Mariko 6

Jeso unaremwa kadzidzi ka kwao

(Matayo 13:53-58)

1Jeso ariphouka phapho, wakwenda kwao Nazareti phamwenga na anafunzie. 2Tsʼiku ya Sabato yiriphofika, wakwenda sinagogini achendaanza kufunza. Na anji omusikira, áangalala hata achiuzana enye kwa enye vivi, 3“Samba yuno, ni yuya fundi wa mbao? Na samba yuno ni mwana wa Maryamu hata nduguze a chilume ni ano Jakobo, Jose, Juda na Simoni? Na samba hata nduguze a chiche hunasagala nao phapha? Hʼaya bee, wagapataphi maneno gano yuno? Wahewa hekima ya chidzedze hata unahenda vilinge?” Phapho ao atʼu achimurema tsetsetse.

4 # Joh 4:44 Jeso yiye achiaamba, “Mugomvi wa Mulungu ni mutʼu aishimiwaye, itsʼiphokala, kʼaishimiwa kwao, ni mbarize na atʼu a phao phenye.” 5Phapho Jeso kʼahendere vilinge vinji, hata itsʼiphokala, waabandikira mikono akongo achache, achiavoyera na achiaphoza. 6Yiye waangalazwa muno ni ao achina phapho, kwa vivyo arivyo kʼaamukuluphirire.

Jeso unaahuma anafunzie kumi na airi

(Matayo 10:5-15; Luka 9:1-6)

Jeso ariphouka phapho phao chidzidzini, watsemberera vidzidzi phapho phephi-phephi, achifunza atʼu. 7Chisha, waaiha phamwenga aratʼu anafunzie kumi na airi, achiapʼa widimi dzulu ya pʼepʼo, na achiahuma airi-airi. 8Gaga ndigo malagizoge goalagiza. Waamba, “Mwimwi kuko charoni, tsukulani ndatʼa tu hicheye, ela mutsʼitsukule mikahe, mukʼoba hebu pʼesa pʼochini. 9Valani virahu, ela mutsʼikale na mavalo mairi. 10Chila chidzidzi chondakwenda na mupigwe karibu ni mutʼu, sagalani kuko ukati muchikala munafunza hata phondaukira phatʼu phapho. 11#Mahe 13:51#Luk 10:4-11Na phatʼu phophosi pharipho enye andarema kumupiga karibu hebu kumusirikisa, phapho ukani, na muchikala munalaa phapho, kutʼani-kutʼani vumbi rondakala ririro mwenu maguluni, kwaonyesa kukala, andamanya enye.” 12Ndo ao anafunzi a Jeso achiuka, achendasumurira atʼu neno ra Mulungu kwa atye. 13#Jak 5:14Ndo achendaalavya atʼu anji pʼepʼo, achiaphaka mafuha ga muzeituni akongo anji na achiphola.

Herode Anitipa kʼamumanya Jeso ni ani

(Matayo 14:1-12; Luka 9:7-9)

14 # Mat 16:14; Mar 8:28; Luk 9:19 Nguma za Jeso zagotʼa chila phatʼu, hata mufalume Herode Anitipa achisikira dzulu ya gosi gokala unagahenda. Ndo atʼu anjine ákala anaamba,#6:14 Nakala zinjine zinaamba: yiye wakala unaamba, “Johana Mubatizi wafufulwa kulaa kuzimu, na gago ndigo gatumago hata unahenda vilinge.” 15Atʼu anjine ao ákala achiamba, “Mutʼu yiye ni mugomvi wa Mulungu Eliya.” Na atʼu anjine vivyo ákala achiamba, “Yiye ni mugomvi wa Mulungu dza mumwenga wa ao agomvi a Mulungu a pʼindi.”

16Ela Herode ariphokala usikira zizo nguma za Jeso, waamba, “Yiye, ninaona ni Johana Mubatizi, yemulagizira achitoswa chitswa, ela vivi wafufulwa kulaa kuzimu!”

