ลูกา 9
9
เยซู พ้าย เหฒียบ เหญ่ย เต้า ไซ-ก๋อ มี่ง ฒุ่น โต์
(เป๊ย หมั่ง มัดทาย 10:5-15; มาโค 6:7-13)
1เยซู เห่ว นิ่น เญย เหฒียบ เหญ่ย เต้า กง-โฒ่ ต้าย ฒุ้น ฯฒฯ จิว หลี่ง จิว หัด ม์า ปุน นิ่น บัว ไฮ่ หฒุ่น ตุ๊ หญู่งๆ เมี้ยน ธ้วด หย่า ไฮ่ หฒ่อ ตุ๊ แป่ง หลง. 2นิ่น พ้าย นิ่น บัว ธ้วด มี่ง ฒุ่น ทิน-ฮู่ง โหฒว เฒี้ยว กุ๊น เมี่ยน เญย คู้ เฝียน หย่า หฒ่อ แป่ง. 3เยซู บั๋ว นิ่น เญย ไซ-ก๋อ, “ธ้วด เจ๊า ไม้ ตู๋ง ต้อ หาย หญู่ง มี่ง. ปย๊า-บย่า, บัวะ จ๋อง, เปี้ยน ฝุย, ฒิ่น ญ่าน, เลี่ยม ลุย-โหว เหยี่ยน หย่า ไม้ ตู๋ง ต้อ.#ลูกา 10:4-11 4เม่ย บัว ฮิด หาย เต้า เญย เปย๊า, อ๋อย หฒุ ฮิด เถา ธ้วด มี่ง กั้น นอม มู้ง. 5เมี่ยน ไม้ ฒิบ นอ, อ๋อย หฒุ ธ้วด วั้ว นอม ล์าง หย่า เฝง กั๊วะ เหฒา เญย เนีย-บูง กวั่ง วั้ว, เหว่ย โหฒว ฒอง-เหฒง ปุน นิ่น บัว ฮิ้ว ตุ๊ นิ่น บัว โหฒว ต่อง.”#กง-โฒ่ 13:51
6กง-โฒ่ บัว ฯฒฯ มี่ง ล์าง เจี๋ย ล์าง, เยียม นอมๆ ต๋อง ฒุ่น คู้ เฝียน หย่า หฒ่อ แป่ง.
เฮโล้ด ฮู่ง ไม้ ฮิ้ว เยซู ต้ง หาย เต้า
(เป๊ย หมั่ง มัดทาย 14:1-12; มาโค 6:14-29)
7กุ๊น กาลิลี เต่ย-ปูง วั้ว เต้า เฮโล้ด ฮู่ง ไฮ์ น้าย เต๋ย เหยียด ฒู้ง สี่ ธ้วด, นิ่น ฮนั้ม ไม้ เม่ง แปะ. ม่าย เต๋ย ก๊อง เถง เมี่ยน เจี๋ย ววม เญย เล์ย วั้ว เต้า โยฮัน แอ๋ง นั่ง ต้าย.#มัดทาย 16:14; มาโค 8:28; ลูกา 9:19 8ม่าย เต๋ย ก๊อง เอลียา หิ่น ธ้วด ต้าย. แอ๋ง ม่าย เต๋ย ก๊อง ม่าย เหยียด เต้า โล์-ฮนอย เญย โต่ว หว่า เมี่ยน นั่ง ต้าย. 9เฮโล้ด ก๊อง, “โยฮัน เญย มฆ้อง เยีย ฒู้ง บั๋ว เมี่ยน ฮงะ ดุ๊ด หมี่ อ๊ะ. วั้ว หญู่ง, ต้ง เยีย ไฮ์ ก๊อง โหฒว น้าย เต๋ย สี่ วั้ว ล่าน เมี่ยน เซ หาย เต้า?” เฮโล้ด ฯฒฯ ล์อ ฉัง ปวัด เยซู.
