Baruch 1
1
Juuda yab bin bí Babiloonee ŋmàn̄ Jeerusaleem yab kugbɔŋu
1Baruuki nín ŋmàn̄ tibɔti tin kugbɔŋu nee poon Babiloon tiŋkinee sɔ̀. Baruuki gbanti nìn sá Neeriya jipɔɔn ní ki sá Maseeyasi naantiiu. Maseeyasi#1.1 Kpèè Yeer 32.12, 36.4-32, 43.3, 45.1. nìn sá Sideesiyasi jipɔɔn ní ki sá Asadiyaasi naantiiu ní Asadiyaasi sá Eelikiyasi jipɔɔn. 2Babiloon yab nín nìn jáń ki fōō Jeerusaleem tiŋki ki tūū-kì ŋŋmee biŋŋmooŋmootiil uŋmaŋmooŋmooti#1.2 uŋmaŋmooŋmooti: nóó nì tin kā 2 Bib 25.8 ní. Ama kugbɔŋu kun poon bi nāatèe, an kā yii uŋmal winluluútiŋu dal ní. winluluútiŋu dal ní bi ŋmàn̄ kugbɔŋu gbanti. 3Baruuki nìn kàan̄ kugbɔŋu nee Yooyakiim jipɔɔn Yeekooniya#1.3 Yeekooniya : Yooyakiin yindi diba mun dee, kpèè Yeer 22.24., Juuda bɔtiu nì samaa un kɔkɔ nìn pée dɔ́miń kí pīlifì tin ŋmàn̄ ki kā kugbɔŋu gbantinee nimbiin. 4Bin kɔkɔ nìn pée kóò Babiloon tiŋkin, Suudi mɔɔgbaŋŋi caŋinee kɔkɔ nìn dɔ́miń, kí yòon̄ ŋwaamu kí cáá sāā bikpaambi, an dàkà yii bikàliŋkpilib nì bɔtiijab nì bikpilib nì samaa kɔkɔ. 5Binib gbanti nìn sūǹ, ki bōob̀ kinyɔkɔ ní ki nìn mèé ti-Dindaan. 6Míǹ boonee, bi nìn tɔ́ animbil. Báà ŋma nìn tɔ́ ki nóó nì u-ŋmam ní. 7Bi nìn cáá animbilee ki cūnnì Jeerusaleem ki tīī usaraaŋakpil Yooyakiim, Eelikiyasi jipɔɔn nì Saluum naantiiu. Animbilee nìn sá ki tīī bisaraaŋaliibi bin kíǹee mun nì samaa un kɔkɔ nìn bí u-cee Jeerusaleemee.
8Kí wàatēe, uŋmal un bi yíì Siifanee iwiin saalaa dalee, Baruuki nìn yōoǹ tiwan tin nìn bí ti-Dindaan Diikun bi nìn yōoǹní circir kɔŋkooŋŋu poonee kí gíiǹ Juuda tiŋkin. Joosiyaasi jipɔɔn Sideesiyasi, Juuda bɔtiu di nìn yāntì bi dū animbil kúti ki mɔ́ɔ́ tiwan gbanti. 9Nì mimmee, Babiloon bɔtiu Neebukadineesaar nìn cúú Yeekooniya nì bikpilib nì ŋŋal pu tɔntɔnliibi nì bikàliŋkpilib nì samaa kɔkɔ Jeerusaleem tiŋkin ki cūnnì kuyuŋu Babiloon tiŋkin.
