Baruch 3
3
1«Ti-Dindaan Mpɔŋkɔdaan, Isirayeel Nimbɔtiu, an sá nì kinaŋ kin bí kunimbaaunee nì dipɔbil din bíil̀ee ní ti bíi kūuntí ki yíì-si nee. 2Ti-Dindaan, sɔ̄ ti-saai kí pīlifiǹ-ti, di sá yii ti yīntiǹ-si. 3Siiyee, a sá un pée bée ní jaanjaan, ama timbee, ti pée wáŋkì ní kɔkɔ! 4Míǹ puee ti-Dindaan Mpɔŋkɔdaan, Isirayeel Nimbɔtiu, pīlifì timbi Isirayeel yab bin bí kii bitaŋkpiibi nee wimmeem. Ti-Dindaan ti-Nimbɔtiu, ti sá bin yīntiǹ-si kaa pílifiǹ-see biyaamu ní. An pu ní inaabu dū i-ba ki yá ki nákáǹ-ti. 5Á taa ti téetí ti-naanjab yìntitam pu, ama ŋyunti nee poonee, á téetí a-pɔŋŋu nì a-yindi pu. 6Tiŋman, sii di sá ti-Dindaan ti-Nimbɔtiu, ní ti làá nīn nyɔ́ŋkí-si, ti-Dindaan. 7An pu ní a dū tifaandi ki ŋá ti-pɔbiliŋin tí ŋmā kí yíiń-si. Ti nín bí kuyuŋu kun poon nee, ti làá nyɔ̄ŋkì-si, di sá yii ti cúú atuŋkpiti ŋin ti-naanjab nìn ŋá ki yīntiǹ-see ki lēē ti-pɔbiliŋin ki wāatì ti-ba. 8Díǹ pu nee, ti bí kuyuŋun, ntimu mun a jìn̄-ti ti yàl̄ ki kɔ́ kɔ́ee poon, ní bi ŋúb́-ti ki sìí ki tòó-ti mbusu. Ti-Dindaan ti-Nimbɔtiu, ti bíi fòol̄ ti-naanjab bin nìn fātì bi-boon ki tīī-see yìntitam tafadaaldi dee.»
ICIIN
Bi súntì Iciin pu
9Isirayeel yab, pīlifìmaan marab bin tìì dimaŋfalee.
Kpòom̄maan ni-tafaliŋ kí pīlifì kí béé kí nīn gàntī tibɔti.
10Isirayeel yab, an dī mana ní ni bí ni-nannanliibi tiŋkin ní?
An dī mana ní ni kā kinicantiŋin ki púĺ ní?
11Ba pu ní ni gbēē anikpil ki kɔ́ tijɔkɔndin ní?
Ba pu ní ni kútì bin còom̄ ki cá ditaŋkpiilinee pu ní?
12Kun yì-tèe di sá yii ni dū iciin nyeel ki fá.
13Ni yaa bàà nóó Unimbɔti saŋŋuee,
ni bàà làá nīn bí ŋgbansɔŋfin ki nīn cá jaanjaan.
14Ní bīfì kí béé laakin ní dinyil
nì mpɔn nì dinimbiŋubitil bée.
Niin ní ni làá béé laakin mmaŋfafɔkɔn nì dimaŋfal bée,
laakin dipɔɔpindi nì ŋgbansɔŋfi bée#3.14 B. 9-14: dūú ŋmàntī nì Ditee 30.15-20, Alaŋ 4.20-22, Siira 32.14, 34.14..
Unil kaa ŋūǹ kí cúú Iciin
(Kpèè Yoob 28.12-17, Alaŋ 1.1-9)
15Ŋma di ká laakin Iciin kóòyee?
Ŋma di kɔ́ laakin i kpáafí i-gaajawantee?
16Atimbun bɔtiibi bí la?
Bin nìn tìì ipeel marabee bí la?
17Bin nì inoon nìn gbíiĺee bí la?
Bin nìn cáá tigaajati an kaa cáá kigbèenlaŋ,
ki nìn kpáafí animbil kúti nì sindaariya
bin pu binib nìn mákée bí la?
18Bin nìn cáá animbil ki mɔ́ɔ̀ tiwan,
ní bi-landɔkɔŋu kā an pu,
ama ní baa ti kāntí bi-tuuŋŋi gbanti tabɔbiliŋee bí la?
