Mariko 2

Widimi wa Jeso wa kusamehe dambi

(Matayo 9:1-8; Luka 5:17-26)

1Ziriphochira tsʼiku fulani, Jeso wauya mudzi wa Kaparinaumu, na atʼu achisikira kukala, wakala u kuko kwakwe asagalako. 2Ndo atʼu anji muno ákwendaphenya yiyo nyumba yokala Jeso, na yichiudzala hata pho muyangoni phachikala kʼaphana mwanya wowosi. Jeso mumo wakala unaasumurira neno ra Mulungu, 3na phapho phachidza atʼu ane okala atsukula mutʼu wa kupholoza na lutsʼatsʼa, anamureha kwa yiye Jeso. 4Ela kwahivira atʼu ákala ni anji hata phachikala kʼaphana mwanya, ao kʼaaidimire kumufisa phephi na Jeso. Ndo achikotʼa na ngazi hata dzulu ya nyumba, achitsamula hata achipata mwanya kwerekeza phatʼu phokala Jeso, na achimutsereza yiye mutʼu wa kupholoza na lulo lutsʼatsʼa lokala utsukulirwa. 5Jeso ariphoona jisi atʼu ao arivyokala na kuluphiro, wamwamba vivi yiye mutʼu wa kupholoza, “Mwanangu, udzisamehewa dambizo.”

6Phapho phakala phasegere alimu a shariya anjine, na ao achidziuza vivi mwao myoyoni, 7“Ugombadze vino yuno baye? Yuyu unamukufuru Mulungu! Kʼakuna mutʼu aidimaye kusamehe dambi, hata itsʼiphokala Mulungu hicheye tu!” 8Jeso achigamanya phapho kare gago maazo gao gokala anaaza, na achiaamba vivi, “Kwadze munaazavyo mwenu myoyoni? 9Ni riphiro ririro dide, ni kumwamba yuno mutʼu wa kupholoza, ‘Udzisamehewa dambizo,’ hebu ni kumwamba, ‘Unuka uhwale lutsʼatsʼalo wenende?’ 10Bee, vivi nindamonyesa kukala, mimi Mutʼu yelaa dzulu, nina widimi phapha duniani wa kusamehe atʼu dambi zao.” Phapho Jeso, achimwamba yiye mutʼu yekala upholoza vivi, 11“Unuka uhwale lutsʼatsʼalo wende vyako mudzini.” 12Phapho yiye mutʼu achiunuka, achihwala lutsʼatsʼalwe, na achilaa na kuno atʼu osi okala a phapho anamulola. Atʼu osi phapho achangalala na achimulika Mulungu achiamba, “Kʼahudzangwe kugaona maneno dza gaga!”

Jeso unaahenza hata atʼu otsʼiriwa

(Matayo 9:9-13; Luka 5:27-32)

13Tsʼiku mwenga, Jeso wakwenda kahiri kʼanda-kʼanda ya ziya ra Galilaya. Duu ra atʼu richimutuwa kuko, naye achanza kwafunza.

14Ariphomala kufunza, wakala unaenenda na njiraze, na achimona Lawi wa Alifayo usegere ufisi ya kodi. Ndo Jeso achimwamba, “Nituwa!” Lawi achiunuka achimutuwa.

15Chidzakoche, Lawi wamupiga karibu Jeso na anafunzie akarye leu kwakwe, phamwenga na atosi a kodi anzie, na atʼu anjine otsʼiriwa.#2:15 Chiyunani chinaamba adambi. (Kati ya duu ra atʼu omutuwa Jeso kuko, anji ákala ni ao atʼu otsʼiriwa.) 16Ndo anjine a alimu a shariya okala ni Afarisayo ariphomona Jeso unarya phamwenga na atʼu dza ao, áauza anafunzie achiaamba, “Heka yuno unarya na atosi a kodi, na atʼu anjine otsʼiriwa?” 17Ela Jeso ariphogasikira gago, waamba vivi, “Azima kʼaana haja na muganga, ario na haja na muganga ni akongo. Mimi tsʼidzire kudzaaiha atʼu adzonao anahenda ga haki atye, ela, nákudzaaiha adambi.”

Mafunzo maphya ga Jeso

(Matayo 9:14-17; Luka 5:33-39)

18Ukati umwenga, anafunzi a Johana Mubatizi, na anafunzi a Afarisayo ákala afunga. Ndo atʼu fulani achenda kwa Jeso, achendamuuza vivi, “Heka we Jeso anafunzio kʼaafunga, ela anafunzi a Johana Mubatizi na anafunzi a Afarisayo anafunga?” 19Jeso achiaudzidza kwa mufano wa tʼadi kukala, “Atʼu oambirwa nyambura anaidimadze kufunga, na hata bwana nyambura ucheri phamwenga nao? Ao, ukati wosi akalapho a phamwenga na bwana nyambura, kʼaaidima kufunga kamare. 20Ela ukati undafika, urio bwana nyambura undauswa kati yao, na ukati uo ndipho andafunga.

21“Na kʼakuna mutʼu atiyaye chiraka chiphya demuni. Maana, mutʼu achihenda vivyo, chicho chiraka chiphya chindatsonyoka, na riro demu rikaze kwahuka. 22Hebu, kʼakuna mutʼu atiyaye divai mbitsi ndani ya viriba#2:22 Chiriba ni chiya cha chʼingo chofumwa dza chirenje cha kwikira divai, nyuchi na kwenderera. vya pʼindi. Maana, mutʼu achihenda vivyo, yiyo divai mbitsi yindachemuka na yivyudule vivyo viriba, na yiyo divai yimwagike, na vivyo viriba vibanangike. Ela divai mbitsi yitiywa ndani ya viriba viphya.”

Jeso ni Bwana wa Sabato

(Matayo 12:1-8; Luka 6:1-5)

23 # Kʼumb 23:25 Tsʼiku mwenga ya Sabato, Jeso wakala unachira phamwenga na anafunzie kwenye minda ya nganu, na ao anafunzie achanza kufutsula masuche ga nganu mumo kʼanda-kʼanda ya njira. 24Afarisayo achimwamba vivi yiye Jeso, “Hebu lola! Heka ano anafunzio anahenda neno ririro tsʼi shariya kuhendwa tsʼiku ya Sabato?” 25Jeso achiaudzidza achiaamba, “Vidze, kʼamudzangwe kusoma dzulu ya vyohenda mufalume Daudi na anzie ukati phokala ana nzala na anahenza leu? 26#Alaw 24:9#1 Sam 21:1-6Ukati Abiatari ariphokala ndiye kuhani mubomu, Daudi waphenya dzumba rokala Aiziraeli achivoya Mulungu, achihewa yiyatʼu mikahe yokala yidziikwa mbere za Mulungu, na achiyirya. Chishariya, ákala ni makuhani hichiyao tu, ndio okala anahenzezwa kurya mikahe yiyo. Ela phapho Daudi wayirya, na chisha achiapʼa hata anzie.”

27Ndo Jeso achiaamba vivi ao Afarisayo, “Sabato yaikwa kwa yiaavize anadamu, ela anadamu kʼaaikirwe atawalwe ni Sabato. 28Na bee, manyani kukala, mimi Mutʼu yelaa dzulu, ni Bwana hata wa yiyo Sabato.”

Currently Selected:

Mariko 2: CHIDUR

Highlight

Copy