Mariko 10

Dzulu ya marichano ga muche na mulume

(Matayo 19:1-12; Luka 16:18)

1Jeso ariphomala kwafunza atʼu, wauka Galilaya achilongoza kwenda jimbo ra Judea, na ngʼambo ya muho wa Jorodani. Duu ra atʼu richimutuwa kahiri, naye achiafunza dza yirivyokala adaye.

2Ndo Afarisayo anjine achenda kwakwe achendamuheza kwa kumuuza vivi, “Vidze, kutuwirizana na Shariya yehu, akale mutʼu unaidima kumuricha muchewe?” 3Jeso achiaudzidza vivi, “Kwani Musa wamupʼa malagizo gani?” 4#Kʼumb 24:1-4; Mat 5:31Ao achiamba, “Shariya ya Musa yinaamba, mulume achihenza kuricha muchewe, niamwandikire baruwa konyesa kukala udzimuricha jeri, na amwambe ende vyakwe.”

5Jeso yiye achiaudzidza vivi, “Bee, Musa wamuhenzeza kwaricha ache enu, mana, muna myoyo mifu. 6#Mwa 1:27; 5:2Ela hangu urumwengu unaanza kuumbwa, Maandiko ga Mulungu ganaamba, ‘Mulungu waaumba mulume na muche.’ Na 7#Mwa 2:24‘Gago ndigo gatumago hata mulume achihwala, undaatelephuka avyazie agwirikane na muchewe, 8na ao airi andakala mwiri umwenga.’ Ndo ao andakala tsʼio airi kahiri, ela andakala mwiri umwenga. 9Kwa vivyo, Mulungu chochigwizanya, mudamu niatsʼichitsamule.”

10Ariphophenya kahiri mumo nyumbani, Jeso wauzwa ni ahumwae dzulu ya neno riro. 11#Mat 5:32; 1 Akor 7:10, 11Naye achiaamba vivi, “Yeyosi amurichaye muchewe na kuhwala munjine, unamuzingira muchewe. 12Na mwanamuche amurichaye mulumewe na kutoroswa ni munjine, unazinga vivyo naye.”

Awiryao kuphenya Ufalumeni kwa Mulungu

(Matayo 19:13-15; Luka 18:15-17)

13Atʼu anjine ámurehera Jeso anache adide, kwa hata aabandikire mikonoye aahatsʼe. Ela ao anafunzie achiagombera ao atʼu oareha. 14Jeso ariphoona vivyo, kʼahamirirwe na achiaamba vivi, “Mutsʼiazize ao anache, aricheni adze kwangu, mana, Ufalume wa Mulungu ni wa atʼu ario dza aa anache. 15#Mat 18:3Ninamwambira jeri mino, mutʼu yeyosi yetsʼi kuluphiro dza mwanache mudide, kʼandaphenya Ufalumeni kwa Mulungu.” 16Chisha achihwala aratʼu anache, achiabandikira mikono, achiahatsʼa.

Matajiri ana shida ya kuphenya Ufalumeni kwa Mulungu

(Matayo 19:16-26; Luka 18:18-27)

17Jeso ariphoanza charoche kahiri, mutʼu mumwenga wamukudzira mairo, achimitʼa mavindi mbereze, na achimuuza vivi, “Mwalimu mudzo, ninihendedze mino hata ndo niupate uo uzima uphya wa kare na kare?” 18Jeso achimuudzidza achimwamba, “Kwadze unaniiha mudzo? Kʼakuna ariye mudzo, atsʼiphokala Mulungu tu bahi. 19#Kul 20:13; Kʼumb 5:17; Kul 20:14; Kʼumb 5:18; Kul 20:15; Kʼumb 5:19; Kul 20:16; Kʼumb 5:20; Kul 20:12; Kʼumb 5:16Ukale unagamanya gano malagizo ga Mulungu gaambago, ‘Utsʼiulage, utsʼizinge, utsʼiiye, utsʼilavye ushaidi wa ulongo, utsʼilembe, na aishime abayo na ameyo’?” 20Yiye mutʼu achimuudzidza achimwamba, “Mwalimu, gago gosi bee ninagamanya, na nidzigatuwiriza hangu utana wangu.”

