Luka 10

Jeso unaahuma anafunzi mirongo mifungahe

1Gariphochira gago, Bwana waatsagula anafunzi anjine mirongo mifungahe,#10:1 Nakala zinjine zinaonjeza: na airi. na achiahuma airi-airi amulongolere chila kadzidzi, na phatʼu phophosi ambapho yiye mwenye wakala udzila kwenda. 2#Mat 9:37, 38Yiye waamba, “Kuna nyoha, ela aguwi ni achache. Ndo muvoyeni Mulungu mwenye munda ahume aguwi anjine mwakwe mundani akaavize kuguwa. 3#Mat 10:16Vivi endani, mana, ninamuhuma, ela manyani kukala, munga dza anagonzi endao kati-kati ya tsʼimba. 4Ndo mutsʼitsukule pʼochi, mukʼoba hebu virahu, na mutsʼihende lubando mumo njirani. 5Muchiphenya nyumba yoyosi, enye nyumba yiyo alamuseni vivi mwanzo, ‘Enye muno kʼamuna utʼu? Mulungu naamupʼe reri!’ 6Phachikala phana mutʼu ahenzaye reri, undapata reri yenu, ela chikala kʼaphana, mundauka nayo enye. 7#1 Akor 9:14; 1 Tʼim 5:18Na sagalani nyumba yiyo murye na kunwa chondahewa, mana, muhendikazi unawirya kuriphwa mushaharawe. Mwimwi mutsʼikale miyango-miyango. 8Na muchifika mudzi wowosi na atʼu a phapho achimupiga karibu, viryeni vyondalavirwa, 9mwaphoze akongo ondakala a mudzi uo, na muambire kukala, ‘Ufalume wa Mulungu u phephi.’ 10#Mahe 13:51Ela muchenda mudzi wowosi, na atʼu a phapho areme kumupiga karibu, ukani na muchikala mu mumo njirani mwao bomu munachira, aambeni, 11#Mat 10:7-14; Mar 6:8-11; Luk 9:3-5‘Hata riri vumbi ra mudzi wenu ririro mwehu maguluni hunarikutʼa kumonyesa mundamanya enye. Na chisha manyani kukala, Ufalume wa Mulungu ufika phephi.’ 12#Mwa 19:24-28; Mat 11:24; Mat 10:15Na ninamwambira mino kukala, tsʼiku ya ulamuli yichifika, Mulungu undaatiya akili vikali achina mudzi uo kuchira yiyatʼu yondahewa achina Sodoma.”

Jeso unaakanya atʼu otsʼitya

(Matayo 11:20-24)

13 # Isa 23:1-18; Ezek 26:1-28:26; Joel 3:4-8; Amo 1:9, 10; Zak 9:2-4 Jeso waamba, “Mundamanya enye mwimwi achina Korazini! Mundamanya enye mwimwi achina Betisaida, mana, kala vivyo vilinge vyohendwa kwenu, bee vyahendwa midzi ya Tʼiro na Sidoni, atʼu a kuko angari ávala kare mavalo ga magunia, na kusagala ivuni konyesa kukala, adzetya. 14Mulungu undamutiya akili vikali mwimwi tsʼiku ya ulamuli kuchira ao achina Tʼiro na Sidoni. 15#Isa 14:13-15Na mwimwi achina Kaparinaumu, munaona enye mundaunulwa dzulu mulunguni? Ngʼo! Mundatsuphwa kuzimu!”

16 # Mat 10:40; Mar 9:37; Luk 9:48; Joh 13:20 Chisha Jeso achiaamba anafunzie vivi, “Amusirikisaye mwimwi, unanisirikisa hata mimi, na aremaye kumuphokera mwimwi, bee unarema kuniphokera hata mimi. Na aremaye kuniphokera mimi, bee unarema kumuphokera hata yenihuma.”

Anafunzi mirongo mifungahe anauya kwa Jeso

17Ao anafunzi mirongo mifungahe#10:17 Nakala zinjine zinaonjeza: na airi. ariphomala kusumurira neno ra Mulungu, áuya na kuno achikala anahamirwa muno. Ao ariphouya ámwamba Jeso vivi, “Bwana, hata pʼepʼo áhwogopha huriphoachemera kwa dzinaro!” 18Jeso achiaamba, “Mino nákala gago gosi ninagaona, na nichimona Shetani vyogwa dza mufyu wa chikwakwara kulaa mulunguni. 19#Zab 91:13Sirikisani wahi, mino námupʼa widimi wa kuvyoga hata nyoka na vizimba, na widimi wosi wa kurima mudawa, na kʼakuna chondamuzuru. 20Ela hata vivyo, mutsʼihamirwe muno kwakukala, pʼepʼo anamogopha, hamirwani tu kwakukala, madzina genu gáandikwa mulunguni, kwenye chitabu cha uzima.”

Jeso unahamirwa

(Matayo 11:25-27; 13:16-17)

21Roho wa Mulungu wamuhenda Jeso ukati uo wenye ahamirwe hata achiamba, “Baba, uriye u Bwana wa mbingu na dunia, ninakulavira mumvera kwakukala, gaga udzigafitsa atʼu adzonao ana hekima na anamanya, na udzigafunulira atʼu ario dza anache adide. Ni chividzo Baba, kwakukala, vivyo ndivyo urivyohenza.”

