Mariko 9

1Jeso waenderera kwamba, “Ninamwambira jeri, phana anjine phapha ario kʼaandafa photsʼiwona Ufalume wa Mulungu uchidza na widimi.”

Jeso unagaluka chivinjine

(Matayo 17:1-13; Luka 9:28-36)

2 # 2 Pet 1:17, 18 Ziriphochira tsʼiku tʼandahu, Jeso waahwala ano Pʼetero, Jakobo na Johana achenda nao vivi hata dzulu ya mwango ure ao tu hichiyao. Ariphofika kuko, Jeso achanza kugaluka chivinjine mbere za ao anafunzie. 3Mavaloge gágaluka meruphe tsetsetse hata kʼakuna mutʼu yeyosi mumu duniani aidimaye kutsusa nguwo hata zikakala nyeruphe dza vivyo. 4Na agomvi a Mulungu Eliya na Musa achilairira phapho, achigomba na yiye Jeso. 5Pʼetero achimwamba Jeso vivi, “Mwalimu, ni vidzo vivi vya kukala naswi hu phamwenga phapha. Ndo ima hujenge vibanda vihahu: chimwenga chako, chimwenga cha Musa na chinjine cha Eliya.” 6Yiye wakala kʼamanya aambedze, mana, osi áogofyerwa muno. 7#Mat 3:17; Mar 1:11; Luk 3:22Chisha, ingu richilairira richiima dzulu yao kwaerekeza, na laka kulaa kuko inguni richamba, “Yuyu ni Mwanangu nimuhenzaye, musirikiseni.” 8Phapho kare ao anafunzi achilola kahiri, ela kʼaamonere mutʼu munjine, itsʼiphokala yiye Jeso, phamwenga na ao.

9Ariphokala anateremuka kulaa kuko mwangoni, Jeso waafungira kukala, atsʼimwambire mutʼu yeyosi dzulu ya riro ono rokala adzirona hata phondakala Mulungu udzimufufula, yiye Mutʼu yelaa dzulu. 10Ndo ao kʼaagahendere ngʼanzi na mutʼu yeyosi maneno gago, ela achikala achiuzana ao kwa ao, yiyo maana, ya kufufuka kulaa kuzimu.

11 # Mal 4:5; Mat 11:14 Chisha ao ámuuza Jeso vivi, “Bee, heka alimu a shariya anaamba kukala, Eliya ndiye yendamulongolera yiye Kʼirisito?” 12Jeso achiaudzidza achiaamba, “Eliya undakudza mwanzo jeri, adze agaudzetʼo maneno gosi. Ela hata vivyo, ni kwadze gáandikwa mumo Maandikoni ga Mulungu kukala, Mutʼu yelaa dzulu ni seti aturike muno, na aphurywe? 13Bee ninamwambira mino, vivi Eliya wakudza kare, na atʼu achimuhendera mai dza vyoandikwa dzuluye.”

Chila chitʼu chinaidimikika kwa mutʼu akuluphiraye

(Matayo 17:14-20; Luka 9:37-43a)

14Jeso na ao anafunzie ahahu ariphoteremuka kulaa kuko mwangoni, áona duu bomu ra atʼu ridziazunguluka ao anafunzi anjine, na alimu a shariya ákala analumbana nao. 15Riro duu ra atʼu ririphomona Jeso tu, osi áangalala muno, na achimutsangira achendamulamusa. 16Jeso achiuza vivi, “Munalumbana na wani?” 17Phapho mutʼu mumwenga kati ya riro duu ra atʼu achimuudzidza achimwamba, “Mwalimu, mimi nidzilamula kumureha mwanangu kwako, kwakukala, una pʼepʼo hata udzimuhenda kʼagomba. 18Na chila amulokerapho, nikumubitʼa photsʼi, akamuhenda alae fulo inji ra mulomo, akadzafuna meno, na kudingalala mwiri wosi. Ndo náavoya ahumwao amulavye yiye pʼepʼo, ela kʼaaidimire.”

19Jeso phapho achiaamba vivi ao ahumwae, “Nindakala Na mwimwi hata rini mwimwi atʼu otsʼi kuluphiro? Na nindamuvumirira hata rini? Hʼaya mureheni phano bee yiye mwanache.” 20Achimuphirika kwakwe, na pʼepʼo ariphomona Jeso tu, wamutetemesa yiye mwanache hata achigwa photsʼi, achigalagala na kulaiwa ni fulo ra mulomo. Jeso achimuuza abaye yiye mwanache vivi, 21“Waanza hangu rini yuno?” Yiye mutʼu achimuudzidza achimwamba, “Waanza hangu wanacheni. 22Na yiye pʼepʼo udzimubitʼa mohoni na madzini chisichisi kwa amuhangamize kamare. Ndo uchikala una utʼu urio unaidima kuuhenda, hwonere mbazi na uhwavize!” 23Jeso achimwamba, “Hangwe, uchikala unaidima! Maneno gosi ganaidimikika kwa mutʼu ariye una kuluphiro.” 24Phapho yiye mutumia achigomba kwa laka ra dzulu achiamba, “Ninakuluphira, ela kuluphiro rangu kʼaritosha, naviza nikaze kukuluphira.”

25Jeso ariphorona duu ra atʼu rinaonjezeka maruru phapho mbereze, wamuchemera yiye pʼepʼo achimwamba, “Pʼepʼo umuhendaye yuyu mwanache atsʼigombe na atsʼisikire, ninakwamba, mulae yuyu mwanache, na utsʼimuuyire kahiri.” 26Phapho yiye pʼepʼo, achimupigisa kʼululu yiye mwanache na achimubitʼa photsʼi, chisha achimulaa. Phapho yiye mwanache achidzigolosa dza lufu, hata anjine achiamba udzefa. 27Ela Jeso achimugwira mukono achimwimisa, naye achiima.

