Luka 9

Jeso unaahuma anafunzie kumi na airi

(Matayo 10:5-15; Mariko 6:7-13)

1Jeso waaiha phamwenga aratʼu ahumwae kumi na airi, achiapʼa widimi dzulu ya pʼepʼo osi na widimi wa kuphoza makongo, 2na phapho achiahuma ende akasumurire dzulu ya Ufalume wa Mulungu, na aphoze makongo. 3Yiye waamba ahumwae vivi, “Mutsʼitsukule chochosi kuko mwendako: kala ndatʼa, mukʼoba, leu, pʼesa, hebu hata valo ra kʼanda. 4Na nyumba yondapiga hodi na mupigwe karibu, sagalani mumo ukati muchikala munafunza hata phondaukira kadzidzi kako. 5#Mahe 13:51#Luk 10:4-11Phatʼu phophosi pharipho enye andarema kumupiga karibu, ukani, na muchikala munalaa phapho kadzidzini, kutʼani-kutʼani vumbi rondakala ririro mwenu maguluni, kwaonyesa kukala, andamanya enye.” 6Ndo ao anafunzi a Jeso achanza charo, achichira na vidzidzini kuno anasumurira Nguma Mbidzo na kuphoza akongo chila phatʼu.

Herode unayugwa ni nguma za Jeso

(Matayo 14:1-12; Mariko 6:14-29)

7 # Mat 16:14; Mar 8:28; Luk 9:19 Herode#9:7 Herode yuyu wakala ni Herode Anitipa. mutawali wa Galilaya ariphosikira nguma dzulu ya maneno gosi gokala ganahendeka, wayugika muno mwakwe moyoni, kwakukala, anjine ákala achiamba, “Johana wafufulwa kulaa kuzimu.” 8Anjine ao ákala achiamba, “Eliya ulairira,” na anjine áamba, “Mumwenga wa agomvi a Mulungu a pʼindi ufufuka.” 9Ela Herode yiye achiamba, “Yiye Johana námulagizira achitoswa chitswa, sambi ni ani yiye nimusikiraye ngumaze?” Kwa vivyo, achikala una pʼola amone Jeso muno.

Atʼu odzichira helufu tsʼano anahewa leu

(Matayo 14:13-21; Mariko 6:30-44; Johana 6:1-14)

10Anafunzi a Jeso ariphouya, ámwambira Jeso gosi gokala adzigahenda kuko kwao charoni, na Jeso achiuya na ao tu hichiyao hata kadzidzi ka kuko Betisaida. 11Ela ao atʼu ariphomanya kukala yiye wakala udziuka, ámutuwa, na ariphokwendamona, Jeso achiapiga karibu, achiasumurira nguma dzulu ya Ufalume wa Mulungu, na achiaphoza okala ni akongo.

12Dzuwa phokala rinalewalewa, aratʼu anafunzie kumi na airi ámwendera achimwamba, “Alage aa atʼu kwa hata ende vidzidzini na mindani yiriyo phephi-phephi, akadzipatire maleu na mutʼu mwa kulala, mana, phapha huripho bee ni nyika.” 13Ela yiye Jeso achiaamba, “Apʼeni mwimwi leu arye.” Ao achimuudzidza achimwamba, “Huriyo nayo ni mikahe mitsano na mabeshe mairi tu, hata kʼahumanya hwende hukaagulirephi leu, ela bee hata kʼahumanya kumba hundarigulaphi leu ra kwamvunya atʼu aa osi!” 14Maana, phákala phana alume apatao helufu tsʼano phapho. Jeso phapho achiaamba anafunzie vivi, “Aambireni atʼu asagale maduu-maduu ga atʼu mirongo mitsano-mitsano ahewe leu.” 15Anafunzi achihenda vyokala adzambwa, na atʼu osi achisagala. 16Jeso achiyihwala yiyatʼu mikahe mitsano na garatʼu mabeshe mairi, achilola dzulu mulunguni, achilavya mumvera kwa Mulungu, chisha achanza kuyimega-mega, na achiapʼa ao anafunzie aapʼe atʼu agavyane. 17Phapho atʼu osi achirya hata achimvuna, na anafunzi a Jeso achitsola-tsola visiku vya yiyo mikahe na vya gago mabeshe vyokala visala, na achiudzaza vikaphu kumi na viri.

Jeso ndiye yiye Kʼirisito

(Matayo 16:13-19; Mariko 8:27-29)

18Tsʼiku mwenga, Jeso wakala unavoya kʼanda hicheye, na anafunzie achenda phephi naye. Ndo yiye achiauza vivi, “Atʼu anaamba mino ni ani?” 19#Mat 14:1, 2; Mar 6:14, 15; Luk 9:7, 8Ao achimuudzidza achimwamba, “Atʼu anaamba uwe u Johana Mubatizi, anjine ao anaamba uwe Eliya, na hata anjine anaamba kukala uwe u mumwenga wa agomvi a Mulungu a pʼindi ariye wafufuka.” 20#Joh 6:68, 69Jeso achiauza kahiri achiaamba, “Hanga mwimwi, munaamba mino ni ani?” Pʼetero achimuudzidza achimwamba, “Uwe ndiwe yiye Kʼirisito wa Mulungu.”