17 # Luk 3:19, 20 Maana, kuko nyuma Herode wakala udzimulagizira Johana achigwirwa, na achifungwa, kwa amuhamye Herodiya mukaza nduguye Filipu, kwa wakala udzimutorosa. 18Ndo Johana wakala achimwamba, “Tsʼiyo shariya uwe kumuhwala mukaza nduguyo, na mwenye ucheri moyo!”

19Na gago gámuhenda Herodiya amutsukirirwe Johana, hata achikala unahenza aulagwe. Ela Herodiya washindwa ni kuhenda vivyo, 20kwakukala, Herode wakala unamogopha Johana, kwa wakala unamumanya ni mutʼu ahendaye ga haki, na wakala ni mutakatifu. Ndo yiye wakala unamurinda. Herode wakala achisirikisa maneno ga Johana unayugika muno, ela wakala unahenza kumusirikisa vivyo.

21Ela musindikizowe, Herodiya wakudzapata njira ukati phokala Herode unausa shuhuli ya kuvyalwakwe. Phapho wakala udziaalika abomu ario tsʼinize, abomu a shikari a viha, na atʼu anjine okala anamanyikana muno kuko Galilaya. 22Ndo mwanangwa wa chiche wa Herodiya achiphenya phapho, na achivina hata achiahamya Herode na ajenie. Ndo phapho, mufalume Herode achimwamba yiye musichana, “Uwe nivoya chochosi uhenzacho, na mimi nindakupʼa.” 23Chisha achimulaphira achimwamba, “Chochosi chondanivoya mino nindakupʼa, hata yikakala ni nusu ya yiyi itsʼi nitawalayo.”

24Phapho yiye musichana achilaa konze achendamuuza ameye vivi, “Nikamuvoyeni?” Ameye achimuudzidza achimwamba, “Kamuvoye chitswa cha Johana Mubatizi.” 25Ndo yiye musichana achiuya mairo kuko kwa yiye mufalume achendamwamba, “Ninahenza unipʼe sambi yenye, chitswa cha Johana Mubatizi ndani ya bakuli.”

26Phapho yiye mufalume achishononeka muno. Ela kwakukala, wakala udzimulaphira, chisha mbere za ao ajenie, achishindwa ni kumuremera gakwe. 27Ndo mufalume achialagiza shikari maruru, ende akamutose chitswa Johana achirehe. Shikari achenda kuko jela, achendamutosa chitswa Johana, 28na achidza nacho bakulini, achidzamupʼa yiye musichana, naye musichana achendamupʼa ameye. 29Anafunzi a Johana ariphogasikira gago, ákwendaluhwala lufulwe, achendaluzika.

Atʼu odzichira helufu tsʼano anahewa leu

(Matayo 14:13-21; Luka 9:10-17; Johana 6:1-13)

30Ahumwa a Jeso ariphouya, árundikana mbere za Jeso achimwambira gosi gokala adzigahenda, na kugafunza. 31Ndo atʼu anji muno ákala achidza phapho na kuuka hata Jeso na anafunzie kʼaapatire hata ukati wa kurya leu. Ndo Jeso achiaamba ao anafunzie, “Hindeni kʼanda hichiyehu, hukaoyeni vichache.” 32Ndo achiuka ao hichiyao ndani ya mashuwa, achenda kutʼu kokala kʼakuna atʼu.

33Ela áonewa ni atʼu anji phokala anenda, na achimanywa. Ndo atʼu anji álaa chila mudzi achikazira kuko kokala Jeso na anafunzie anenda, na hata ao achifika na chimbere kuko. 34#Isab 27:17; 1 Afal 22:17; 2 Mgu 18:16; Ezek 34:5; Mat 9:36Ndo Jeso naye unafika kuko na yiyo mashuwaye, walaa na achiona duu bomu ra atʼu hata achiaonera mbazi, mana, ákala anga dza magonzi gotsʼina murisa. Phapho achanza kwafunza maneno manji. 35Jeso phapho waenderera kufunza atʼu, hata dzuwa richiphenduka. Anafunzie achenda kwakwe achendamwamba, “Vivi bee kunatswa, na phapha huripho kʼaphana mudzi wa mutʼu phephi. 36Ndo ela tsʼi baha walage ano atʼu, ende mindani na vidzidzi virivyo phephi-phephi, akadzigulire vyakurya?” 37Ela Jeso yiye achiaudzidza achiaamba, “Apʼeni mwimwi leu arye.” Ao achimwamba, “Bee, leu ra kwamvunya atʼu ano osi hundachigula nani? Maana, hata leu rigulwaro ni mahelufu ga pʼesa, chisha kʼariamvunya vivyo!” 38Jeso achiauza achiaamba, “Kwani muna mikahe mingaphi? Hebu endani mukayilole.” Ariphokwendalola, áuya achidzamwamba, “Phana mikahe mitsano, na mabeshe mairi.”