เยซู หวุย ปยา ธิน ล่าน เมี่ยน
(เป๊ย หมั่ง มัดทาย 14:13-21; มาโค 6:30-44; โยฮัน 6:1-14)
10กง- โฒ่ บัว หฑวน ต้าย ก๊อง นิ่น บัว โหฒว ลิ์ว เญย เหยียด ฒู้ง เจ๊า-โหล่ว ปุน เยซู หมวัง. เยซู ต้อ เจี๊ยน กง-โฒ่ บัว กั้น มี่ง นอม มู้ง, บั๋ว เห่ว เบดไซดา. 11เมี่ยน ธั้ม ฮิ้ว ตุ๊, ฯฒฯ กัน เจี๊ยน มี่ง. เยซู ฒิบ นิ่น บัว หย่า ก๊อง ทิน-ฮู่ง โหฒว เฒี้ยว เญย คู้ เฝียน บั๋ว นิ่น บัว. หาย เต้า เฉียม หฒุ หฒ่อ แป่ง, นิ่น หย่า หฒ่อ หลง.
12บะฮนอย อ๊า ลั่ม เต๋ย ม้วด อ๊ะ. วั้ว เต๋ย เหฒียบ เหญ่ย เต้า ไซ-ก๋อ ต้าย บั๋ว เยซู, “อ๋อย หฒุ ปุน น้าย เต๋ย เมี่ยน มี่ง อ๊ะ. บั๋ว นิ่น บัว มี่ง น้าย เต๋ย ต๋อง เญย ล์าง เหธา เด่ย-ลิ่ว จอม ล์อ กะน้าย หญั่น, ล์อ ต๋อง ฮิด, เหว่ย หฒุ น้าย เซ เล่ง เญย ต๋อง.”
13มป่า เยซู บั๋ว นิ่น บัว, “เม่ย บัว กั้น ล์อ ปุน นิ่น บัว หญั่น ม่าะ!”
นิ่น บัว เตา, “เยีย บัว ขูง ม่าย ดุ ปยา นอม ฌั้ว เหธา อี เต้า เบย์า ฮนั้ง. ไซ-เตี๋ย อ๋อย เยีย บัว มี่ง ม์าย กะน้าย ปุน ด่ง น้าย ธั้ม เญย เมี่ยน หญั่น?” 14(เยียม วั้ว เญย มจั่ง ตอน ม่าย เล่ย ไม้ โก ปยา ธิน ล่าน เญย ต๋อง.)
เยซู บั๋ว นิ่น เญย ไซ-ก๋อ บัว, “เห่ว หฒวัง เมี่ยน เฒว์ย เจี๊ยน เหยียด บ์ม เหยียด บ์ม เญย. เหยียด บ์ม เล่ย ไม้ โก ฮม์ เหฒียบ ล่าน เญย ต๋อง.”
15ไซ-ก๋อ บัว เอย เจี๊ยน น้าย เต๋ย หว่า โหฒว. หฒวัง เมี่ยน ฯฒฯ เฒว์ย เหฌี่ย. 16เยซู เฒาะ วั้ว เต๋ย ปยา นอม ฌั้ว เหธา อี เต้า เบย์า เธา เฮมียน หมั่ง ลู่ง, แล์ง ฒี่ง ทิน-ฮู่ง ลิ์ว ฯฒฯ แมะ ฆอย ปุน ไซ-ก๋อ บัว ต้อ มี่ง ปุน ฆอย หฒวัง เมี่ยน หญั่น. 17หฒวัง เมี่ยน หญั่น เป๊ว เหฑ่ง. เหฒ่ง เหฌี่ย หม่วน วั้ว เต๋ย กะน้าย, ไซ-ก๋อ บัว เซียว ต้าย ตุ๊ เหฒียบ เหญ่ย ดาน ปวั๊ง.
