1 Maccabées 7
7
Deemeetriyusi kpántì ubɔti
(2 Maka 14.1-10)
1Abin 151 poonee, ní Seeleewukusi jipɔɔn Deemeetriyusi sáǹ Room tiŋkin nì binib biba ki nín cá kitiŋ kiban. Kitiŋ gbanti nìn bí Meediiteeranee tiŋkuu gbandi ní. Niin ní u kāaǹ u-ba ubɔti. 2Ŋyunti ŋun u kíĺ nsan ki nín cá u-naanjab beecindin Antiyɔɔsee, ní bijanjaliibi cúú Antiyookuusi Eepatɔɔr nì Liisiyasi ki cáań u-cee. 3Deemeetriyusi nín gbìl̄ mimmee ní u bí yii: «Maa pée là kí wāl̀-bi.» 4Ní bijanjaliibi kūū-bi, ní Deemeetriyusi kāl̀ dibeejal pu.
5Isirayeel yab bin kɔkɔ kaa ŋúb́ Mooyiisi marabee dɔ́miń ki ká-u. Alkiim un nìn là kí kpántí usaraaŋakpilee di nìn līiń-bi nsan. 6Bi dɔ́miń ki bíi kúŋfí Juuda yab bin kíǹee boon yii: «Juudasi nì u-nabiyaamu kūū <Ubɔti bɔɔbi> kɔkɔ, ní ki jìn̄-ti ti-tiŋki pu. 7Tɔ̄ unil un pu a cáá dimákalee kɔŋkɔnnee ú cùú kpèè Juudasi gbanti nín bíil̀ tin kɔkɔ ti-dumpu nì ubɔti timmunee. Udaan ń dáaĺ Juudasi nì u-nabiyaamu nì bin tútúǹ-uee tafal.»
Bakideesi nì Alkiimee bí Juudee
8Ubɔti Deemeetriyusi nìn lēē Bakideesi, <Ubɔti bɔɔbi> kansikin ubɔ nì Siiriikpaan gɔminau. U nìn sá unikpaan ní dibeel poon, ní ki nìn yú nì ubɔti deedee. 9Deemeetriyusi nìn tú u nì unikpiti Alkiimee. Ubɔti nìn yāntì u fātìi kpántì usaraaŋakpil, ní ki tīī-u mara yii ú téeǹ Isirayeel yab tikpitil tin bi ŋée. 10Bakideesi nì Alkiimee nìn yōoǹ dijanjakitikpaandi ní ki nín cá Juudee. Bi bàn̄ee ní ki tú binib Juudasi nì u-nabiyaamu cee ki mɔ́ntì-bi yii u là u nì bi ń ŋá mpèé. 11Ama Juuda yab dáań ki ká yii bi dɔ́miń nì dijanjakitikpaandi ní. An puee baa fōō tin bi sòon̄ee ki kíí.
12Nì míǹ kɔkɔee bimaradakaliibi nín cá Alkiimee nì Bakideesi cee kí nyàab̀ kí kpèè bi nín làá ŋá puee. 13Isirayeel yab kansikinee, Asiidee yab di sá bipeepeekaabi ki ŋá mpèé nì bi. 14Di sá yii bi lī yii: «Alkiimee un nì ubɔti janjaliibi nóó ki dɔ́mińee sá Aarɔn dicaŋkun yɔu ní. Waa làá ŋmā kí ŋá-ti tikpitil.»
15Alkiimee nìn sòon̄ nì bi nì kinyɔɔmɔɔi ní ki pūtì ki lī yii: «Taa nyàab̀ kí ŋá ni nì ni-bɔɔbi tikpitil tiba.» 16Asidee yab nìn fōō ki kíí míǹ, nì míǹ kɔkɔee Alkiimee yāntì bi cúú bi-kansikin binib imuŋku ita ki kūū ŋwimbaanti. Circir Gbɔnti lī yii: 17«Bi dū a-circir nib wunti ki yàl̄ an kɔkɔ pu, ní ki dū bi-fatikuu ki yāaǹ Jeerusaleem tiŋki ki māntìi tú, ní ubɔ kpá kí síb́-bi.» 18Niinee tifaandi cúú samaa kɔkɔ ní bi-wunti kíǹ ki jìkì. Binib nìn bí ki lì yii: «Binib nee sá binikpɔliibi ní kaa bí deedee. Di sá yii bi nyáń mpèé ŋun bi ŋá nì tee nì bi nín pūtì puee boon.»