19Bi wáŋkì, bi nín sìntī ditaŋkpiilin,
ní biba mun fōō bi-paaŋŋu.
20Bi màl̄ binipɔmbi ní bíǹ kāl̀ kitiŋ pu,
ama baa ká Iciin saŋŋu.
21Baa ŋúń ki ká Iciin saŋyi
ní kaa dū i-bɔti ki páb́ bi-ba.
Mbiyaamu kākatì mu-ba ki wāatì mu-baabi saŋŋu.
22Ubɔ kaa gbìl̄ bi sòon̄ Iciin pu Kanaan tiŋkinaaa,
kaa tí wál̀-i Teeman tiŋkin mun#3.22 Dūú ŋmàntī nì Yeer 49.7..
23Ki kpáaǹ Agaar#3.23 Agaar : kpèè Diny 16.15. naantiibi
bin nìn nyàab̀ Iciin kitiŋ puee,
Maran nì Teeman yab nyampoobi
bin tìiǹ itiin ki nyàab̀ dinyilee
kaa ŋúń ki ká Iciin saŋŋu
ki dāa nín téetí i-sàmbiyaamu pu.
24Isirayeel yab, kpèèmaan ti-Dindaan diiku nín wāā puee!
Duulinya un sá u-yɔuee wāā ní!
25U wāā ní kaa cáá kigbèenlaŋ,
u cáá mpúun ní ubɔ kaa ŋūǹ kí ŋmàntī-u.
26U-pu ní bi màl̄ tijawɔkɔl,
tin nìn nyáń diyindi njamin
ki nìn yáà ki nyí kujaau bɔti tiŋanee#3.26 Dūú ŋmàntī nì Diny 6.1-4, Iciin 14.6..
27Ama an kaa sá bíǹ ní Unimbɔti lēē
kí dū Iciin saŋŋu kí dàkà.
28An puee bi kpíì, di sá yii bi nìn lóò dinyil.
Bi nìn kpíì bi-gbaandi pu.
29Ŋma di ŋúń ki jɔ́m̀ yilpu ki cúuń Iciin
ki yōoǹní-i doooo yilpu ki kpákatìń ní?
30Ŋma di ŋúń ki dūtì dimɔɔl ki ká-i
ki cáań-i ki kpántì sindaariyamɔnti?
31Báà ubɔ kaa nyí Iciin saŋŋu
àá ki dākafì ki túuǹ nsan ŋun di cáǹ i-laŋkee#3.31 B. 29-31: dūú ŋmàntī nì Ditee 30.11-14, Siira 1.2-6, Yoow 3.13, Room 10.6-8..
Unimbɔti baba di cáá Iciin ní ki dū-i ki tīī Isirayeel
32Ama Unimbɔti un nyí tikɔkɔee cáá Iciin,
u dū u-nyil ní ki ká-i#3.32 Dūú ŋmàntī nì Yoob 28.27, Siira 1.8-9..
U bɔ́ntì kitiŋ dibaba pu ní kí nīn cá jaanjaan
ní ki dū tiwaŋkuti tin cáá ataa anaayee ki gbéeǹ-kì.
33Úǹ di tūǹ ŋwalifi ní ŋú búntí.
U yaa yíiń-ŋuee, ŋu tɔ́-u ní ŋu-wunti jìkì.
34Iŋmalbi bí i-paaŋyi pu ní ki ŋmíntí nì dipɔɔpindi#3.34 B. 34-35: dūú ŋmàntī nì Yees 40.26, Ilan 19.2, Yoob 38.7, Siira 43.9-10..
35Unimbɔti yaa yíiń-iee, i kíikí ní yii: «Ti sèé!»
I ŋmíntí nì mmɔn ní ki tìì un di náań-iee.
36Úǹ di sá ti-Nimbɔtiu,
waa cáá juti.
37U ká kisàmbiki kin cáǹ Iciin ceeyee
ní ki dūu dàkā Jaakɔb u-tɔntɔnliu
nì Isirayeel un u néeń tikpilee.
38Míǹ boon ní Iciin dɔ́miń kitiŋ pu
ní ki kāl̀ binib kansikin#3.38 B. 37-38: dūú ŋmàntī nì Siira 24.8,10-12..
Currently Selected:
Baruch 3: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.