Baruch 4
4
1Iciinee, Unimbɔti marab gbɔŋku dee,
an sá marab bin bí kí nīn cá jaanjaanee ní.
Bin ŋúb́ marab gbantee làá nīn bí dimaŋfalin,
ama bin dū-bi ki fée làá kpú#4.1 Dūú ŋmàntī nì 3.9, Ilan 119.98, Siira 24.23, Maat 5.18..
2Jaakɔb naantiibi, fàtīí gítiḿmaan i-cee kí cúú-i!
Nín̄ còom̄ ki dīmaan i-walfiŋu nín ŋmíntí-ni puee.
3Ní taa dū ni-nyooti kí tīī biba,
kí taa dū ni-yimɔɔl kí tīī ditimbuncandi diba.
4Timbi Isirayeel yab, ti bí mmɔnneeee!
Kun puee an pú-ti tí ŋmā kí béé tin fáatiǹ Unimbɔtee!
BI BÍI ŊMĒENTÍ UNIMBƆTI NIBUL
Bin bí kuyuŋunee ń ká kunyannyaau
5M-nibul, ká kunyannyaau,
sii un pu bi gbíntìi téetí Isirayeel puee!
6Bi nìn dū-ni ki nyáfiǹ atimbun,
ama an kaa nìn sá bí nàan̄-ni.
Unimbɔti nìn dū-ni ki líiǹ ni-nannanliibi,
kun puee ni nìn gbítì u-ŋuul.
7Ni nìn ŋá saraabi ki tīī arasiniibi
kaa ŋá ki tīī Unimbɔti,
ki kɔ́ǹ ni-náanliu diŋuul#4.7 Dūú ŋmàntī nì Ditee 32.15-18, Ilan 106.37, 1 Kɔra 10.20..
8Ni nìn súntì talku Nimbɔtiu un di nìn kpíiǹ-nee pu.
Ni nìn kɔ́ǹ ni-na Jeerusaleem un di lōō-nee kunimbaau.
9Jeerusaleem nìn ká Unimbɔti ŋuul nín bíi jēetí ni-puee
ní ki lī yii:
«Pīlifìmaan, Siiyɔn kɔŋkɔnnaatɔb,
Unimbɔti yāntì nnaabukpaan ŋubɔ jéetì m-pu#4.9 B. 9-16: dūú ŋmàntī nì Iyal 1..
10M ká ti-Dindaan Unimbɔti nín yāntì
m-jipɔmbi nì m-bisalib búntì kuyuŋu puee.
11M nìn lōō-bi mmɔnni ní,
ama nì kunimbaau nì nsiim poon ní m yāntì bi búntì.
12M yaa kpántì ukpiipu ní tikpil dū-mi ki fée,
báà ubɔ ń taa fàal̀.
M-biyaamu kpitii pu ní m kíǹ m-baba,
di sá yii bi fātì bi-boon ki tīī Unimbɔti Marau.
13Baa ŋúb́ u-bɔkpaaŋaaa,
kaa nóó u-marabaaa,
kaa tí dī deedee saŋŋu ŋun u dàkā-bee.
14Siiyɔn kɔŋkɔnnaatɔb, dāam̄maan!
Ní téetí ti-Dindaan nín yāntì
m-jipɔmbi nì m-bisalib búntì kuyuŋuee pu!
15U cáań ditimbundi din nyánní ndandatee ki tɔ́ bi-pu,
ditimbundi din cáá inimbinaakulim ki sòoǹ isooncaanee.
Dàa tɔ́ utikpilaaa, kaa sūǹ kibiki mun saai#4.15 Dūú ŋmàntī nì Ditee 28.49-52..
16Bi yōoǹ ukpiipu bineeŋkaamu ki búntì
ní ki yāntì u kíǹ u-baba kaa ti cáá mbinimpubiyaamu.»
Jeerusaleem bíi sɔ̀kɔl̄ u-biyaamu
17M-biyaamu, mana ní m làá ŋmā kí jòoń-ni?
18Un di cáań nnaabu nee ki tɔ́ ni-puee,
úǹ di làá nyāntí-ni ni-nannanliibi ŋaan.
19Nín̄ cámaan, m-biyaamu, nín̄ cámaan!
Di sá yii mamee, bi dū-mi ki fá m kíǹ m-baba ní.
20M cúú dijiŋaabɔkutil ki pēetì
ki dū kpɔsata ki lōoǹ.
M làá nīn kūuntí ki yíì ti-Dindaan ní
m-maŋfal wiiŋyi kɔkɔ poon.
