Luke 12

Ha Mitokweɏan Chi Litataɏu Un Somsomok

(Mat. 10:26-27)

1Si hachiʼn timpu, lachagup cha kalibu-libuʼn tagu ot lan-ipi-ipitcha. Ilulan Jesus kilaugud cha disipulusla. Kalala, “Allachenyu ta achi kayu mikama si angwat cha Pariseo un aginpapaticha un miyaligcha yeast. 2Ti losan un mitataɏu si sala, mitokweɏ lu sumin-eɏgew. Ked losan un lailimod si sala, lumtaw lu chumtong chi timpula. 3Ked losan un ilugudyu si labi, madngeɏ si padcha. Ked losan un inyagasaasyu si abusanyu, ipakuyyu si tuktuk cha byebbyeɏoy.”

Ha Ustuʼn Umogyatan Cha Tagu

(Mat. 10:28-31)

4“Ibyegak kan chikayuʼn bubuɏunku, achi kayu umogyat kan cha mangtoy si long-eg, ti siya kiged chi makwacha. 5Ibyegak kan chikayu chi ustuʼn umogyatanyu. Umogyat kayu kan Apudyus ti alla kalobbongala un mangtoy si long-eg ya mangibyellu ud impiyeɏlu. Mamati kayu kan sakon ya masapuɏʼn ogyatanyù Apudyus!

6“Somsomkonyu chuwaʼn siping chi ngilan chi limaʼn sissiwit. Ngim ulay ossaan kan chicha achipun Apudyus liwatan. 7Ked sinchumadlu kan chikayu, ti ulay cha buukyu ammula bilangla. Ked achi kayu umogyat, lapotpotog kayu kan Apudyus lu cha achu un sissiwit.”

Cha Mangitakcheɏ Kan Jesus Ya Cha Mangisulib Kan Siya

(Mat. 10:32-33; 12:32; 10:19-20)

8Intuɏuy Jesus un lan-ugud, un kalala, “Ibyegak kan chikayu, lu silu mangitakcheɏ si sangwalan cha tagu un sakon chi Apula, Sakon un Alak chi Tagu takcheɏak bo siya si sangwalan cha angheles Apudyus. 9Ngim lu silu mangisulib kan sakon si sangwalan cha tagu, Sakon un Alak chi Tagu isulibku bo siya si sangwalan cha angheles Apudyus. 10Lu silu mangibyega si lawwik kan Sakon un Alak chi Tagu, ked makwaʼn mapakawan. Ngim lu silu mangibyega si lawwing mipanggop si Ispiritun Apudyus, ked achipun mapakawan. 11Lu ichiɏumcha chikayu si sinagoga ya cha gubillachuɏ ya langangatuʼn turay, achi kayu machalagen si isongbyatyu willu ibyegayu. 12Ti si hachiʼn uras, ha Ispiritun Apudyus chi mangisuɏu kan chikayu si ibyegayu.”

Ha Pangngalig Chi Osaʼn Byaklang

13Inggew chi osaʼn leɏaki si awechen cha amod un tagu un kalala, “Mistulu, ibyegam u kan suludku ta manggogwaanmi cha laksunmi.”

14Ngim summongbyat si Jesus kan siya, un kalala, “Lappun kalintogek un manguis kan chikayu willu manggodwa si laksunyuʼn mansulud!” 15Oli pun kalan Jesus kan chicha, “Allachenyu cha losan un kalasin chi kilaagum. Ti ha biyeg chi tagu ked chakampun si mibyeseɏ si kilaachun cha kukkuwala, ulay amod chi bilaklangla.”

16Ot lan-alig si Jesus un kalala, “Inggew chi osaʼn byaklang un leɏaki un labyelin chi apitla. 17Lansomsomok siya ot kalala, ‘Simman li kook? Ti kuɏang chi mangiponpolak si achuʼn apitku.’ 18Kamatla kook. Byakasok chi aɏangku ya mampauchak si chakchakeɏ ta mangiponpolak si apitku ya kukkuwak. 19Ked kalak si long-egku, ‘Kapipialak, ti wechewed losan cha kasapuɏak si katawo-tawon. Lalam-ay chi biyegku, manga-mangalak, umilu-ilumak ya ganggalasok chi biyegku!’ 20Ngim kalan Apudyus kan siya, ‘Laoggogka! Si salaʼn labi matoyka. Ked silu mangingkuwa kan cha allaʼn ilumunglu?’ ”

21Ot inyalungus Jesus imbyega, “Katchi makwa kan cha tagu un mangakokos si amod un bilaklang, ngim kapuscha kan Apudyus.”

