Mariko 7

Henzo ra Mulungu na jadi za Afarisayo kʼavigwa sawa

(Matayo 15:1-9)

1Ukati umwenga, Afarisayo na alimu a shariya anjine okala alaa Jerusalemu, ákwendarundikana mbere za Jeso. 2Ndo phapho achiona anafunzi a Jeso anjine anavunza jadi yao, kwa kurya photsʼi koga mikono. 3Afarisayo na Ayahudi osi, anatuwa jadi za akare ao, za kukala, ao niaoge mikono dza vihenzwavyo, ndo arye chitʼu. 4Na chitʼu chochosi chichilaa cheteni, niachitsukutse kwanza, ndo achirye. Chisha, ákala achituwa ada zinjine nyinji dza kutsukutsa vikombe, sufuriya na nyungu.

5Ndo Afarisayo na alimu a shariya achimuuza Jeso achimwamba, “Heka ano anafunzio kʼaatuwa jadi za akare, hata ao anarya photsʼi koga mikono?” 6#Isa 29:13Jeso achiaudzidza achiaamba, “Gago maneno gogombwa chimbere dzulu yenu ni mugomvi wa Mulungu Isaya, mwimwi alumakwiri, ni ga jeri. Mulungu kuchirira Isaya waamba,

‘Atʼu aa anaamba mulomoni ananihenza,

ela myoyoni kʼaanenzi.

7Na hata kuko kunabudu kwao,

tsʼikona dza chitʼu.

Mana, ao ahwala shariya zotungwa ni atʼu,

akazifunza kuno achamba ni zangu!’

8“Mwimwi munaricha malagizo ga Mulungu, munatuwa jadi za binadamu.

9“Mwimwi munarema chilachu kutuwa malagizo ga Mulungu, kwa mutuwe jadi zenu enye! 10#Kul 20:12; Kʼumb 5:16; Kul 21:17; Alaw 20:9Maana, Musa waamba, ‘Aishime abayo na ameyo,’ na ‘Amulaphizaye muvyaziwe, bee unawirya kunyongwa.’ 11Ela mwimwi vino munaafunza atʼu kukala, ‘Mutʼu achikala una mwiyo wa kumokolera muvyaziwe, ela achiamba, “Mwiyo uu ni koribani,” ’ yaani, (mino nálaga kukala nindaupʼa Mulungu), 12hʼaya phapho kʼamumuhenzeza kahiri kwahendera utʼu avyazie na mwiyo uo. 13Bee, manyani kukala, vivyo munaphurya neno ra Mulungu, kwa kutuwa na kufunza jadi zenu. Na chisha, munahenda maneno manji dza gago.”

Maneno gamutiyago mutʼu najisi

(Matayo 15:10-20)

14Chisha, Jeso wasumiza riro duu ra atʼu, achiaamba, “Nisikizani mugamanye gaga nimwambirago. 15Mutʼu kʼatiywa najisi ni utʼu wowosi auryao. Ela gamutiyago mutʼu najisi ni maneno galaago mwakwe ndani.”#7:15 Nakala zinjine zinaonjeza fungu ra 16 dza: Na bee, musikizi, naagasikire! 17Ariphoricha riratʼu duu ra atʼu, ákwendaphenya nyumbani, na ao anafunzie achimuuza maana, ya yiyo tʼadi yokala udziyigomba. 18Ela yiye achiaudzidza achiaamba, “Yaani hata mwimwi namwi kʼamumanya? Vino bee kʼamumanya kukala, mutʼu kʼatiywa najisi ni utʼu auryao? 19Maana, leu richiriwa kʼarenda moyoni, ela renda uhumboni, na chidzako nikunyewa.” (Jeso ariphogomba vivyo, wakala unaimanisha maleu gosi ganarika.)

20Jeso waenderera kugomba achiamba, “Galaago ndani mwa mutʼu, ndigo gamutiyago najisi. 21Mana, ndani ya moyo wa mutʼu munalaa maazo mai, udiya, 22wivi, wulagi, uzinzi, moyo, kulaiwa ni matso kwa cha mutʼu, kulemba, mahendo makolo, chidzitso, kutsuna, kudziunula na uzuzu. 23Maneno gago gosi, galaa ndani mwa mutʼu, na ndigo gamutiyago najisi.”

Kuluphiro ra muchetʼu yekala tsʼiye Muyahudi

(Matayo 15:21-28)

24Jeso ariphouka phapho, wakwenda pʼande za Tʼiro.#7:24 Nakala zinjine zinaonjeza: na Sidoni. Kuko, wakwendaphenya nyumbani, na kʼahenzere mutʼu yeyosi agamanye gago, ela kʼaidimire kudzifitsa. 25Ndo kuko kwakala kuna muchetʼu mumwenga, yekala mwanawe wa chiche una pʼepʼo, na yiye ariphosikira nguma za Jeso tu, wakwenda kwakwe kare, achidzitsupha mbereze. 26Muchetʼu yiye wakala ni Muyunani, na wavyalwa boma ra Foinike kuko jimbo ra Siriya. Ndo yiye wamulombera Jeso ende akamulavye pʼepʼo yiye mwanawe wa chiche. 27Jeso achimuudzidza chitʼadi achimwamba, “Richa kwanza anangu arye hata amvune, mana, tsʼi vidzo kuhwala leu ra anache, na kuritsuphira madiya.” 28Yiye muchetʼu naye achimuudzidza achimwamba, “Ni gago jeri Bwana, ela pʼukupʼuku za anache zichigwa, madiya nago ni paka galambe.” 29Phapho Jeso achimwamba, “Unaidima ukenda vyako kwa vyodziudzidza, na mwanao ulaiwa ni pʼepʼo.” 30Ndo muchetʼu achiuya mudzini, na achendamona mwanawe uhembelele chitʼandani, ulaiwa ni pʼepʼo.

Mutʼu yetsʼisikira na yetsʼigomba unaphozwa

31Jeso ariphouka lalo ra Tʼiro, wachira na Sidoni, achiteremuka na riro ziya ra Galilaya kuko Dekapoli. 32Kuko, atʼu achimuphirikira mutʼu yekala kʼasikira na kʼagomba, na achimuvoya amwikire mikono amuvoyere aphole. 33Jeso achimuusa phapho duuni, achenda naye kʼanda achimutiya vyala vya masikironi. Chisha, Jeso achilatsʼa mahe, achilukumba lulo lulimilwe yiye mutʼu. 34Achilola dzulu mulunguni, achisohozeka na achimwamba vivi yiye mutʼu, “Efata,” yaani “Vugukwa!” 35Phapho yiye mutʼu masikiroge gachifunduka, na lulimilwe luchivuguka, na achanza kugomba chividzo phapho kare. 36Jeso achiafungira atsʼimwambire mutʼu yeyosi gago, ela viratʼu arivyo wakala unaafungira kwenda, vyaahenda atʼu akaze kugavumisa. 37Atʼu áangalala muno achiamba, “Maneno gosi udzigahenda chividzo! Otsʼisikira, udziahenda asikire, na otsʼigomba udziahenda agombe.”

Currently Selected:

Mariko 7: CHIDUR

Highlight

Copy