19Bakideesi yíkì Jeerusaleemee ní ki nín cá Beeti-Sayiiti tiŋkin ki cūtìi gāā u-janjanaapaal. U nìn cúú binib bin nìn bí u-jandi púee tikpil nì Juuda yab biba mun. U nìn yāntì bi kūū-bi ní ki cáá-bi ki tɔ́ lɔkɔkpaan ubɔn. 20U nìn dū Alkiimee ki kāaǹ kitiŋgbaŋ gbanti pu gɔmina, ní ki yāntì bijanjaliibi biba u-cee bí tūtuǹ-u. U ŋá míǹ ki dóòyee ní ki nín gítí ubɔti cee.
21Alkiimee nìn pée ŋá tin kɔkɔ u ŋūǹee kí ŋmā kí kpántí usaraaŋakpil ní. 22Bin cāabìń fikil fikil kitiŋ puee kɔkɔ nìn kpáfì u-cee. Bi nìn fōō Juudee tiŋki ní ki kɔ́ǹ Isirayeel yab digìŋ́kpaandin. 23Juudasi ká yii Alkiimee nì u-bɔɔbi bíi ŋáań Isirayeel yab tikpitil ki jítiǹ bin kaa sá Juuda yabee. 24Niinee ní Juudasi yìin̄ Juudee timmu kɔkɔn. U nìn dátí bin kɔkɔ nìn dū bi-ba ki nákáǹ Alkiimeeyee, ní ki pīiǹ-bi nsan bí taa ti còom̀ kitiŋee pu. 25Alkiimee ká yii Juudasi nì u-naacimbi bíi pɔ́ɔkí, ní waa ti ŋūǹ kí já nì bi. Niinee ní u nín gítí ubɔti cee ki mɔ́ntì ki túǹ bi-pu yii bi bí ki tūǹ atuŋkpiti.
Ubɔti tú Niikanɔɔr ú cùú jáǹ Juudasi
26Niikanɔɔr sá ubɔti janjakpilib kansikin ubɔ ní. U nìn kútì dibeel bɔtibiliŋ pu. U-nimbil kaa nìn pée là kí wāl̀ Isirayeel yab. Ubɔti nìn dū úǹ ní ki tú ú cùú kúntí dinibul gbanti. 27Niikanɔɔr nìn bàn̄ Jeerusaleem nì dijanjakitikpaandi. U sòon̄ nì Juudasi nì u-naalib biibii poon yii u là u nì bi ń ŋá mpèé. U nìn bí-bi yii: 28«Kujaau kaa máaǹ kí nīn bí man nì nimbi kansikin. Man nì bijanjaliibi bikaaŋkaabi làá dāá ká-ni nì ŋgbansɔŋfi poon.» 29Niikanɔɔr bàn̄ee ní ki jáam̀ Juudasi nì kunabitiiu poon. Ama binannanliibi nìn bɔ́ntì kí cúú Juudasi. 30Juudasi nìn béè yii Niikanɔɔr nìn ŋúb́ kulandɔkɔkpiiu ní ki dɔ́miń u-cee. An puee u nìn fāŋkì ní kaa yāntì dikpafil gbanti yúntì. 31Niikanɔɔr nín ká yii bi béè tin u bàà bɔ́ntèe puee, ní u yíkì Jeerusaleem ki cūtìi bíi jáà nì Juudasi Safarsalama. 32Bi nìn kūū Niikanɔɔr janjaliibi binib alaataa aŋmoo ní bin kíǹee sáǹ ki kɔ́ Daafiidi tiŋkin.
