Siracide 47
47
Unimbɔti bɔnaatiliu Natan nì ubɔti Daafiidi
1Samiyeel boonee, Naatan di nìn kpántì Unimbɔti bɔnaatiliu
Daafiidi yuntiŋu#47.1 Kpèè 2 Sami 7.2-16..
2Kii bi nín lèekī mpèé saraau kpam puee,
míǹ ní Unimbɔti nìn lēē Daafiidi mun Isirayeel yab kansikin#47.2 Dūú ŋmàntī nì Akoo 3.3, 1 Sami 16.12..
3Kí cúú gbikintibee nìn sá u-cee
kii bi nín cútí ŋŋɔbiyaamu puee ní,
ní kí cúú agbiŋgbilee nìn sá u-cee
kii bi nín cútí mpibiyaamu puee#47.3 Dūú ŋmàntī nì 1 Sami 17.34-37..
4U-naacimpɔnti poonee, úǹ di nìn kūū kujawɔkɔu,
ní ki nìn nyántì Isirayeel nibul icoon.
U nìn dū u-jaataafuŋku ki tɔ́ ditaŋkpal
ki yá Gooliyaati un nìn gbí dilambilee ki kūū-u#47.4 Kpèè 1 Sami 17.1-54..
5Di sá yii u nìn kúuǹ ki yíiń
ti-Dindaan Yilpu Fɔ́ŋŋŋ Nimbɔtiu.
Úǹ nìn dū mpɔn ki ŋá u-ŋaŋgiilin
ú ŋmā kí kpɔ̀ ujanjakpaan gbanti,
ní kí lēē u-nibul pɔŋŋu kí dàkà.
6An pu ní bi nìn tīī-u tinyool kii
u nìn kūū binib kutukub saalaayee.
Bi nìn gāā ilan ki nyɔ́ŋkì-u
ki jáam̀ ti-Dindaan
ní ki nìn dū tinyool beefuuliiki ki cíkiǹ-u#47.6 Dūú ŋmàntī nì 1 Sami 18.5-8..
7Di sá yii u nìn kūū ki céetì
binannanliibi bin nìn māntìi tú-bee.
U nìn kúntì u-pulincɔntiibi Fiiliistii yab,
ní ki nāaǹ bi-pɔŋŋu ki dāa sāā díǹ.
8Daafiidi tuuŋŋi kɔkɔ poonee,
u nìn tīī Yilpu Fɔ́ŋŋŋ Nimbɔtiu un bí circiree tinyool.
U nìn gà ipampakalan nì u-pɔbil kɔkɔ,
ki dàkā yii u néeń u-náanliu.
9U nìn lēē bilaŋgaaliibi ki yóoǹ nsaraafan nyɔkɔpu,
ní bi nìn gà ilan in mɔ̄ee.
10U nìn tīī jiŋaalib jilma,
ki nìn bɔ́ntì-bi tiŋan tiŋan.
U nìn yāntì bi nyɔ́ŋkí ti-Dindaan yindi
ní kí yòon̄ ntaafaabɔmbɔmee,
bi nìn gbìl̀ ilan pu circir kɔŋkooŋŋun#47.10 Kpèè 1 Kroo 23-26..
11Ti-Dindaan nìn pítì Daafiidi kpitii
ki nìn tīī-u mpɔŋkpaan kí nīn cá jaanjaan.
U nìn pōoǹ-u tibɔtiil,
ki nìn yāntì u jíń dibeel nì tinyool Isirayeel tiŋki pu.
Saloomɔn
12Daafiidi kúm boonee,
u-jipɔɔn uciŋfiti di nìn fōō u-yil.
Daafiidi puee, ti-Dindaan nìn yāntì u bí ŋgbansɔŋfin#47.12 Dūú ŋmàntī nì 1 Bib 5.5-6..
13Saloomɔn nìn jíń dibeel ŋgbansɔŋfi yuntiŋu ní.
Unimbɔti nìn tīī-u diŋuŋfil u-tiŋki kɔkɔn.
