Exode 3

1Mooyiisi nìn bí ki kpàá u-coo Jeetroo, Madiyan tiŋki tandaaŋwu piii nì u-ŋoobui. Dalbee u yōoǹ tiwaŋkuti ki jítì kuteeu pu ki tin bàn̄ Ooreeb, Unimbɔti jool pu. 2Niin ní ti-Dindaan tuuŋŋu nyántì ŋu-ba ki dàkā-u ŋŋmin kisugbooi poon. Mooyiisi ká aŋmilimbil nyēē kisugbooyee poon, ama ní kíǹ ki-ba kaa bíi wù. 3Ní Mooyiisi bí yii: «M làá sútí kí pìl̄ kí kpèè maamaaci bɔti tin di bíi jītí niin ní ŋŋmi gà kisugbooi poon lìblib ama ní kaa bíi wùee.» 4Ti-Dindaan nín ká yii u sútìń kí kpèèyee ní u yíiń-u kisugbooyee poon yii: «Mooyiisi! Mooyiisi!» Ní Mooyiisi kíí-u yii: «M sèé!» 5Ní Unimbɔti bí-u yii: «Taa sútí kí pìl̄ kisugbooi nee. Tákatí a-naatakaŋ, kun puee laakin a yú nee sá circir paaŋŋu ní. 6Man di sá a-baa Nimbɔtiu, Abraam nì Isaaki nì Jaakɔb Nimbɔtiu.»

Niinee Mooyiisi fātì u-nimbiin, kun puee u nìn fāŋkì kí kpèè Unimbɔti. 7Ní ti-Dindaan bí yii: «M ká m-nibul din bí Eejipitee falaau, ki gbìl̄ Eejipiti yab nín sàantí-bi bi gbáà ibiil iŋyee. Tiŋman m nyí falaa un bi bíi jīǹee. 8An puee m sīntìń kí fōō-bi Eejipiti yab ŋaan, kí nyāntí-bi kitiŋ nee poon kí cáá-bi kí cùnnì kitiŋ kin ŋān̄ ki sá kikpaaŋŋee poon. Kitiŋ gbanti poonee, nnaabiim nì tisiil di còol̀. Niin ní Kanaan yab nì Eeti yab nì Amɔɔr yab nì Peeriisi yab nì Eefi yab nì Jeebusi yab kóò. 9Isirayeel yab biilii bāań-mi, ní man m-ba ká Eejipiti yab nín bí ki sàantí-bi puee. 10Kɔŋkɔnnee m làá tɔ̄-si Faaroo cee á cù Eejipiti kí nyāntí man nibul Isirayeel yab.»

Unimbɔti nyántì u-yindi ki dàkā Mooyiisi

11Ní Mooyiisi bí Unimbɔti yii: «Man di sá ŋma ní kí cù Faaroo cee kí nyāntí Isirayeel yab Eejipiti tiŋkin?» 12Ní Unimbɔti bí yii: «M làá nīn bí a-cee. Kun làá nīn sá-si kudaaŋŋu á béé yii man di tú-see di sá a yaa láa nyántì Isirayeel yab Eejipiti tiŋkinee, dijool nee pu ní ni làá dāá jāam̀ man Unimbɔti.» 13Ní Mooyiisi bí Unimbɔti yii: «Too, m làá cù Isirayeel yab cee kí tùkù-bi yii: <Ni-naanjab Nimbɔtiu di túnní-mi ni-cee.> Bi làá bàlifì-mi yii: <Bi yíì-u yii ba? M làá kíí-bi yii ba?>»

14Ní Unimbɔti kíí Mooyiisi yii: «M SÁ UN SÉE NÍ». Á tùkù Isirayeel yab yii: «M SÁ di túnní-mi ni-cee.» 15Unimbɔti gíti bí Mooyiisi yii: «TI-DINDAAN ni-naanjab Nimbɔtiu, Abraam Nimbɔtiu nì Isaaki Nimbɔtiu nì Jaakɔb Nimbɔtiu di túnní-mi ni-cee. Man yindi dee kí nīn cáa cá jaanjaan. Diyindi gbanti ní iyunti kamaa nib làá nīn yíì-mi. 16Kɔŋkɔnnee, cù kí kpāfì Isirayeel kpilib, kí tùkù-bi yii ni-Dindaan ni-naanjab Nimbɔtiu, Abraam Nimbɔtiu nì Isaaki Nimbɔtiu nì Jaakɔb Nimbɔtiu nyántì u-ba ki dàkā-si ní ki tùkū-si yii: <M ká Eejipiti yab nín bí ki sàantí-ni puee, kɔŋkɔnnee m làá fīī-ni. 17M làá nyāntí-ni kitiŋ kin poon bi bí ki sàantí-ni nee kí cáá-ni kí cùnnì kitiŋ kin poon Kanaan yab nì Eeti yab nì Amɔɔr yab nì Peeriisi yab nì Eefi yab nì Jeebusi yab kóòyee. Kitiŋ gbanti poon ní nnaabiim nì tisiil còol̀.>

18«Isirayeel yab làá gbìl̄ kí tīiǹ-si. Niinee si nì bikpilib ń cùú ká Eejipiti yab bɔtiu ní kí tùkù-u yii: <Ti-Dindaan Eebru yab Nimbɔtiu, ti-Nimbɔtiu lēē u-ba ki dàkā-ti. Míǹ puee pɔ̄-ti nsan tí dū iwiin ita kí còom̀ kí cù kuteeun kí ŋá saraabi kí tīī-u.> 19Ama m nyí Eejipiti yab bɔtiu nín kaa làá kíí ní cùee, asee m yaa dàkā-u mpɔn. 20An puee m làá tàntī m-ŋal ki dū maamaacib nín bí tɔbin u-ba u-ba puee kí ŋá bi-kansikin niin, ní án fáá Eejipiti tiŋki. Míǹ boonee ní ú yàntī ní nyā kí nīn cá. 21M làá yàntī gba ni-nibul ń ká diyimɔɔl Eejipiti yab cee, ní ni yaa làá dāá nyēe, ní taa láa nyā nì iŋaŋkulim. 22Unimpu kamaa làá dāá bàlifì ueejipitinimpu u nì un kóò ki pìl̄ee nì un kóò u-dumpuee animbil kúti nì sindaariya wanti nì abɔkuti, kí dūú ŋá ni-jipɔmbi nì ni-bisalib wunti pu. Ni nín làá ŋá pu kí fūkul̀ Eejipiti yabee dee.»

Currently Selected:

Exode 3: BASSARDC

Highlight

Copy

Compare