Jeso unasema chimbere dzulu ya sheneneye na chifoche

(Matayo 16:20-28; Mariko 8:30-9:1)

21Jeso waafungira atsʼimwambire mutʼu maneno gago, 22na achenderera kugomba achiamba, “Ni seti mimi Mutʼu yelaa dzulu nituriswe muno, na niremwe ni atumia, makuhani abomu, na alimu a shariya. Na hata nindaulagwa, ela tsʼiku ya hahu nindafufuka.” 23#Mat 10:38; Luk 14:27Chisha, achiaambira atʼu osi vivi, “Mutʼu yeyosi ahenzaye kukala mwanafunzi wangu, ni seti ariche njiraze mwenye, atsukule musalabawe chila tsʼiku,#9:23 Mutʼu kutsukula musalabawe tsʼiku zizo vyakala vinaonyesa wendaulagwa. na anituwe. 24#Mat 10:39; Luk 17:33; Joh 12:25Maana, ahenzaye kutivya maishage mwenye, bee kʼandapata uzima uphya wa kare na kare. Ela alavyaye maishage kwa dzulu yangu, undapata uzima. 25Na vina faida yani mutʼu kuupata utajiri wosi wa dunia, ela yiye mwenye atsʼipate uzima? Kʼaphana! 26Mutʼu achinionera waibu mimi na mafunzo gangu, mimi Mutʼu yelaa dzulu nami nindakudzamonera waibu mutʼu yiye ukati mimi phondakudza na mungʼalo wangu, mungʼalo wa Baba Mulungu, na wa malaika atakatifu. 27Na ninamwambira jeri, phana anjine phapha ario kʼaandafa photsʼiwona Ufalume wa Mulungu.”

Jeso unagaluka chivinjine

(Matayo 17:1-8; Mariko 9:2-8)

28Jeso ariphogomba dzulu ya chifoche, wakala vivi hata zichichira tsʼiku nane hivi, ndo achiahwala ano Pʼetero, Johana na Jakobo, achenda nao hata dzulu mwangoni kwendavoya. 29Ariphokala unavoya, suraye yagaluka chivinjine, na hata mavaloge nago gachigaluka meruphe tsetsetse. 30Ndo phapho kare phachilairira atʼu airi achigomba naye, nao ákala ni agomvi a Mulungu Musa na Eliya, 31na ao álairira na mungʼalo wa Mulungu, achigomba naye dzulu ya vyokala undachimiza lengo ra Mulungu kwa kufa Jerusalemu. 32Pʼetero na anzie ákala arere jeri-jeri, ela achilamuka vivyo, achiwona uo mungʼalo wa Jeso, na aratʼu atʼu airi okala aimire phamwenga naye nao achiaona. 33Ndo ao atʼu airi phokala anauka, Pʼetero achimwamba Jeso vivi, “Mwalimu, ni vidzo vivi vya kukala naswi hu phamwenga phapha, ndo ima hujenge vibanda vihahu: chimwenga chako, chimwenga cha Musa, na chinjine cha Eliya.” Ela ujeri ni kwamba, kʼamanyire rokala unagomba.

34Pʼetero phokala unagomba gago, phálairira ingu phapho kare na richiima dzulu yao kwaerekeza, na ingu riro ririphoazizira dzuwa, aratʼu anafunzi áogofyerwa muno. 35#Isa 42:1; Mat 3:17; 12:18; Mar 1:11; Luk 3:22#2 Pet 1:17, 18Na laka kulaa kuko inguni richamba, “Yuyu ni Mwanangu yemutsagula, musirikiseni.” 36Ariphosikira laka riro, ámona Jeso u phapho hicheye, na ao ahumwa kʼaagahendere ngʼanzi na mutʼu yeyosi maneno gago gokala adzigaona.

Jeso unamuphoza mwanache mwenye pʼepʼo

(Matayo 17:14-18; Mariko 9:14-27)

37Kunadzachakwe, Jeso na ahumwae ariphokala ateremuka kulaa kuko mwangoni, duu bomu ra atʼu raonana nao. 38Phapho mutʼu mumwenga kati ya riro duu achigomba kwa laka ra dzulu achiamba, “Mwalimu, ninakuvoya umonere mbazi mwanangu, ariye ni yiye mumwenga tu, 39na una pʼepʼo ariye achimulokera unamupigisa kʼululu phapho kare, na achanza vivyo nikumufitisa na kumulavya fulo mulomoni hata akakala kʼadzimanya kahiri kwa masaa manji genye. 40Kala ni ano ahumwao náavoya amulavye, ela kʼaaidimire.” 41Phapho Jeso achiaamba, “Atʼu mwimwi kʼamuna kuluphiro, na muna dambi! Nindakala na mwimwi hata rini? Na nindamuvumirira hata rini?” Chisha achimwamba yiye mutʼu, “Hebu murehe yiye mwanao phano.” 42Ndo mwanache phokala unenda kwa Jeso, pʼepʼo achimubitʼa photsʼi, na achimufitisa. Ela Jeso achimuchemera yiye pʼepʼo, na mwanache achiphola na achihewa abaye. 43Atʼu osi phapho achangalazwa ni widimi ubomu wa Mulungu.