22 # Joh 3:35; Joh 10:15 Chisha achiaamba atʼu vivi, “Baba waika gosi mwangu mikononi. Kʼakuna animanyaye mimi Mwana ni ani atsʼiphokala yiye Baba Mulungu, na hebu kʼakuna amumanyaye Baba Mulungu ni ani atsʼiphokala mimi Mwanawe, na yeyosi ariye ninahenza kumungʼazira yiye Baba.”

23Chisha, Jeso achiagalukira anafunzie hichiyao achiaamba, “Baha mwimwi, kwakukala, munagaona na matso genu gaga! 24Ninamwambira jeri, agomvi a Mulungu anji na afalume anji átamani muno agaone gaga mugaonago, ela kʼaagaonere. Achitamani asikire gaga mugasikirago, ela kʼaagasikirire vivyo.”

Tʼadi ya Musamariya mudzo

25 # Mat 22:35-40; Mar 12:28-34 Ndo Jeso ariphomarigiza kugomba gago, mumwenga wa alimu a shariya waima achimuhega kwa kumuuza vivi, “Mwalimu, ninihendedze mino hata ndo nipate uo uzima uphya wa kare na kare?” 26Jeso naye achimuudzidza kwa kumuuza vivyo achimwamba, “Kwani Maandiko ga Mulungu ganaambadze? Uchigasoma welewani uwe mumo?” 27#Kʼumb 6:5; Alaw 19:18Yiye achimuudzidza achimwamba, “Ganaamba, ‘Muhenze Mwenyezi Mulungu, Mulungu wenu na moyo wenu wosi na roho renu rosi, na kwa mukotse wenu wosi na akili zenu zosi. Na muhenze jiranio dza vivyo udzihenzavyo uwe mwenye.’ ” 28#Alaw 18:5Phapho Jeso achimwamba, “Udziudzidzatʼo! Na bee henda vivyo, nawe undaupata uo uzima uphya wa kare na kare.”

29Ela yiye mwalimu wa shariya wahenza kudzonyesa kukala ni muhaki, na ndo achimuuza Jeso kahiri vivi, “Na jirani wangu ni yuphiye?” 30Phapho Jeso achimuudzidza kwa kumwambira tʼadi yiyi: “Mutʼu mumwenga wakala unateremuka kulaa Jerusalemu wenda mudzi wa Jeriko, na achigwirana na anyangʼanyi omupiga achimuphoka miyoye, na achimuricha udzegwa phapho uzimya moyo. 31Ndo vyalairira kukala, kuhani mumwenga wakala unateremuka na yiyo njira bomu naye, ela ariphomona, wachira na kʼanda hata kʼamurungire. 32Mulawi mumwenga naye dza vivyo, ariphofika phapho wamona na achichira na kʼanda vivyo. 33#2 Mgu 28:15Ela Musamariya mumwenga yekala naye una yiyo njira bomu, wafika pharatʼu phokala yiye mutʼu, na ariphomona tu achimushononekera muno. 34Ndo phapho, achimuhendera hʼamehʼame kwa kumutiya mafuha#10:34 Mafuha dza ga zeituni gákala ganahumirwa dza dawa ya kuphoza akongo. na divai mokala udzahulwa-ahulwa. Chisha achimufunga videmu, achimupandiza dzulu ya pʼundawe, na achimuphirika hata nyumba mwenga ya ajeni arimo wamurarisa. 35Kunadzachakwe, achilavya magana mairi#10:35 Chiyunani chinaamba: dinari mbiri. achimupʼa yuyatʼu mwenye yiyo nyumba ya ajeni, na achimwamba, ‘Murarise yuyu mutʼu, na chochosi chondahumira kuchira pʼesa zizi kwa dzuluye, nindakudzakuudzira nichiuya.’ ” 36Ndo Jeso achimarigiza na kumuuza vivi yiye mwalimu wa shariya, “Hʼaya, kati ya ano atʼu ahahu, ni yuphiye yemuhikirahikira dza jiraniwe yiye mutʼu yekala upigwa ni anyangʼanyi?”

37Yiye mwalimu wa shariya achimuudzidza achimwamba, “Ni yuyatʼu yemugwizira mbazi hata achimurarisa.” Jeso phapho achimwamba, “Hʼaya nawe enda ukahende dza vivyo vyenye.”

Jeso unendaalamusa ano Marita na Maryamu

38 # Joh 11:1 Jeso na anafunzie ariphokala a charoni kwenda Jerusalemu, áphenya kadzidzi kamwenga, na phapho muchetʼu mumwenga aihiwaye Marita achimupiga karibu. 39Marita wakala una nduguye wa chiche aihiwaye Maryamu, na Maryamu tsʼiku yiyo wasagala phephi na Jeso achisirikisa mafunzoge. 40Ela Marita wakala una makazi manji hata gachikala gadzimuchira chimo. Ndo achimwendera Jeso achimwamba, “Bwana, kʼona vii hata vichache uwe kukala, yuno mwenehu udzinirichira makazi gosi nigahende hichiyangu? Mwambe adze anavize bee.” 41Ela Bwana Jeso achimuudzidza, “Uwe Marita unadzangaisha, na kudziyuga na gago makazigo manji. 42Ela chihenzwacho ni chitʼu chimwenga tu, na munzio Maryamu utsagula chicho chitʼu cha jeri, na chitʼu chicho kʼandaphokwa.”

Currently Selected:

Luka 10: CHIDUR

Highlight

Copy