Siracide 50
50
Usaraaŋakpil Siimɔn
1Usaraaŋakpil Siimɔn, Ooniyasi jipɔɔn,
di nìn fātìi ŋáŋkì kunimbɔtidii.
Úǹ di nìn mɔ̄tìi pɔ́ɔkì circir kɔŋkooŋŋu
ŋyunti ŋun ní u nìn dáá bí dimaŋfalinee.
2Úǹ di nìn yāntì bi cóoǹ kunimbɔtidii
gundi di fɔ̀kɔ̀ mili puee nyeel.
Úǹ di nìn máń digundi din māntìi tú
kunimbɔtidiiyee ki tɔ́kɔǹ.
3U-yuntiŋu ní bi nìn gbìn̄ dinyimbɔbil.
Dinyimbɔbilee nìn wāā kii
kunimbɔtidii kupeekaau sampeekuee ní.
4U-landɔkɔŋu di nìn pée sá yii
ú pìin̄ nsan u-nibul ń taa nàan̄.
U nìn máń digundi ki māntìi tú kitiŋ
an yaa sá yii binannanliibi dɔ́miń kí jáǹ-kèe.
5U yaa nìn nyáń circir kɔŋkooŋŋun,
ki yaa nìn còom̄ ki màntī kunimbɔtidiiyee,
u nìn gbí tinyooleeee!
6U nìn bí kii utaafaaŋmalbija un di ŋmíntí atagban kansikinee,
ní ki nìn bí kii uŋmal un ŋá dikuŋkundee.
7U nìn bí kii ŋwìiń ŋun ŋmíntí
Yilpu fɔ́ŋŋŋ Nimbɔtiu Diikuee,
ní ki nìn bí kii dikuntinyindi
din jìl̀ tinyool tagbaŋŋi poonee.
8U nìn bí kii nsupumpukum min mātì dipeepɔndinee,
ki bí kii nsupumpukum min yú ibun caŋinee,
ní ki bí kii Leebanɔn sufii dipeel puee.
9U nìn bí kii talaalutuukaa un bi tūū nsaraafan puee,
ki bí kii sindaariya sampeeku kun bi dū
ataŋkpanyaan kɔkɔ nì ŋi-bulifi ki nyáantèe.
10U nìn bí kii ɔliifi subu bun lòon̄ sàka sakee,
ki bí kii siipreesi subu di fɔ̄kɔǹ ki tin tūū atagbanee.
11U yaa nìn dū u-saraaŋabɔkutifɔkɔl ki pēeǹ,
ki yaa nìn pēeǹ u-wannyaanti tin kíǹee kɔkɔ
ní ki jɔ́m̀ Unimbɔti saraafaŋŋu puee,
u nìn yàntī tinyool gbéè circir kɔŋkooŋŋu cindi kɔkɔ ní.
12U nìn yūlifí ki kɔ́l̀ nsaraafan,
ní ki fòol̄ bisaraaŋaliibi ŋaan dijandi din u làá dūú ŋá saraayee.
U-nabiyaamu mun nìn māntìi tú-uee nìn bí kii kibeefuuliiyee,
a lì kii Leebanɔn sufii in bi yíì seediree,
a lì kii ibafi sujaatii di yú ki māntìi tú-uee.
13Aarɔn jipɔmbi kɔkɔ pēē bi-bɔkutinyaaŋŋi.
Bi nìn ŋúb́ ti-Dindaan saraau
Isirayeel samaau kɔkɔ nimbiin.
14Siimɔn nìn pāantí saraabi nsaraafan pu,
ki tìì Yilpu Fɔ́ŋŋŋ Nimbɔtiu, Mpɔŋkɔdaan.
15U nìn tàntī u-ŋal kí yòon̄ kɔŋkɔnnyɔkaa,
ní kí bàtī ndamam min sá fiinyi subiliŋee
ki féeń nsaraafan nyeel pu.
An nìn sá talaalu un sɔ́fì
ki kóò Yilpu Fɔ́ŋŋŋ Nimbɔtiu,
duulinya kɔkɔ bɔtiu fíŋfiŋfiŋee ní#50.15 Kpèè Dikà 15.7,10, 28.7-8,14..