ปีเต เหญี่ยม เยซู
(เป๊ย หมั่ง มัดทาย 16:13-19; มาโค 8:27-29)
18ม่าย ฮนอย เยซู เยียม เล่ง เญย ต๋อง, นิ่น กั้น เต๋า เก๋า. ไซ-ก๋อ บัว หย่า เหธา นิ่น เยียม เญย. เยซู หน่าย ก๋า นิ่น บัว, “หฒวัง เมี่ยน ก๊อง เยีย เซ หาย เต้า?”
19ไซ-ก๋อ บัว เตา, “ม่าย เต๋ย ก๊อง เม่ย ต้ง เถง เมี่ยน เจี๋ย ววม เญย เล์ย วั้ว เต้า โยฮัน. ม่าย เต๋ย ก๊อง เอลียา. แอ๋ง ม่าย เต๋ย ก๊อง เม่ย เหยียด เต้า โล์-ฮนอย เญย โต่ว หว่า เมี่ยน แอ๋ง นั่ง ต้าย.”#มัดทาย 14:1-2; มาโค 6:14-15; ลูกา 9:7-8
20เยซู แอ๋ง ก๊อง, “เม่ย บัว นี? เม่ย บัว ก๊อง เยีย ต้ง หาย เต้า?”
ปีเต เตา, “เม่ย ต้ง ทิน-ฮู่ง พ้าย ต้าย เญย กีตู่.”#9:20 ไฟ เมสิยา.#โยฮัน 6:68-69
เยซู ก๊อง นิ่น อ๋อย หฒุ เตี๊ย โค้ว หย่า อ๋อย หฒุ ไต่
(เป๊ย หมั่ง มัดทาย 16:20-28; มาโค 8:30—9:1)
21เยซู หัด นิ่น เญย ไซ-ก๋อ, เห่ว นิ่น บัว ไม้ ตู๋ง ก๊อง น้าย เต๋ย สี่ บั๋ว หาย เต้า. 22นิ่น หย่า ก๊อง, “เยีย, ป้าม เมี่ยน เญย ตอน, อ๋อย หฒุ เสี่ยว ธั้ม-หญู่ง โค้ว. เมี่ยน โก๋ เหธา ไซ เมี่ยน เปย๊ย เหธา หฌาว เล์ย เญย ฟิน-แซง อ๋อย เฆ่ม เยีย, ต้อ เยีย มี่ง ไต๋ กวั่ง, มป่า ฆะฮ้า ปัว ฮนอย เยีย แอ๋ง นั่ง ต้าย.”
23เยซู แอ๋ง ก๊อง บั๋ว นิ่น บัว เหยียด ฒู้ง, “หาย เต้า อ๋อย กัน เยีย มี่ง อ๋อย หฒุ เซี้ย เจี๊ยน นิ่น กั้น. ฮนอยๆ อ๋อย หฒุ ดาม เจี๊ยน นิ่น เญย เหฒียบ หฑั่ง จ๋า กัน เยีย มี่ง.#มัดทาย 10:38; ลูกา 14:27 24หาย เต้า ขูง ฮนั้ม เหฌียว นิ่น กั้น เญย แหม่ง ฮนั้ง, วั้ว เต้า เญย แหม่ง ฯฒฯ หฒุ กวั่ง. มป่า หาย เต้า เหว่ย เยีย กวั่ง นิ่น เญย แหม่ง, วั้ว เต้า ฯฒฯ เหฌียว ตุ๊ นิ่น เญย แหม่ง.#มัดทาย 10:39; ลูกา 17:33; โยฮัน 12:25 25หาย เต้า ตุ๊ เหฑ่ง ลู่ง เดี๊ย เญย กะน้าย มป่า นิ่น กั้น หฒุ เหมียด, วั้ว เต้า ตุ๊ หาย หญู่ง ม่าย ลั่ม หล่ง? 26หาย เต้า ไญ้ เยีย หย่า ไญ้ เยีย หฌาว เญย หว่า, เยีย, ป้าม เมี่ยน เญย ตอน, เหธา เยีย กั้น เญย ฌัง-หล่าง หย่า เหธา หฒั่ง เตี๋ย เหธา ธีง-เหฑ่ง ฟิน-เมี่ยน เญย ฌัง-หล่าง ต้าย วั้ว หฒั่น, เยีย ฯฒฯ ไญ้ วั้ว เต้า. 27เยีย ก๊อง เฒียน บั๋ว เม่ย บัว, เยียม น้าย เญย เมี่ยน ม่าย เต๋ย ฒู้ง ไม้ แก้ง ไต่ ฯฒฯ ตุ๊ ปวัด ทิน-ฮู่ง ต้าย โหฒว เฒี้ยว กุ๊น เมี่ยน.”