33Tíǹ jítèe ní Niikanɔɔr nín jɔ́ḿ Siiyɔn jool pu. Bisaraaŋakpilib nì bitindaŋkpilib nyáń circir kɔŋkooŋŋun kí dāá jāam̀-u nì ŋgbansɔŋfi. Bi nìn dàkā-u saraawɔkaa un bi ŋá ubɔti yil puee. 34Ama ní Niikanɔɔr bíi bèel̄-bi ki sìí-bi, ní ki tíil̀ ki lābitì-bi ki kɔ́ǹ-bi tijɔkɔndi. U nìn sòon̄ nì bi dilambil poon, 35ní ki pūtì diŋuul poon yii: «Min bí neeyee, see ní dū Juudasi nì u-janjaliibi kí ŋá m-ŋaan. Yaa sá fám, m làá fàtīí gítiń kí tūū kunimbɔtidii nee ŋŋmi, ŋyunti ŋun kujaau yaa láa dóòyee.» Ní u yíkì nì diŋuul. 36Niinee bisaraaŋaliibi nín kóò dicindi. Bi nìn yáatìi yúl̀ nsaraafan nì circir kɔŋkooŋŋu nimbiin ní ki sūǹ ki lì yii: 37«Ti-Dindaan, sii di lēē kudii nee kú nīn sá a-yɔku. A là yii kú nīn sá kudii kun poon anibul làá nīn mèé-si ki gbàam̄-see ní. 38Dáaĺ Niikanɔɔr gbanti nì u-janjaliibi tafal. Yàntī bí kpú kujaaun. Téetí bi-siibiliŋ pu, kí taa yàntī bí ŋmátí.»
Bi jáń ki pɔ́ɔkiǹ Niikanɔɔr ki kūū-u
(2 Maka 15.1-36)
39Niikanɔɔr yíkì Jeerusaleem, ní ki cūtìi gāā u-janjanaapaal Beeti-Oorɔn. Siirii yab janjakitil diba nìn dɔ́miń ki kútì u-pu. 40Juudasi úǹ nìn gāā u-janjanaapaal Adaasa tiŋkin ní. U-janjaliibi nìn nyáń binib kutukub bita. Niin ní u mēē ŋwimmeem nee yii: 41«Ti-Dindaan, ubɔti ubɔ tuuŋyi nìn sīī-si ŋwiin ŋubɔ. Niinee a-tuuŋŋu dɔ́miń ki kūū u-janjaliibi binib kutukub dilaataal nì imuŋku inaa nì biŋmoo. 42Míǹ mbaantiim ní á nà dijanjakitil nee ti-nimbiin díǹ. Mimmee bin kɔkɔ kíǹ ki bí dimaŋfalinee làá béé yii Niikanɔɔr sīī a-circir diiku. Sòoǹ u-bɔti kí nóó nì ikpiti in u ŋée.»
43Ajanjakiti nìn kíĺ kujaau uŋmal un bi yíì Adaaree iwiin saalaa nì ita dal ní. Bi nìn nàn̄ Niikanɔɔr janjakitil, ní úǹ u-ba sá upeekaa ki kpíì kujaaun. 44U-janjaliibi nín ká yii bi kūū-uee ní bi dū bi-janjawanti ki fá ki sáǹ. 45Juuda yab nìn dū ŋwimmɔn ki jìn̄-bi kí yòon̄ Adaasa kí cáá sāā Geeseer. Bi nìn pá bi-boon ki búǹ akantán. 46Binib nìn nyēeń Juuda yab timbilimmu mun māntìi túee poon. Bi nìn màntīí tū-bi ijaan liitil pu, ní ki nìn yàntī binannanliibi fàtīi jáà nì tɔb. Bi nìn kūū Niikanɔɔr janjaliibi kɔkɔ, ubɔ kaa kíǹ. 47Juuda yab nìn kóoǹ binannanliibi janjawanti nì bi-gaajawanti. Bi nìn lēē Niikanɔɔr yil ki gíí u-ŋaŋgiil ŋun u nìn tāntì nì dilambilee. Bi nìn cáa cūnnì Jeerusaleem ki bíl̀ bin kóò niinee kɔkɔ nimbiin. 48Samaa nìn bí mmɔŋkpaanni ní ki jíń jiŋaal ŋwiin gbanti kii bi nín jīǹ jiŋaakpaan puee ní. 49Juuda yab nìn lēē kí nīn jīǹ jiŋaal gbanti dibindi kamaa uŋmal un bi yíì Adaaree poon iwiin saalaa nì ita dal. 50Juudee tiŋki nìn kɔ́ nsɔŋfin ŋyunti ŋubɔ poon fiii.
Currently Selected:
1 Maccabées 7: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.