Matayo 28

Kufufuka kwa Jeso

(Mariko 16:1-8; Luka 24:1-12; Johana 20:1-10)

1Sabato yiriphosira, tsʼiku yotuwiriza yakala ni ya mwanzo wa juma ra Ayahudi, na tsʼiku yiyo na chiramuko dani-dani, Maryamu muchina Magidala na yiye Maryamu munjine, ákwendalola mbira ya Jeso. Ndo ao ariphofika kuko, 2itsʼi yasumba muno, mana, malaika wa Bwana watserera kulaa mulunguni, achidzariusa riro dziwe rokala ribinikʼizwa phapho mbirani, chisha achirisagalira. 3Yiye wakala unameta-meta dza mufyu wa chikwakwara, na mavaloge gakala ni meruphe tsetsetse. 4Ao shikari okala anarinda yiyo mbira achogofyerwa muno, na achigwirwa ni mbuluka.

5Ela yiye malaika achiaamba ao achetʼu, “Tsʼogofyerweni! Ninamanya kukala munamutsakula Jeso yekotwʼa misumari musalabani. 6Yiye kʼamo mumu, ufufuka dza arivyomwamba. Nzoni mulole phano phokala ulazwa. 7Chisha, vivi endani maruru mukaambire anafunzie kukala, ‘Jeso ufufuka kulaa kuzimu, na vivi unamulongolera kwenda Galilaya. Kuko muchenda, mundakwendamona.’ Na bee, mutsʼiganyale gago godzimwambira.”

8Ndo achetʼu achiuka mairo phapho mbirani na woga na kuno anahamirwa, kwendaambira anafunzi a Jeso.

9Vyokala a mairo anenda, achihendamona Jeso hiyu kare, na achiaamba, “Mudzilamukadze ano mayo?” Ao achetʼu achimusengerera achimitʼa mavindi mbereze na kuno agwira maguluge, na achimwabudu. 10Jeso achiaamba, “Tsʼogofyerweni! Endani mukaambire anafunzi angu, ario hata anga enehu adze Galilaya, na andakudzanona kuko.”

Shikari anaambira makuhani abomu godzilairira

11Aratʼu achetʼu phokala anenda kwa anafunzi a Jeso, anjine a aratʼu shikari okala anarinda yiyatʼu mbira, ákwenda mudzi wa Jerusalemu achendaambira makuhani abomu dzulu ya maneno gosi gokala galairira. 12Ndo ao makuhani abomu achionana phamwenga na atumia a Chiyahudi kudzila, na achichiza kwahonga pʼesa nyinji ao shikari. 13Ao áahonga na achiaamba, “Ambani kukala, ‘Usiku phodzikala hurere, anafunzi a Jeso ákudzalwiya lufulwe.’ 14Na hata Pilato achigasikira naye gaga, sino hundamwambira yiye naye hata akubali kukala kʼamuna makosa.” 15Ndo shikari achizihwala zizo pʼesa, na achihenda dza vyokala adzambwa. Na kulaa ukati uo hata rero, gago ndigo gavumiswago ni Ayahudi.

Jeso unaalairira anafunzie

(Mariko 16:14-18; Luka 24:36-49; Johana 20:19-23; Mahendo 1:6-8)

16 # Mat 26:32; Mar 14:28 Aratʼu anafunzi a Jeso kumi na mumwenga ákwenda Galilaya, na achenda hata kuko mulimani kokala álagizirwa ni Jeso. 17Ariphomona, ámwabudu, ela anjine ákala kʼaana uhakika kukala ndiye. 18Jeso achiasengerera achiaamba, “Nidzihewa widimi wosi wa mulunguni, na wa phapha duniani. 19#Mahe 1:8Ndo mwimwi endani kwa atʼu a viryomo vyosi, mukaahende akale anafunzi angu, na mwabatize kwa dzina ra Baba, ra Mwana na ra Roho wa Mulungu. 20Na afunzeni agatuwe malagizo gosi godzimupʼa. Na mimi nindakala phamwenga namwi tsʼiku zosi hata musindikizo wa urumwengu.”

Currently Selected:

Matayo 28: CHIDUR

Highlight

Copy