ไซ-ก๋อ บัว ปวัด เยซู ทิ้ว เหฑ่ง หมี่ อ๊ะ
(เป๊ย หมั่ง มัดทาย 17:1-8; มาโค 9:2-8)
28เยซู ก๊อง ลิ์ว น้าย เต๋ย หว่า, ฆะฮ้า เสี่ย เหฮยียด ฮนอย เญย ต๋อง, นิ่น ต้อ เจี๊ยน ปีเต, โยฮัน, เหธา ยากอบ มี่ง วั้ว เจี๋ย บง เต๋า เก๋า.#2 ปีเต 1:17-18 29เยซู เต๋า เก๋า วั้ว หฒั่น, นิ่น เญย เฮมียน ทิ้ว เหฑ่ง หมี่ อ๊ะ. นิ่น เญย ลุย-โหว หย่า ทิ้ว หมี่ อ๊ะ, บ๊บ แปะ เญย, แฒ่งๆ วั้ว. 30เลี่ยม เฒ่ย ม่าย อี ล่าน เมี่ยน เยียม วั้ว เหธา เยซู ก๊อง หว่า, เซ โมเซ เหธา เอลียา. 31นิ่น บัว เยียม ฌัง-หล่าง หิ่น ธ้วด หย่า เยียม วั้ว เหธา เยซู ก๊อง เถา นิ่น ไต่ เญย เจ๊า ไม้ เล่า อ๋อย เยียม เยลูซาเลม ฒี่ง เฒี่ยง สี่. 32วั้ว หฒั่น ปีเต เหธา นิ่น เญย อี เต้า ต่อย มฒีง หญุย, อ๋อย มฌ่อม ไห่ อ๊ะ. นิ่น บัว เยี้ยด เญีย ต้าย, ปวัด เยซู เญย ฌัง-หล่าง หย่า ปวัด วั้ว เต๋ย อี ล่าน เมี่ยน เหธา เยซู โซ้ว เจี๊ยน วั้ว. 33วั้ว เต๋ย อี ล่าน เหธา เยซู อ๋อย เล่ย ต่อย วั้ว หฒั่น ปีเต ก๊อง บั๋ว เยซู, “เฒี้ยว อ้า! เยีย บัว เยียม น้าย เก้ง หลง ไห่. โท้ ปุน เยีย บัว โหฒว ปัว นอม ลิ่ว, โหฒว นอม ปุน เม่ย, โหฒว นอม ปุน โมเซ, แอ๋ง โหฒว นอม ปุน เอลียา.” (ปีเต ฒู้ง ไม้ ฮิ้ว ตุ๊ นิ่น ก๊อง หาย หญู่ง.)