Jeso unagomba kahiri dzulu ya chifoche

(Matayo 17:22-23; Mariko 9:30-32)

Atʼu ariphokala acheri kwangalazwa ni maneno gokala gahendwa ni Jeso, Jeso waamba ahumwae vivi, 44“Hegani masikiro genu mugasikire chividzo maneno gaga: mimi Mutʼu yelaa dzulu nindalaviwa kwa atʼu ario andaniulaga.” 45Ela ao ahumwa kʼaamanyire maana, ya maneno gago, mana, maanaye yakala yifitsika kwa atsʼelewe, na ao achogopha kumuuza dzulu ya maneno gago.

Mubomu ni ani?

(Matayo 18:1-5; Mariko 9:33-37)

46 # Luk 22:24 Kwalairira kʼani kati ya ao ahumwa dzulu ya ni yuphiye kati yao yekala ni mubomu kuriko anzie osi. 47Ela Jeso yiye achimanya maazo gokala ga mwao myoyoni, na achimuhwala mwanache mudide achimwimisa mbereze 48#Mat 10:40; Luk 10:16; Joh 13:20na achiaamba, “Mutʼu amuphokeraye mwanache dza yuyu kwa dzina rangu, bee unaniphokera mimi, na aniphokeraye mimi, unamuphokera hata yuyatʼu yenihuma. Yiye ariye ni mudide kati yenu, ndiye mubomu kuchira mwimwi mosi.”

Yetsʼimupinga u upande wenu

(Mariko 9:38-40)

49Johana achimukatʼa ulimi achimwamba, “Bwana, hudzimona mutʼu mumwenga unalavya pʼepʼo kwa kuhumira dzinaro, naswi hukamukahaza, kwakukala, yiye bee tsʼiye mumwenga wehu.” 50Ela Jeso yiye achimwamba, “Mutsʼimukahaze mutʼu dza yiye, mana, yetsʼimupinga bee unavuhira kwenu.”

Asamariya anarema kumuphokera Jeso

51Ukati uriphokala u phephi na kufika wa Jeso kuhwalwa ende dzulu mulunguni, Jeso waamula kwenda Jerusalemu. 52Ndo waahuma adzumbe amulongolere, na ao achendaphenya kadzidzi kamwenga ka kuko Asamariya, kwa hata amubambanyire phatʼu. 53Ela achina phapho kʼaahenzere kudzamuphokera, kwakukala, wakala unamanyikana lwazu-lwazu kukala, u njirani kwenda Jerusalemu. 54#2 Afal 1:9-16Ndo anafunzie airi, Johana na Jakobo ariphoona gago áamba, “Bwana, unahenza huvoye Mulungu abitʼe moho kulaa mulunguni waoche atʼu ano?”#9:54 Nakala zinjine zinaonjeza: dza Eliya arivyohenda? 55Ela Jeso yiye achiagalukira achiagombera,#9:55 Nakala zinjine zinaonjeza: “Mwimwi kʼamumanya mwa roho yuphiye, mana mimi Mutʼu yelaa dzulu tsʼidzire kudzahangamiza maisha ga atʼu, ela nákudzaativya,” 56na achiuka phapho achenda kadzidzi kanjine.

Awiryao kukala anafunzi a Jeso

(Matayo 8:18-22)

57Phokala a njirani anenda, mutʼu mumwenga wamwamba Jeso vivi, “Mino nindakutuwa uwe kosi kondakwenda.” 58Ela Jeso yiye achiamba, “Mbewa ana miina, na nyama a kuburuka ana nyumba, ela mimi Mutʼu yelaa dzulu tsʼina phatʼu pha kwika mbavu.”

59Chisha achimwamba mutʼu munjine vivi, “Uwe nituwa.” Ela yiye achiamba, “Bwana, niricha nikazike baba mwanzo, ndo nidze nikutuwe.” 60Ela Jeso yiye achimwamba, “Ga mahanga garichire ao ario chiroho áfa, ela uwe hinde ukasumurire dzulu ya Ufalume wa Mulungu.”

61 # 1 Afal 19:20 Na mutʼu munjine achimwamba, “Bwana, uwe mino nindakutuwa, ela niricha mwanzo nikaalage atʼu angu.” 62Ela Jeso yiye achimwamba, “Mutʼu agwiraye jembe na kwanza kurima, ela chidzako auchirire kuriika jembe fuzini, tsʼiye mundimwa, na mutʼu dza yiye bee kʼawirya kwenye Ufalume wa Mulungu.”

Currently Selected:

Luka 9: CHIDUR

Highlight

Copy