IOANE, 13

O LE MATAUPU XIII.

Ua mulumuluina e Iesu o vae o ona soo.

1A o lei oo i le tausamiga o le paseka, ua silafia e Iesu ua oo mai ona po e tuua ai e ia lenei lalolagi, a e maliu atu i le Tamā; ua na alofa i ona tagata o i le lalolagi, ua ia alofa ia i latou ua oo i le gataaga. 2Ua fai le talisuaga, a ua tuu e le tiapolo i le loto o Iuta le Sekara, le atalii o Simona ia faalata ia te ia; 3ua silafia e Iesu ua tuuina mai e le Tamā mea uma lava i ona aao, ua maliu mai foi o ia mai le Atua, o le a toe maliu atu foi o ia i le Atua; 4ona tu lea o ia i luga a o fai le talisuaga, ua tuu ese ona ofu, ua tago foi i le ie sōloi, ua fusi ia te ia. 5Ona liligi lea e ia o le vai i le ipu e mulumulu ai, ua mulumulu i vae o ona soo, ma sōloi ai i le ie sōloi ua ia fusia ai. 6Ona oo atu lea o ia ia Simona Peteru; a ua fai mai o ia ia te ia, Le Alii e, e te mulumulu ea o‘u vae? 7Ua tali atu Iesu ia te ia, ua faapea atu, O le mea ou te faia, e te le iloa nei, a e mulimuli ane e te iloa. 8Ua fai mai Peteru ia te ia, E te le mulumulu lava o‘u vae e oo i le faavavau. Ua tali atu Iesu ia te ia, Afai ou te le mulumulu ia te oe, e leai sou tofi faatasi ma a‘u. 9Ona faapea mai lea o Simona Peteru ia te ia, Le Alii e, aua lava na o o‘u vae, a o o‘u lima foi, atoa ma lo‘u ulu. 10Ona faapea atu lea o Iesu ia te ia, O le ua taele, ia tau o ona vae, a e mamā uma ai, e le aoga ona mulumulu uma. Ua mamā foi outou, a e le o outou uma lava. 11Auā ua silafia e ia le na te faalataina o ia; o le mea lea na ia fetalai atu ai, Ua le mamā outou uma lava.

12Ua uma ona mulumuluina e ia o latou vae, ua tago foi i ona ofu, ma toe taoto, ona faapea atu lea o ia ia te i latou, Ua outou iloa ea le mea ua ou faia ia te outou? 13Tou te ta‘ua mai a‘u, o le a‘oa‘o ma le Alii; ua lelei foi la outou e fai mai na, auā o a‘u lava lea. 14O lenei, afai o a‘u le Alii, ma le a‘oa‘o, ua oa mulumuluina o outou vae, e tatau ona outou femulumuluai o outou vae. 15Auā ua ou avatu le faaa‘oa‘o ia te outou, e pei ona ou faia ia te outou, ia faapea lava e outou ona fai. 16E moni, e moni, ou te fai atu ia te outou, e le sili le auauna i lona alii; e le sili foi le ua auina i le e ana le feau. 17Afai ua outou iloa ia mea, amuia outou pe a outou faia. 18E le o outou uma ou te fai atu ai, ua ou iloa i latou na ou filifilia; a e peitai ia taunuu ai le Tusi, O le ‘ai faatasi ma a‘u ua aa mai o ia ia te au i lona mulivae. 19Ou te fai atu nei lava ia te outou, a o lei oo mai, ina ia outou talitonu pe a taunuu, o a‘u lava o ia. 20E moni, e moni, ou te fai atu ia te outou, o lē talia se tasi ou te auina atu, e talia e ia o au; o lē talia foi o a‘u, e talia e ia le ua auina mai a‘u.

21Ua fetalai atu e Iesu ia mea, ua ātu ai lona finagalo, ona ta‘utino atu lea o ia, ua faapea atu, E moni, e moni, ou te fai atu ia te outou, e faalataina a‘u e se tasi o outou na. 22Ona fevaaiai lea o le au soo, ma latou masalosalo pe na fetalai mai o ia ia te ai. 23Ua taoto ane foi i le fatafata o Iesu le tasi o ona soo, o le ua alofaina e Iesu. 24Ona negonego lea o Simona Peteru ia te ia, e fesili atu po o ai ua ia fetalai i ai. 25Ua faalagolago mai o ia i le fatafata o Iesu, ona fai mai lea ia te ia, Le Alii e, o ai ea? 26Ua tali atu Iesu, O le ou te avatu i ai sina mea e ‘ai pe a uma ona ou fuia, o ia lea. Ona fuifui lea e ia o le mea e ‘ai, ma avatu ia Iuta le Sekara, le atalii o Simona. 27Ua mavae atu le mea e ‘ai, ona uluitinoina lea o lea tagata e Satani, Ona faapea atu lea o Iesu ia te ia, O le mea e te faia, ia vave ia ona fai. 28A e lei iloa e se tasi o i latou sa taooto le mea ua ia fetalai atu ai lea upu ia te ia. 29Auā ua masalo isi ua fetalai atu Iesu, ina ua ia Iuta le ete tupe, Ina faatau mai ia ni mea e tatau ia te i tatou i le tausamiga; pe avatu se mea i e matitiva. 30Ua talia foi e ia le mea e ‘ai, ona alu loa lea o ia i fafo; ua po.

31Ua alu ia i fafo, ona faapea atu lea o Iesu, Ua viia nei le Atalii o le tagata, ua viia foi le Atua ia te ia. 32Afai e viia le Atua ia te ia, e viia foi o ia e le Atua ia te ia lava, e vave foi ona vivii o ia ia te ia. 33Lo‘u fanau e, e toe itiiti nai aso ou te i ai ia te outou, tou te saili mai ia te au, a e pei ona ou fai atu ia Iutaia, O le mea ou te alu i ai, tou te le mafai ona ō i ai; e faapea foi ona ou fai atu nei ia te outou. 34O le poloaiga fou ou te tuu atu ai ia te outou, ia outou fealofani; faapei ona ou alofa atu ia te outou, ia fealofani foi outou. 35O le mea lea e iloa ai e tagata uma lava o o‘u soo outou, pe afai ua outou fealofani. 36Ua fai mai Simona Peteru ia te ia, Le Alii e, po o fea e te maliu atu i ai? Ua tali atu Iesu ia te ia, O le mea ou te alu i ai, e te le mafai ona mulimuli atu nei ia te au; a o se aso e te mulimuli atu ai ia te au. 37Ua fai mai Peteru ia te ia. Le Alii e, pe se a le mea ou te le mafai ai ona mulimuli atu nei ia te oe? ou te tuuina atu lo‘u ola ona o oe. 38Ua tali atu Iesu ia te ia. E te tuuina atu ea lou ola ona o a‘u? E moni, e moni, ou te fai atu ia te oe, e le vivini moa, seia e faafiti faatolu mai ia te au.

Currently Selected:

IOANE, 13: SOV

Highlight

Copy