An di yì-tì ní u nìn ŋúń ki máń kudii ki tīī ti-Dindaan,
ní ki nìn bɔ́ntì circir kɔŋkooŋŋu ŋun bí ki cá jaanjaanee#47.13 Kpèè 1 Bib 5.18, 6-8..
14Saloomɔn, a-naacimpɔntinee, a nìn lafun cáá iciin,
dinyil gbí-si kii dimɔɔl nín gbéè puee!
15A-nyil nìn kpátìi gbí kitiŋ kɔkɔ pu,
a-bɔŋmantikaati nì a-pɔɔŋyi nìn gbí ki-pu.
16A-yindi nìn bàn̄ ntindandatimu mun nnyim māntìi túee,
ní binib nìn néeń-si a-gbansɔŋfiŋu pu.
17Binib nìn pàkà a-laŋyi nì a-laŋkpaŋŋi
nì a-bɔŋmantikaati nì a-bɔsooŋyi#47.17 B. 15-17: kpèè 1 Bib 5.9-14, 10.1..
18Ti-Dindaan Unimbɔti yindi pu,
úǹ un bi yíì Isirayeel Nimbɔtiuee puee,
a nìn kóoǹ sindaariya ki kpúkuǹ kii tikúpinee,
ki nìn kóoǹ animbil kúti ki kpúkuǹ kii tikúbɔnee.
19Ama ní a nìn dū a-wunti ki fītiǹ binimpoobi,
ní bi-wunti puee, a kpántì bi-yumbuu#47.19 Dūú ŋmàntī nì 1 Bib 11.1-10, Alaŋ 31.3..
20Min ní a ŋá ki bíil̀ a-nyooti
ki kɔ́ǹ a-dicaŋkun yab tijɔkɔndi,
ki dáaĺ ti-Dindaan ŋuul ki tɔ́ bi-pu.
A-gbaantundi gbanti nìn kɔ́ǹ-bi kunimbaau.
21Di sá yii a-beel nìn cúu yākatì mili,
ní Eefiraayiim naakookun yab nìn yíkì
kaa kíí bi-ba pu ki náań bi-beel#47.21 Kpèè 1 Bib 12..
22Ama ti-Dindaan kaa nìn fātì u-boon ki tīī u-laŋŋaŋfitiiku,
ní kaa yāntì u-pooŋyi mun gbíntì fám.
Waa nìn kúntì un u nìn lēēyee naantiibi.
Waa nìn kūū ki céetì un u nìn néeńee nibooliŋu.
U nìn yāntì Jaakɔb naantiibi bikaaŋkaabi ŋmátì.
Míǹ mbaantiim ní u nìn yāntì Daafiidi maaliŋun yab
biba kíǹ ki fòol̄ u-yil#47.22 gbíntì fám: kpèè Joos 23.14, 1 Sami 3.19, 1 Bib 8.56, Yees 55.11, Saka 6.12..
Rooboowaam nì Jeerooboowaam
23Saloomɔn nìn kpíì ki cūtìi ŋàl̄ u-baabi.
Úǹ boonee u-jipɔmbi kansikin ubɔ di nìn fōō u-yil.
U nìn gbí digbaandi kaa nìn pée cáá dinyil báà fiii.
Di sá yii Rooboowaam nìn lēē dileel din di nìn yāntì
dinibul yíkì kaa kíí di-ba pu ki bíi jáà nì uee#47.23 Kpèè 1 Bib 12.26-32, 14.16..
Neebaati jipɔɔn Jeerooboowaam mun
nìn yāntì Isirayeel yab ŋá ikpiti.
U nìn dàkā Eefiraayiim yab ikpiti saŋŋu.
24An pu ní bi-kpitii nìn būtì tikpilku
ní bi dāa cúú-bi ki cūnnì kuyuŋu ki wāatì bi-tiŋki.
25Bi nìn ŋáaǹ atuŋkpiti kɔkɔ nì ŋi-bulifi
áli ki dāa fōō ditafadaaldi#47.25 B. 24-25: kpèè 2 Bib 17.21-23..
Currently Selected:
Siracide 47: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.