34นิ่น ก๊อง หว่า ฒู้ง ไม้ แก้ง เซ้ด, ม่าย ต๊อ บ๋วน ต้าย เฑีย เจี๊ยน นิ่น บัว. ไซ-ก๋อ บัว เปียะ บ๋วน กะญั์ว นิ่น บัว กั้ม เหฑีย ไห่. 35ไฮ์ หว่า เยียม บ๋วน กะญั์ว ธ้วด ต้าย ก๊อง, “น้าย เซ เยีย เญย ตอน, ต้ง เยีย กิ๊น ต้าย วั้ว เต้า.#9:35 ม่าย เต๋ย โล์-ฮนอย โซว ขูง ก๊อง “น้าย เซ เยีย เญย ตอน- ฮนั้ม”. หมวัง นิ่น ม่าะ!”#อิสะยา 42:1; มัดทาย 3:17; 12:18; มาโค 1:11; ลูกา 3:22
36น้าย เต๋ย เฉีย เซ้ก หมี่ อ๊ะ, ขูง ม่าย เยซู กั้น เยียม วั้ว ฮนั้ง. ไซ-ก๋อ บัว หย่า มวั่ง เจี๊ยน น้าย เต๋ย เจ๊า-โหล่ว, ไม้ แก้ง ก๊อง นิ่น บัว ตุ๊ ปวัด ลิ์ว เญย เจ๊า บั๋ว หาย เต้า.
เมี้ยน มัวะ เต้า ตอน, เยซู หฒุ่น เมี้ยน ธ้วด หมี่ อ๊ะ
(เป๊ย หมั่ง มัดทาย 17:14-18; มาโค 9:14-27)
37ตะเหญ่ย ฮนอย, เยซู บัว เยียม บง เหฌี่ย ต้าย, ม่าย กวั้น เมี่ยน ธั้ม เญย ต้าย ล์อ เยซู. 38วั้ว กวั้น เมี่ยน ม่าย เต้า มจั่ง ตอน เห่ว เจี๊ยน ก๊อง, “ฟิน-แซง อ้า! โท้ เม่ย เถง หมั่ง เยีย เญย ตอน. เยีย ขูง ม่าย น้าย เต้า ตอน-โดะ ฮนั้ง. 39นิ่น หฒุ เมี้ยน มัวะ. เยี้ยด หฒุ เหยียด หฑุ่น, ฯฒฯ เหน่าๆ เญย เห่ว แอ๋ง เธียว อ๊ะ. ววม-ฑุ่ย บย์าว ป้มๆ เญย ธ้วด. เมี้ยน หฒั่นๆ ห่อย นิ่น โค้ว ไห่, ไม้ คั้ง ปู๋ง กวั่ง. 40เยีย โท้ เม่ย เญย ไซ-ก๋อ บัว หฒุ่น เมี้ยน ธ้วด มป่า นิ่น บัว หฒุ่น ไม้ ไฮ่ ธ้วด.”
41เยซู บั๋ว หฒวัง เมี่ยน, “เม่ย บัว อี้ จ๋า เญย เมี่ยน อ้า! เม่ย บัว หฒะเก้ง ไม้ เสียน, มน่อม หย่า โฮ์ ไห่. เยีย อ๋อย หฒุ เหธา เม่ย บัว เยียม, อ๋อย หฒุ เญี์ยน เม่ย บัว ด่ง หาย เล่า?”
เยซู แอ๋ง ก๊อง บั๋ว วั้ว ล่าน เมี่ยน, “ต้อ เม่ย เญย ตอน ต้าย น้าย ม่าะ!”
42น้าย เต้า ตอน ต้าย เจี๊ยน วั้ว หฒั่น, เมี้ยน แอ๋ง มัวะ นิ่น คีง เหฌี่ย เดา เธียว ตุ๊ โค้ว ไห่. เยซู ฯฒฯ หัด เฮยี่ย ไกว๊ เมี้ยน หย่า หฒ่อ หลง วั้ว เต้า ตอน, จิว ปุน นิ่น เญย เตีย หมี่ อ๊ะ. 43หฒวัง เมี่ยน บัวะ ฮ่อง ไห่ ทิน-ฮู่ง เญย ต้ม ชะ.
