Matayo 27

Jeso unaphirikwa kwa Pilato

(Mariko 15:1-5; Luka 23:1-5; Johana 18:28-38)

1Kunadzachakwe dzuwa rinaamba rinaahula ingu, makuhani abomu osi na atumia a Chiyahudi áchiza kukala, Jeso anyongwe. 2Ndo ámuhwala Jeso achimufunga mikowa, na achimuphirika kwa Pilato, gavuna wa Chirumi.

Juda unadzifunga lugwe

(Mahendo 1:18-19)

3 # Mahe 1:18, 19 Juda yemuguza Jeso ariphomanya kukala, Jeso wakala ulamulwa kunyongwa, wadzuta muno na achiaudzira o makuhani abomu na atumia a Chiyahudi vivyo vipande mirongo mihahu vya pʼesa vyokala adzimupʼa. 4Juda waamba, “Náhenda dambi mimi kumuguza mutʼu yetsʼi kosa.” Ela ao achimuudzidza achimwamba, “Gago bee tsʼi gehu hata ni gako genye.” 5Juda ariphosikira gago, wazihwala zizo pʼesa achizitsupha mumo Hekaluni, achilaa konze na achilongoza achendadzifunga lugwe. 6Ela ao makuhani abomu achizitsola zizo pʼesa, na achiamba, “Pʼesa zizi zaulaga. Kwa vivyo, Shariya yehu kʼayihuhenzeza kuziika phatʼu phaikwapho pʼesa za Hekalu.” 7Ndo achiuzana-uzana hata musindikizowe, acherekezana pʼesa zizo akazigule chiwanja chiihiwacho Chiwanja cha Aumbi a Nyungu, phakale phatʼu pha kuzika ajeni. 8Gago ndigo gatumago hata chiwanja chicho chinaihiwa Chiwanja cha Milatso hata rero. 9#Zak 11:12, 13Phapho maneno ga mugomvi wa Mulungu Jeremia gachichimira. Jeremia waamba, “Ávihwala vivyo vipande mirongo mihahu vya pʼesa, na vivyo ndivyo beiye yiriyo Aiziraeli álamula kumuriphira, 10na ao ákudzagula chiwanja chiihiwacho Chiwanja cha Aumbi a Nyungu na vivyo vipande vya pʼesa, dza Bwana Mulungu vyokala udzinaamba.”

Pilato unamuuza-uza maswali Jeso

(Mariko 15:2-5; Luka 23:3-5; Johana 18:33-38)

11Jeso wakwendaimiswa mbere za Pilato, gavuna wa Chirumi. Ndo yiye gavuna achimuuza Jeso vivi, “Uwe ndiwe mufalume wa Ayahudi?” Jeso achiudzidza achiamba, “Vinahwalana na vivyo wambavyo.” 12Phapho makuhani abomu na atumia a Chiyahudi achilumba kukala Jeso una makosa, ela yiye kʼaudzidzire chitʼu. 13Ndo Pilato achimwamba, “Kʼwasikira ano vivyo akulumbiravyo?” 14Ela Jeso yiye kʼaudzidzire hata mwenga, na gago gachimwangalaza muno yiye gavuna.

Jeso unalamulwa kunyongwa

(Mariko 15:6-15; Luka 23:13-25; Johana 18:39-19:16)

15Chila ukati wa tsʼikukʼuu ya Pʼasaka, gavuna wa Chirumi wakala una ada ya kwavugulira atʼu mufungwa mumwenga, yendakala uhadzwa ni duu ra Ayahudi. 16Ndo ukati wa tsʼikukʼuu yiyo, kwakala kuna mufungwa mumwenga yekala unamanyikana muno kwa mai gogahenda, aihiwaye Baraba. 17Ndo atʼu anji ariphorundikana phamwenga, Pilato waauza vivi, “Munahenza nimuvugulire mufungwa yuphiye, Baraba, hebu Jeso aihiwaye Kʼirisito?” 18Pilato wagomba vivyo, mana, wakala unamanya lwazu-lwazu kukala, makuhani abomu ámuphirika Jeso kwakwe, kwakukala, ákala anamonera chidzitso.

19Pilato ariphokala ucheri kusagala phapho chihini cha chifalume, muchewe wamuhumira udzumbe uu, “Muriche yiye mutʼungwa kʼana makosa, mana, mimi usiku bee nidziloha kʼoma mbii-mbii kwa yiye.”

20Ela makuhani abomu na atumia a Chiyahudi achiakalata atʼu amuvoye Pilato amulavye jela Baraba, ela Jeso yiye alamulwe kunyongwa. 21Ndo Pilato achiauza kahiri, “Ni yuphiye kati ya ano airi mumuhenzaye nimuvugulire?” Ao achiudzidza achiamba, “Huvugulire Baraba sino!” 22Pilato achiauza vivi, “Hanga yuno Jeso aihiwaye Kʼirisito yiye, munahenza nimuhendedze?” Osi achiudzidza phapho achiamba, “Naaulagwe kwa kukotwʼa misumari musalabani!” 23Pilato achiauza kahiri achiaamba, “Bee kwadze? Kwani wahenda ii rani yuno mutʼungwa?” Ela ao achikaza kupiga kʼululu kwamba, “Naaulagwe kwa kukotwʼa misumari musalabani!”

