangkiro tan saray makabat a lalaki ed Egipto. Imbaga tod sikara iray kinogip to, balet anggapoy makapangipatalus ed sikara.
9Insan samay inkargadoy alak inkuantod ari, “Akoen kod sayan agew a nankasalanan ak. 10Nen nampasnuk kad siak tan samay pangulon panadiro, impaipriso mo kami ed abung na kapitan da ray guardia. 11Aminsan a labi, nankogip kami, et nandomaay talus da ra may kogip mi. 12Walad may kaiba min sakey a Hebreon malangwer ya aripen na kapitan da ray guardia. Imbaga mid sikato ra may kogip mi, insan to ra impatalus. 13Tinmua ya amin so imbaga to: impawil mo ak ed gendat a kimey ko, balet pinatey mo may panadiro.”
14Impaawit nen ari si Jose, kanyan nipaway a tampol ed prisowan. Kasumpal ton nambalbas tan nampales, pinmarontal ed ari. 15Inkuan na arid sikato, “Walay kogip ko, et anggapoy makapangipatalus. Abalitaan kon nayarian moy mangipatalus na kogip.”
16Inmebat si Jose, “Ag ko nayarian, Kagalang kon Ari; balet say Dios so makapangiter na dugan talus na kogip.”
17Inkuan na ari, “Kinogip kon manalalagey ak ed pandel na Ilog na Nilo. 18Kabebekta sinmakbit a nanlapud ilog so pitoran baka a mararakep tan matataba, tan nankabkab ira na dika. 19Insan sinmakbit met so pitoran baka a mapmabeng tan kapokepokel. Sankaaliwaan iran bakan anengneng kod intiron Egipto. 20Saramay mapmabeng a baka kinan da ra may matataba, 21balet ag nabaloan so impangan da, ta ag met naoman so nengneng da. Abangon ak ed satan. 22Kinogip ko met ya anengneng kon pinmaway so pitoran dawa a maiiyan tan matatakken. 23Insan pinmaway met so pitoran dawa ya apa tan amaga, lapud adalan na dagem a nanlapud kalawakan. 24Saramay pitoran apa a dawa inakmun da ra may pitoran maiiyan. Imbagak ira yan kogip ko ed saray salamangkiro, balet anggapod sikaray makapangipatalus ed siak.”
25Inkuanen Jose, “Saksakey so talus da ra yan duan kogip mo; imbagay Dios ed sika so gawaen to. 26Saramay pitoran baka a matataba kabaliksan day pitoran taon, tan saramay pitoran dawa a maiiyan kabaliksan da met so pitoran taon; saksakey so kabaliksan da. 27Saramay pitoran baka a mapmabeng a sinmakbit, tan saramay pitoran dawa ya apa tan amagaan lapud adalan na dagem a nanlapud kalawakan, kabaliksan day pitoy taon a walay eras. 28Onung na imbagak lad sika, impanengneng na Dios ed sika so gawaen to. 29Onsabiy pitoy taon a walay inawa ed intiron dalin na Egipto. 30Kasumpal to ya, ontombuk so pitoy taon a walay eras; nalingwanan ira may maung a taon, ta say eras deralen toy intiron bansa. 31Nalingwanan imay panaon na inawa, ta ontombuk so mapalalon eras. 32Say impakapidwa na kogip mo kabaliksan to a say Dios tinibokel to lad kanunotan to yan gawaen, tan asingger lan nagawa.
33“Natan mamili kay sakey a toon makabat tan maisip, tan ipasen mon inkargado ed intiron bansa. 34Mamili ka met na saray arum ya opisyal a mantipon na kakalima na amin a bungay dalin legan na pitoy taon a daakan so naani. 35Patipon mon amin iray kakanen legan na saray onsabin maung a taon, tan itdan mo ray pakaoley a mangisinup ed kamalir diad saray siudad, tan pabantayan mo ra. 36Saray taganon atipon igana ran para saray onsabin pitoran taon a walay eras ed Egipto, pian ag naerasan iray totood Egipto.”