10Bin bínní Babiloon tiŋkin kuyuŋuee nín nìn ŋmàn̄ tibɔti tin ki tīī Jeerusaleem yabee di sá yii: «Ti tú bí cáań-ni animbil. Ní dū animbil gbanti kí dā tiwaŋkuti kí ŋá bisaraawɔkaabi nì ikpiti pɔ̄tam saraabi, ní kí lēē kí dā talaalutuukaa mun. Ní ŋá saraabi gbanti ti-Dindaan ti-Nimbɔtiu saraafaŋŋu pu. 11Ní mèè kí tīī Babiloon bɔtiu Neebukadineesaar nì u-jipɔɔn Baltasaar#1.11 Baltasaar : kpèè Dani 5.1-2. - B. 11. kpèè Yeer 29.7, Eesi 6.10, 1 Tiim 2.1-2.. Ní mèè Unimbɔti yii ú yàntī bí kàl̄ kitiŋ pu kí yúntí kii kutaa kun dàn̄ kitiŋ pu nee nín làá yúntí puee. 12Niinee ti-Dindaan làá tīī-ti mpɔn, ní kí ŋúbití ti-nimbiliŋ, án nín làá ŋá pu Babiloon bɔtiu Neebukadineesaar nì u-jipɔɔn Baltasaar ń nīn wúń ti-puee. Ti làá nīn bí bi-ŋaan an yúntí ní bí dàkà-ti kulaŋŋaŋfitiiu. 13Ní mèè ti-Dindaan ti-Nimbɔtiu kí tīī ti-mun. Di sá yii ti yīntiǹ ti-Dindaan ti-Nimbɔtiu. Ki dāa sāā nì díǹ nee, diŋuul nì mbum min u fōō ti-puee dáá gbíntìi dàn̄ ti-pu. 14Ní kàaǹ kugbɔŋu kun ti tú bí cáań-ni nee, kí bìitī ni-kpitii pu ti-Dindaan Diikun. Ní kàaǹ-ku tibìń jiŋaaliu yuntiŋu, nì ŋyunti ŋun an yaa kítì ní kàaǹ-kuee».
BIN BÍNNÍ KUYUŊUEE WIMMEEM
Isirayeel yab bīitì bi-kpitii pu
(Dani 9.4-19, Eesi 9.6-7, Neey 9)
15Ní lì yii: «Ti-Dindaan ti-Nimbɔtiu sá deedeedaan ní, ama timbee, icoo di máaǹ kí cúú-ti, kii an nín bí pu díǹ nan ní! Tiŋman icoo sá ki tīī timbi Juuda yab nì bin kóò Jeerusaleem tiŋkinee, 16nì ti-bɔtiibi nì ti-kpilib nì ti-saraaŋaliibi nì ti-bɔnaatiliibi nì ti-baabi. 17Di sá yii ti yīntiǹ ti-Dindaan. 18U nín bí yii tí nīn nóó marab bin u tīī-tee, taa yúliǹ-u deedee ní kaa pílifì úǹ ti-Dindaan ti-Nimbɔtiu nyɔkɔ. 19Kí yòon̄ ŋwiin ŋun ti-Dindaan nyántìń ti-naanjab Eejipiti tiŋkin ki dāa sāā díǹ nee, taa yúliǹ ti-Dindaan ti-Nimbɔtiu deedee. Tin ti pée ŋáańee, taa dàkafī ní kaa pílifí tin u sòoǹee#1.19 Dūú ŋmàntī nì Yeer 7.25-26, Ilan 106.6-42.. 20An pu ní nnaabu nì mbusu dū bi-ba ki yá ki nákáǹ-ti kii ti nín wāĺ an bí-ti díǹ pu nan ní. Ŋwiin ŋun u nyántìń ti-naanjab Eejipiti tiŋkin kí dū kitiŋ kin poon ní nnaabiim nì tisiil còol̀ee kí tīī-tee, ti-Dindaan tɔntɔnliu Mooyiisi nìn sòon̄ mbusub gbanti pu#1.20 Ditee 28.15-68.. 21U nìn dū u-bɔnaatiliibi ki túnní ti-cee, ama taa nìn pílifì tin ti-Dindaan ti-Nimbɔtiu nìn dī bi-pu ki sòon̄ nì tee. 22Ama báà ŋma nìn nóó u-pɔɔkpitil landɔkɔi ní, ki tòotī awaa. Báà ŋma nìn pée ŋáań tin kaa kítèe ní ti-Dindaan ti-Nimbɔtiu cee#1.22 B. 21-22: dūú ŋmàntī nì Disa 20.3, Yeer 11.8, 25.4-6..»
Currently Selected:
Baruch 1: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.