Siracide 51
51
TIBƆKUTIKAAL
Siiraki jipɔɔn Yeesu wimmeem
1Ti-Dindaan Ubɔti, m là kí jāam̀-si.
Unimbɔti m-fiiliu, m làá gāā ilan kí nyɔ̄ŋkì-si.
Sii ní m bíi jáaḿ,
2kun puee sii di wúń m-pu.
A jòoń-mi ki fīī-mi ŋkúm ŋaan.
A fīī-mi ki nyántì bin sòoǹ m-pu tinyimɔmbɔti
nì binyimɔndambi talintin.
A fīī-mi ki nyántì bin bí ki kɔ́kɔĺ-mee ŋaan#51.2 Dūú ŋmàntī nì Disa 15.2..
3A nín fīī-mi ki nyántì bin nìn nyàab̀ kí tɔ̀ntī-mee ŋaanee,
a dàkā yii a-poon lafun mɔ̄ ní a-yindi sá dikpaandi.
A fīī-mi ki nyántì bin nìn nyàab̀ kí kpɔ̀-mee ŋaan,
nì agìń tikpil ŋin nìn bāań-mee poon.
4A nìn fīī-mi ki nyántì ŋŋmifaam min nìn māntìi tú-mee,
nì aŋmilimbil ŋin maa nìn sēēyee poon.
5A nìn yāntì m ŋmátì ki nyáń ditaŋkpiil,
nì tibɔkpitil nì inyimɔn,
6nì dilimbikpitil piiŋyi ŋaan.
M nìn sútì ki pìl̄ ŋkúm,
ki sīntì ki tin bàn̄ ditaŋkpiil punyɔkɔki#51.6 B. 5-6: kpèè Ilan 30.2-4..
7M-nannanliibi nìn māntìi tú-mi an kɔkɔ pu,
ní báà ubɔ kaa nìn bí kí jòoń-mi.
M nìn nyàab̄ ubɔ ń jòoń-mi,
ama kaa ká báà uniseen.
8Niinee ní m téetì sii ti-Dindaan poommɔŋŋu pu,
nì a-ŋanti tin bí ki cá jaanjaanee pu.
M nyí yii a fìil̄ binib bin di máká a-puee,
a fìil̄-bi ki nyāntí bi-nannanliibi ŋaan#51.8 Dūú ŋmàntī nì Yoona 2.8, Ilan 25.6..
9Doooo kitiŋ pu doo ní m fáá m-biil ki yíiń-si
ní ki gbāam̀-si yii á fīī-mi ŋkúm ŋaan.
10M nìn kúuǹ ki yíiń-si ki lī yii:
«Ti-Dindaan, sii di sá m-Baa,
taa dū-mi ki fá dinimbinaamandi yuntiŋu poon,
ŋyunti ŋun ní m bí bilambidambi nimbiin
kaa cáá un di làá jòoń-mee.
11M làá nīn nyɔ́ŋkí a-yindi ní kí nīn pée cá jaanjaan,
ní kí nīn pée gà ilan ki jáaḿ-si.»
Niinee ní a fōō m-wimmeem.
12Di sá yii a fīī-mi an kaa nāaǹ-mi,
a fīī-mi nnaabu yuntiŋu poon.
An pu ní m là kí jāam̀-si,
kí gāā ilan kí nyɔ̄ŋkì sii ti-dindaan,
ní kí lì tin ní a ŋá ki tīī-mee.
Unil bí ki nyàab̀ iciin
13M nín nìn dáá pɔ̀ɔǹee,
kí wàatī ḿ nìn búntí diyiindee,
m nìn mèé ti-Dindaan,
kaa nìn bāal̀ yii m nyàab̀ kí nīn cáá iciin.
14M nìn mēē kunimbɔtidii nyɔkɔpu ki nyàab̄-i,
ní ki làá nīn pée nyàab̀-i kí tin sāā m-kúm dal.
15I kpītì kii fiinyi subiliŋ ŋin bíi bīīyee,
ní ki yāntì m ká dipɔɔpindi.
M nìn kíǹ ki tàkā nsammɔnti pu,
doooo m-pɔntinee, m pée nóó i-tabɔbiliŋ ní.
16M nìn pée kpōoǹ m-tafal ŋyunti fiii pu yéè
ní ki ŋúń ki ká-i.
I yāntì m ká didàkamɔntiil ki tīī m-ba.
17Iciin di yì-tì ní m cūtì nyɔkɔpu,
an pu ní m jáaḿ un di tīī-mi-iee.
18M lēē m-ban yii m làá dū-i kí tɔ̄ ditundi,
m nyàab̄ kí ŋá tiŋan nì difaŋgiil ní icoo kaa kɔ́-mi.
19M mɔ̀n̄ nì dibaatandi kí nīn ŋúb́-i.
M cúú m-ba tiŋan kí nīn tɔ́ Unimbɔti marau.
M yōoǹ m-ŋalii ki túĺ kutaa,
ki gbāam̀ tin m yīntiǹ-i kaa nyée pu.
20M ŋá m-ba circir ki fātì m-ba ki túĺ iciin,
ní ki dāa ká-i.