16Niinee ní Aarɔn jipɔmbi bisaraaŋaliibi ń fáá ŋwiliili
ki búǹ bi-kantáŋŋi ŋin sá tikútee.
Bi nìn ŋáań kuwoou tikpil míǹ
samaa ń gbìl̄ kí téetí Yilpu Fɔ́ŋŋŋ Nimbɔtiu pu#50.16 Kpèè Dikà 10.10..
17Dicilpu niinee ní dinibul kɔkɔ
ń tàtīí gbàan̄ bi-yigbeeŋi tūū kitiŋ,
ní kí kíĺ ki bíi jáaḿ di-Dindaan
Mpɔŋkɔdaan, Yilpu Fɔ́ŋŋŋ Nimbɔtiu.
18Niinee ní bilaŋgaaliibi ń nìn kíĺ ki gà ilan ki nyɔ́ŋkí-u.
Kunimbɔtidii poon nìn fòol̄ kí píĺ dàii
ní nlan ŋun bi nìn gèe nìn mɔ̄ dipilifil.
19Dinibul nìn gbàam̄ ti-Dindaan, Yilpu Fɔ́ŋŋŋ Nimbɔtiu.
Bi nìn gbāā Unimbɔti un poon mɔ̄ee nimbiin ki mèé
áli bí dāá ŋá saraabi kí tīī ti-Dindaan
kí ŋá akoobil nín sá puee kɔkɔ kí dóó.
20Niinee ní Siimɔn ń kpákatí nsaraafan pu.
U nìn yòontí u-ŋalii yilpu kí túĺ Isirayeel samaau,
ní kí wàan̄ kinyɔkɔ kí mèè ti-Dindaan kí bìin̄ bi-pu.
Úǹ ní bi nìn tīī jilma ú yíiń ti-Dindaan yindi.
21Míǹ boonee ní samaa ń fàtīí gbàan̄ nliliitiim
bi-yigbeeŋi tūū kitiŋ kí fōō
Yilpu fɔ́ŋŋŋ Nimbɔtiu biindi.
Dibiindi wimmeem
22Kɔŋkɔnnee ní jāam̀maan duulinya kɔkɔ Nimbɔtiu.
U tūǹ atuŋkpaan ijaan kɔkɔ pu,
ki yòontí-ti yilpu doooo ŋyunti ŋun bi màl̄-tee,
ní ki dàkà-ti u-laŋŋaŋfitiiku.
23Ú tīī-ti dipɔɔpindi, ifaal ti-pɔbiliŋ poon
kí tīī ti-yuntiŋu nee nib ŋgbansɔŋfi
kii u nín nìn ŋá pu njaminee.
24U-ŋanti ń nīn pée gbíntìi bí ti-cee,
ní kí nīn fìil̄-ti ti-maŋfal wiiŋyi kɔkɔ poon.
Anibul ata bɔti kaa fáatì-mi
25Anibul ali di bí m-nimbil kaa là kí wāl̀-ŋi,
ní ditataatiil díǹ kaa kpáàa bàn̄ dinibul gba.
26An nibee di sá binib bin kóò Seeyiir jool puee,
nì Fiiliistii yab nì bigbaambi bin kóò Siikeem tiŋkinee.
Tibɔkuntikaal
27Siiraki jipɔɔn Yeesu, Eelasaar un kóò Jeerusaleemee naantiiu ŋmàn̄ kugbɔŋu nee poon iciin nì dinyil dakaŋ. U dū iciin in di gbí u-pɔbilinee ki yāaǹ kitiŋ pu kii utaayee. 28Un di yaa kàaǹ ki bùsī tibɔti nee bí mmɔneeee! Un di yaa dū-tì ki ŋá u-pɔbilinee làá kpántí uciŋfiti.
29Di sá yii u yaa dū-tì ki túń ditundee, u làá nīn pɔ̄ɔ̄ tikɔkɔ poon, di sá yii u làá nīn fàŋkí ti-Dindaan u-saŋkindi poon.
Currently Selected:
Siracide 50: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.