24 # Kʼumb 21:6-9 Pilato ariphoona kukala hata akaambira dzadze kʼaandasikira, hata ao ni andabitʼa muyuwano tu, wahwala madzi, achoga mikono mbere za riro duu ra atʼu na achiamba vivi, “Mino tsʼimo mutʼu yuyu achiulagwa! Hata riro bee ni renu renye!” 25Ao atʼu osi okala a phapho achiamba, “Kuulagwakwe mutʼu yiye, nakukale dzulu yehu siswi, na atʼu a midzungu yehu!” 26Phapho Pilato achiavugulira Baraba kulaa jela, na Jeso naye ariphopigwa vibokʼo, achimulavya akaulagwe kwa kukotwʼa misumari musalabani.

Shikari anamuhenda chinyago Jeso

(Mariko 15:16-20; Johana 19:2-3)

27Ndo shikari a Chirumi ámuhwala Jeso achenda naye kuko ndani ya boma ra yiye gavuna wao, na gingi yosi ya shikari yichimuzangila. 28Ao shikari phapho achimuvula nguwo, na achimuvika zurungi ra rangi ya kʼundu. 29Chisha, achilinga chiremba cha vitai vya miya, achimuvika chitswani, na achimupʼa chidatʼa mukonowe wa kulume dza kwamba ni mufalume. Achimumitʼira mavindi mbereze, achimuzomorera kwa kumwamba, “Hʼaya kʼamuna utʼu baba mufalume wa Ayahudi?” 30Achimulatsʼira mahe, chisha, achimuphoka chicho chidatʼa, achimupiga nacho cha chitswa kwenda-kwenda. 31Ariphomala kumuhenda chinyago, ámuvula riro zurungi, achimuvika nguwoze, chisha achimulongoza kwendamuulaga kwa kumukotʼa misumari musalabani.

Jeso unaulagwa kwa kukotwʼa misumari musalabani

(Mariko 15:21-32; Luka 23:26-43; Johana 19:17-27)

32Ariphokala analaa phapho mudzi wa Jerusalemu, áonana na mutʼu mumwenga aihiwaye Simoni muchina Kurene, na ao shikari achimugaramisha autsukule uratʼu musalaba wa Jeso. 33Ndo achenda hata achifika phatʼu phaihiwapho Goligota kwa Chiburania, na maanaye ni, “Muma wa Chitswa.” 34#Zab 69:21Achimupʼa Jeso divai yokala yitsanganywa na dawa ya kuusa matsungu anwe, ela Jeso ariphoyitata, yichimushinda.

35 # Zab 22:18 Shikari achimukotʼa misumari musalabani phapho, chisha achigavyana mavaloge kwa kupiga kʼura ya kʼamari,#27:35 Nakala chʼachʼe zituwirizazo za mwanzo zinaonjeza: kwa hata maneno gogombwa ni mugomvi wa Mulungu gachimizwe. Yiye waamba, “Ao ágavyana nguwo zangu, na valo rangu achiripigira kʼura ya kʼamari,” 36na achisagala phapho kumurinda. 37Na dzulu ya musalaba wa Jeso, achikotʼa chibao chokala chidzandikwa gotuma hata aulagwe. Nago gákala ni, “yuyu ni jeso mufalume wa ayahudi.” 38Chisha, ao shikari achikotʼa atʼu anjine airi okala ni anyangʼanyi, mumwenga mukonowe wa kulume, munjine mukonowe wa kumotsʼo, na Jeso yiye achikala adzimwika kati-kati na musalabawe.

39 # Zab 22:7; 109:25 Atʼu ochira na phatʼu phapho ariphomona, ámuhakana na achitukusa vitswa vyao kumuzomorera Jeso achimwamba, 40#Mat 26:61; Joh 2:19“Hʼaya, samba uwe waamba unaidima kurivomola Hekalu, na ukarijenga kwa tsʼiku tʼahu tu? Amba vino dzitivye! Na kumba u Mwana wa Mulungu, amba vino tserera phapho musalabani!” 41Makuhani abomu, alimu a shariya na atumia a Chiyahudi nao, ámuhenda Jeso chinyago vivyo. Ao áamba, 42“Waativya atʼu anjine, ela yiye mwenye heka kʼadzitivya? Amba yiye mufalume wa Aiziraeli, vino rero naatserere kulaa phara musalabani kwa hata humukuluphire. 43#Zab 22:8Amba yiye ukuluphira Mulungu! Ndo mba Mulungu naamutivye chikala unamumanyirira jeri, mana, yiye waamba, ‘Mimi ndimi Mwanangwa wa Mulungu.’ ” 44Phapho hata ao anyangʼanyi okala akotwʼa misumari misalabani dza yiye nao, ámwamba dza gago.