21Jeso achimulola, na achimuhenza. Ndo achimwamba, “Uwe unakosa kuhenda chitʼu chimwenga tu. Enda ukaguze miyoyo uriyo nayo, na pʼesa zondapata uapʼe achiya. Uchihenda vivyo, undakala udzidziikira mbeko mulunguni. Hʼaya chidzako udze, unituwe.” 22Ariphosikira gago, wakunza nyusi, na achiuka na kushononeka, mana, wakala ni tajiri muno.

23Phapho Jeso achilola pʼande zosi, na achiaamba anafunzie vivi, “Heka ni vikomu muno kwa matajiri kuphenya Ufalumeni kwa Mulungu!” 24Ao ahumwa a Jeso áangalazwa ni gago manenoge. Ela Jeso achigomba kahiri achiamba, “Anangu, ni vikomu muno#10:24 Nakala zinjine zinaonjeza: kwa ao akuluphirao mali. kuphenya Ufalumeni kwa Mulungu! 25Kʼaviidimikika ngamia kuchira na tʼundu ya tsʼinzano, na kʼaviidimikika muno yenye tajiri kuphenya Ufalumeni kwa Mulungu.” 26Ao ahumwa a Jeso phapho achangalala muno hata achimuuza vivi, “Bee, ni ani sambi aidimaye kutivywa?” 27Jeso achialola, chisha achiaamba, “Mudamu kʼagaidima gago, ela kwa Mulungu kʼakuna rishindaro.”

Manoso ga atʼu amutuwao Jeso

(Matayo 19:27-30; Luka 18:28-30)

28Pʼetero yiye achimwamba Jeso, “Sino vidze? Kwani vivyo hwaricha gosi huchikutuwa uwe!” 29Jeso achiaamba vivi, “Ninamwambira jeri mino, mutʼu yeyosi yericha mudzi wao, nduguze, avyazie, anae hebu mindaye kwa dzulu yangu na kwa dzulu ya Nguma Mbidzo, 30kwenye dunia yiyi, undaphokera kʼano gana ya gago gosi, na ahenderwe mauku. Na kwenye uo urumwengu udzao, andakala na uzima uphya wa kare na kare. 31#Mat 20:16; Luk 13:30Elako anji ario ni a mwanzo vivi, andakudzakala a musindikizo, na anji ario ni a musindikizo vivi, andakudzakala a mwanzo.”

Jeso unagomba lwa hahu dzulu ya chifoche na kufufukakwe

(Matayo 20:17-19; Luka 18:31-34)

32Jeso na ahumwae ákala a njirani anenda Jerusalemu, naye wakala u mbere zao. Ahumwae áangalala, na ao atʼu ariomutuwa achiphenywa ni woga. Jeso achenda nao kahiri kʼanda aratʼu anafunzie kumi na airi, na achanza kwaambira gokala gandakwendamupata. 33Yiye waamba vivi, “Vivi hunakotʼa kwenda Jerusalemu, na kuko, mimi Mutʼu yelaa dzulu nindakwendalaviwa kwa makuhani abomu, na alimu a shariya, na ao andanilamula ninyongwe, na andanilavya kwa atʼu a makabila manjine. 34Ao andanihenda chinyago, andanilatsʼira mahe, andanipiga vibokʼo, na aninyonge. Ela tsʼiku ya hahu yichifika, nindafufuka.”