21Kámaan kunyannyaau, m-biyaamu!
Kúuǹ kí yíiḿmaan Unimbɔti!
U làá fīī-ni kí nyāntí bin wɔ́b́-nee ŋaan,
u làá fīī-ni kí nyāntí ni-nannanliibi ŋaan.
22Mamee, ti-Dindaan pu ní m máká yii u làá fīī-ni.
Unimbɔti circirdaan tīī-mi mmɔn:
ti-Dindaan un di sá ni-fiiliuee cee
ní disaasɔl làá nyānní an kaa làá yúntí.
23Di sá yii nì kunimbaau nì nsiim ní m yāntì ni búntì.
Ama nì mmɔn nì dipɔɔpindi
ní Unimbɔti làá fàtīí gíiǹní-ni kí tīī-mi kí nīn cá jaanjaan#4.23 Dūú ŋmàntī nì Yeer 31.12-13..
24Díǹ nee, Siiyɔn kɔŋkɔnnaatɔb
wāĺ ni nín bí kuyuŋunee.
Ama an kaa làá yúntí, bi làá ká difiil
nín làá nyānní ti-Nimbɔtiu cee puee.
Difiil gbantee làá dāan̄ nì ti-Dindaan
nyookpaanti nì u-nyaaŋku ní.
25M-biyaamu, ní fōō Unimbɔti ŋuul
din jéetì ni-puee nì kimɔtii.
Ni-nannanliu yāntì ni jíń falaa,
ama an kaa làá yúntí ni làá ká u-nàantam,
ní ní tāā u-sil kí nákań kitiŋ#4.25 Kpèè Joos 10.24, Ilan 18.39 nì tin bi ŋmàn̄ kugbɔŋu faaku taapuee..
26Bi dū m-biyaamu mun pɔ̀fèe
ki dī isan in cáá ataŋkpeeyee poon.
Bi yōoǹ-mu kii kupicaŋkpuŋu kun binannanliibi fìkēe.
27M-biyaamu, kámaan kunyannyaau,
kí kúuǹ kí yíiń Unimbɔti.
Di sá yii un di cūnnì-ni niinee
làá téetí ni-pu.
28Ni nìn ká nlandɔkɔ
ki fātì ni-boon ki tīī Unimbɔti.
Too kɔŋkɔnnee ní fàtīí gítiń u-cee,
kí pɔ́ɔǹ míǹ saalaa pu kí nyàab̀-u.
29Di sá yii un di cáań nnaabu nee ki tɔ́ ni-puee,
úǹ di làá tí fàtīí fīī-ni.
U làá tīī-ni mmɔn ŋun làá nīn bí ki cá talkuee.
Jeerusaleem ń ká kunyannyaau
30Jeerusaleem, ká kunyannyaau!
Unimbɔti un pú-si diyindee#4.30 Kpèè Yees 45.4.
di làá ŋméeǹ-si.
31Mbusu dɔ̄ ki cí ntimu mun sāaǹ-si
ní ki fàal̄ a-lítitam puee!
32Mbusu dɔ̄ ki cí ntimu mun
di cúú a-biyaamu kuyuŋuee!
Mbusu dɔ̄ ki cí kitiŋ
kin di fōō a-jipɔmbee!
33Kii a nín lítì an mɔ̄ǹ-kì
kì fàal̄ a-nàantam pu puee,
míǹ mbaantiim ní bi yaa láa nāaǹ ki muee,
kì làá dāá nīn bí kunimbaaun.
34M làá dāá yòon̄ ki-nib
bin wīikí ki tìì-kì mmɔnee,
ní ki-lambil ń dāá kpántí kunimbaau.
35Ti-Dindaan làá dāá yàntī
ŋŋmi ń fōō-kì iwiin kupaau,
ní arasiniibi ń dāá kɔ́ ki-pu
kí gíti yúntí#4.35 Dūú ŋmàntī nì Yees 13.21..
36Jeerusaleem,
kpèè ŋwìiń nyalaŋki pú,
a làá ká mmɔn ŋun Unimbɔti cāabìń-see!
37Kpèè, a-jipɔmbi bin a nìn yāntì
bi búntèe di dòońee!
Unimbɔti circirdaan dū u-nyɔɔbundi
ki kóoǹ-bi ŋwìiń nyalaŋki pú
ki cáa sāā ŋwìiń jeetilaŋki pú ki kpáfì.
Bíǹ di dòoń ki fàal̀ Unimbɔti nyooti puee#4.37 Dūú ŋmàntī nì Yees 43.5, 60.4-9..
Currently Selected:
Baruch 4: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.