39Chisha Jeso achiaamba, “Aambireni atʼu asagale phapho nyasini maduu-maduu.” 40Ndo ao atʼu achisagala maduu-maduu ga atʼu mirongo mitsano-mitsano, na ga atʼu gana-gana. 41Jeso achihwala yiyatʼu mikahe mitsano na gago mabeshe mairi, achilola dzulu mulunguni achilavya mumvera kwa Mulungu, na achiyimega-mega yiyo mikahe. Chisha, achiapʼa ao anafunzie aapʼe atʼu agavyane. Na garatʼu mabeshe mairi nago, gachigaviwa atʼu osi vivyo. 42Phapho atʼu osi achirya hata achimvuna. 43Aratʼu anafunzi achitsola-tsola visiku vya mikahe na vya gago mabeshe vyokala visala, na achiudzaza vikaphu kumi na viri. 44Alume hichiyao orya phapho, ákala ni helufu tsʼano.

Jeso unaenenda dzulu-dzulu ya madzi

(Matayo 14:22-23; Johana 6:16-21)

45Gariphochira gago tu, Jeso waamba anafunzie aphenye mashuwani phapho kare, amulongolere kwenda kadzidzi kariko Betisaida ngʼambo ya riro ziya, ukati yiye unalagana na riro duu ra atʼu. 46Na ariphomala kulagana na ao atʼu, waambuka dzulu mwangoni, achendavoya.

47Kuriphofika usiku, mashuwa ya anafunzie yakala yifika kati-kati ya ziya, na yiye wakala u hicheye kuko konze ya riro ziya. 48Ndo achiaona anafunzie anapiga makasiya, ela anayugika kwakukala, vuto rakala rinaapiga voro. Ndo kunamba kunahendawewe, Jeso achenenda dzulu-dzulu ya madzi kwatuwa, na achihenda dza aachiraye. 49Ela ariphomona unaenenda dzulu-dzulu ya madzi, áona dza kwamba ni tunusi, na phapho achipiga kʼululu, 50mana, osi ákala anamona, na phapho achogofyerwa muno. Jeso achiagombekeza phapho kare achiaamba, “Mutsʼogophe, phenywani ni moyo ndimi!” 51Chisha achiphenya mumo mashuwani arimokala, na vuto richiricha. Phapho, ao anafunzi achangalala muno, 52mana, ao ákala kʼaadzangwe kumanya maana, ya yiyatʼu mikahe mitsano yoamvunya atʼu okala achira helufu tsʼano. Ao ákala ana kondwe na kwelewa utʼu maruru.

Jeso unaaphoza akongo Genesareti

(Matayo 14:34-36)

53Ariphovuka riro ziya, áfika itsʼi ya Genesareti, na achitiya nanga phapho. 54Na aripholaa mumo mashuwani tu, atʼu achimukumbikira kare Jeso. 55Ndo ao atʼu achizunguluka maruru itsʼi yiyo yosi, achihwala akongo na kwatsukula na tsʼatsʼa, kwaphirika chila phomusikira Jeso u phapho. 56Chila phatʼu arikokwenda Jeso, kala vidzidzini, midzini hebu mindani, atʼu áika akongo mutʼu mwalamu, achimuvoya Jeso aahenzeze akumbe hata kumba ni mutse wa valore, nao osi ariomukumba, áphola kamare.

Currently Selected:

Mariko 6: CHIDUR

Highlight

Copy