Nagmaliw a Gobirnador ed Egipto si Jose
37Sayan plano inabubonan na ari tan saray opisyal to, 38tan inkuantod sikara, “Anggapo lay naalmo tayon magmaung a too nen say si Jose, ta walad sikato so ispiritu na Dios.” 39Inkuan na ari ed kinen Jose, “Impanengneng na Dios ed sika yan amin, kanyan anggapoy ontalonad sika ed kakabatan tan kaisipan. 40Ipasen ta kan inkargado ed bansak, tan onuren na totook iray amin a ganggan mo. Sikay onkumadwad siak ed pakaoley. 41Toroen ta ka natan a gobirnador na intiron Egipto.” 42Inekal na ari so singsing to a panagmarka, insan to insolung ed gamet nen Jose. Sinolungan toy kawes a linen, tan initdan toy kadinan balituk a para beklew to. 43Impaikana to ed kinen Jose so kumadwan karwahi to, insan saray guardiad palasio nambabando rad onaan to, “Paliis kayo! Paliis kayo!” Onya so inkatoro nen Jose a gobirnador ed intiron Egipto. 44Inkuan na ari ed sikato, “Siak so ari, sikay onkumadwa, et anggapod intiron Egipto so makagawa na antokaman no anggapoy abuloy mo.” 45-46Initdan toy Jose na balon ngaran: Zafenat-panea. Initdan to met na asawa a si Asenat ya anak nen Potifera a pari ed siudad na Heliopolis.
Mantaoy talomplo si Jose nen ginmapon manlingkur ed ari na Egipto. Nampatanir ed ari tan nanliber-liber ed intiron Egipto. 47Legan na pitoy taon na inawa, amayamay so naani. 48Tinipon nen Jose ray amin a naani legan na saramay pitoy taon, tan inkamalir to rad saray siudad. Diad balang siudad tinipon to ray naani ed kaalogan a kaabay to. 49Singa karakel na buer ed dayat so atipon to. Diad karakel da, tinondaan to la ran sinukat.
50Kasakbayan a sinmabi ra may taon na eras, awalaay Jose na duaran anak a lalaki diad kinen asawa ton Asenat. 51Inkuanto, “Impalingwanan na Dios iray amin a kairapan ko a pati say pakakailiw kod pamilya na amak”; kanyan inngaran to na Manases#41:51 MANASES: Say tanul na sayan ngaran kapara toy Hebreon salita a kabaliksan toy “inawa.” imay pangulowan ya anak to. 52Inkuanto met, “Say Dios initdan to ak na anak ed sayan dalin a paniirapan ko”; kanyan inngaran to na Efraim#41:52 EFRAIM: Say tanul na sayan ngaran kapara toy Hebreon salita a kabaliksan toy “itdan na saray anak.” imay kumadwan anak to.
53Nansamput ira may pitoy taon na inawa ed Egipto, 54tan ginmapo lay pitoy taon na eras, onung na samay imbaga nen Jose. Walay eras ed arum a bansa, balet walay nakan na saray totoo ed intiron Egipto. 55Nen anggapo lay nakan da ray Egipsio, linma rad ari. Inkuantod sikara, “Laka yod kinen Jose tan gawa yoy ibaga to.” 56Nen kinmayat so eras ed intiron bansa, inlokas nen Jose iray amin a kamalir tan nilakoan to ray Egipsio, ta mapalalo lan tuay eras. 57Linmad Egipto iray katoowan ed intiron mundo ta nansaliw iray tagano ed kinen Jose, lapud mapalalo lay eras ed inerman a pasen.
Currently Selected:
Genesis 41: MBBPAN83
Highlight
Share
Copy
Want to have your highlights saved across all your devices? Sign up or sign in
Maung a Balita Biblia © Philippine Bible Society, 1983