Íǹ di kíĺ ki tīī-mi dinyil.
I pée kpá kí fá-mi dalba dalba.
21M nìn nyàab̄-i nì m-pɔbil kɔkɔ,
an pu ní m ká tigaajawammɔntiil gbanti#51.21 Dūú ŋmàntī nì Alaŋ 8.33-36..
22Tipaal tin ti-Dindaan tīī-mee di sá dilimbil.
An pu ní m làá dū-dì kí nyɔ̄ŋkì-u.
23Nimbi bin kaa cáá dinyilee,
ní dāam̄maan m-cee.
Ní dāam̄maan ḿ bīfì-ni#51.23 Dūú ŋmàntī nì Alaŋ 9.4-6, Maat 11.28..
24Ba pu ní ní nīn kā ki ŋmìntī ni-ba Iciin,
ŋyunti ŋun ní i-nyinnyooŋu cáá-nee?
25Man di wāaǹ m-nyɔkɔ ní ki lī yii:
«Ní dā iciin kí taa pà#51.25 Dūú ŋmàntī nì Yees 55.1, Alaŋ 4.7..
26Ní tàntīmaan ni-sil í kpàl̄-ni ní tɔ̄ i-tundi,
ní í dàkà-ni.
I pée bí ni-caŋin gbiisii yéè, ni ŋūǹ kí ká-i#51.26 Dūú ŋmàntī nì Ditee 30.11-14, Room 10.6-8..
27Nimbi ni-ba ń dáań kí kpèè
m nín kaa gīī tikpil pu
ní ki ká diŋuŋfikpaandee.
28Ní dū kunimbigbaau kí bīfì didàkal,
dì làá yàntī ní ká sindaariya tikpil#51.28 Dūú ŋmàntī nì Alaŋ 16.16, Maat 13.44-46..»
29Nín̄ bímaan dipɔɔpindin ti-Dindaan ŋanti pu,
án taa nín cáá-ni icoo ní gāā ilan kí nyɔ̄ŋkì-u.
30Ní tɔ̄maan ni-tundi din sá ní tɔ̄ee
ní ŋyunti ŋun bi yóoǹ-nee ń nín bàń.
Ti-Dindaan làá dāá pà-ni ni-paati
ŋyunti ŋun sá ú dāá pà-nee#51.30 Dūú ŋmàntī nì 2.8, Gala 6.9-10..
Inyɔŋki laŋyi in bi dūu kútì kugbɔŋu kun bi ká Keeri tiŋkinee puee
31 Nyɔ̄ŋkìmaan ti-Dindaan, di sá u ŋān̄, di sá yii u-neendi bí ní ki cá jaanjaan.
32 Nyɔ̄ŋkìmaan Unimbɔti, di sá yii u-neendi bí ní ki cá jaanjaan.
33 Nyɔ̄ŋkìmaan un cí Isirayeelee, di sá yii u-neendi bí ní ki cá jaanjaan.
34 Nyɔ̄ŋkìmaan duulinya Náanliu, di sá yii u-neendi bí ní ki cá jaanjaan.
35 Nyɔ̄ŋkìmaan un dá Isirayeel ki líìyee, di sá yii u-neendi bí ní ki cá jaanjaan.
36 Nyɔ̄ŋkìmaan un kóoǹ Isirayeel yab bin yàl̄ee ki kpáfèe, di sá yii u-neendi bí ní ki cá jaanjaan.
37 Nyɔ̄ŋkìmaan un māā u-tiŋki nì u-kɔŋkooŋŋuee, di sá yii u-neendi bí ní ki cá jaanjaan.
38 Nyɔ̄ŋkìmaan un yāntì ŋyin ŋubɔ cɔ́tì Daafiidi dicaŋkunee, di sá yii u-neendi bí ní ki cá jaanjaan.
39 Nyɔ̄ŋkìmaan un di lēē Saadooki naantiibi bí nīn sá bisaraaŋaliibee, di sá yii u-neendi bí ní ki cá jaanjaan.
40 Nyɔ̄ŋkìmaan Abraam gbampɔɔl, di sá yii u-neendi bí ní ki cá jaanjaan.
41 Nyɔ̄ŋkìmaan Isaaki taŋkpanaakooku, di sá yii u-neendi bí ní ki cá jaanjaan.
42 Nyɔ̄ŋkìmaan un sá Jaakɔb pɔŋŋuee, di sá yii u-neendi bí ní ki cá jaanjaan.
43 Nyɔ̄ŋkìmaan un di lēē Siiyɔŋyee, di sá yii u-neendi bí ní ki cá jaanjaan.
44 Nyɔ̄ŋkìmaan un sá bibɔtiibi bɔtiibi kɔ Bɔtiuee, di sá yii u-neendi bí ní ki cá jaanjaan.
45 U làá fàtīí yòon̄ u-nibul pɔŋŋu yilpu,
an di sá kun pu bin kɔkɔ yú nì u deedeeyee nyɔ́ŋkí-uee,
Isirayeel biyaamu, dinibul din di pìl̄-uee.
Aleeluya.
Currently Selected:
Siracide 51: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.