Ni ani ariye mubomu Ufalumeni kwa Mulungu

(Matayo 20:20-28)

35Jakobo na Johana, anangwa a Zebedayo, ámwendera Jeso achimwamba vivi, “Mwalimu, hunahenza uhuhendere chitʼu chondakuvoya.” 36Jeso naye achiauza vivi, “Munahenza nimuhendereni?” 37Ao achimuudzidza vivi, “Huhenzeze kusagala, mumwenga mukonoo wa kulume, na munjine asagale mukonoo wa kotsʼo phondakala usegere kwako Ufalumeni ubomu, hutawaleni phamwenga.” 38#Luk 12:50Jeso yiye achiaamba vivi, “Kʼamumanya muvoyaro mwimwi. Kwani mwimwi, mukale munaidima kushononeswa dza mimi vyondashononeswa, hebu kuturika dza vyondaturika mimi?” 39Ao achimuudzidza achimwamba, “Ehʼe hunaidima.” Jeso achiaamba, “Mwimwi mundashononeswa dza mimi vyondashononeswa, na muturike dza vyondaturika mimi, 40ela mimi tsʼimi mulamuli yendalamula kukala, ni yuphiye yendasagala mukono wangu wa kulume, hebu mukono wangu wa kotsʼo. Baba Mulungu nafasi zizo waaikira aratʼu oatsagula azihwale.”

41Aratʼu anafunzie anjine kumi ariphosikira gago, áanza kwatsukirirwa ano Jakobo na Johana. 42#Luk 22:25, 26Ndo phapho Jeso achiaiha osi phamwenga na achiaamba vivi, “Mwimwi munamanya kukala, atawali na vilongozi a mataifa, bee anaatawala atʼu na chiguvuguvu. 43#Mat 23:11; Mar 9:35; Luk 22:26Ela mwimwi kwenu navitsʼikale hivyo. Ahenzaye kukala chilongozi kati yenu, ni seti aahikirehikire anzie osi. 44Na yeyosi kati yenu yendahenza kukala wa mwanzo, ni seti akale dza mugulwa muhumiki wa mwimwi mosi. 45Maana, hata mimi Mutʼu yelaa dzulu nákudzaahikirahikira atʼu, na nidzilavire kufa kwa niativye anji. Ela tsʼidzire kudzahikirwahikirwa.”

Jeso unamuphoza Batimayo

(Matayo 20:29-34; Luka 18:35-43)

46Ndo Jeso na anafunzie áfika mudzi wa Jeriko. Ariphokala analaa phapho, duu bomu ra atʼu raatuwa. Kuko kwakala kuna mutʼu yekala kʼaona aihiwaye Batimayo, yiriyo maanaye ni mwanangwa wa Timayo, usegere kʼanda-kʼanda ya yiyo njira bomu unavoya-voya. 47Ariphosikira kukala, Jeso muchina Nazareti unachira, waanza kugomba kwa laka ra dzulu achiamba, “Nonera mbazi Jeso mutʼu wa mudzungu wa Daudi!” 48Atʼu anji achimugombera, na achimwamba anyamale. Ela yiye, hata achikaza kugomba kwa laka ra dzulu kwamba, “Nonera mbazi Jeso mutʼu wa mudzungu wa Daudi!”

49Jeso ariphosikira gago, waima achiamba, “Mwiheni adze.” Ndo ao atʼu achimwiha achimwamba, “Phenywa ni moyo! Na zuka udze, Jeso unakwiha!” 50Ndo yiye achibitʼa valore photsʼi, achitina dzulu na achenda kwa Jeso.

51Jeso achimuuza vivi, “Unahenza nikuhenderedze?” Yiye mutʼu yetsʼona achimuudzidza achimwamba, “Mwalimu, ninavoya nipate kona.” 52Jeso yiye achimwamba, “Kuluphiroro ridzikuphoza. Kwa vivyo, enda vyako.” Phapho kare yiye mutʼu yetsʼona achiona, achimutuwa Jeso mumo charoni.

Currently Selected:

Mariko 10: CHIDUR

Highlight

Copy