เยซู แอ๋ง ก๊อง หฑุ่น นิ่น อ๋อย หฒุ ไต่
(เป๊ย หมั่ง มัดทาย 17:22-23; มาโค 9:30-32)
หฒวัง เมี่ยน หธ่อ บัวะ ฮ่อง ไห่ เยซู โหฒว เญย เหยียด ฒู้ง สี่ วั้ว หฒั่น, เยซู บั๋ว นิ่น เญย ไซ-ก๋อ, 44“เม่ย บัว หลงๆ เญย หมวัง เยีย อี้ หฒั่น บั๋ว เม่ย บัว น้าย เต๋ย หว่า. เยีย, ป้าม เมี่ยน เญย ตอน, อ๋อย หฒุ จิว ปุน เยียม เมี่ยน เญย ปั์ว-เดี๊ย.” 45มป่า ไซ-ก๋อ บัว ไม้ เม่ง แปะ น้าย โจ๋ว หว่า เญย เอ๋ย เล์ย. เซ ฮนั้ง อ๊อม เจี๊ยน นอ, นิ่น บัว หธีง ต้าย ไม้ ไฮ่ เม่ง แปะ. นิ่น บัว หย่า กั้ม เหฑีย ไม้ หน่าย เยซู.
หาย เต้า โหฒว เก้า โฮล
(เป๊ย หมั่ง มัดทาย 18:1-5; มาโค 9:33-37)
46ไซ- ก๋อ บัว เยียม นิ่น บัว กั้น บุด๋ง แฑง หาย เต้า โหฒว เก้า โฮล เจี๋ย.#ลูกา 22:24 47มป่า เยซู ฮิ้ว ตุ๊ นิ่น บัว เยียม เฮญี้ยว ฮนั้ง หาย นอ ฮนั้ม, นิ่น ฯฒฯ เคน เต้า ฝุเจว๊ย ต้าย โซ้ว เจี๊ยน นิ่น เญย กะเฮลน, 48หย่า ก๊อง บั๋ว นิ่น บัว, “หาย เต้า เต๊ง เยีย เญย บั๋ว ฒิบ น้าย เต้า ไฝ เญย ฝุเจว๊ย, วั้ว เต้า หย่า ฒิบ เยีย. หาย เต้า ฒิบ เยีย หย่า ฒิบ พ้าย เยีย ต้าย วั้ว เต้า. ฮนั้ง หน่าย, เยียม เม่ย บัว เญย บุด๋ง, หาย เต้า โหฒว เก้า ไฝ เจี๋ย, วั้ว เต้า ตุ๊ โหฒว เก้า โฮล เจี๋ย.’#มัดทาย 10:40; ลูกา 10:16; โยฮัน 13:20
หาย เต้า ไม้ ต๋อย-เตก เซ เถง บัว
(เป๊ย หมั่ง มาโค 9:38-40)
49โยฮัน ก๊อง, “ไซ-เตี๋ย อ้า! เยีย บัว ปวัด เต้า เมี่ยน หล่ง เม่ย เญย บั๋ว หฒุ่น เมี้ยน ธ้วด. เยีย บัว ไม้ ปุน นิ่น โหฒว, เหว่ย หฒุ นิ่น ไม้ เฒ์ย โหฒว บัว เญย กวั้น.”
50เยซู บั๋ว นิ่น, “ไม้ ตู๋ง ล่าน นิ่น, เหว่ย หฒุ หาย เต้า ไม้ เหธา บัว ต๋อย-เตก, วั้ว เต้า เซ เถง บัว อ๊ะ.”
