IOANE, 16

O LE MATAUPU XVI.

O le mavaega a Iesu.

1Ua ou fai atu nei mea ia te outou, ina nei tausuai outou. 2E tulia outou i sunako e i latou; a e oo lava i le aso e manatu ai se na te fasioti ia te outou, ua na faia le taulaga i le Atua. 3E faia foi e i latou ia mea ia te outou, auā latou te lei iloa le Tamā atoa ma a‘u. 4A ua ou fai atu ia te outou nei mea, ina ia outou manatua pe a oo i le aso, na a‘u fai atu ai ia te outou. Ou te lei fai atu nei mea ia te outou i le amataga, auā na ou i ai ia te outou. 5A ou te alu atu nei ia te ia na auina mai a‘u; e lei fesili mai foi se tasi o outou, Po o fea e te alu i ai? 6A ua tutumu o outou loto i le faanoanoa, ina ua ou fai atu nei mea ia te outou. 7A e peitai a‘u, o le upu moni lava ou te fai atu ai ia te outou, e aoga ia te outou pe a a‘u alu ese; auā afai ou te le alu ese, e le maliu mai le fesoasoani ia te outou; a e afai ou te alu, ou te auina mai o ia ia te outou. 8A maliu mai foi o ia, na te faailoa atu i le lalolagi le agasala, ma le amiotonu, ma le faamasinoga. 9O le agasala, auā ua le faatuatua ia te au; 10o le amiotonu, auā ou te alu atu i lo‘u Tamā, tou te le toe vaai mai foi ia te au; 11o le faamasinoga, auā ua faamasinoina le alii o le lalolagi nei.

12Ua totoe ia te au mea e tele e fai atu ai ia te outou, a e tou te le mafaia ona talia i nei ona po. 13A e a maliu mai o ia, o le Agaga lea e tupu mai ai le upu moni, e ta‘ita‘i e ia ia te outou i upu moni uma; auā e le tautala fua ia na o ia, a o mea uma e faalogo i ai o ia, e tautala a‘i lava, ma faailoa mai ia te outou mea e oo mai. 14O ia lava e vivii mai ia te au, auā e maua e ia mai ia te au, ma faailoa atu ai ia te outou. 15O mea uma lava o i le Tamā, o ia te au foi ia; o le mea lea na ou fai atu ai, e maua e ia mai ia te au, ma faailoa atu ai ia te outou. 16E toe itiiti ona outou le vaai mai ai lea ia te au; e toe itiiti foi ona outou toe vaai mai ai lea ia te au, auā ou te alu atu i le Tamā. 17Ona fetautalatala‘i lea o isi ona soo. Pe se a lenei mea ua ia fetalai mai ai ia te i tatou. E toe itiiti ona outou le vaai mai ai lea ia te au; e toe itiiti foi ona outou toe vaai mai ai lea ia te au, auā ou te alu atu i le Tamā? 18Ona latou faapea ane lea, Pe se a lenei mea ua ia fetalai mai ai, E toe itiiti? Tatou te lei iloa le mea ua ia fetalai mai ai. 19Ua silafia e Iesu lo latou fia fesili mai ia te ia; ona faapea atu lea o ia ia te i latou. Pe tou te felafolafoai ea i le mea na ou fai atu na, E toe itiiti ona outou le vaai mai ai lea ia te au; e toe itiiti foi ona outou toe vaai mai ai lea ia te au? 20E moni, e moni, ou te fai atu ia te outou, e tagi outou ma taufaitagiaue, a e olioli le lalolagi; e tiga outou, a e liua lo outou tiga ma olioli. 21A fanau se fafine ua tiga ai o ia, auā ua oo i lona aso; a uma ona fanau mai o lana tama, ua le toe manatu e ia lona tiga, ona o le olioli, ina ua fanau mai le tagata i le lalolagi. 22O lenei foi, ua maua nei outou e le tiga; a e tatou te toe feiloai ma a‘u, ona olioli ai lea o outou loto, e le aveeseina foi e se tasi lo outou olioli. 23O lea aso tou te le toe fesili mai ai ia te au i se mea e tasi. E moni, e moni, ou te fai atu ia te outou, o mea uma tou te ole atu ai i le Tamā i lo‘u igoa, e foai mai e ia ia te outou. 24Ua oo mai nei lava tou te lei ole atu i se mea i lo‘u igoa; ina ole atu ia, ona outou maua ai lea, ina ia atoatoa ai lo outou olioli. 25Ua ou tautala atu ia te outou i nei mea i upu faatusa; a e oo atu i ona aso ou te le toe tautala ai ia te outou i upu faatusa; a e ou te matuā faailoa atu ia te outou mataupu i le Tamā. 26O lea aso e ole atu ai outou i lo‘u igoa; ou te le fai atu foi ia te outou ou te faatoga i le Tamā mo outou; 27auā e alofa mai lava le Tamā ia te outou, ina ua outou alofa mai ia te au, ma ua outou talitonu o a‘u nei ua ou sau mai le Atua. 28Ua ou sau mai le Tamā, ma ou sau i le lalolagi; o le a a‘u toe tuua le lalolagi, ma alu atu i le Tamā. 29Ona fai mai lea o ona soo ia te ia, Faauta, o lenei, ua e ta‘utino mai lava, ua e le fetalai mai i le upu faatusa. 30O lenei, ua matou iloa ua e silafia mea uma lava, e le aoga foi ia te oe ina fesili atu se tasi ia te oe; o le mea lea ua matou talitonu ai, na e maliu mai mai le Atua. 31Ua tali atu Iesu ia te i latou, Ua outou talitonu mai nei ea? 32Faauta, e oo i le aso, ua oo nei foi i ai, e taapeape ai outou, e taitasi ma alu i lona aiga, a e tuua a‘u e toatasi; a ou te le toatasi lava, auā ua ia te au le Tamā. 33Ua ou fai atu nei mea ia te outou, ina ia outou maua le manuia ia te au; e maua foi outou e le puapuaga i le lalolagi, a ia outou loto tetele, ua ou manumalo i le lalolagi.

Currently Selected:

IOANE, 16: SOV

Highlight

Copy