Chifo cha Jeso

(Mariko 15:33-41; Luka 23:44-49; Johana 19:28-30)

45Dzuwa ririphofika vitswani raanza kugwirwa, na itsʼi yiyo yosi kuchikala na dziza masaa mahahu. 46#Zab 22:1Ziriphofika kama saa chenda za mutsana, Jeso warira kwa laka ra dzulu achiamba, “Eloi, Eloi lama sabakitani?” Na maanaye ni, “Mulungu wangu, Mulungu wangu, heka udziniricha?” 47Ela anjine okala aimire phapho phephi ariphosikira vivyo kʼaaelewere, na kwa vivyo achiamba, “Sirikisani, unamwiha Eliya!” 48#Zab 69:21Ndo phapho mumwenga wao achimusengerera maruru, achitsʼatsʼa kasiku ka godoro ndani ya divai ya ngwadu, achikadunga na mudatʼa wa mwanzi achimulambisa. 49Ela anjine ao achiamba, “Nahumuloleni yiye kumba Eliya undakudzamutivya.” 50Jeso achirira kahiri kwa laka ra dzulu, na achitosa rohoye.

51 # Kul 26:31-33 Ndo phapho pʼaziya ya Hekalu yichahuka kati-kati, kulaa dzulu hata photsʼi. Itsʼi yichisumba, myamba ya mawe yichivunzika, 52mbira zichifunuka, na atʼu anji a Mulungu achifufulwa, 53achilaa mbirani. Na Jeso ariphokudzafufuka kulaa kuzimu, ao ákwendaphenya mudzi utakatifu wa Jerusalemu, na achionewa ni atʼu anji.

54Ndo yiye mubomu wa shikari a viha, na shikarie okala anamurinda Jeso ariphoona itsʼi vyosumba na gago maneno manjine golairira, áogopha muno, na achiamba, “Mutʼu yuyu wakala ni Mwana wa Mulungu jeri!”

55 # Luk 8:2, 3 Phapho phákala phana achetʼu anji okala aimire kure analolera. Achetʼu ao ndio okala achimuhikirahikira Jeso, na ákala ákudza osini kulaa Galilaya. 56Kati yao wakala ni Maryamu muchina Magidala, Maryamu ameye ano Jakobo na Jesefu, na ameye Jakobo na Johana anangwa a Zebedayo.

Jeso unazikwa

(Mariko 15:42-47; Luka 23:50-56; Johana 19:38-42)

57Kuriphotswa, mutʼu mumwenga aihiwaye Jesefu muchina Arimataya yekala ni tajiri, wakudza. Yiye naye wakala ni mwanafunzi wa Jeso. 58Ndo achenda hata kwa Pilato, achendavoya ahewe lufu lwa Jeso. Pilato achilagizira akahewe lulo lufu lwa Jeso. 59Jesefu achendalutsereza kulaa phapho musalabani, achiluvika sanza mbiphya ya kitani, na 60achendaluzika mwakwe mbirani yokala udziyitsonga mwambani, kwa achifa adze azikwe mumo. Chisha, achiphimbilisa dziwe bomu achiyibinikʼiza kuko muyangoni, na achiuka. 61Maryamu muchina Magidala, na yiye Maryamu munjine ákala asegere analola yiyo mbira.

Shikari anahumwa akarinde mbira ya Jeso

62Kunadzachakwe, yakala ni Sabato.#27:62 Chiyunani chinaamba: tsʼiku yotuwiriza tsʼiku ya kudzibambanya kwa Sabato. Ndo makuhani abomu na Afarisayo achenda kwa Pilato 63#Mat 16:21; 17:23; 20:19; Mar 8:31; 9:31; 10:33, 34; Luk 9:22; 18:31-33achendamwamba, “Bwana Pilato, hunakumbikira kukala yuyatʼu Jeso, ariye ni mulembi phokala kʼadzangwe kunyongwa, waamba, ‘Nichifa, nindafufuka tsʼiku ya hahu.’ 64Kwa vivyo, lagizira mbiraye yirindwe hata phapho machero, yiriyo ndo tsʼiku ya hahu, kwa hata anafunzie atsʼidze akadzalwiya lufulwe, na akakwatya kwalemba atʼu kwamba, ‘Ufufuka kulaa kuzimu!’ Anafunzie achihenda vivyo, andakala anakaza kulemba atʼu muno kuchira garatʼu ga mwanzo ga kwambwa yiye ni Kʼirisito.” 65Phapho Pilato achiaamba, “Hinyo shikari, na kahakikisheni yiyo mbiraye yinarindwa vyenye.” 66Ndo achenda hata phapho mbirani, achenda phakongomera phapho mulomo wa mbira phokala phabinikʼizwa riratʼu dziwe bomu, na achiaamba ao shikari ayirinde yiyo mbira.

Currently Selected:

Matayo 27: CHIDUR

Highlight

Copy