Siracide 48
48
Eelii
1Míǹ boonee ní Unimbɔti bɔnaatiliu Eelii yíkì kii ŋŋmee,
ní u-nyɔɔbundi nìn wù kii ŋŋminaapoolee.
2U nìn cáań ŋkùm ki tɔ́ Isirayeel yab pu,
ní difaŋgiil din u nìn cáá ti-Dindaan puee puee,
u nìn kūū ki céetì binib tikpil#48.2 ŋkùm: 1 Bib 17.1, Luuki 4.25..
3U nìn dū ti-Dindaan nyɔɔbundi pu ki pīiǹ kutagbɔŋu,
ní ki tí yāntì ŋŋmi nyánní yilpu ki kpákatìń kitiŋ mita pu#48.3 mita pu: 1 Bib 18.38, 2 Bib 1.10,12..
4Eelii, a ká tinyool atuŋkpaan ŋin ní a ŋáaǹee pueeee!
Ŋma di ŋūǹ kí gāā u-bindi yii u nì si ŋmà?
5A dū Yilpu Fɔ́ŋŋŋ Nimbɔtiu nyɔɔbundi pu ki yāntì
utaŋkpiil nyánní ditaŋkpiilin ki gítìń dimaŋfalin#48.5 1 Bib 17.17-24..
6Sii di téé bibɔtiibi ki lúkú ki nāaǹ-bi
ní ki téé binikpaambi bi-bunlidooi pu ki tɔ́ dikaakulin#48.6 1 Bib 21.17-24, 2 Bib 1.15-17..
7Siinaayi, Ooreeb jool puee,
ti-Dindaan wòon̄-si a gbìl̄,
ní u sòon̄ ki tùkū-si ditafadaakpaandi pu#48.7 1 Bib 19.8-18..
8Sii di kāaǹ bibɔtiibi bí tɔ̀ ti-Dindaan pɔntooŋyi,
ní ki sītì Unimbɔti bɔnaatiliibi yiliŋ pu ŋkpam bí fōō a-yil#48.8 1 Bib 19.15-21..
9Sii ní an yōoǹ ŋŋmi naakpaabuŋku poon,
a kāl̀ janjatɔrɔku un ŋŋmi taamui dátée ki jɔ́m̀ yilpu#48.9 Dūú ŋmàntī nì 2 Bib 2.11..
10Sii pu ní Tiŋmaŋmabiti sòon̄ yii
a làá sɔ̀ŋkì ti-Dindaan ŋuul ní dí nín pōō.
A làá yàntī ubaati nì u-jipɔɔn ń mɔ̄ɔkì
ní kí fàtīí gíiǹ Jaakɔb naakɔti kí kàan̄ ti-paaŋŋu#48.10 Dūú ŋmàntī nì Mala 3.23-24, Yees 49.6, Maat 11.14, 17.10-13, Luuki 1.17..
11Bin làá dāá ká-si ní kí nīn néeń ti-Dindaan
kí kpúee bí mmɔnneeee!
Di sá yii ti mun làá dāá nīn pée bí dimaŋfalin ní.
Eeliisee
12Eelii nín nìn wáŋkì kunaakpaabuŋŋu poonee,
u-fam nìn gbí Eeliisee ní.
Eeliisee maŋfal wiiŋyi kɔkɔ poonee,
uyidaan ubɔ kaa nìn ŋúń ki cīŋkì-u,
ní báà unil mun kaa nìn ŋúń ki jíń u-pu dinyandi.
13Báà tiba kaa nìn pée pɔ̄ɔ̄ u-cee.
Ki kpáaǹ u-kúm boonee,
u-wunti nìn gbíntìi tūǹ Unimbɔti bɔnaatiliu tundi ní.
14U nín nìn bí dimaŋfalinee,
u nìn túń maamaaci tuuŋŋi.
ní u-kúm boonee,
u gíti ŋáaǹ maamaacikpaambi#48.14 B. 12-14. 2 Bib 2.1-13.21..
