Luke 14

Ha Lamalin-awaan Jesus Si Lasakit Si Sabyechu

1Si osaʼn Sabyechu ummoy lakakan si Jesus ud byeɏoy chi osaʼn pangat cha Pariseo. Ot silipsiputan cha tagu si Jesus lu silu koola, 2ti inggew chi osaʼn leɏakiʼn lallotlotog cha ikila kan cha imalaʼn ummoy kan Jesus, 3Ilimus Jesus kan cha Pariseo ya mimistulun chi lintog un kalala, “Ipalubus kamman chi lintog taku lu palin-awaon chi sakit si Sabyechu willu achipun?” 4Ngim gummigillokcha. Ot ilappachen Jesus chi lasakit ya pilalin-awala ot paoyolola.

5Oli pun kalala kan cha taguʼn malipsiput kan siya, “Lu maodcheg chi alakyu willu byakayu si bubun lu Sabyechu, achipunyu kamman kakma aɏan siya?” 6Ngim lappun misongbyatcha si hachi.

Ha Kilakumbyabya Ya Kilalaay

7Illilan pun Jesus chi in-ilon cha uchum un laayagen un mampili si kabiɏuwan un aammuyan, lan-alig kan chicha, 8“Lu laayagenka un umoy makakaseɏ, achika umamuy si kapotgen un aammuyan ti lu awed ked laayagen si taguʼn langatngatu lu sika. 9Lu umali hachiʼn lan-ayeg kan sika ked kalala, ‘Umamuyan chi langatuʼn tagu alla.’ Ked mabiilanka ya ingka umamuy si igid. 10Ngim lu ayagen chika un makaganggalas, umamuyka si igid ta umali ked chi taguʼn lan-ayeg kalalaʼn, ‘Biɏun, umalika utla ti alliya bibiɏuʼn aammuyan.’ Lu katchi makwa, machayawka si sangwalan cha uchum un laayagen. 11Ha taguʼn mangipangatu si long-egla mipabyabya, ngim ha taguʼn mangikumbyabya si long-egla, mipangatu.”

12Oli pun kalan Jesus si lan-ayeg kan siya, “Lu man-ayegka mampakan kan cha tagu willu manbyangkiti, achim ayagen cha biɏunlu willu cha susuludlu willu cha agim willu cha byaklang un cheeglu, ti makwaʼn subyalitancha ked isun chi labyayachenka. 13Ngim ha koom lu manbyangkitika, ayagem cha kapus, cha laasimbyachu, cha lapilay, cha lakuɏap, 14ot mabinchisyulanka ti achipuncha makasubyalit. Ked si Apudyus chi mansubyalit kan sika si eɏgew un umuliyan cha lalintog un tagu mataguwan kasin.”

Ha Pangngalig Chi Chakeɏ Un Byangkiti

(Mat. 22:1-10)

15Chingngeɏn pun chi osaʼn lakakan chi imbyegan Jesus, kalala kan siya, “Pian chi makakan makalaglagsak si Mampangatan Apudyus.”

16Silongbyatan Jesus siya si pangngalig un kalala, “Inggew chi osaʼn taguʼn lansagala si chakeɏʼn byangkiti ot lan-ayeg kan cha achu un taguʼn makakan. 17Lagamput ked lisagala cha losan, biluunla bubùulola ta umoyla ibyega kan cha laayagen, ‘Umali kayu ti lisagala losan.’

18“Ngim silu kagga osa kan cha laayagen lallasun. Kalan chi ummula, ‘Kewam ta chakpun yan umali ti awed chi kangngin-ak un payaw, ked masapuɏʼn inyak yan itullong si sala.’

19“Ked ha osa, kalala, ‘Kewam ta chakpun yan umali ti kangngilaak si simpuɏuʼn luwang ked sala bo ayak mangipachasan kan chicha.’

20“Kalan bo chi osa, ‘Kàaasawaak, siya un chakpun umali.’

21“Langulin chi bubùulon ot imbyegala losan cha lasuncha si ap-apula. Summanga ap-apu ot kalala si bubùulola, ‘Chesam ta ingka si losan un chaɏan ya kekkesa si allaʼn ili ked ayagem cha kapus, cha laasimbyachu, cha lapilay ya cha lakuɏap ta umalicha makakan makalaglagsak.’

22“Lagamput pun, langulin chi bubùulon ot kalala, ‘Apu, tilungpeɏk chi imbilinlu, ngim achu pay laing chi lugeɏ.’

23“Ot kalan chi ap-apu, ‘Ingka cha lung-uchen ya achayuʼn ili ked liwinwichem chicha ta umalicha makakan makalaglagsak ta maplu byeɏoyku. 24Ibyegak kan chikayu, lappun osà malimsim kan cha ummulan laayagen si allaʼn insagalak un byangkiti.’ ”

Ha Ligat Chi Mituntun-ud Kan Jesus

(Mat. 10:37-38)

25Amo-amod cha taguʼn lituntun-ud kan Jesus, lansagung siya kan chicha ot kalala, 26“Lu silu simpion un mambyalin disipulusku, masapuɏ un chakchakeɏ ayatla kan sakon lu ha ayatla kan amala ya kan ilala, asawala ya cha aalakla, susuludla ya ulay long-egla. 27Ya lu silu achipunla maalusan cha losan un ligat ya achipun mituntun-ud kan sakon, achipun makwa un mandisipulusku.”

28Katla miyaligela, “Lu awed mampaud si chakeɏʼn byeɏoy, ulaola yan somsomkon chi gastuwola ta ammuwola lu umalay chi pilaklaʼn manggamputla. 29Ti lu achipunla amman somsomkon ked illugilaʼn mampaud ked laamin lagastu pilakla un chaampun magamput, yokyokon cha losan un mangitullong chi kingwala. 30Ked amsiwoncha kalan un, ‘Illugila un lampaud chi taguʼn alla ked achipunla gilamput.’

31“Willu awed Ari un simpuɏuʼn libu cha suɏchachula, umoy kamman makagubyat si asin-Aarila un chuwampuɏuʼn libu suɏchachula lu achipunla ulaon somsomkon lu kayala un abyakon cha kabusuɏla willu achipun? 32Lu ammula un achipunla kaya un makagubyat, mambuun si umoy mangiyugud si mantimpuyugencha sakbyey un mallibbyatcha kabusuɏla.”

33Inyalungus Jesus kalan un, “Isula bo kan chikayu, lu silu mangibyegan mitun-ud kan sakon, masapuɏ man-awichela cha losan un awed kan siya.”

Ha Pangngalig Chi Asin

(Mat. 5:13; Mrk. 9:50)

34Kasin lan-alig si Jesus, kalala, “Bibiɏu asin ngim lu makaan chi simsimla lappun in-ilontan mangiyulin si kilaasinla. 35Lappun simbila ulay lu useɏon si man-abulu, mibyellu. Chongɏonyu lu awed ingayu.”

Currently Selected:

Luke 14: HUA

Highlight

Copy