1 Watesalonike 1
1
1Mimi Paulo, pfamodza na Sila na Timoteo, hwakumworeani nywinywi wantu wa tsanganiko ḍya Muungu Baba na Ḅwana jwehu Yesu *Kirist̯o, ḍiḍyo Tesalonike.
Hwakumuyombeani Muungu amuvodhye na kumumpa naghea nto.
2Hunakaa hukimuyaviza ḍuḍa Muungu kut̯wa kwa dzambo ḍyenu nyonse. Na kula hukwakuyombani, hunakaa hukimuyombea nanywi. 3Hunakaa hukimuyombea kwa Muungu Baba jwehu, hukimuhadzia wema wenu mwiwohenda kwa dzambo ḍya kuhikiza kwenu. Hunakaa hukamuhadzia namuna ya matsako yenu yamumpiyevyo kuhenda kazi na hiḍu, na namuna mugijiyevyo kuwa na madzikwat̯yo ya kwamba Ḅwana jwehu Yesu Kirist̯o anauja kawii. 4Koro wandugu zehu, humanya ya kwamba, Muungu kamutsaka na kamutsana muwe wantuwe mwenye. 5Swiswi ntahukumusumwiiya injili ya vyuuwo vihupfu, ela huhenda na mambo ya kumakisa kwa nguvu za huyu Ruhu Mudheru, hukiwa na uhakika myojoni mwehu kwamba hwakusumwiiyani injili ya hachi. Na pia mumanya namuna huishiyevyo kahi yenu hupate kumuyanga namuna ya kuishi maisha mema. 6Nanywi nywinywi wenye mut̯aḅa namuna yehu swiswi na Ḅwana huishiyevyo. Na hat̯a ingawa mukuntiswa d̯ina muno, mukipfokea hichi chuuwo na tsekea mupfegejweyo ni Ruhu Mudheru. 7Ndookomu mukaa dza mufaano hangu kwa wahikiza weo ḍyimbo ḍya Makedonia hat̯a kwa hawaḍe weo Akaya. 8Koro hichi chuuwo musumwiiyecho dzuu ya Ḅwana, kihandaiya Makedonia nzima pfamodza na Akaya. Na si hivyo t̯u, ela hat̯a haya maagu dzuu ya namuna mumuserefat̯iyevyo Muungu yahandaiya kula pfantu. Ndookomu ntaku haḍya iḍeyonse kwehu kunena dzuu yenu amaale. 9Hao wantu wonse hao, wakunenani namuna muhukaraḅishiyevyo urembo hwipfokudza kwenu. Na wakunenani na namuna muyatsiyevyo kuyomba miungu ya masanamu mukimuperukia huyu Muungu jwa ḍugha eye mojo. 10Na pia, wakunenani namuna mwivyokumuindiiyani huyu Mwana jwa Muungu, yani Yesu, adze kuyawa mbinguni. Na huyu huyu Yesu ndiye jwa Muungu amufufwiiye kuyawa kwa wafu na ndiye ahupfonyeye na ngoro ya Muungu idzeyokudza.
Currently Selected:
1 Watesalonike 1: pkb
Highlight
Copy
Compare
Share
Want to have your highlights saved across all your devices? Sign up or sign in
© 2004, Bible Translation and Literacy