IOANE, 15

O LE MATAUPU XV.

O le vine moni ma ona la.

1O a‘u nei o le vine moni, a o lo‘u Tamā o lē galue vine ia. 2O la uma lava o ia te au e le fua, e aveeseina o ia; a o la uma e fua, e teuteu e ia, ina ia fua mai ai atili. 3Ua uma ona faamamāina o outou i le upu na ou tautala atu ai ia te outou. 4Ina tumau ia o outou ia te au, o a‘u foi ia te outou. Faapei o le la e le mafai ona fua pe a na o ia, pe afai e le mau i le vine; a faapea foi outou, pe afai tou te le tumau ia te au. 5O a‘u nei o le vine, o la outou. O lē tumau ia te au, ma a‘u ia te ia, o ia lava e fua tele mai; auā e le mafaia e outou ona fai o se mea e tasi pe a a‘u le i ai. 6Afai e le tumau se tasi ia te au, ona lafoaiina lea o ia i tua pei o le la laau, ma faapopoina, ona faapotopotoina ai lea e tagata, ma lafo i le afi, ua susunu ai. 7Afai tou te tumau ia te au, a tumau foi a‘u upu ia te outou, o mea uma lava tou mananao i ai, tou te ole atu ai, ona faia lea mo outou. 8E viia lo‘u Tamā i lenei mea, pe a outou fua tele mai; ona fai ai lea outou mo‘u soo. 9Faapei ona alofa mai o le Tamā ia te au, e faapea lava ona ou alofa atu ia te outou; ia tumau pea outou i lo‘u alofa. 10Afai tou te tausia a‘u poloaiga, ona tumau lea o outou i lo‘u alofa; pei ona ou tausia poloaiga a lo‘u Tamā, ma ou tumau i lona alofa. 11Ua ou fai atu nei mea ia te outou, ina ia tumau ai lo‘u olioli ia te outou, ia atoatoa foi lo outou olioli. 12O la‘u poloaiga lenei, ia outou fealofani, pei ona ou alofa atu ia te outou. 13E le sili lava le alofa o se tasi i lenei alofa, ia tuuina atu e se tasi lona ola e sui a‘i ana uo. 14O a‘u uo outou, pe afai tou te faia mea uma lava ou te fai atu ai ia te outou. 15Ou te le toe ta‘ua outou o auauna, auā e le iloa e le auauna mea e faia e lona alii; a ua ou ta‘ua outou o uo, auā ua ou faailoa atu ia te outou mea uma na ou faalogo ai i lo‘u Tamā. 16Ua le filifilia a‘u e outou, a ua filifilia outou e a‘u; ua ou tuuina atu foi outou, ia outou ō, ma ia outou fua mai ni fua, ma ia tumau o outou fua; ina ia foaiina atu ia te outou e le Tamā mea uma lava tou te ole atu ai ia te ia i lo‘u igoa. 17Ou te fai atu ia te outou ia mea, ina ia outou fealofani.

18Afai e ‘ino‘ino mai le lalolagi ia te outou, ua outou iloa ua muamua ona ‘ino‘ino mai ia te au, i lona ‘ino‘ino ia te outou. 19Afai a ni tagata o le lalolagi outou, po ua alofa mai le lalolagi i ona tagata; a e le ni o le lalolagi outou, a ua ou filifilia outou nai le lalolagi, o le mea lea e ‘ino‘ino ai le lalolagi ia te outou. 20Ia outou manatua le upu na ou fai atu ai ia te outou. E le sili le auauna i lona alii. Afai ua latou faasaua mai ia te au, e faasaua foi ia te outou; afai ua latou tausia la‘u upu, latou te tausia foi la outou. 21A e faia e i latou ia mea uma ia te outou ona o lo‘u igoa, auā e lei iloa e i latou o ia ua auina ma a‘u. 22Afai ana a‘u le sau ma tautala atu ia te i latou, po ua leai sa latou agasala; a o lenei, e leai se mea e ufiufi a‘i la latou agasala. 23O lē ‘ino‘ino mai ia te au, ua ‘ino‘ino foi o ia i lo‘u Tamā. 24Ana a‘u lei faia ia te i latou o galuega e lei faia lava e se tasi, po ua leai sa latou agasala; a o lenei, ua latou vaai mai, ma latou ‘ino‘ino mai ia te au atoa ma lo‘u Tamā. 25A e peitai ia taunuu ai le upu ua tusia i la latou tulafono, Ua latou ‘ino‘ino mai fua lava ia te au. 26A maliu mai le Fesoasoani, o le ou te auina mai ia te outou mai le Tamā, o le Agaga lea e tupu mai ai le upu moni, o lē maliu mai mai le Tamā, o ia lava e molimau ia te au. 27Tou te molimau foi, auā ua outou faatasi ma a‘u talu le amataga.

Currently Selected:

IOANE, 15: SOV

Highlight

Copy