15Nì míǹ kɔkɔee Isirayeel nibul kaa nìn kpántì bi-ba,
baa nìn fātì bi-boon ki tīī bi-kpitii,
áli bi dāa cúú-bi ki cūnnì kuyuŋu
ki yàl̄ duulinya kɔkɔ poon ki wāatì bi-tiŋki.
An nìn pée kíǹ bikaaŋkaabi pu yéè ní#48.15 Kpèè 2 Bib 17.7-23.,
nì ubɔti un nyánní Daafiidi dicaŋkunee.
16Bi-kansikin biba nìn ŋá tin fáatiǹ Unimbɔtee,
ní bin kíǹee mɔ̄tìi dū bi-ba ki múĺ ikpitin.
Ubɔti Eeseekiyaasi nì Unimbɔti bɔnaatiliu Yeesaya
17Eeseekiyaasi nìn máń digundi ki tú Jeerusaleem tiŋki,
ní ki nìn kɔ́ǹ nnyim kitiŋ poon.
U nìn dū tikúti ní ki lùkū ditaŋkpal ki cátì nnyinsan,
ní ki gbìn̄ dinyimbɔbil kí kpāafì nnyim#48.17 Kpèè 2 Bib 20.20..
18U-beel yuntiŋuee, Seenakeeriibi
nìn dɔ́miń kí jáǹ Jeerusaleem tiŋki.
U nìn tú u-janjakpiliu Rabsakeesi
ní u nìn dúkutì u-ŋal ki dàkā Siiyɔn tiŋki
u-lambikpaandi poon.
19Niinee Jeerusaleem tiŋkinee,
binib pɔbiliŋ nìn bíil̀ ní bi-wunti gbáà kpàkpakpa,
ní tiweendi cúú-bi kii unimpu un kā imatiŋween puee#48.19 Dūú ŋmàntī nì 2 Bib 19.3, Yees 13.8..
20Bi nìn kúuǹ ki yíiń ti-Dindaan ulaŋŋaŋfiti,
ki nìn yōoǹ bi-ŋalii ki túĺ u-watil pú.
Circir Nimbɔtiu nìn kíiń-bi malaa doooo yilpu,
ní ki nìn dī Yeesaya pu ki fīī-bi.
21Ti-Dindaan nìn jáń nì Asuur yab janjakitil
ní u-tuuŋŋu nìn kūū ki céetì bi-kɔkɔ múb#48.21 B. 20-21: kpèè 2 Bib 19.14-35..
22Di sá yii Eeseekiyaasi nìn ŋá tin fáatiǹ ti-Dindaanee.
U nìn nóó u-naanja Daafiidi tabɔbiliŋ ní deedee.
Unimbɔti bɔnaatiliu Yeesaya un leedakaŋ nìn sá ibaamɔnee
di nìn tīī-u mara ú ŋá míǹ#48.22 Dūú ŋmàntī nì 2 Bib 18.3-6..
23Yeesaya yuntiŋu ní ŋwìiń nìn sútì ki gítì ŋu-boon
ní ubɔti maŋfal wiiŋyi fɔ̄kɔǹ ki kútì#48.23 Kpèè 2 Bib 20.8-11..
24Mpɔŋkpaan ŋun Unimbɔti nìn tīī-uee
nìn yāntì u wál̀ tin làá dāá jītí iyuntijoolkaa poonee,
ní u nìn ŋméeǹ Siiyɔn yab bin nìn kā dikpoolee#48.24 Dūú ŋmàntī nì Yees 40.1-2, 61.2-3..
25U nìn sòon̄ tin làá dāá jītí iyuntijoolkaa poonee bɔti,
nì tibɔti tin nìn bál̀ kaa láá nyáń mpaampiin puee pu.
Currently Selected:
Siracide 48: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.