Mariko 12

Tʼadi ya aroromi ai

(Matayo 21:33-46; Luka 20:9-19)

1 # Isa 5:1, 2 Jeso waanza kugomba nao chitʼadi. Yiye waamba, “Mutʼu mumwenga warima mundawe, na achiphanda mizabibu. Ariphomala gago, achiulinga uchigo, achitsonga phatʼu pha kubundira zabibu mwambani, na achimutʼa uringo wa kurindira. Chisha, acherekezana na atʼu anjine aurorome uo munda, chidzako yiye mwenye achitsamira itsʼi yinjine. 2Musimu wa zabibu kwiva uriphofika, mwenye munda wahuma muhendikaziwe kwa aratʼu aroromi, kwa hata akamuhwalire fungure ra mavuno ga zabibu. 3Ela aratʼu aroromi achendamugwira yiye muhendikazi, achimupiga, na achimuudza mikono miphuphu. 4Achimuhuma kahiri muhendikazi munjine. Yuyu naye achidzamulumiza chitswa, na achimuhenda vii. 5Mwenye munda kʼatsokere yiye, achimuhuma munjine kahiri, na ao aroromi achidzahendamuulaga. Na tsʼi yiye hicheye tu, ela anji okala achihumwa ápigwa, na hata anjine achihendaulagwa. 6Ndo yiye wasalirwa ni mutʼu mumwenga tu, naye wakala ni mwanawe amuhenzaye. Musindikizowe, wamuhuma vivyo yiye naye na maazo ga kukala, ‘Andakwendamogopha yuyu mwanangu.’ 7Ela ao aroromi ariphomona yiye mwanawe tu, áambana vivi, ‘Yuyu abaye achifa ndiye yendahwala ufa. Ndo nahumuulageni kwa hata abaye achidzafa, ufawe ukale wehu!’ 8Ndo achimugwira kare, achimulavya hata konze ya uratʼu munda wa mizabibu, achendamuulaga.” 9Ndo Jeso achiuza vivi, “Hʼaya, munaona yiye mwenye munda achidza, undakudzaahendadze ao aroromi? Ninamwambira mino, yiye achidza, undakudzaaulaga ao aroromi, na uo munda wa mizabibu aerekezane na aroromi anjine. 10#Zab 118:22, 23Mukale mwimwi kʼamudzangwe kugasoma Maandiko gano ga Mulungu gaambago,

‘Dziwe riro roremwa ni ajengi,

vivi ndiro rodzikala dziwe ra tende muno.

11Bwana Mulungu ndiye ariyehenda neno riro,

naro ni neno ra kuhwangalaza muno’?”

12Makuhani abomu, alimu a shariya na atumia ariphosikira yiyo tʼadiye, ámanya kukala, Jeso wakala unagomba dzulu yao. Kwa vivyo, achikala anahenza amugwire Jeso, ela achogopha riro duu ra atʼu. Kwa vivyo, achimuricha, achenda vyao.

Vilongozi a Ayahudi anaheza kumuhega Jeso

(Matayo 22:15-22; Luka 20:20-26)

13Afarisayo anjine, na atʼu a chama cha Herode áhumwa ni vilongozi a Ayahudi akamuhege Jeso, kwa kumuuza maswali. 14Ndo ao achenda kwa Jeso achendamwamba, “Mwalimu, hunamanya kukala, uwe u mujeri, na unafunza ujeri dzulu ya njira ya Mulungu, na kʼogopha, hebu kumupendeleya mutʼu, mana, kʼulola cheo cha mutʼu. Ndo yikale yino Shariya yehu, yinahuhenzeza kuripha kodi kwa Kaisari, hebu kʼayihuhenzeza? Huriphe, hebu hutsʼiriphe?” 15Ela Jeso yiye wakala udziumanya kare uo ulumakwiri wao. Ndo hata achiaamba vivi, “Kwadze munaheza kunihega? Hebu mwenye dinari#12:15 Dinari yakala ni pʼesa ya Chirumi. naanipʼe niyone.” 16Mumwenga aripholavya, Jeso achiauza vivi, “Sura rino, na dzina rino ni vya ani?” Ao achimuudzidza achiamba, “Ni vya Kaisari.” 17Jeso yiye achiaamba, “Hʼaya vyakwe Kaisari mupʼeni mwenye, na vyakwe Mulungu navyo, mupʼeni Mulungu mwenye vivyo.” Ao atʼu achangalazwa muno ni yiye.

Swali dzulu ya kufufuka

(Matayo 22:23-33; Luka 20:27-40)

18 # Mahe 23:8 Asadukayo aambao kukala, afadzi kʼaafufuka, ákwenda kwa Jeso achendamwamba, 19#Kʼumb 25:5“Mwalimu, Shariya ya Musa yinahwamba, ‘Mutʼu achihwala na afe achikala muchewe kʼadzangwe kuvyala, nduguye yiye mufadzi ni seti amuhwale yiye gungu amuvyalire ana nduguye.’ 20Ndo sambi, pʼindi kwakala ndugu mwenga, alume afungahe. Yuyatʼu muvyere wahwala, ela achifa photsʼivyala naye yiye muche. 21Muvahawe achimuhwala yuyatʼu gungu, ela yuyu naye achifa photsʼivyala naye vivyo. Nduguye wa hahu naye achimuhwala, ela maneno gachikala dza vivyo. 22Ndo achenderera vivyo kuhwala na kufa hata osi afungahe, photsʼipata mwana. Musindikizowe, achifa yuyatʼu muchetʼu naye. 23Ndo sambi, tsʼiku atʼu phondafufulwa, muchetʼu yiye undakala mukaza ani? Kwani osi afungahe ámuhwala vivyo!” 24Jeso achiaamba, “Mu alongo mwimwi, mana, kʼamugaelewa Maandiko ga Mulungu, hebu widimi wa Mulungu. 25Maana, atʼu phondafufuka, kʼaandahwala hebu kuhwalwa, ela andakala dza malaika a mulunguni. 26#Kul 3:6Na dzulu ya gano maneno ga atʼu kufufuka kulaa kuzimu, mwimwi Asadukayo mukale kʼamudzangwe kusoma dzuluye mumo chitabuni mwa Musa, phara phokala chitsaka chinaaka moho? Phapho Mulungu wamwamba Musa vivi, ‘Mimi ndimi Mulungu wa ano Burahemu, Isaka na Jakobo.’ 27Na bee, yiye tsʼiye Mulungu wa afadzi, ela ni Mulungu wa aratʼu ario moyo. Kwa vivyo, mu alongo vyenye mwimwi.”

