Mariko 11

Jeso unaphokerwa Jerusalemu dza mufalume

(Matayo 21:1-11; Luka 19:28-40; Johana 12:12-19)

1Jeso na ahumwae ariphokala anatapira Jerusalemu, áfika mudzi wa Betania, na phapho kadzidzi kariko kuko Betifage, kariko kʼanda-kʼanda ya mulima wa Mizeituni, achikala adzikalozera mbavu. Phapho, Jeso achihuma ahumwae airi, 2achiaamba, “Endani kadzidzi kara kodzikalozera mbavu, na muchendaphenya tu phapho kadzidzini, mundamona mwana pʼunda ufungwa, ariye kʼadzangwe kutsukula mutʼu. Muchendamona, muvuguleni, mumurehe phapha. 3Na mutʼu yeyosi achimuuza, ‘Kwadze munahenda vino?’ Mwambeni, ‘Bwana unaye haja, na undamuudza sambi yenye.’ ”

4Ndo ao achenda, achendamona mwana pʼunda mumwenga, njira bomu ufungwa muyangoni. Ariphokala anamuvugula, 5atʼu anjine okala aimire phapho áauza vivi, “Kwadze munamuvugula yiye mwana pʼunda?” 6Ao ahumwa achiaudzidza dza vyokala adzambwa ni Jeso, nao achiaricha achenda vyao. 7Achimurehera Jeso yiye mwana pʼunda, achiika mavalo gao dzulu-dzulu ya yiye mwana pʼunda, na Jeso yiye achisagala dzuluye. 8Na atʼu anji kati ya riro duu ra atʼu, achichachasa mavalo gao kwenye yiyo njira bomu, na anjine ao achitema vitai vya mihi kulaa mindani na kuvitandaza mumo njirani vivyo. 9#Zab 118:25, 26Atʼu osi okala a mbere za Jeso, na okala a nyumaze, achanza kugomba kʼululu kwamba,

“Naalikwe Mulungu!

Waajaliwa ni Mwenyezi Mulungu yiye adzaye kwa dzina ra Bwana!

10Waajaliwa ni Mulungu uo Ufalume wa Baba Daudi udzao!

Naalikwe Mulungu ariye u dzulu mulunguni!”

11Jeso ariphophenya mudzi wa Jerusalemu, wakwenda mwenga kwa mwenga hata Hekaluni, achendalola chila chitʼu chividzo. Ela kwakukala, kwakala kudzetswa, achigwirikana na aratʼu anafunzie kumi na airi, achiuya Betania.

Muhi wa mutini otsʼiokola

(Matayo 21:18-19)

12Kunadzachakwe, áuka Betania, na Jeso achikala una nzala. 13Ndo achiwona kwa kure muhi wihiwao mutini,#11:13 muhi wihiwao mutini wakala uhwalanishwa na atʼu a Iziraeli. okala una makodza manji. Achiusengerera, aone kumba una matunda gogosi. Ariphofika, wawona kʼauna matunda gogosi hata ni makodza maphuphu, mana, wakala tsʼio ukati wa mihi yiyo kuvyala matunda. 14Phapho achiulaphiza achiwamba, “Kʼakuna mutʼu yendarya kahiri matundago!” Ao ahumwae achigasikira gago.

Jeso unaavuguza atʼu boma ra Hekalu

(Matayo 21:12-17; Luka 19:45-48)

15Ndo ariphofika Jerusalemu, Jeso wakwendaphenya boma ra Hekalu, na achanza kwavuguza alae konze ao atʼu okala anaguza, na kugula miyo mumo. Chisha, achizipetula-petula meza za aratʼu okala anavunzirana pʼesa, na mabao ga aratʼu okala anaguza ngiya manga. 16Yiye kʼamuhenzezere mutʼu yeyosi kuchira na phapho Hekaluni na kuno utsukula miyo ya uchuzi. 17#Isa 56:7; Jer 7:11Chisha achifunza kukala, “Gaandikwa Maandikoni ga Mulungu kukala, ‘Nyumba yangu yindaihiwa nyumba ya mavoyo kwa mataifa gosi.’ Ela mwimwi, ninaona mudziyihenda ni pʼanga ya aivi!”

18Ndo makuhani abomu na alimu a shariya ariphosikira gago, áanza kutsakula njira ya kumuulagira. Ela ámogopha, mana, duu ra atʼu raangalazwa ni gago mafunzoge. 19Na kuriphotswa, Jeso na ao anafunzie#11:19 Nakala zinjine zinaamba: wauka phapho mudzini. áuka phapho mudzini.

Kuluphiro, mavoyo na musamaha

(Matayo 21:20-22)

20Kunadzachakwe na chiramuko dani-dani, ariphokala anachira, áwona uo muhi wa mutini udziuma wosi hata mizi. 21Pʼetero achiukumbikira na achimwamba vivi Jeso, “Mwalimu, lola, ufinyalala ura muhi oulaphiza!”

22Jeso achiaamba, “Mukuluphireni Mulungu! 23#Mat 17:20; 1 Akor 13:2Ninamwambira jeri mino, mutʼu uu mulima akawamba, ‘Ngʼoka ukadzitiye baharini’ na kʼana shaka mwakwe moyoni hata unakuluphira kukala, vyodzamba vindahendeka, vivyo undahenderwa. 24Kwa vivyo, ninamwambira mino, chochosi mumuvoyacho Mulungu kwa njira ya mavoyo, kuluphirani kukala, mudzichiphokera kare, namwi mundahewa. 25#Mat 6:14, 15Mwimapho kwa muvoye na muna maundu na atʼu, asameheni kwanza, kwa hata Abayenu ariye dzulu mulunguni, amusamehe makosa genu namwi.”#11:25 Nakala zinjine zinaonjeza fungu ra 26 dza: Ela mutsʼiphoasamehe anzienu, bee hata Abayenu ariye dzulu mulunguni naye, kʼandamusamehe makosa genu namwi.

Widimi wa Jeso unapingwa

(Matayo 21:23-27; Luka 20:1-8)

27Jeso na ahumwae áuya kahiri Jerusalemu. Na ariphokala unaenenda mumo boma ra Hekalu, makuhani abomu, alimu a shariya na atumia ámwendera, 28na achimuuza Jeso achimwamba, “Uwe Jeso, gano ga kuvuguza atʼu muno boma ra Hekalu, unagahenda kwa widimi wani? Na ni ani yekupʼa widimi uno?” 29Jeso naye achiaudzidza achiaamba, “Mimi nami nindamuuza swali mwenga, na muchiniudzidzatʼo, hʼaya nami nindamwambira ninahenda maneno gaga kwa widimi wani. 30Hebu nambirani, Johana Mubatizi ariphobatiza atʼu, uo widimiwe wakala ulaa kwa Mulungu, hebu wakala ulaa kwa atʼu?” 31Ela ao achanza kuuzana-uzana ao enye kwa enye vivi, “Aa! Hwambedze asena? Huchamba widimiwe wahewa ni Mulungu, undahwuza yiye ahwambe, ‘Bee kwadze kʼamumukuluphirire? 32Na huchamba widimiwe walaa kwa atʼu?’ ” (Áogopha duu ra atʼu, kwakukala, osi ákala anakuluphira kukala, Johana wakala ni mugomvi wa Mulungu jeri.) 33Ndo achimuudzidza Jeso achimwamba, “Kʼahumanya sino.” Jeso naye achiaamba, “Hʼaya bee hata mimi nami, tsʼindamwambira yenipʼa widimi wa kuhenda maneno gaga.”

Currently Selected:

Mariko 11: CHIDUR

Highlight

Copy