สะมาเลีย จั๋น ไม้ คั้ง ฒิบ เยซู
51ทิน-ฮู่ง อ๋อย ฒิบ เยซู ฝาว ทิน-ต้อง เญย ฮนอย-เหญียะ เถา ฟัด อ๊ะ. เยซู ฯฒฯ เหลียบ ตี่ง เฮญี้ยว มี่ง เยลูซาเลม ฒี่ง. 52นิ่น พ้าย เต๋ย เมี่ยน มี่ง ด่าง. นิ่น บัว เปียะ นอม สะมาเลีย ล์าง, อ๋อย เถง เยซู หลิ่ว เล์ย ต๋อง, 53มป่า ล์าง หฒั่ง เมี่ยน ไม้ คั้ง ฒิบ เหว่ย หฒุ ปวัด เยซู อ๋อย มี่ง เยลูซาเลม ฒี่ง. 54เยซู เญย ไซ-ก๋อ, ยากอบ เหธา โยฮัน, ปวัด ฮนั้ง น้าย, นิ่น บัว ก๊อง, “เฒี้ยว อ้า! เม่ย อ๋อย เยีย บัว เห่ว ลู่ง โต์ว เหฌี่ย ต้าย ปั๊ว เหมียด เหฑ่ง นิ่น บัว ไฟ?”#9:54 ม่าย เต๋ย โล์-ฮนอย โซว แอ๋ง ม่าย หว่า ก๊อง ฮนั้ง เอลียา โหฒว นอ.#2 ฮู่ง โต้ว 1:9-16
55เยซู ฮวิน หฑวน ก๊อง นิ่น บัว.#9:55 ม่าย เต๋ย โล์-ฮนอย โซว ทิบ หว่า ก๊อง “เม่ย บัว ไม้ ฮิ้ว ตุ๊ เม่ย บัว เญย เฮญี้ยว ฮนั้ง หาย นอ, เหว่ย หฒุ ป้าม เมี่ยน เญย ตอน ต้าย ไม้ เฒ์ย อ๋อย เหมียด เมี่ยน. นิ่น ต้าย เหว่ย เหฌียว เมี่ยน. 56เยซู บัว แอ๋ง มี่ง กั้น นอม ล์าง หมี่ อ๊ะ.
เมี่ยน ก๊อง อ๋อย กัน เยซู
(เป๊ย หมั่ง มัดทาย 8:19-22)
57นิ่น บัว กัน เจี๊ยน เจ๊า มี่ง เกา, ม่าย ล่าน เมี่ยน บั๋ว เยซู, “ไม้ กุ๊น เม่ย มี่ง หาย, เยีย อ๋อย กัน เม่ย มี่ง.” 58เยซู ก๊อง บั๋ว นิ่น, “เฮยี่ย จู๊ ม่าย ค้วด เยียม, เหนาะ หย่า ม่าย เล์า, มป่า เยีย, ป้าม เมี่ยน เญย ตอน, ไม้ ม่าย ต๋อง เปว๋ย ฮิด ขวน.”
59เยซู แอ๋ง บั๋ว ล่าน เมี่ยน, “กัน เยีย มี่ง ม่าะ!” วั้ว ล่าน เมี่ยน เตา, “ต้ม ก๋อ อ้า! เยีย โท้ หฑวน มี่ง ปย๊บ เยีย เญย เตีย ด่าง.”
60เยซู เตา, “เซว่ย ไต่ มี่ง เญย เมี่ยน กั้น ปย๊บ นิ่น บัว เญย ไต่ มี่ง เญย เมี่ยน อ๊ะ. เม่ย กุ๊น มี่ง ฒุ่น ทิน-ฮู่ง โหฒว เฒี้ยว กุ๊น เมี่ยน เญย คู้ เฝียน.”
61แอ๋ง ม่าย ล่าน ก๊อง บั๋ว เยซู, “ต้ม ก๋อ อ้า! เยีย อ๋อย กัน เม่ย มี่ง มป่า เยีย โท้ หฑวน บั๋ว ตั้ง เยีย เญย ฮมวั้ง ต่อย.”#1 ฮู่ง โต้ว 19:20
62เยซู ก๊อง, “หาย เต้า นั้น เจี๊ยน ไล่ เปย๊ย ไล่ ลี่ง มป่า นิ่น ฮวิน หฑวน หมั่ง ฆะฮ้า, วั้ว เต้า ไม้ ผุย เยียม ทิน-ฮู่ง เญย กั๊วะ.”
Currently Selected:
ลูกา 9: IuMiTH
Highlight
Share
Copy
Want to have your highlights saved across all your devices? Sign up or sign in
Mien Bible (Thai Script) © Thailand Bible Society, 2007