Cha Taguʼn Mantegod Kan Apudyus

(Mat. 6:25-34)

22Oli pun kalan Jesus kan cha disipulusla, “Siyad ibyegak kan chikayu, achi kayu machalagen si kalonyu willu silupyu ya useɏonyu. 23Ti lapotpotog chi biyegyu lu ha makan ya lapotpotog bo long-egyu lu ha luput. 24Itullongyu ked cha gayang, achipun cha mammuɏa willu man-apit. Lappun aɏangchà mangiponpolancha si apitcha, ngim pakalan Apudyus chicha. Lapotpotog kayu kan Apudyus lu cha sissiwit. 25Ha awed kamman akit icheay chi machanchalagen kayu si biyegyu? Pulus! 26Lu achipun kayu makakopya ulay paat un byaleg, pakayuggey machalagen si uchum?

27“Itullongyu ked chi in-ilon cha sabsabung un chumakeɏ. Achipun cha mangkawachi ya mallaga si silupcha. Ngim ibyegak kan chikayu un ulay si Ari Solomon un kabyaklangan, lappun silupla si labibbiɏu lu cha sabsabung alla.#12:27 1 Kings 10:4-7 28Lu katchi in-ilon Apudyus un mampabiɏu si luut lawa un sin-akitan chi inggewancha ked lu bigat masgob, giluɏa kayu bo achila silupan? Ha lappun pammatiyu! 29Ked achi kayu machanchalagen si kalonyu ya ilumonyu. 30Ti cha laoy cha gamgamgaman cha achipun mamati utla lubung. Ngim chikayu, Ammun Amayuʼd langit un masapuɏyu cha alla. 31Ked un-ulaonyu isosomok chi Mampangatan Apudyus, ked idchola bo kan chikayu cha alla.”

Ha Man-umungan Si Kilabyaklang

(Mat. 6:19-21)

32Intuɏuy Jesus un kalala, “Achi kayu umogyat, ulay lu akit kayu, ti pion Amayu un idchon kan chikayu Mampangatala. 33Man-ingila kayu kan cha kukkuwayu ked idchonyu chi ngilala kan cha kapus. Isagalaanyu long-egyu si bilaklang ud langit ti achipun makaalan, achipun mataɏak cha bilaklangyuʼd langit. Udchi lappun man-akaw ya achipun mayam-an. 34Ti lu silu potpotgonyu, siya bo isosomokyu.”

Ha Mansagalaan Cha Tagu Si Mangulilan Jesus

35-36Intuɏuy Jesus un lan-ugud, un kalala, “Masapuɏʼn mansagala kayu ulay lu silu makwa ya latotonggen cha silawyu. Isun cha bubùulon un man-uuway si mangulilan chi ap-apucha un ummoy lakakaseɏ. Lu gumatong ked mangkongkong, kakmacha iwalit chi sawang. 37Pian cha bubùulon un ochesan chi apucha chichaʼn lakasagala ya achipun cha lasusuyop. Ibyegak kan chikayu, pasantala silupla ked paamuyola chicha ta pakalala chicha. 38Amod chi galasla lu ochesala chichaʼn lakasagala, ulay gawan labi willu allà akit un mabigat.”

39“Somsomkonyu alla. Lu ammun chi simbyeɏoy chi uras un gumatngan chi man-aakaw, achipunla ipalubus un lumlok chi man-aakaw si byeɏoyla. 40Ked katchi bo kan chikayu, masapuɏʼn mansasaggala kayu, ti Sakon un Alak chi Tagu umaliyak si timpuʼn achipunyu lamlamaon.”

Ha Mapiyeɏan Ya Achipun Mapiyeɏan Un Bubùulon

(Mat. 24:45-51)

41Ot ilimus Peter kan Jesus, “Apu, chikami kamma mangibyeg-am si allaʼn pangngalig willu cha losan un tagu?”