28Gariphochira gago, Jeso wakala u nyumbani na ao ahumwae hicheye, nao achimuuza vivi, “Kwadze sino kʼahwidimire kumulavya yiye pʼepʼo?” 29Jeso achiaudzidza achiaamba, “Pʼepʼo dza yuyatʼu ulaviwa kuchirira mavoyo#9:29 Nakala zinjine zinaonjeza: na kufunga. hicheye.”

Jeso unagomba kahiri dzulu ya chifoche

(Matayo 17:22-23; Luka 9:43b-45)

30Ndo Jeso na ahumwae áuka phapho, achenderera na charo chao kuchirira jimbo ra Galilaya. Jeso kʼahenzere atʼu amanye ariphokala, 31mana, wakala unaafunza ahumwae. Yiye waamba vivi, “Mimi Mutʼu yelaa dzulu, nindalaviwa kwa atʼu ario andaniulaga, ela tsʼiku ya hahu nindafufuka kulaa kuzimu.” 32Ela ao ahumwa kʼaayimanyire yiyo maana ya maneno gago, na achogopha kumuuza.

Mubomu ni ani

(Matayo 18:1-5; Luka 9:46-48)

33Ndo Jeso na ao ahumwae ákwenda hata Kaparinaumu, na ariphokala a nyumbani, waauza vivi, “Mudzikala munauzana-uzana dzulu ya chitʼu chani kura njirani?” 34#Luk 22:24Ela ao kʼaamuudzidzire, mana, kuko njirani ákala adziuzana-uzana dzulu ya ni yuphiye kati yao, ariye ndiye mubomu kuriko anzie osi.

35 # Mat 20:26, 27; 23:11; Mar 10:43, 44; Luk 22:26 Ndo Jeso ariphosagala photsʼi, waaiha aratʼu ahumwae kumi na airi, na achiaamba vivi, “Mutʼu achihenza kukala wa mwanzo, ni seti akale wa musindikizo, na muhendikazi wa osi.” 36Chisha achihwala mwanache mudide, achimwimisa kati-kati yao. Achimuunula, na achiaamba vivi, 37#Mat 10:40; Luk 10:16; Joh 13:20“Mutʼu amuphokeraye mwanache dza yuyu kwa dzina rangu, bee unaniphokera mimi, na aniphokeraye mimi kʼaniphokera mimi hichiyangu tu, ela unamuphokera hata yenihuma.”

Yetsʼimupinga Jeso unavuhira kwakwe

(Luka 9:49-50)

38Johana achimukatʼa ulimi achimwamba, “Mwalimu, hudzimona mutʼu mumwenga unalavya pʼepʼo kwa kuhumira dzinaro, naswi hukamukahaza, kwakukala, yiye bee tsʼiye mumwenga wehu.” 39Ela Jeso yiye achiaamba vivi, “Mutsʼimukahaze mutʼu dza yiye, mana, kʼakuna mutʼu ahendaye vilinge kwa dzina rangu, na phapho kare akagomba mai dzulu yangu. 40#Mat 12:30; Luk 11:23Mutʼu yetsʼihupinga, bee unavuhira kwehu. 41#Mat 10:42Ninamwambira jeri mino, mutʼu yeyosi yendamupʼa chikombe cha madzi ga kunwa kwakukala, mwimwi mu atʼu a mimi Kʼirisito, nina kanuni kukala, kʼandakosa kupata manosoge.”

Atʼu niadzimanyirire atsʼiriche kukuluphira

(Matayo 18:6-9; Luka 17:1-2)

42Jeso waenderera kugomba achiamba, “Mutʼu yeyosi yendamuhenda mumwenga wa aa ario chiroho ni atsanga ariche kukuluphira, vingekalatʼo muno kala mutʼu yiye ni kufungwa lwala lubomu lwa tsʼingo, na akendatsuphwa kati-kati ya bahari. 43#Mat 5:30Mukonoo uchikuhenda uriche kunituwa, utose. Ni baha kuhenda chirema cha mukono, ela ukaphenye uzimani, kuriko kukala na mikonoyo yosi miri, na ukatsuphwe moho wa Jahanamu otsʼifisika.#9:43 Nakala zinjine zinaonjeza fungu ra 44 dza vivyo ririvyo fungu ra 9:48. 45Guluro richikuhenda uriche kunituwa, ritose uritsuphe. Ni baha kuhenda chirema cha gulu, ela ukaphenye uzimani, kuriko kukala na magulugo gosi mairi, na ukatsuphwe moho wa Jahanamu.#9:45 Nakala zinjine zinaonjeza fungu ra 46 dza vivyo ririvyo fungu ra 9:48. 47#Mat 5:29Na dzitsoro richikuhenda uriche kunituwa, rishungulule. Ni baha kuhenda chʼongo, ela ukaphenye Ufalumeni kwa Mulungu, kuriko kukala na matsogo gosi mairi, na ukatsuphwe moho wa Jahanamu. 48#Isa 66:24Kuko Jahanamu mabuluge kʼagafa, na mohowe kʼaufiswa kamare. 49Henda vivyo, mana, chila mukuluphiri undatakaswa kuchirira majezo. 50#Mat 5:13; Luk 14:34, 35Munyu ni udzo, ela uchikala kʼaukoza, undawudzadze kukala udzo kahiri? Bee kʼamona mwimwi, nituwani mimi na moyo umwenga kamare, na musagale na reri kati yenu.”

Currently Selected:

Mariko 9: CHIDUR

Highlight

Copy