Exode 2

Mooyiisi màaltam nì u-biyati bɔti

1Uninja ubɔ nìn sá Leefii naakookun ní ki fātìi cáá unimpu Leefii naakookun. 2Unimpuee nìn cáá dipool ní ki màl̄ kibininjabiki. U nìn ká yii kibikee ŋān̄ tikpil ní u dū-kì ki bál̀ áli iŋmal ita#2.2 Kpèè Atuun 7.20, Eebru 11.23.. 3Ŋyunti ŋun waa nìn gíti ŋūǹ kí yàntī kí nīn gbíntìi kā dibalinee ní u nyàab̄ kikabiki kin bi dū papiirusi#2.3 papiirusi bí kii tikatee ní bi cáa ŋáań tigban ki ŋmà an pu. ki lùn̄ee, ki dū aŋɔ ki póoń, ki dū kibiki ki tākaǹ poon ní ki cáa nēeǹ dikal taapu dimɔɔgbandi. 4Kibikee niisal nìn cūtìi yúní ndan fiii kí kpèè tin làá jītí ki-puee.

5Míǹ boonee Faaroo bisal cūtì dimɔɔlin kí fàl̀. Ŋyunti gbantee, binimpoobi bin céeǹ-uee bíi kpàkaǹ dimɔɔl, ní úǹ ká kikabikee nēē dikal taapu, ní u tú u-yumbusapɔɔŋwu ú cùú yòon̄ní. 6U cúu púkutèe kibininjabiki di kā poon ki sūǹee. An nìn kɔ́-u falaa ní u bí yii: «Eebru yab biki dee.» 7Ní kibikee niisal bālifì Faaroo bisal yii: «Ḿ cù Eebru nimpoobi cee kí nyàabìń-si umatimpɔɔn ú lòò-si kibiki gbantaaa?» 8Ní Faaroo bisal kíí-u yii: «Iiin.»

Ní kisapɔmbikee cūtìi nyàabìń kibikee ki-ba na. 9Ní Faaroo bisal bí unimpuee yii: «Yòon̄ kibiki nee kí lòò-kì kí tīī-mi, m làá dāá pà-si ditundi gbanti pu.» Ní unimpuee yōoǹ kibikee ki lōō.

10Kibikee dāa wíiǹee ní unimpuee cáań-kì ki tīī Faaroo bisal. Úǹ nìn fōō-kì ki dūu ŋá u-ba biki ní ki pú-kì diyindi yii Mooyiisi. Di sá u bí yii: «Nnyimin ní m nyántìń-kì.»

Mooyiisi sáǹ ki búntì Madiyan yab tiŋkin

11Mooyiisi wíiǹee, dalbee ní u cūtì kí màntì u-nabiyaamu Eebru yab pu. U bàn̄ee ki lafun ká atuun ŋin bi tūǹee nín pɔ̄ɔ̄ ki cáá agìń miŋyee. U nìn ká ueejipitija bíi gbáà u-nabiki ueebruja ubɔ. 12U nín fātìi kpēē ajan kɔkɔ pu kaa ká báà ubɔee, ní u fáá ki kūū ueejipitijee ní ki kūtì dibul ki dū-u ki síb́. 13Kutaa wúntì u tí gítì bi-ceeyee ki ká Eebru yab ŋmaniŋma bili bíi jáà. Ní u bí un bɔti kaa ŋān̄ee yii: «Ba pu ní a gbáà a-juti míǹ?» 14Ní úǹ fātìi kíí-u yii: «Ŋma di kāaǹ-si á nīn sòoǹ ti-bɔti ní? Àá a là kí kpɔ̀ ma mun kii a nín fu kūū ueejipitija puee ní?» 15Mooyiisi nín béè yii an bɔtee gbītì an kɔkɔee ní u fāŋkì. Faaroo gbìl̄ tin jítèe ní ki bíi nyàab̀ kí kpɔ̀ Mooyiisi. Ní Mooyiisi sáǹ ki cūtìi kóòń Madiyan yab tiŋkin, ki kā ki kɔ́ĺ lɔkɔ ubɔ#2.15 B. 11-15. kpèè Atuun 7.23-29, Eebru 11.24-27..

16Madiyan tiŋki tandaaŋwu nìn cáá bisapɔmbi biluli. Bi nìn dɔ́miń kí lúń nnyim kí sìtī laakin tiwaŋkuti nyùee kí nyùntī bi-baa piii nì u-ŋoobui. 17Ama ní bipikpaaliibi dɔ́miń ki jìn̄-bi. Ní Mooyiisi yíkì ki mɔ́tì bi-pu ní ki lúń nnyim ki tīī bi-waŋkuti nyùn̄. 18Bi fātìi bàn̄ mmɔŋki bi-baa Reewuyeel ceeyee ní úǹ bālifì-bi yii: «Ba ŋá ní ni fātìń mmɔŋki díǹ malaa míǹ?» 19Ní bi kíí-u yii: «Ueejipitija ubɔ di fīī-ti bipikpaaliibi ŋaan ní ki lúń nnyim ki nyūntì ti-waŋkuti.» 20Ní bi-baa bālifì-bi yii: «Uninja gbanti bí la? Ba ŋá ní naa cáań-u? Cùú yíiḿmaan-u ú dāan̄ kí jī tijin.»

21Ní Mooyiisi lēē yii u làá nīn kíǹ ki kóò uninja gbanti cee. Ní uninjee dū u-bisal Seefoora ki pú Mooyiisi cáá. 22Unimpuee màl̄-u kibininjabiki, ní u pú-kì diyindi yii Geersɔm, an taapu di sá yii <Unicaan niin>, di sá u bí yii u sáǹ ki kpántì unicaan kinicantiŋ poon.

Unimbɔti lēē Mooyiisi ú fīī Isirayeel yab

23An yúntì boonee ní Eejipiti bɔtiu dāa kpíì. Isirayeel yab nìn bí ki fátí diniindi bi-yuŋku poon ki gbáà ibiil, ní bi-kuŋkuuntii bàn̄ áli Unimbɔti cee. 24Unimbɔti nìn gbìl̄ bi-yaliŋkii pu ní ki téetì u nín nìn pūtì ki pōoǹ Abraam nì Isaaki nì Jaakɔb puee#2.24 Kpèè Diny 15.13-14.. 25Unimbɔti nìn kpēē Isirayeel yab falaau ní ki súń bi-saai.

Currently Selected:

Exode 2: BASSARDC

Highlight

Copy

Compare