Lagizo ra halahala kuchira manjine gosi

(Matayo 22:34-40)

28Mumwenga wa alimu a shariya wakala wimire phapho, unaasirikisa vyokala Asadukayo analumbana na Jeso. Ariphoona kukala Jeso wakala udziaudzidzatʼo, wamuuza Jeso vivi, “Kati ya malagizo gosi ga Mulungu, ni riphiro ra halahala?” 29#Kʼumb 6:4, 5Jeso achimuudzidza achimwamba, “Lagizo ra halahala ni riri rambaro, ‘Sirikisani mwimwi Aiziraeli! Mwenyezi Mulungu, Mulungu wehu ni mumwenga tu. 30Muhenzeni Mwenyezi Mulungu, Mulungu wenu na moyo wenu wosi na roho renu rosi, kwa akili zenu zosi, na kwa mukotse wenu wosi!’ 31#Alaw 19:18Na ra phiri ni riri rambaro, ‘Muhenze jiranio dza vivyo udzihenzavyo uwe mwenye.’ Kʼakuna lagizo rinjine, ririro ni bomu kuriko gaga.”

32 # Kʼumb 4:35 Ndo yiye mwalimu wa shariya achimwamba, “Udzigombatʼo mwalimu! Uwe udzigomba ujeri kukala, Mulungu ni mumwenga tu, na kʼakuna munjine, itsʼiphokala yiye. 33#Hos 6:6Na ni seti mutʼu amuhenze Mulungu na moyowe wosi, na akilize zosi, na mukotsewe wosi, na amuhenze jiraniwe dza vivyo adzihenzavyo yiye mwenye. Neno riri ndiro ra halahala kuchira sadaka za nyama, na miyo ya mindani yosi yochwayo mbere za Mulungu.” 34#Luk 10:25-28Jeso ariphoona kukala, yiye mutʼu wakala udzimuudzidza chilachu, wamwamba, “Kʼu kure na Ufalume wa Mulungu.” Gariphochira gago, kʼaphana mutʼu yesubutu kumuuza kahiri maswali manjine.

Swali dzulu ya yiye Kʼirisito

(Matayo 22:41-46; Luka 20:41-44)

35Ukati Jeso ariphokala achifunza mumo Hekaluni, wauza vivi, “Kwadze alimu a shariya anaamba kukala, ‘Yiye Kʼirisito ni mutʼu wa mudzungu wa Daudi’? 36#Zab 110:1Daudi mwenye walongozwa ni Roho wa Mulungu na achiamba,

‘Bwana Mulungu wamwamba Bwana wangu:

“Sagala upande wangu wa mukono wa kulume,

hata phondakuhenda warime tsetsetse adawao.” ’

37“Yiye Daudi mwenye tu, unamwiha yiye Kʼirisito ‘Bwana,’ sambi yiye Kʼirisito unaidimadze kukala mutʼu wa mudzunguwe kahiri?”

Jeso unaakanya atʼu dzulu ya ulumakwiri

(Matayo 23:1-36; Luka 20:45-47)

Duu ra atʼu ramusirikisa Jeso na kuno achikala ana raha. 38Ndo Jeso achiaamba vivi phokala unafunza, “Dzimanyirireni na alimu a shariya. Ao anahenza kuchira-chira na kuno adzidzivalira mazurungi mare kwa aonewe ni abomu, na anahenza kulamuswa ni atʼu chiishima kuko vyeteni. 39Na ahenza kusagala mbere-mbere mumo masinagogini, na kusagala mutʼu mwa abomu shuhulini. 40Ela anaaiyira magungu miyo yao hata kʼaana haya, na chidzako anaayaza manza atʼu kwa kuvoya mavoyo mare. Tsʼiku ya ulamuli, andatiywa akili vikali muno atʼu dza ao!”

Sadaka ya muchetʼu gungu

(Luka 21:1-4)

41Tsʼiku mwenga, Jeso wakala usegere Hekaluni, phephi na chisanduku cha kuhwalira sadaka. Yiye wakala unalolera chividzo viratʼu atʼu anji arivyokala achilavya pʼesa, na kuzitiya mumo. Matajiri manji gálavya pʼesa nyinji. 42Ela phapho phachidza muchetʼu mumwenga yekala ni gungu na ni muchiya, achibitʼa ndururu mbiri mumo ndani. 43Phapho Jeso achiaiha anafunzie achiaamba, “Ninamwambira jeri, yuyu muchetʼu gungu na muchiya, ulavya na moyo umwenga kuchira anjine osi. 44Maana, ao anjine osi alavya sadaka pʼesa zodzikala zirizo mwao mifukoni tu, ela ana mbeko zao kʼanda. Ela yuno muchetʼungwa muchiya yiye, ulavya chila chitʼu chodzikala unacho, na hata kʼana mbeko yinjine kʼanda yodziyikuluphira.”

Currently Selected:

Mariko 12: CHIDUR

Highlight

Copy