42Ot kalan Apu Jesus un lan-alig, “Silu chi mapiyeɏ ya lasilib un bubùulon? Siya chilutukan chi ap-apulaʼn mangayyuwan si byeɏoyla ya mangatod kan cha uchum un bubùulon si kaloncha si ustuʼn timpu. 43Pian chi bubùulon un ochesan chi ap-apula un pin-ala koon cha lipiyeɏ kan siyaʼn kawachila! 44Tuttuwa ibyegak kan chikayu, gapu ta mapiyeɏan, ipiyeɏn chi ap-apula cha losan un kukkuwala. 45Ngim lu kalan chi bubùulon si long-egla, ‘Mabyeyeg chi gumatngan chi apula,’ ked ilugilan manchateɏ kan cha bubuɏunla un bubùulon, cha lelleɏaki ya byebbyebyai ya langan ya ummilum ya labuuk. 46Ked lu gumatong chi apula si eɏgew un achipunla lilamlama ya achipunla ammu. Ked kapilitan un chusaon chi apula siya ya ipatila siya si machusaan cha losan un achipun mamati.

47“Ha bubùulon un ammula pion chi apulaʼn pakwa, ngim achipunla koon willu achipun mansagala, amod chi chusala. 48Ngim ha bubùulon un lappun ammula si pion chi apulaʼn pakwa ya langwa si lawwik, akit chi machusaala. Ti ha taguʼn achu lipiyeɏ kan siya, achu bo songbyatala. Ked ha tagu boʼn ad-achu lipiyeɏ kan siya, ad-achu bo songbyatala.”

Ha Mansisilaan Cha Tagu Gapu Kan Jesus

(Mat. 10:34-36)

49Ot lan-alig si Jesus, un kalala, “Ummaliyak utla pita un mangigetong si apuy un malusan Apudyus kan cha tagu. Ked otyan ta lagamput gummileb. 50Masapuɏʼn mapachasak chi amod un ligat ked chakpun makaskasmok inggala magamput. 51Kalanyu lin lu siyad ummaliyak chi inyak palin-awaon cha tagu utla pita? Chakampun! Ibyegak kan chikayu, ummaliyak ta inyak mansisilaon cha tagu. 52Malipud si sala, ha limaʼn tagu si simbyeyan mansisilacha, sangaon cha tiɏu chuwa ya sangaon bo cha chuwa tiɏu. 53Ulay cha man-aama, man-asisangacha ya isula kan cha man-iila ya cha mangkakatuganga, man-asisangacha.”#12:53 Micah 7:6

Ha Mangammuwan Si Timpu

(Mat. 16:2-3)

54Ot kalan Jesus kan cha amod un tagu, “Lu mailayuʼn ngummitit chi libuu kalanyuʼn umuchen ked tuttuwaʼn umuchen. 55Ked lu magiklayu bidbid un lampeɏpuʼd chaya, kalanyuʼn maligat bigat, ked tuttuwaʼn maligat.#12:55 Si pitan cha Judio, lampeɏpu si mipisukan ilit chi uchen, ti siya awechen chi byeybyey. Ha kapon lagud ked eɏwa-eɏwa un kaleglegelan un amod attubla. 56Chikayuʼn aginpapati! Payuggey makwaʼn mailasin chi sinyeɏn chi taɏun, ngim achipunyu ammu pion chi salaʼn timpu un uguchon?”

Aligluwonyu Kasusyu

(Mat. 5:25-26)

57Intuɏuy Jesus un kalala, “Pakayuggey achipun makasomsomok si ustuʼn koonyu? 58Lu awed lamabyasuɏ kan chikayu ya inchiɏum chikayu si korti, kakmam umoy makaaliglu sakbey un gumatong kayu si korti ta achila ipuɏang chikayu si kuis. Ked achipun chi kuis sika ipuɏang kan cha pulis ta achipun cha pulis chikayu ibyaɏud. 59Ked lu mibyaɏud kayu, achipun kayu mibukat inggala mabyayachenyu losan un muɏtayu.”

Currently Selected:

Luke 12: HUA

Highlight

Copy