Mariko 3

Jeso unaphoza mutʼu tsʼiku ya Sabato

(Matayo 12:9-14; Luka 6:6-11)

1Tsʼiku yinjine, Jeso wakwendaphenya sinagogini, na mumo mwakala muna mutʼu yekala upholoza mukono. 2Na chisha, mumo mwakala muna atʼu okala anatsakula chausa cha kumulumbira Jeso. Ndo ákala a phapho anatariza aone kumba undamuphoza yiye mutʼu yiyo tsʼiku ya Sabato. 3Jeso yiye mutʼu wa kupholoza mukono achimwamba vivi, “Nzo vyako phano mbere.” 4Chisha, Jeso ao atʼu achiauza vivi, “Ni riphiro ririro ni shariya kurihenda tsʼiku ya Sabato, ni kuhenda neno idzo, hebu kuhenda neno ii? Ni kutivya mutʼu, hebu kuulaga?” Ela ao kʼaagombere chitʼu. 5Ndo phapho Jeso achialola osi na kuno utsukirwa, achishononeka kwa chicho chiphurye chao, na chisha achimwamba vivi yiye mutʼu, “Golosa mukonoo!” Yiye mutʼu achigolosa mukonowe, na uchiuya uzima kamare. 6Ndo Afarisayo achilaa konze, achanza kudzila phapho kare na atʼu a chama cha Herode, dzulu ya njira yondamuulagira Jeso.

Duu ra atʼu rinenda kwa Jeso

7Jeso aripholaa phapho sinagogini, wauka na anafunzie achenda kʼanda-kʼanda ya ziya ra Galilaya, na duu ra atʼu kulaa Galilaya richimutuwa. 8Na chisha, atʼu anji muno kulaa jimbo ra Judea, mudzi wa Jerusalemu, jimbo ra Idumaya, ngʼambo ya muho wa Jorodani na atʼu a phephi-phephi na midzi ya Tʼiro na Sidoni, ákwenda kwakwe. Atʼu ao anji vivyo, ákwenda kwakwe kwakukala, ákala asikira dzulu ya maneno manji gokala udzigahenda. 9#Mar 4:1; Luk 5:1-3Jeso ariphoona atʼu áchimira muno, waamba anafunzie amwikiretʼo mashuwa mwenga tʼide, kwa atsʼidze akafyehewa ni riro duu ra atʼu anji. 10Jeso wakala udziaphoza atʼu anji. Ndo akongo osi ákala anasukumana kwa apate kumukumba. 11Na atʼu okala ana mapepo ákala achimona Jeso, anadzibitʼa photsʼi mbereze, na agombe kwa laka ra dzulu kwamba, “Uwe u Mwana wa Mulungu!” 12Ela Jeso achiafungira muno atsʼiaambire atʼu kukala, yiye ni ani.

Jeso unaatsagula anafunzi kumi na airi

(Matayo 10:1-4; Luka 6:12-16)

13Jeso waaiha atʼu okala unaahenza amutuwe, na achikotʼa nao hata mwangoni. 14Jeso kuko achiatsagula atʼu kumi na airi, na achiapʼa dzina ra “Ahumwa.”#3:14 Nakala zinjine kʼazina pʼande yiyi yambayo: na achiapʼa dzina ra “Ahumwa.” Yiye waatsagula kwa akale naye, akale achiahuma kwendasumurira neno ra Mulungu, 15na kwa akale na widimi wa kulavya atʼu pʼepʼo. 16Ao atʼu kumi na airi otsagulwa ni Jeso ndio aa: Simoni (ariye wamuhatsʼa dzina ra Pʼetero), 17Jakobo na Johana, anangwa a Zebedayo. (Aa, Jeso waahatsʼa dzina ra “Bonerege,” na maanaye ni, “Ana a chikwakwara.”) 18Andireya na Filipu, Batolomayo, Matayo, Tʼomasi, Jakobo wa Alifayo, Tadayo, Simoni, mutʼu wa chama cha Zelote,#3:18 Lola Luka 6:15. Chiyunani chinaamba muchina Kanani, na maanaye ni, mutʼu wa chama cha Zelote. 19na Juda Isikariyoti, yekudzamuguza Jeso.

Atʼu anaamba Jeso una pʼepʼo

(Matayo 12:22-23; Luka 11:14-23; 12:10)

20Jeso wakwenda kokala achisagala, na duu ra atʼu richendarundikana kuko, hata Jeso na anafunzie achishindwa ni kurya leu. 21Atʼue nao ariphosikira dzulu ya maneno gago gosi, ákwenda kwa akamuhwale, mana, atʼu ákala anaamba unaayuka.

22 # Mat 9:34; 10:25 Alimu a shariya okala alaa Jerusalemu áamba, “Yuyu upagaiwa ni Belizabuli, mubomu wa pʼepʼo! Na uhewa widimi wa kwalavya atʼu pʼepʼo ni yiye mubomu wa pʼepʼo.” 23Phapho Jeso achiaiha, na achigomba nao chitʼadi. Yiye waamba vivi, “Shetani unaidimadze kumulavya Shetani munziwe? 24Ufalume wowosi ogavikana virundu-virundu viyuwanavyo, kʼawidima kutowa. 25Atʼu amwenga nao achigavikana na kuyuwana, mudzi kʼaundaenderera. 26Kwa vivyo, yiye Shetani achikala udzidziphenyerera mwenye na unadzigavya, kʼaidima kutowa hata ni unahangamika.

27“Kʼakuna mutʼu aidimaye kuphenya nyumba ya mutʼu wa mukotse na kumunyangʼanya miyoye. Yiye niaanze kumugwira yiye mwenye mwanzo na amufunge, ndipho aidime kumunyangʼanya miyoye.

28“Ninamwambira jeri mino, atʼu andasamehewa madambi gao gosi na makufuru gao gosi. 29#Luk 12:10Ela yeyosi amukufuruye Roho wa Mulungu, kʼandasamehewa hata kare na kare, ela undakala una dambi ya kare na kare.” 30(Jeso wagomba vivyo kwakukala, ámwamba, “Una pʼepʼo.”)

Ameye na nduguze Jeso

(Matayo 12:46-50; Luka 8:19-21)

31Phokala Jeso ucheri kugomba na riro duu ra atʼu, ameye na nduguze a chilume akudza nao. Achiima phapho phonze, na achilagizira akaihiwe. 32Duu ra atʼu rakala risegere kumuzunguluka. Ndo ao achimwamba, “Ameyo na nduguzo a kuko konze, anakuhenza.” 33Ela Jeso yiye achiamba, “Mayo na enehu a chilume?” 34Phapho achilola ao atʼu okala asegere kumuzunguluka, na achiamba, “Aa ndio ano mayo, na ndio enehu a chilume! 35Yeyosi ahendaye mahenzo ga Mulungu, bee ndiye mwenehu wa chilume, wa chiche na mayo.”

Currently Selected:

Mariko 3: CHIDUR

Highlight

Copy