Siracide 49
49
Joosiyaasi
(Kpèè 2 Bib 22.1-13, Yeer 22.15)
1Binib téetí Joosiyaasi pu,
kii bi nín téetí utalaaluŋal
nín ŋmālim̀ tiwan tin sɔ́fì
ki ŋá talaalumɔnti puee ní.
U-yindi mɔ̄ kinyɔkɔ kamaa poon kii tisiilee ní,
àá kii bi nín gà ilan diina poon puee ní.
2U nìn nóó deedee saŋŋu ki kpántì dinibul pɔbil,
ní ki kúntì ntimbiil waaŋi.
3U nìn fātì u-pɔbil ki túĺ ti-Dindaan.
Ŋyunti ŋun binib kaa nìn dū u-marab ki yíiń tibee,
u nìn dū ti-Dindaan tundi ki līntì nsan.
Juuda bɔtiibi biluŋkikaabi nì Unimbɔti bɔnaatiliu Yeereemii
4Bibɔtiibi kɔkɔ nìn ŋáaǹ ikpiti an kaa cáá bí lì,
asee Daafiidi nì Eeseekiyaasi nì Joosiyaasi baba.
Bi-kɔkɔ nìn dū Yilpu Fɔ́ŋŋŋ Nimbɔtiu Marau ki fá.
Juuda bɔtiibi kɔkɔ nìn wáŋkì.
5Bi nìn dū bi-pɔŋŋu kɔkɔ ki tīī biba,
ní ki nìn dū bi-nyooti ki tīī ditimbuncandi diba.
6Bi-nannanliibi nìn sēē circir tiŋki
kin Unimbɔti nìn lēēyee ŋŋmi.
Ki-daŋŋi nìn kíǹ ki dɔ̄ fám ní.
Unimbɔti bɔnaatiliu Yeereemii nín nìn sòon̄ pu ki síiǹee dee.
7Binib gbanti nìn yāntì u jíń falaa tikpil.
Too, ti-Dindaan mun di nìn lēē-u doooo u-na poon
ú nīn sá u-bɔnaatiliu kí kpìkitī, kí bīil̀ ní kí nàan̄,
ama ní kí fàtīí mā kí cóoń mun#49.7 Bi nín sāaǹ Yeereemii puee: kpèè Yeer 20.2, 38.28. - uyakatikaa nee nín kúntì puee: dūú ŋmàntī nì Yeer 1.10..
Eeseekiyeel
8Eeseekiyeel di sá un nìn ká ti-Dindaan nyootee.
Unimbɔti nìn dàkā-u tinyool gbanti
keerubimbi bin tɔ́kɔ́ tɔrɔkub puee ní#49.8 Kpèè Eesee 1.4-28, 10..
9U nìn téetì binannanliibi pu utaaja poon,
ní ki nìn ŋá bin nóó deedee saŋŋuee tiŋan.
Unimbɔti bɔnaatiliibi saalaa nì bili bɔti
10Unimbɔti bɔnaatiliibi saalaa nì bilee
dáá gbíntìi dɔ̄ bi-kaakuliŋin.
Ama ti-Dindaan ń yàntī bin làá téeǹ bi-yil puee ń nyā.
Di sá yii bi nìn tīī Jaakɔb maaliŋun yab kunyannyaau,
ní ki nìn fīī-bi kun puee baa nìn fá bi-mákal.
Sooroobabeel nì Joosuwa
11Mana ní unil ŋūǹ kí pàkà Sooroobabeel?
U nìn sá kii kibɔmbiki kin fúuń ti-Dindaan ŋaŋgiilee ní#49.11 Sooroobabeel : kpèè Agaa 1.1,12,14, Saka 4.6-10, Maat 1.12-13..
12Míǹ mbaantiim ní Jooseedeeki jipɔɔn Joosuwa bí.
Ŋyunti gbantee, bi-liitil nìn fātìi máń kunimbɔtidii.
Bi nìn máń circir kɔŋkooŋŋu ŋun làá nīn cáá
tinyool kí nīn cá jaanjaanee ki tīī ti-Dindaan#49.12 Kpèè Agaa 1.1, Eesi 6.14-22..
Neeyeemiya
(Kpèè Neey 1–7)
13Neeyeemiya mun nìn túń atuŋkpaan ŋin unil máaǹ kí téetée pu.
U nìn fātìi máń ti-tiŋki guŋŋi ŋin nìn lítèe.
U nìn kpántì ti-punuubi nì ti-kpàlkaati,
ní ki fātìi máń ti-diiŋŋi.
Eenɔki
14Binib bin kɔkɔ ti-Dindaan náań kitiŋ puee,
baa ŋūǹ kí dū bi-kansikin ubɔ kí ŋmàntīǹ Eenɔki.
Di sá yii an yōoǹ-u kitiŋ pu doo ní ki cáa jɔ́ntiǹ yilpu#49.14 Dūú ŋmàntī nì Diny 5.24, Eebru 11.5..
15Unil kaa nìn tí bí ki bàn̄ Jooseefi.
U nìn sá u-nabiyaamu kpiliu,
ní ki nìn sá u-nibul tíkinliu.
Bi nìn tīī u-kpabiŋ tinyool#49.15 Kpèè Diny 50.25-26, Disa 13.19, Joos 24.32..
16Seem nì Seeti nìn ká tinyool binib kansikin,
ama Adam di jítiǹ binifoobi bin ní ti-Dindaan náańee kɔkɔ#49.16 Seem : kpèè Diny 6.10, 10.21. - Seeti : Diny 4.25, 5.3. - Adam : Luuki 3.38..
Currently Selected:
Siracide 49: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.